ធ្វើបច្ចុប្បន្នភាព៖ អតីតកីឡាករជើងខ្លាំង និងជាគ្រូបង្វឹកដ៏ឆ្នើមលោក អេ ភូថង រួមទាំងភរិយាអ្នកស្រី សាំង សុម៉ាលី និងកីឡាការិនី អេ យ៉ានុត ដែលជាកូនស្រី ត្រូវបានសហព័ន្ធកីឡាប្រដាល់គុនខ្មែរ ដាក់វិន័យ(ពិន័យ) មិនឱ្យចូលរួមក្នុងព្រឹត្តិការណ៍ប្រកួតកីឡាប្រដាល់គុនខ្មែររយៈពេល៦ខែដូចគ្នា ដោយចាប់គិតពីថ្ងៃទី២២ ខែកក្កដា ឆ្នាំ២០២៤តទៅ។ ប៉ុន្តែ លោក ខូវ ឆាយ បានបង្ហើបថា ការដាក់ពិន័យនេះ អាចនៅមានច្រកសម្របសម្រួល និងបន្ធូរបន្ថយកម្រិតទោសបានខ្លះ ដែលអាស្រ័យលើក្រុមគ្រួសារលោក អេ ភូថង ផ្ទាល់។
ការដាក់វិន័យរបស់សហព័ន្ធកីឡាប្រដាល់គុនខ្មែរទៅលើលោកគ្រូ អេ ភូថង ព្រមទាំងអ្នកស្រី សាំង សុម៉ាលី និងកីឡាការិនី អេ យ៉ានុត ដែលជាកូនស្រីនេះ គឺត្រូវបានធ្វើឡើង កាលពីរសៀលថ្ងៃចន្ទ គឺបន្ទាប់ពីក្រុមគ្រួសារលោក អេ ភូថង បានប្រតិកម្មដោយកំហឹងទៅលើអាជ្ញាកណ្តាល ជ្រា សុភាព ដែលបានបញ្ឈប់កីឡាករ ម៉ឺន មេឃា ក្នុងពេលឡើងប្រកួតការពារខ្សែក្រវាត់ពីការដណ្តើមរបស់កីឡាករ ចាន់ ប៊ុនហឿន នៅលើសង្វៀនប្រដាល់ PNN កាលពីថ្ងៃអាទិត្យ។
នៅក្នុងការដាក់ពិន័យនេះ សហព័ន្ធកីឡាប្រដាល់គុនខ្មែរ បានចេញសេចក្តីសម្រេចចំនួន៣ផ្សេងគ្នា ប៉ុន្តែមានអត្ថន័យរួមតែមួយ គ្រាន់តែបញ្ជាក់ពីតួនាទីខុសគ្នា គឺលោកគ្រូ អេ ភូថង ត្រូវបានពិន័យមិនឱ្យចូលរួមក្នុងព្រឹត្តិការណ៍កីឡាប្រដាល់គុនខ្មែរ រយៈពេល៦ខែ ក្នុងនាមជាគ្រូបង្វឹក ចំណែកអ្នកស្រី សាំង សុម៉ាលី ត្រូវបានពិន័យក្នុងនាមគាត់ជាមន្រ្តីបច្ចេកទេសរបស់ហព័ន្ធកីឡាប្រដាល់គុនខ្មែរ និង អេ យ៉ានុត ក្នុងនាមជាកីឡាការិនីប្រដាល់គុនខ្មែរ។
យោងតាមសេចក្តីសម្រេចនៃការដាក់ពិន័យរបស់សហព័ន្ធកីឡាប្រដាល់គុនខ្មែរនេះ បានបញ្ជាក់ថា៖ «ដាក់វិន័យលោក អេ ភូថង ដែលជាគ្រូបង្វឹកកីឡាប្រដាល់គុនខ្មែរ មិនអនុញ្ញាតឱ្យចូលរួមព្រឹត្តិការណ៍ប្រកួតកីឡាប្រដាល់គុនខ្មែរ ដែលរៀបចំដោយសហព័ន្ធកីឡាប្រដាល់គុនខ្មែររយៈពេល៦ខែ»។
