កាលពីថ្ងៃពុធ ក្រុមសហជីពការងារបានអំពាវនាវទៅរដ្ឋាភិបាលឲ្យពង្រឹងបទដ្ឋានសាងសង់ឲ្យបានតឹងរ៉ឹងជាងនេះ ដើម្បីទប់ស្កាត់សោកនាដកម្មនាពេលអនាគត ដូចជាករណីបាក់រលំអគារនៅខេត្តកែបដែលបណ្តាលឲ្យមនុស្ស ៣៦នាក់ស្លាប់កន្លងមកនេះ។
សហព័ន្ធសហជីពកម្មករសំណង់និងព្រៃឈើកម្ពុជានិង មជ្ឈមណ្ឌលសម្ព័ន្ធភាពការងារ (សង់ត្រាល់) បានរៀបចំសន្និសីទកាសែតមួយក្នុងក្រុងភ្នំពេញ ដើម្បីធ្វើការអំ ពាវនាង ដោយពួកគាត់លើកឡើងថា ពលកម្មកុមារនៅតាមការដ្ឋានសំណង់ត្រូវតែបញ្ចប់ ហើយក្រុមហ៊ុនសាងសង់ត្រូវទទួលខុសត្រូវចំពោះគុណភាពសំណង់របស់ខ្លួន។
កុមារ ៦នាក់ស្ថិតក្នុងចំណោមមនុស្ស៣៦នាក់ដែលបានស្លាប់នៅក្នុងហេតុការណ៍ បាក់រលំអគារកម្ពស់៧ជាន់នៅខេត្តកែបកាលពីថ្ងៃសុក្រ។
លោក សុខ គីន ប្រធានសហព័ន្ធសហជីពកម្មករសំណង់និងព្រៃឈើកម្ពុជាបាននិយាយថា ក្រសួងការងារនិងក្រសួងរៀបចំដែនដីនិងសំណង់ត្រូវតែពង្រឹងការត្រួត ពិនិត្យការសាងសង់។
លោកបាននិយាយថា ក្រសួងរៀបចំដែនដីនិងសំណង់ចាំបាច់ត្រូវពង្រឹងការចេញលិខិតអនុញ្ញាតសាងសង់និងការត្រួតពិនិត្យការដ្ឋានសាងសង់របស់ខ្លួន ដើម្បីពិនិត្យមើលគុណភាពនិងបទដ្ឋានសាងសង់ ដើម្បីលុបបំបាត់ហានីភ័យនាពេលអនាគត ។
លោក សុខ គីន បាននិយាយថា ក្នុងពេលជាមួយគ្នានេះដែរ ក្រសួងការងារត្រូវតែធានាសុវត្ថិភាពរបស់កម្មករ។
លោក សុខ គីន បាននិយាយថា៖ «ក្រុមអធិការកិច្ចមកពីក្រសួងការងារត្រូវចុះទៅការដ្ឋានសំណង់ [ និងពិនិត្យ ] ថា តើកម្មករមានសម្ភារៈការពារសុវត្ថិភាពដែរទេ? ថាតើការងារ អនុវត្តតាមច្បាប់ការងារដែរឬទេ ហើយ [គ្មាន] ពលកម្មកុមារនិងពិនិត្យមើលជីវភាពរស់នៅ ថាតើកម្មករទាំងអស់នោះមានកន្លែងស្នាក់នៅ បង្គន់អនាម័យនិងមិនរស់នៅក្នុងការដ្ឋានសំណង់»។
ការបាក់រលំអគារនៅខេត្តកែបកើតមាន បន្ទាប់ពីមានករណីបាក់រលំអគារដូចគ្នានៅខេត្តព្រះសីហនុកាលពីខែមិថុនាដែលបានបណ្តាលឲ្យមនុស្ស២៨ស្លាប់និង២៦ នាក់ទៀតរងរបួស។ កាលពីខែមុន សាលាឆាន់ដែលកំពុងដំណើរការសាងសង់នៅវត្តមួយនៅខេត្តសៀមរាបបានបាក់រលំនិងបណ្តាលឲ្យមនុស្សបីនាក់ស្លាប់ផងដែរ។
លោក ឃុន ថារ៉ូ ជាមន្ត្រីសម្របសម្រួលគម្រោងនៅអង្គការ សង់ត្រាល់ បាននិយាយថា ការទទួលខុសត្រូវគឺជារឿងសំខាន់ក្នុងការទប់ស្កាត់សោកនាដកម្មនាពេលអនាគត។
លោក ឃុន ថារ៉ូ បាននិយាយថា៖ «ប្រសិនបើអាជ្ញាធរពាក់ព័ន្ធបណ្តោយឲ្យមានការធ្វេសប្រហែសដែលបណ្តាលឲ្យមានមនុស្សស្លាប់ ហើយពួកគេមិនប្រឈមនឹងការដាក់ទោសទណ្ឌទេ រឿងនេះនឹងកើតឡើងម្តងទៀត»។
ម្ចាស់អគារនៅខេត្តកែបឈ្មោះ ឯក សារុន អាយុ ៦៥ឆ្នាំនិងប្រពន្ធឈ្មោះ ឈីវ សុធី អាយុ ៦១ឆ្នាំត្រូវបានឃាត់ខ្លួន បន្ទាប់ពីការបាក់រំលំនេះ និងត្រូវបានចោទប្រកាន់ពីបទមនុស្សឃាតដោយអចេតនានិងបង្ករបួសស្នាមដោយអចេតនា ប៉ុន្តែបានដោះ លែងឲ្យនៅក្រៅឃុំបណ្តោះអាសន្នកាលពីថ្ងៃចន្ទ។
លោក ហេង សួរ អ្នកនាំពាក្យក្រសួងការងារមិនអាចទាក់ទង ដើម្បីសុំការអត្ថាធិប្បាយបានទេ។
លោក ស៊ូ ឆ្លូញ អនុប្រធានសហព័ន្ធសហជីពកម្មករសំណង់និងព្រៃឈើកម្ពុជាបានថ្លែងនៅក្នុងសន្និសីទកាសែតកាលពីថ្ងៃពុធថា ក្រុមហ៊ុនសាងសង់ដែលល្មើសនឹងច្បាប់អនុញ្ញាត គឺមានការពាក់ព័ន្ធនឹងការបាក់រលំអគារនាពេលថ្មីៗនេះ។
នៅក្រុងព្រះសីហនុ ក្រសួងរៀបចំដែនដីបានលើកឡើងថា អគារកម្ពស់៧ជាន់ដែលបាក់រលំនេះគ្មានច្បាប់អនុញ្ញាតពីអាជ្ញាធរ។ ចំណែកនៅខេត្តកែបវិញ ក្រសួងអះអាងថា អាជ្ញាធរអនុញ្ញាតឲ្យសាងសង់ត្រឹមកម្ពស់៥ជាន់ប៉ុណ្ណោះ ប៉ុន្តែអគារនេះត្រូវបានគេសាងសង់ដល់៧ជាន់។
លោក ឆ្លូញ បាននិយាយថា៖ «យើងមិនចង់ឃើញឧប្បត្តិហេតុកើតមានចំពោះកម្មករសំណង់ទៀតទេ»៕
