រោងចក្រចំនួន២០០ អាចផ្អាកផលិតកម្មនៅខែមីនានេះ ដោយសារតែកង្វះខាតវត្ថុធាតុដើមនាំចូលពីប្រទេសចិន។ នេះបើយោងទៅតាមអ្នកនាំពាក្យក្រសួងការងារ។
ថ្លែងនៅទីស្តីការគណៈរដ្ឋមន្រ្តីក្នុងក្រុងភ្នំពេញកាលពីសប្តាហ៍កន្លងទៅ អ្នកនាំពាក្យក្រសួងការងារ លោក ហេង សួរ បាននិយាយថា រោងចក្រចំនួន១០ បានផ្អាកដំណើរការរួចទៅហើយ ហើយការផ្អាកនេះបានប៉ះពាល់កម្មករចំនួន ៣០០០នាក់ ដោយសារតែការបង្អាក់ខ្សែសង្វាក់ផ្គត់ផ្គង់វត្ថុធាតុដើមបង្កឡើងដោយវិបត្តិវីរុសកូរ៉ូណានៅប្រទេសចិន។
លោក ហេង សួរ បានមានប្រសាសន៍ថា៖ «នៅក្នុងខែមីនា មើលឃើញថា រោងចក្រជិត២០០ ប្រឈមនឹងព្យួរ ដោយសាកង្វះវត្ថុធាតុដើម ហើយប៉ះពាល់កម្មករ ១៦០០០០នាក់»។
កាលពីសប្តាហ៍កន្លងទៅ លោកនាយករដ្ឋមន្រ្តី ហ៊ុន សែន បានបញ្ជាឲ្យរោងចក្របង់ប្រាក់ ៤០ភាគរយនៃប្រាក់ឈ្នួលអប្បបរមាសម្រាប់រយៈពេលប្រាំមួយខែទៅឲ្យកម្មករក្នុងករណីបាត់បង់ការងារ ហើយរដ្ឋាភិបាលជួយផ្តល់ប្រាក់បន្ថែម ២០ភាគរយទៀត។
លោក ហេង សួរ បានលើកឡើងថា ក្រសួងការងារកំពុងធ្វើការជាមួយនឹងរោចក្រ ដើម្បីឲ្យរោងចក្របង់ប្រាក់ដល់កម្មករ។
អ្នកនាំពាក្យក្រសួងការងាររូបនេះ បានបន្ថែមថា បញ្ហាបណ្តាលមកពីការថយចុះផលិតកម្មនៅប្រទេសចិនបានបង្កការប៉ះពាល់ជុំវិញពិភពលោក។
លោក អាត់ ធន់ ប្រធានសហភាពការងារកម្ពុជា បាននិយាយថា សេចក្តីប្រកាសរបស់ក្រសួងការងារជារឿងគួរឲ្យព្រួយបារម្ភមួយ ហើយលោកបានលើកឡើងថា ការព្យួរប្រព័ន្ធអនុគ្រោះពន្ធពីសំណាក់សហភាពអឺរ៉ុបទៅលើមុខទំនិញផ្សេងៗចំនួន ២០ ភាគរយ ដោយសារតែការរំលោភបំពានសិទ្ធិការងារ និងសិទ្ធិមនុស្ស ក៏ជាកត្តាដើរតួរួមចំណែកមួយផងដែរ។
លោក អាត់ ធន់ បានមានប្រសាសន៍ថា៖ «ខ្ញុំគិតថាបញ្ហានេះបង្កឡើងទាំងពីរ គឺកូវីដ១៩ និងEBA»។
លោក ប៉ាវ ស៊ីណា ប្រធានសហភាពចលនាកម្មករកម្ពុជា ក៏បានយល់ស្របថា ការព្យួរប្រព័ន្ធអនុគ្រោះពន្ធសម្រាប់កម្ពុជា «គ្រប់មុខទំនិញលើកលែងសព្វាវុធ» ហៅកាត់ថា EBA ដែលនឹងចូលជាធរមាននៅខែសីហា ក៏ជាកត្តារួមចំណែកមួយផងដែរ។ លោកក៏បានជំរុញឲ្យរដ្ឋាភិបាលស្វែងរកប្រភពវត្ថុធាតុដើមពីប្រទេសចិន ឬពីប្រទេសផ្សេងទៀត ដើម្បីផ្គត់ផ្គង់រោងចក្រនានានៅក្នុងប្រទេសកម្ពុជា។
លោក ប៉ាវ ស៊ីណា បាននិយាយថា៖ «ខ្ញុំសង្ឃឹមថា រដ្ឋាភិបាល នឹងជួយសម្របសម្រួល ជាមួយភាគីរដ្ឋាភិបាលចិន ដើម្បីដឹកជញ្ជូនវត្ថុធាតុដើមឲ្យបានលឿន។ រដ្ឋាភិបាលគួរស្វែងរកវត្ថុធាតុដើមមកពីប្រទេសដទៃ ក្រៅពីប្រទេសចិន ដើម្បីផ្តល់ដល់រោងចក្រ»៕