ចំពោះការដាក់ពិន័យទៅលោកគ្រូ អេ ភូថង រួមទាំងអ្នកស្រី សាំង សុម៉ាលី និងកីឡាការិនី អេ យ៉ានុត នេះ គឺយោងទៅតាមលក្ខន្តិកៈ បទបញ្ជាគ្រប់គ្រងការប្រកួតរបស់សហព័ន្ធកីឡាប្រដាល់គុនខ្មែរ និងយោងទៅតាមស្មារតីអង្គប្រជុំរបស់អនុគណៈកម្មការបច្ចេកទេសរបស់សហព័ន្ធកីឡាប្រដាល់គុនខ្មែរ កាលពីថ្ងៃទីចន្ទ ទី២២ ខែកក្កដា ឆ្នាំ២០២៤។
ប៉ុន្តែសហព័ន្ធកីឡាប្រដាល់គុនខ្មែរ ដែលមានលោក ខូវ ឆាយ ជាប្រធាន មិនបានបញ្ជាក់ពីមូលហេតុជាក់លាក់ ដែលឈានដល់ការដាក់ពិន័យទៅលើក្រុមគ្រួសាររបស់លោក អេ ភូថង នេះទេ គឺ លោក ឆាយ គ្រាន់តែបង្គាប់ឱ្យគណៈកម្មាធិការប្រតិបត្តិរបស់សហព័ន្ធ រួមទាំងអគ្គលេខាធិការ អនុគណៈកម្មការបច្ចេកទេស និងសាមីខ្លួន (លោក អេ ភូថង អ្នកស្រី សាំង សុម៉ាលី និងកីឡាការិនី អេ យ៉ានុត) ត្រូវអនុវត្តសេចក្តីសម្រេចនេះឱ្យមានប្រសិទ្ធភាពខ្ពស់ ចាប់ពីការចុះហត្ថលេខានេះតទៅ។
យ៉ាងណាក៏ដោយ នៅក្នុងបទសម្ភាសតាមទូរសព្ទជាមួយខេមបូចា កាលពីព្រឹកថ្ងៃអង្គារនេះ លោក ខូវ ឆាយ បានប្រាប់បន្ថែមថា ដោយសារលោក អេ ភូថង អ្នកស្រី សាំង សុម៉ាលី និង អេ យ៉ានុត បានបង្កបញ្ហានៅក្នុងកម្មវិធីរបស់ស្ថានីយទូរទស្សន៍ PNN ដោយពួកគាត់មិនព្រមទទួលយកលទ្ធផលការសម្រេចដោយគណៈកម្មការបច្ចេកទេស។
ប្រធានសហព័ន្ធកីឡាប្រដាល់គុនខ្មែររូបនេះ បានបន្ថែមថា៖ «គាត់បានតវ៉ានៅពេលនោះ បង្កឱ្យមានភាពអនាធិបតេយ្យក្នុងកម្មវិធី ធ្វើឱ្យប៉ះពាល់សណ្តាប់ធ្នាប់ និងប៉ះពាល់ដល់កម្មវិធីរបស់គេទាំងមូល រហូតដល់គេបិទការឡាយ ហើយបន្តមកទៀតគាត់បានសម្ភាស ដោយបានជេរប្រទេចទៅដល់មន្រ្តីសហព័ន្ធ ក៏ដូចជាអាជ្ញាកណ្តាល ហើយទាំងអស់នេះ ជារូបភាពមិនល្អ ដែលធ្វើឱ្យប៉ះពាល់ដល់ស្ថាប័នរបស់សហព័ន្ធ ដែលជាអ្នករៀបចំកម្មវិធីប្រកួត»។
