ស្ថានទូតជប៉ុនប្រចាំកម្ពុជាបានទទួលស្គាល់បុគ្គលបីរូបជា «បុគ្គលឆ្នើម» នៅក្នុងការលើកកម្ពស់ទំនាក់ទំនងយោគយល់គ្នាតាមរយៈកម្មវិធីផ្លាស់ប្តូរកម្មសិក្សាតាមសាកលវិទ្យាល័យរវាងកម្ពុជា និងជប៉ុន។
លោកស្រី អ៊ុំ រ៉ាវី សាកលវិទ្យាធិការរងនៃសាកលវិទ្យាល័យភូមិន្ទភ្នំពេញ លោក ឯក ប៊ុនថា អគ្គនាយករងផ្នែកកេរដំណែលវប្បធម៌អរូបិយនៃក្រសួងវប្បធម៌ និងវិចិត្រសិល្បៈ និងលោក Takakazu Yamada សាស្រ្តាចារ្យទស្សនកិច្ចនៅសាកលវិទ្យាល័យភូមិន្ទវិចិត្រសិល្បៈ បានទទួលលិខិតសរសើរនៅក្នុងពិធីមួយក្នុងក្រុងភ្នំពេញ កាលពីថ្ងៃពុធ។
ឯកអគ្គរាជទូតជប៉ុនលោក Masahiro Mikami បានមានប្រសាសន៍ថា លោកស្រីរ៉ាវីបានជួយជ្រោមជ្រែងនិស្សិតជប៉ុនក្នុងការរៀនអក្សរសិល្ប៍ខ្មែរនៅកម្ពុជា ហើយអ្នកស្រីក៏ជានាយកមជ្ឈមណ្ឌលសហប្រតិបត្តិការកម្ពុជា-ជប៉ុន (CJCC) ផងដែរ។
លោក Mikami បានមានប្រសាសន៍ថា៖ «លោកស្រីរ៉ាវីបានខិតខំប្រឹងប្រែងជំរុញទំនាក់ទំនងតាមរយៈកម្មវិធីផ្លាស់ប្តូរកម្មសិក្សាជាមួយនឹងសាកលវិទ្យាល័យនានានៅប្រទេសជប៉ុន»។
លោក Mikami បានបន្តថា ស្របពេលដូចគ្នានេះដែរ លោក ប៊ុនថា បានសិក្សានៅសាកលវិទ្យាល័យ Sophia ក្នុងទីក្រុងតូក្យូ និងបានបង្កើតសមាគមអតីតនិស្សិតខ្មែរពីប្រទេសជប៉ុនផងដែរ។
លោកឯកអគ្គរាជទូតបានថ្លែងថា៖ «លោកប៊ុនថាបានចូលរួមចំណែកលើការជំរុញកម្មវិធីផ្លាស់ប្តូរវប្បធម៌រវាងប្រទេសទាំងពីរ ដូចជា សហស្រាវជ្រាវជាដើម»។
លោក Mikami បានលើកឡើងថា ជាចុងក្រោយ លោក Yamada គឺជា ជាងគំនូរជនជាតិជប៉ុនម្នាក់ដែលបានគូររូបភាពទេសភាពកម្ពុជាចាប់តាំងពីឆ្នាំ១៩៩៤ ដោយប្រើទឹកថ្នាំពិសេសម្យ៉ាងដែលមិនមែនជាប្រេង ឬទឹកពណ៌។
លោក Mikami បានមានប្រសាសន៍ថា រូបគំនូរប្រាសាទអង្គរវត្តនៅក្នុងស្ថានទូតជប៉ុនប្រចាំកម្ពុជាគឺជាស្នាដៃរបស់លោក Yamada។
លោក Mikami បានមានប្រសាសន៍ថា៖ «ចាប់តាំងពីឆ្នាំ២០០៨ លោក Yamada បានចូលរួមក្នុងវិស័យអប់រំផ្នែកវិចិត្រសិល្បៈនៅកម្ពុជា ក្នុងឋានៈជាសាស្រ្តាចារ្យទស្សនកិច្ចនៅសាកលវិទ្យាល័យភូមិន្ទវិចិត្រសិល្បៈ និងជានាយកសាលាសិល្បៈ Yamada ផងដែរ»។
