ក្រសួងកាបរទេសកម្ពុជាបានឲ្យដឹងកាលពីថ្ងៃព្រហស្បតិ៍ថា កម្ពុជាបានឆ្លើយតបទៅនឹងរបាយការណ៍បឋមរបស់សហភាពអឺរ៉ុបស្តីពីការព្យួរប្រព័ន្ធអនុគ្រោះពន្ធ ដោយធ្វើការពន្យល់ “យ៉ាងលម្អិត” អំពីអ្វីដែលកម្ពុជាបានធ្វើ ដើម្បីធ្វើឲ្យប្រសើរឡើងនូវឱកាសចូលរួមផ្នែកនយោបាយ សិទ្ធិដីធ្លី សេរីភាពក្នុងការបញ្ចេញមតិនិងសេរីភាពក្នុងការជួបជុំ។
សហភាពអឺរ៉ុប (EU) ពិចារណាព្យួរប្រព័ន្ធអនុគ្រោះពន្ធ “អ្វីៗគ្រប់យ៉ាងលើកលែងអាវុធ” ហៅកាត់ថា EBA ដោយសារតែមានការបារម្ភពីបញ្ហាសិទ្ធិមនុស្សនិងនយោបាយ រួមទាំងការរំលាយគណបក្សប្រឆាំងនៅប្រទេសនេះកាលពីឆ្នាំ២០១៧ ហើយ EU គ្រោងនឹងធ្វើការសម្រេចចិត្តចុងក្រោយនៅខែកុម្ភ:។
គណៈកម្មការអឺរ៉ុបទុកពេលឲ្យរដ្ឋាភិបាលកម្ពុជាមួយខែ ដើម្បីឆ្លើយតប បន្ទាប់ពីបានដាក់ជូនរបាយការណ៍របស់ខ្លួនកាលពីខែមុន។ គណៈកម្មការនេះទាមទារឲ្យមាន ការកែលម្អ “ពិតប្រាកដនិងអាចជឿទុកចិត្តបាន” លើបញ្ហាសិទ្ធិមនុស្សនិងនយោបាយ ប្រសិនបើកម្ពុជាចង់រក្សាភាពអនុគ្រោះពន្ធនេះ។
កាលពីថ្ងៃព្រហស្បតិ៍ ក្រសួងបានឲ្យដឹងថា ខ្លួនបានឆ្លើយតបទៅគណៈកម្មការនេះរួចហើយ។ ក្រសួងកាបរទេសបានឲ្យដឹងតាមរយៈសេចក្តីថ្លែងការណ៍នេះថា «សេចក្តីឆ្លើយតបចុងក្រោយនេះ គឺជារបាយការណ៍គ្រប់ជ្រុងជ្រោងអំពីសកម្មភាពនិងវិធានការណ៍នានា ដែលរាជរដ្ឋាភិបាលបានអនុវត្ត ឆ្លើយតបទៅនឹងបញ្ហាទាំងឡាយដែលជាការព្រួយបារម្ភរបស់គណៈកម្មការអឺរ៉ុប ជាអាទិ៍រួមមានការគោរពសិទ្ធិក្នុងការចូលរួមនយោបាយ សិទ្ធិដីធ្លី សេរីភាពបញ្ចេញមតិនិងសេរីភាពបង្កើតសមាគមជាដើម»។
ក្រសួងក៏បានទទូចឲ្យសហភាពអឺរ៉ុបពិចារណាពីផលប៉ះពាល់ដែលអាចមានលើកម្មការិនី ដែលនឹងកើតមានដោយសារការដកប្រព័ន្ធអនុគ្រោះ EBA ។