ចំពោះស្ថានភាពជាក់ស្តែងនៃការប្រកួតដណ្តើមខ្សែក្រវាត់ នៅសង្វៀនប្រដាល់PNN កាលពីថ្ងៃអាទិត្យនោះ កីឡាករ ម៉ឺន មេឃា បានដាក់ខ្សែក្រវាត់ប្រភេទទម្ងន់ ៦៣,៥គីឡូក្រាមរបស់ខ្លួនឱ្យអ្នកប្រដាល់ ចាន់ ប៊ុនហឿន ឡើងវ៉ៃដណ្តើម ហើយតាមរយៈការប្រកួតនោះ ម៉ឺន មេឃា បានម៉ាត់ និងទាត់ឱ្យ ប៊ុនហឿន មានរបួសជើងក្រោម ហើយត្រូវបានអាជ្ញាកណ្តាលលោក ជ្រា សុភាព រាប់ចំនួន២លើក នៅក្នុងទឹកទី២ និងសឹងតែបោះបង់ការប្រកួត ក្រោមការវាយសង្រ្គប់របស់ ម៉ឺន មេឃា នៅចុងទឹកទី២នេះទៅហើយ។
ប៉ុន្តែស្ថានភាពត្រដាបត្រដួសរបស់ ចាន់ ប៊ុនហឿន បានប្រែប្រួល នៅពេលរូបគេអាចគ្រប់គ្រងស្ថានភាពប្រកួតបានល្អវិញ នៅក្នុងទឹកទី៣ ហើយនៅដើមទឹកទី៤ ប៊ុនហឿន បានទាត់ឆ្វេងចូលថ្គាម ម៉ឺន មេឃា ពេញទំហឹង បណ្តាលឱ្យ មេឃា ដួលទាំងជំហរ ហើយត្រូវបានលោកអាជ្ញាកណ្តាលរាប់ភ្លាមៗ។
នៅក្នុងអំឡុងលោកអាជ្ញាកណ្តាល ជ្រា សុភាព កំពុងរាប់នោះ ម៉ឺន មេឃា ដែលកំពុងបានខំប្រឹងស្រវេស្រវាក្រោកឡើងទាំងស្ថានភាពវង្វេងវង្វាន់។ មេឃា បានងក់ក្បាល ដើម្បីបញ្ជាក់ថា រូបគេអាចបន្តប្រកួតទៀតបាន នៅពេលលោកអាជ្ញាកណ្តាលរាប់ដល់៨ ប៉ុន្តែរូបគេមិនបានបោះជំហានដើរមកមុខ តាមការបញ្ជារបស់អាជ្ញាកណ្តាលនោះទេ ហើយសកម្មភាពនេះ នាំឱ្យលោក ជ្រា សុភាព បានសម្រេចបញ្ឈប់តែម្តង ព្រោះយល់ថា ម៉ឺន មេឃា នៅបាត់បង់ស្មារតីនៅឡើយ មិនអាចឱ្យប្រកួតបានទៀតទេ។
តែទោះបីជាយ៉ាងណា ភ្លាមៗបន្ទាប់ពីការបញ្ឈប់នោះ ម៉ឺន មេឃា និង អេ អាំម៉ារីន ដែលជាប្អូនប្រុស និងជាអ្នកឱ្យទឹក បានស្រែកតវ៉ាទាំងច្រឡោតទៅកាន់លោកអាជ្ញាកណ្តាល ចំណែកអ្នកស្រី សាំង សុម៉ាលី ដែលជាម្តាយ រួមទាំងលោក អេ ភូថង ជាឪពុក និងអ្នកគាំទ្រ ម៉ឺន មេឃា មួយចំនួនទៀត ក៏បានស្រែកតវ៉ាដោយកំហឹងចំពោះការកាត់សេចក្តីនេះ ដែលបង្កឱ្យមានភាពចលាចលពេញសង្វៀនប្រដាល់តែម្តង ដោយអូសបន្លាយពេលជាងកន្លះម៉ោង។
យ៉ាងណាក៏ដោយ ក្រោយការប្រជុំពិភាក្សាម្តងហើយម្តងទៀតរបស់គណៈកម្មការបច្ចេកទេសគឺ គណៈកម្មការវិនិច្ឆ័យរបស់សហព័ន្ធកីឡាប្រដាល់គុនខ្មែរ នៅតែសម្រេចរក្សាលទ្ធផលដើម ដោយប្រកាសឱ្យកីឡាករ ចាន់ ប៊ុនហឿន ជាអ្នកឈ្នះ ដើម្បីក្លាយជាម្ចាស់ខ្សែក្រវាត់ អមដោយប្រាក់រង្វាន់ចំនួន១២លានរៀល។
