នាសប្តាហ៍នេះ រដ្ឋាភិបាលបានលើកឡើងសារជាថ្មីថា សហភាពអឺរ៉ុបកំពុងតែជ្រៀតជ្រៀកកិច្ចការផ្ទៃក្នុងរបស់កម្ពុជា បន្ទាប់ពីសហភាពអឺរ៉ុបបានប្រកាសដកប្រព័ន្ធអនុគ្រោះពន្ធមួយផ្នែកពីកម្ពុជាជុំវិញបញ្ហានយោបាយ និងសិទ្ធិមនុស្ស។
នៅក្នុងសេចក្តីថ្លែងការណ៍មួយចុះកាលពីថ្ងៃពុធ ក្រសួងការបរទេសកម្ពុជាបានរិះគន់សេចក្តីសម្រេចរបស់សហភាពអឺរ៉ុបថា ត្រូវបានជំរុញពីក្រោយដោយហេតុផលនយោបាយ ដោយការពារថា ការរំលាយគណបក្សប្រឆាំងចម្បងនៅក្នុងប្រទេសគឺ ស្របទៅតាមនីតិវិធីតុលាការ។
សេចក្តីថ្លែងការណ៍ខាងលើនេះបានសរសេរថា៖ «រដ្ឋាភិបាលនៅតែរក្សាជំហរមុតមាំ ដោយច្រានចោលរាល់ការប៉ុនប៉ងពីបរទេស ដែលប្រើជំនួយផ្នែកពាណិជ្ជកម្ម និងអភិវឌ្ឍន៍ ជាហេតុផលនៅពីក្រោយការលូកដៃចូលរឿងផ្ទៃក្នុងរបស់កម្ពុជា»។
បន្ទាប់ពីសិក្សាវាយតម្លៃអស់រយៈពេលមួយឆ្នាំមក សហភាពអឺរ៉ុបកាលពីថ្ងៃពុធ បាននិយាយថា ខ្លួននឹងដាក់បញ្ចូលឡើងវិញនូវពន្ធដារតាមអត្រាបទដ្ឋានមកលើផលិតផលសម្លៀកបំពាក់ និងស្បែកជើងមួយចំនួន រួមទាំងគ្រប់ទំនិញប្រើប្រាស់ពេលធ្វើដំណើរ និងស្ករស ដែលផលិតផលទាំងនេះមានទំហំពាណិជ្ជកម្មសរុបប្រមាណ ១,១ ពាន់លានដុល្លារ។ សេចក្តីថ្លែងការណ៍របស់សហភាពអឺរ៉ុបក៏បានសរសេរផងដែរថា សហភាពអឺរ៉ុបបានរកឃើញនូវការរំលោភបំពានធ្ងន់ធ្ងរ និងជាប្រព័ន្ធទៅលើសិទ្ធិមនុស្សនៅកម្ពុជា ដោយការណ៍នេះបានធ្វើឲ្យខ្លួន «មិនមានជម្រើសអ្វី» ក្រៅពីដកប្រព័ន្ធអនុគ្រោះពន្ធ EBA ផ្នែកខ្លះនោះទេ។
គណបក្សប្រឆាំងចម្បងនៅកម្ពុជាគឺ គណបក្សសង្គ្រោះជាតិ ត្រូវបានរំលាយក្រោមបញ្ជារបស់តុលាការកំពូលតាមសំណើររបស់រដ្ឋាភិបាលកាលពីខែវិច្ឆិកា ឆ្នាំ២០១៧ ប្រាំបីខែមុនការបោះឆ្នោតជាតិ។ ហើយគណបក្សប្រជាជនកម្ពុជា ដែលជាគណបក្សកាន់អំណាច បានដណ្តើមយកកៅអីទាំង ១២៥ នៅក្នុងសភាក្នុងការបោះឆ្នោតជាតិនោះ។
សហភាពអឺរ៉ុបគឺជា ទីផ្សារនាំចេញធំជាងគេបង្អស់របស់កម្ពុជានៅឆ្នាំ ២០១៨ ដោយមួយផ្នែកធំសម្រាប់ផលិតផលសម្លៀកបំពាក់ និងស្បែកជើង។
លោក អាត់ ធន់ ប្រធានសហភាពការងារកម្ពុជា បាននិយាយថា លោករំពឹង ក្រុមហ៊ុននាំចេញពីកម្ពុជានឹងត្រូវបង់ប្រាក់ប្រមាណ ១០០លានដុល្លារ ដើម្បីបង្រ្គប់លើពន្ធបន្ថែម។
លោក ប៉ាវ ស៊ីណា ប្រធានសហភាពចលនាកម្មករកម្ពុជា បាននិយាយថា លោកសង្ឃឹមថា ការចរចារផ្សេងៗនឹងបន្តធ្វើឡើងក្នុងរយៈពេលប្រាំមួយខែទៅមុខទៀត មុនពេលសេចក្តីសម្រេចរបស់សហភាពអឺរ៉ុបចូលជាធរមាន។
លោក ប៉ាវ ស៊ីណា បានមានប្រសាសន៍ថា៖ «យើងមិនចង់ឲ្យកម្មករក្លាយជាចំណាត់ខ្មាំងនយោយបាយនោះទេ»
នៅក្នុងសេចក្តីថ្លែងការណ៍មួយ ក្រុមហ៊ុនផលិតសម្លៀកបំពាក់ម៉ាក H&M បាននិយាយថា ខ្លួនគាំទ្រគោលបំណងរបស់សហភាពអឺរ៉ុបក្នុងការដោះស្រាយការរំលោភបំពានសិទ្ធិនៅកម្ពុជា។
សេចក្តីថ្លែងការណ៍របស់ក្រុមហ៊ុន H&M បានសរសេរថា៖ «យើងទាំងអស់គ្នា រួមជាមួយអ្នកកាន់ភាគហ៊ុនក្នុងស្រុក និងអន្តរជាតិ ក៏ដូចជា ម៉ាកសម្លៀកបំពាក់ដទៃទៀត នឹងបន្តចូលរួមអភិវឌ្ឍវិស័យវាយនភណ្ឌប្រកបដោយចីរភាពមួយ។ ឥឡូវនេះ យើងនឹងបន្តវាយតម្លៃទៅលើទំហំនៃផលប៉ះពាល់ដោយសារសេចក្តីសម្រេចរបស់សហភាពអឺរ៉ុបមកលើយុទ្ធសាស្រ្តអាជីវកម្ម និងផលិតកម្មរបស់យើងនៅកម្ពុជា»៕