លោកឯកអគ្គរាជទូត Mikami បានពន្យល់ថា ការចូលរួមចំណែកក្នុងវិស័យអប់រំ និងវប្បធម៌អាចមានការលំបាកក្នុងការវាស់ស្ទង់ នឹងការរួមចំណែកក្នុងវិស័យផ្សេងទៀតដូចជា វិស័យសេដ្ឋកិច្ច ប៉ុន្តែនៅរយៈពេលវែង គឺជាការសំខាន់ក្នុងការដឹកនាំប្រជាជនឲ្យសហការគ្នា។
លោក Mikami បានបន្ថែមថា៖ «វិស័យអប់រំ និងវប្បធម៌អាចផ្សារភ្ជាប់ទំនាក់ទំនងរវាងមនុស្ស និងមនុស្សឲ្យកាន់តែជិតដិតជាងវិស័យដទៃទៀត។ ហើយបុគ្គលទាំងបីរូបនេះបានផ្សាភ្ជាប់ និងរឹតបន្តឹងកិច្ចសហប្រតិបតិ្តការរវាងប្រជាជនជប៉ុន និងកម្ពុជា»។
មុនពេលពិធីប្រគល់លិខិតសរសើរ ក្រសួងការបរទេសជប៉ុនបានប្រកាសបញ្ជីឈ្មោះបុគ្គលឆ្នើមកាលពីថ្ងៃទី១៦ ខែកក្កដា។
សេចក្តីប្រកាសព័ត៌មានរបស់ក្រសួងការបរទេសជប៉ុនបានសរសេរថា លោកស្រីរ៉ាវីបានចូលរួមចំណែកក្នុងទំនាក់ទំនងយោគយល់ពីគ្នាតាមរយៈកម្មវិធីផ្លាស់ប្តូរកម្មសិក្សា។ លោកប៊ុនថាបានលើកកម្ពស់ទំនាក់ទំនងយោគយល់ពីគ្នាតាមរយៈកម្មវិធីផ្លាស់ប្តូរវប្បធម៌ ហើយលោក Yamada បានជួយបំផុសគំនិតសិល្បករខ្មែរតាមរយៈការអប់រំផ្នែកសិល្បៈ។
នៅក្នុងពិធីប្រគល់លិខិតសរសើរ លោកស្រីរ៉ាវីបានថ្លែងអំណរគុណរដ្ឋាភិបាលជប៉ុនចំពោះការផ្តល់ជំនួយជាបន្តបន្ទាប់ ដែលរួមមាន គ្រឿងសម្ភារៈ ជំនួយបច្ចេកទេស និងថវិកា ដើម្បីអភិវឌ្ឍសេដ្ឋកិច្ច និងធនធានមនុស្សនៅកម្ពុជា។ លោកស្រីបានមានប្រសាសន៍ថា តាមរយៈអាហារូបករណ៍របស់រដ្ឋាភិបាលជប៉ុន លោកស្រីអាចសម្រេចការសិក្សាថ្នាក់ឧត្តមសិក្សានៅឆ្នាំ ១៩៩៥។
លោកស្រីរ៉ាវី បានទទួលសញ្ញាប័ត្រថ្នាក់បណ្ឌិតនៅប្រទេជប៉ុនក្នុងឆ្នាំ ២០០២ មុនពេលត្រឡប់មកបំពេញការងារនៅសាកលវិទ្យាល័យភូមិន្ទភ្នំពេញ។
លោក ង៉ូវ ប៉េងហ៊ុយ ប្រធានក្រុមអតីតនិស្សិតខ្មែរពីប្រទេសជប៉ុន បានមានប្រសាសន៍ថា លោកមានសេចក្តីសោមនស្សពេលឃើញមានការទទួលស្គាល់បុគ្គលទាំងបីរូបខាងលើ។
លោក ប៉េងហ៊ុយ បានបន្ថែមថា និស្សិតខ្មែរប្រមាណ ១០០០នាក់ បានបញ្ចប់ការសិក្សានៅជប៉ុនរហូតមកទល់ពេលនេះ។
លោកបានបន្តថា ពលរដ្ឋខ្មែរបីរូបផ្សេងទៀតធ្លាប់បានទទួលលិខិតសរសើរជាបុគ្គលឆ្នើមពីសំណាក់ក្រសួងការបរទេសជប៉ុនកាលពីពេលមុន ដែលរួមមាន លោក ជេត ជាលី សាកលវិទ្យាធិការសាកលវិទ្យាល័យភូមិន្ទភ្នំពេញ និងលោក ហោ ប៉េង សាកលវិទ្យាធិការសាកលវិទ្យាល័យជាតិគ្រប់គ្រង៕