ជាមួយគ្នានេះ គណៈកម្មការបច្ចេកទេសរបស់សហព័ន្ធកីឡាប្រដាល់គុនខ្មែរ ក៏បានស្នើសុំទៅកាន់ភាគីកីឡាករ ម៉ឺន មេឃា ឱ្យសរសេរលិខិតប្តឹងតវ៉ាជាផ្លូវការចំពោះការមិនឯកភាពលើការកាត់សេចក្តីនេះផងដែរ ប៉ុន្តែទាំងលោក អេ ភូថង និងភរិយា មិនប្តឹងនោះទេ ព្រោះអ្នកទាំង២យល់ថា ប្តឹងក៏អត់ប្រយោជន៍ ព្រោះមិនអាចកែប្រែអ្វីបាន។
លោក អេ ភូថង បានប្រាប់ប្រព័ន្ធផ្សព្វផ្សាយក្រោយការប្រកួត កាលពីថ្ងៃអាទិត្យនោះថា៖ «ខ្ញុំមានការអន់ចិត្តណាស់ (ចំពោះការកាត់សេចក្តីនេះ) ប៉ុន្តែសួរថា បើដាក់ពាក្យប្តឹងខ្ញុំបានអ្វីមកវិញ។ ប្តឹងលុះត្រាតែមានអ្នករកភាពយុត្តិធម៌ឱ្យខ្ញុំ ប៉ុន្តែខ្ញុំដូចជាមិនជឿ»។
ចំណែកអ្នកស្រី សាំង សុម៉ាលី ដែលជាភរិយា ក៏បានប្រកាន់ជំហរមិនប្តឹងតវ៉ា ព្រោះវាអត់ប្រយោជន៍ ដោយអះអាងថា អ្នកស្រី និងស្វាមីធ្លាប់បានប្តឹងតវ៉ាជុំវិញភាពមិនប្រក្រតីក្នុងការប្រកួតបែបនេះច្រើនលើកដែរហើយ ប៉ុន្តែចុងក្រោយមិនមានការដោះស្រាយតាមតម្លាភាពអ្វីទេ ផ្ទុយទៅវិញត្រូវបានគេគាបសង្កត់ ស្តីបន្ទោស និងអស់លុយដាក់ពាក្យប្តឹងចំនួន១លានរៀលទៀត។
យ៉ាងណាក៏ដោយ ចំពោះការស្រែកតវ៉ាលើករណីប្រកួតរបស់កីឡាករ ម៉ឺន មេឃា និង ចាន់ ប៊ុនហឿន នេះអ្នកស្រី សាំង សុម៉ាលី បានបញ្ជាក់ថា អ្នកស្រី និងក្រុមគ្រួសារ ត្រូវតែធ្វើបែបនេះ ព្រោះជារឿងមិនអាចទទួលយកបាន។ អ្នកស្រីនិយាយថា៖ «ខ្ញុំជាប្រជារាស្រ្តខ្មែរធម្មតា អ៊ីចឹងខ្ញុំត្រូវតែតវ៉ាហើយ ហើយបើសិនគាត់ (ថ្នាក់ដឹកនាំសហព័ន្ធ)មិនពេញចិត្តពួកខ្ញុំ បញ្ឈប់ក្លិបគុនខ្មែររបស់ខ្ញុំទាំងអស់ទៅ!»។
យ៉ាងណាក៏ដោយ នៅថ្ងៃចន្ទបន្ទាប់អ្នកស្រី សាំង សុម៉ាលី និងកីឡាការិនី អេ យ៉ានុត ដែលជាកូនស្រី បានបង្ហោះសារសូមទោសជាសាធារណៈ ជុំវិញការប្រើពាក្យរិះគន់ដោយកំហឹងរបស់ខ្លួនទៅលើលោកអាជ្ញាកណ្តាល ជ្រា សុភាព។