ក្រសួងបានឲ្យដឹងទៀតថា «ក្នុងចន្លោះពេលដែលគណៈកម្មការអឺរ៉ុបចេញសេចក្តីសម្រេចចុងក្រោយរបស់ខ្លួននៅខែកុម្ភៈ ឆ្នាំ២០២០ខាងមុខនេះ រាជរដ្ឋាភិបាលសង្ឃឹមថា គណៈកម្មការអឺរ៉ុបនឹងពិចារណាលើកិច្ចខិតខំប្រឹងប្រែងប្រកបដោយសុឆន្ទៈរបស់រាជរដ្ឋាភិបាលក្នុងការអនុវត្តរាល់អនុសញ្ញាអន្តរជាតិទាំងអស់ ក្រោមលក្ខខណ្ឌអនុគ្រោះពន្ធ “គ្រប់មុខទំនិញលើកលែងសព្វាវុធ-EBA” ដែលអាចផ្តល់ផលប៉ះពាល់សង្គមដល់កម្មការិនីប្រមាណជិតមួយលាននាក់ និងផលប៉ះពាល់ដោយប្រយោលដល់ក្រុមគ្រួសារសាច់ញាតិដែលរស់នៅពឹងផ្អែកលើប្រាក់ឈ្នួលរបស់ពួកគេ រួមទាំងការ គោរពនូវគោលការណ៍អធិបតេយ្យភាពនិងការមិនជ្រៀតជ្រែកចូលកិច្ចការផ្ទៃក្នុងកម្ពុជា»។
សហភាពអឺរ៉ុបបានបញ្ជាក់ថា សំណុំរឿងដែលកំពុងបន្តចោទប្រកាន់លើលោក កឹម សុខា ប្រធានគណបក្សសង្គ្រោះជាតិ (CNRP) ក៏ជាកង្វល់មួយក្នុងចំណោមកង្វល់ចម្បងរបស់ខ្លួនផងដែរ។
សវនាការសំណុំរឿងរបស់លោក កឹម សុខា នឹងចាប់ផ្តើមនៅថ្ងៃទី១៥ ខែមករា នេះបើតាមការជូនដំណឹងរបស់សាលាដំបូងរាជធានីភ្នំពេញក្នុងសប្តាហ៍នេះ។
លោក ម៉ាយ ផុមផេអូ (Mike Pompeo) រដ្ឋមន្ត្រីកាបរទេសអាមេរិកបានថ្លែងក្នុងសន្និសីទកាសែតកាលពីថ្ងៃពុធអំពីទណ្ឌកម្មអន្តរជាតិថា ក្រុងវ៉ាស៊ីនតោននឹងតាមឃ្លាំមើលសវនាការរបស់លោក កឹម សុខា។
លោក ផុមផេអូ បានអះអាងថា «យើងមិនគ្រាន់តែនិយាយអំពីពួកគេទេ។ យើងចាត់វិធានការគាំទ្រពួកគេ យើងការពារពួកគេនៅជុំវិញពិភពលោក ពីព្រោះវាគឺជាកាតព្វកិច្ចរបស់យើងក្នុងការធ្វើបែបនេះ។ ជាក់ស្តែង យើងកំពុងតាមឃ្លាំមើលសវនាការជម្រះក្តីលើលោក កឹម សុខា មេដឹកនាំបក្សប្រឆាំងនៅកម្ពុជា»។
ប្រទេសកម្ពុជាគឺជាអ្នកទទួលផលប្រយោជន៍ធំបំផុតទី២តាមរយៈប្រព័ន្ធអនុគ្រោះពន្ធ EBA ដែលស្មើនឹង១៨ភាគរយនៃការនាំចូលក្រោមប្រព័ន្ធអនុគ្រោះពន្ធ EBA ទៅកាន់តំបន់អឺរ៉ុបកាលពីឆ្នាំមុន នេះបើតាមការលើកឡើងរបស់សហភាពអឺរ៉ុប។
កម្ពុជាបាននាំចេញទៅកាន់សហភាពអឺរ៉ុបមានទំហំទឹកប្រាក់សរុបប្រហែល ៥,៨ពាន់លានដុល្លារកាលពីឆ្នាំ២០១៨ ដែល៩៥ភាគរយនៃទំហំទឹកប្រាក់នេះបានមកពីការនាំ ចូលដោយរួចពន្ធក្រោមលក្ខខណ្ឌនៃប្រព័ន្ធអនុគ្រោះ នេះបើតាមការលើកឡើងរបស់សហភាពអឺរ៉ុប។ សហភាពអឺរ៉ុបបានបន្ថែមថា វិស័យសម្លៀកបំពាក់និងវាយភណ្ឌគឺស្មើប្រហែលបីភាគបួននៃការនាំចូលទៅកាន់សហភាពអឺរ៉ុប៕