អ្នកស្រី សាំង សុម៉ាលី បានសរសេរបែបនេះថា៖ «រឿងអ្វីៗដែលកើតឡើងម្សិលមិញ នាងខ្ញុំសូមទោសបងប្អូនជនរួមជាតិទាំងអស់ផង ដែលខ្ញុំ និងក្រុមគ្រួសារបានប្រើពាក្យខ្លះមិនល្អដោយកំហឹង ហើយរឿងម្សិលមិញខ្ញុំ និងក្រុមគ្រួសារចិត្តត្រជាក់នឹងលែងខឹងអស់ហើយ ខ្ញុំសូមចប់ត្រឹមហ្នឹង»។
ចំណែក អេ យ៉ានុត ដែលបានបង្ហោះសារជេរប្រមាថដល់ម្តាយរបស់លោកអាជ្ញាកណ្តាល ជ្រា សុភាព នោះបានបង្ហោះសារសូមទោសវិញបែបនេះថា៖ «ខ្ញុំអន់ចិត្តចំពោះលោកអាជ្ញាកណ្តាល ហើយដោយសារតែពិបាកទប់អារម្មណ៍ទើបខ្ញុំប្រើពាក្យមិនសមរម្យទៅលោកគ្រូអាជ្ញាកណ្ដាល។ ខ្ញុំសុំទោសលោកគ្រូ ហើយក៏សុំទោសហ្វេនៗដែលខ្ញុំប្រើពាក្យមិនបានល្អ តែខ្ញុំពិតជាអន់ចិត្តខ្លាំង ចំពោះការកាត់សេចក្តីរបស់លោកអាជ្ញាកណ្តាល»។
ជាមួយការបង្ហោះសារសុំទោស ដែលបានធ្វើឡើង នៅព្រឹកថ្ងៃចន្ទម្សិលមិញ បានធ្វើឱ្យស្ថានភាពនៃការប៉ះទង្គិចដោយពាក្យសំដី ជុំវិញការប្រកួតរវាង ម៉ឺន មេឃា និងចាន់ ប៊ុនហឿន បានវិលមករកភាពល្អវិញ ដោយអ្នកគាំទ្រភាគច្រើនយល់ថា បញ្ហាទាំងនេះ បានបញ្ចប់ត្រឹមការ«សូមទោស»។
ប៉ុន្តែនៅល្ងាចថ្ងៃចន្ទ ទី២២ ខែកក្កដា ដដែលនោះ ស្រាប់តែឃើញសហព័ន្ធកីឡាប្រដាល់គុនខ្មែរ ចេញសេចក្តីសម្រេចដាក់ពិន័យទៅដល់លោក អេ ភូថង អ្នកស្រី សាំង សុម៉ាលី និងកីឡាការិនី អេ យ៉ានុត។ អ្នកគាំទ្រមួយចំនួនធំ បានគាំទ្រចំពោះចំណាត់ការនេះ ប៉ុន្តែអ្នកគាំទ្រមួយចំនួនទៀត បានបញ្ចេញមតិទិដៀលថា ការសម្រេចពិន័យនេះ ដូចជាលឿនពេក ដែលមិនបានឆ្លងកាត់នីតិវិធី ឬធ្វើការព្រមានជាមុន ទើបឈានដល់ការដាក់ពិន័យនោះទេ។
ចំពោះបញ្ហានេះ លោក ខូវ ឆាយ បានពន្យល់ថា៖ «តាមពិតយើងមានការបញ្ជូន(រឿងនេះ) តាំងពីព្រឹកដល់ល្ងាច ទើបមានកំណត់ហេតុត្រឹមត្រូវ គឺអនុគណៈកម្មការបច្ចេកទេស បានកោះប្រជុំតាំងពីព្រឹកម៉ោង៨ ព្រោះរឿងនេះយើងត្រូវធ្វើបន្ទាន់ ដោយសារជារឿងក្តៅដែរ»។
លោកបានឱ្យដឹងទៀតថា ខាងអនុគណៈកម្មការបច្ចេកទេស និងក្រុមការងារបច្ចេកទេសរបស់សហព័ន្ធកីឡាប្រដាល់កម្ពុជាប្រចាំនៅស្ថានីយទូរទស្សន៍ PNN បានកោះប្រជុំគ្នា រហូតដល់ធ្វើកំណត់ហេតុ ហើយនៅថ្ងៃចន្ទ ពេលត្រង់ ទើបមានការប្រជុំជាមួយអនុគណៈកម្មការវិន័យទៀត ដើម្បីកំណត់ថា ត្រូវពិន័យយ៉ាងម៉េចចំពោះទង្វើរបស់ក្រុមគ្រួសារលោក អេ ភូថង។
លោកបញ្ជាក់ថា៖ «ចុងក្រោយអនុគណៈកម្មការវិន័យ សម្រេចថា ត្រូវតែពិន័យពួកគាត់ មិនឱ្យចូលរួមកម្មវិធីប្រកួតប្រដាល់រយៈពេល៦ខែ។ ពួកគាត់ទាំង២ (អេ ភូថង និងភរិយា) មិនមែនជាកីឡាករទេ គ្រាន់តែជាគ្រូ អ៊ីចឹងមិនឱ្យចូលរួម មានន័យថា មិនឱ្យគាត់ទៅឱ្យទឹក ដើម្បីកុំឱ្យគាត់បង្កបញ្ហាទៀត»។
ចំណែក លោក អេ ភូថង បានបដិសេធមិនផ្តល់បទសម្ភាសន៍ ជុំវិញការដាក់ពិន័យរបស់សហព័ន្ធកីឡាប្រដាល់គុនខ្មែរនេះទេ ដោយលោកបានប្រាប់តាមទូរសព្ទ កាលពីយប់ម៉ោង៨ ថ្ងៃចន្ទថា៖ «សូមទោសផងបង ខ្ញុំអត់សម្ភាសទេ ព្រោះពេលនេះខ្ញុំកំពុងខូចចិត្ត។ និយាយអត់ចេញទេ! ខ្ញុំពិបាកនិយាយណាស់ ព្រោះពេលនេះអារម្មណ៍របស់ខ្ញុំកំពុងក្តុកក្តួល»។
ជាមួយគ្នានេះ លោក ខូវ ឆាយ បានអះអាងថា ការចេញសេចក្តីសម្រេចដាក់ពិន័យដល់លោកក្រុមគ្រួសារលោក អេ ភូថង គឺលោកធ្វើទៅតាមការសម្រេចរបស់គណៈកម្មការវិន័យ និងយោងទៅតាមរបាយការណ៍អង្គប្រជុំរបស់អនុគណៈកម្មការបច្ចេកទេសរបស់សហព័ន្ធ ហើយលោកទទួលស្គាល់ថា ការសម្រេចដាក់ពិន័យរយៈពេល៦ខែទៅលើលោក អេ ភូថង និងភរិយា រួមទាំងកូនស្រី រាងធ្ងន់បន្តិចមែន។
លោកបញ្ជាក់ថា៖ «ជាគោលការណ៍យើងឃើញថា ការដាក់វិន័យហ្នឹង បើថាធ្ងន់ វារាងធ្ងន់បន្តិចដែរ ប៉ុន្តែពេលខ្លះករណី និងរូបភាពបែបនេះវាធ្វើឱ្យប៉ះពាល់ដល់ការអភិវឌ្ឍគុនខ្មែរ ព្រោះនៅពេល (ពួកគាត់) បដិសេធទៅនឹងការសម្រេចលទ្ធផលរបស់គណៈកម្មការ ហើយបង្កឱ្យមានរូបភាពបែបនេះ វាមិនល្អទេ អ៊ីចឹងបើសិនជាមិនមានការពិន័យ វាច្បាស់ជាមានករណីបែបហ្នឹងកើតមានជាបន្តទៀត វាអាចរាំងស្ទះដល់ការអភិវឌ្ឍវិស័យកីឡាគុនខ្មែរទាំងមូល»។
យ៉ាងណាក៏ដោយ ចំពោះអ្នកគាំទ្រដល់ក្រុមគ្រួសាររបស់លោកគ្រូ អេ ភូថង នៅតែសម្តែងការមិនសូវពេញចិត្តទៅលើចំណាត់ការរបស់សហព័ន្ធកីឡាប្រដាល់គុនខ្មែរ ព្រោះពួកគេបានលើកឡើងថា ប្តីប្រពន្ធ អេ ភូថង បានពុះពារ និងលះបង់ច្រើនណាស់ ក្នុងការរួមចំណែកអភិវឌ្ឍវិស័យកីឡាប្រដាល់គុនខ្មែរ តាំងពីលោកនៅជាកីឡាករ ហើយពេលនេះ កូនប្រុស-ស្រីទាំង៤នាក់របស់គាត់ ក៏បានចូលរួមចំណែកក្នុងនាមជាកីឡាករ កីឡាការិនីប្រដាល់គុនខ្មែរទាំងអស់ ចុះហេតុអ្វីទើបមានការដាក់ពិន័យភ្លាមៗ ដោយមិនមានការប្រមានជាមុនបែបនេះ។
សិល្បៈការិនីអ្នកនាង លី ចិន្តាលីស បានបង្ហាញទស្សនៈរបស់ខ្លួនទៅលើបញ្ហានេះ ដោយនាងបានបង្ហោះសារបែបនេះ កាលពីយប់ថ្ងៃទី២២ ខែកក្កដា ថា ៖ «ខ្ញុំជាមនុស្សធម្មតាម្នាក់ នៅតែគាំទ្ររាល់ទង្វើ និងការផ្សព្វផ្សាយបណ្តុះបណ្តាល ថ្នាលគុនខ្មែរជាច្រើនរបស់លោកគ្រូ អេ ភូថង សម្រាប់ប្រទេសកម្ពុជាមួយនេះ ខ្ញុំមានមោទនភាព ដែលមានលោកគ្រូជាធនធានដ៏សំខាន់របស់កម្ពុជា»។
លី ចិន្តាលីស បានបន្ថែមថា លោកគ្រូ អេ និងភរិយា មានប្រវត្តិតស៊ូខ្លាំងណាស់ក្នុងវិស័យប្រដាល់គុនខ្មែរ រហូតបណ្តុះបណ្តាលជំនាញតរហូតដល់កូនៗ និងក្មេងៗជាច្រើន។ «នាងខ្ញុំធ្លាប់ធ្វើកិច្ចសម្ភាសជាមួយពួកគាត់កាលគ្រាលំបាក គាត់នៅតែមិនបោះបង់តស៊ូរហូតបច្ចុប្បន្ន កំហុសអចេតនាខ្លះបើមានគួរកោះហៅ ទៅនិយាយ មិនមែនបញ្ឈប់រហូត៦ខែបែបនេះទេ ពិសេស ភរិយាលោកគ្រូក៏បានចេញសារសុំទោសជាសាធារណៈ រួចទៅហើយ»។
ចំពោះហេតុផលនេះ លោក ខូវ ឆាយ បានទទួលស្គាល់ថា ត្រកូល «អេ» ពិតជាបានរួមចំណែកជួយដល់វិស័យកីឡាគុនខ្មែរច្រើនមែន ប៉ុន្តែមិនអាចមើលរំលងច្បាប់បាននោះទេ។ លោកបញ្ជាក់ថា៖ «យើងទទួលស្គាល់ថា គ្រួសារលោកគ្រូ អេ ភូថង មានគុណសម្បត្តិច្រើន ប៉ុន្តែការអនុវត្តច្បាប់ ត្រូវតែធ្វើឱ្យបានខ្ចប់ខ្ជួន ព្រោះគុនខ្មែរអភិវឌ្ឍទៅមុខ មិនអាចគ្មានការអនុវត្តច្បាប់បានទេ»។
យ៉ាងណាក៏ដោយលោក ខូវ ឆាយ ដែលទើបបានជ្រើសតាំងឱ្យធ្វើជាប្រធានសហព័ន្ធកីឡាប្រដាល់គុនខ្មែរ ជំនួសប្រធានចាស់ គឺលោក តែម ម៉ឺន កាលពីថ្ងៃទី២៩ ខែមីនា ឆ្នាំ២០២៤នោះ បានអះអាងថា ការពិន័យរយៈពេល៦ខែទៅលើក្រុមគ្រួសារលោក អេ ភូថង នេះ អាចនឹងមានការបន្ធូរបន្ថយវិញ ដែលវាអាស្រ័យទៅលើប្តីប្រពន្ធរបស់លោក អេ ភូថង ផ្ទាល់ថា ចេះទទួលកំហុសដែរអត់។
លោកបានសង្កត់ធ្ងន់ថា៖ «នៅក្នុងករណីនេះ មិនមែនថា យើងមិនទុកផ្លូវសម្រាប់សម្របសម្រួលដល់គាត់នោះទេ។ បានន័យថា យើងចេញលិខិតពិន័យនេះទៅតាមច្បាប់ ហើយយើងនៅមានយន្តការសម្របសម្រួលទៀត បើសិនជាគាត់ទទួលខុស សូមទោស ហើយគាត់យល់ព្រមកែកំហុស អាហ្នឹងក៏យើងនៅអាចសម្របសម្រួលបន្ធូរបន្ថយទោសរបស់គាត់ទៅតាមហ្នឹង»។
លោក ខូវ ឆាយ បានបន្ថែមថា៖ «អ៊ីចឹងដល់ពេលនេះយើងបានទទួលការស្នើសុំពីគាត់ (អេ ភូថង) ហើយ។ គាត់ថា គាត់នឹងមកធ្វើការសូមទោស និងទទួលការណែនាំពីសហព័ន្ធ ហើយយើងនឹងប្រជុំសម្រេចថា នឹងបន្ធូរបន្ថយដាក់ទោសគាត់បែបណាទៀត»។
យ៉ាងណាក៏ដោយ លោក ឆាយ នៅមិនទាន់កំណត់ពេលជាក់លាក់ សម្រាប់ការអនុញ្ញាតឱ្យក្រុមគ្រួសារលោក អេ ភូថង មកជួបនោះទេ ដោយលោកនឹងស្នើទៅកាន់ក្រុមគណៈកម្មការបច្ចេកទេស ជាមុនសិន ចំណែកការបន្ធូរបន្ថយទោសកម្រិតណា លោកថា វាអាស្រ័យទៅការសម្រេចរបស់គណៈកម្មការវិន័យរបស់សហព័ន្ធ បន្ទាប់ពីមានការជួបជុំពិភាក្សាជាមួយក្រុមគ្រួសារលោក អេ ភូថង បានបញ្ចប់៕
ធ្វើបច្ចុប្បន្នភាពអត្ថបទនៅវេលាម៉ោង៦ល្ងាចថ្ងៃទី២៣ ខែកក្កដា ឆ្នាំ២០២៤៖ នៅរសៀលថ្ងៃដដែល លោក អេ ភូថង និងប្រពន្ធ កូនស្រីរបស់គាត់បានជួបជាមួយប្រធានសហព័ន្ធកីឡាប្រដាល់គុនខ្មែរ និងលោកគ្រូអាជ្ញាកណ្ដាល ព្រមទាំងអ្នកពាក់ព័ន្ធផ្សេងទៀត ហើយពួកគាត់បានយល់ព្រមទទួលកំហុស និងសុំទោសជាសាធារណៈ ដោយសារតែពួកគាត់ទប់អារម្មណ៍មិនបាន និងឆេវឆាវនៅពេលនោះ។
