សមាគមសម្ព័ន្ធអ្នកសារព័ត៌មានកម្ពុជា

ផ្លូវលំមួយខ្សែក្នុងខេត្តព្រៃវែងបានខូចយូរឆ្នាំ ពលរដ្ឋថាមិនមានក្រសួងពាក់ព័ន្ធអើពើចុះជួសជុលឬស្ថាបនា

ម៉ូតូប្រជាពលរដ្ឋដឹកទំនិញឆ្លងកាត់ផ្លូវលំក្នុងឃុំកោះសំពៅ ដួលផ្ងារកង់ឡើងលើ ក្នុងស្រុកពាមជរ ខេត្តព្រៃវែង។ រូបថតថ្ងៃទី១២ ខែកញ្ញា ឆ្នាំ២០២២។ រូបភាពផ្ដល់ឱ្យ
ម៉ូតូប្រជាពលរដ្ឋដឹកទំនិញឆ្លងកាត់ផ្លូវលំក្នុងឃុំកោះសំពៅ ដួលផ្ងារកង់ឡើងលើ ក្នុងស្រុកពាមជរ ខេត្តព្រៃវែង។ រូបថតថ្ងៃទី១២ ខែកញ្ញា ឆ្នាំ២០២២។ រូបភាពផ្ដល់ឱ្យ

ផ្លូវលំមួយខ្សែប្រវែង១០គីឡូម៉ែត្រលាតសន្ធឹងក្នុងឃុំឫស្សីស្រុកនិងឃុំកោះសំពៅ ស្រុក​ពាមជរ ខេត្តព្រៃវែង បានរងការខូចខាតរយៈពេលយូរឆ្នាំបង្កការ​លំបាកដល់​ការ​រស់នៅ និង​ប៉ះពាល់ដល់ការប្រកបរបររកស៊ី សិស្សសាលាអាក់ខានរៀនសូត្រ ខណៈ​ពលរដ្ឋ​អះអាងថា​ផ្លូវ​លំ​មួយខ្សែនេះមិនទាន់ឃើញមានអាជ្ញាធរ ឬក្រសួងពាក់ព័ន្ធ​ណាចុះ​មកជួសជុលឬស្ថាបនា​ឡើយ។

ព្រះចៅអធិការវត្តស្វាយអណ្ដូង ព្រះតេជគុណ វ៉ែន បុនណាត មានសង្ឃដីការថា ផ្លូវលំមួយ​ខ្សែ​នេះលាតសន្ធឹងក្នុងឃុំចំនួន២ គឺឃុំឫស្សីស្រុក និងឃុំកោះសំពៅ។ ព្រះតេជគុណ​បន្ត​មានសង្ឃដីការថា ផ្លូវនេះខូចខាតមុនព្រះអង្គមកគង់នៅវត្តទៅទៀត ហើយ១០ឆ្នាំហើយ​តាំង​ពីព្រះអង្គគង់នៅវត្តនេះ ផ្លូវនៅទេវេទនាដដែល។ ដោយហេតុដូច្នេះ ព្រះតេជគុណ បាន កៀរគរ​ថវិកាពីសប្បុរសជន ដើម្បីជួសជុលផ្លូវលំដែលខូចខាតនេះ ដោយសារ​តែទ្រាំ​ឃើញ​ប្រជាពលរដ្ឋ កុមារី កុមារា ធ្វើដំណើរពិបាកពេក ម្យ៉ាងមិនឃើញ​អាជ្ញាធរ​ភូមិឃុំ​ចុះមក​អន្តរាគមន៍សោះ។

ព្រះអង្គមានសង្ឃដីកាថា៖ «និយាយរឿងផ្លូវម្ដងៗពិបាកវេទនា រអិលជាប់ផុងជើង ធ្វើឱ្យ​សិស្ស​សាលាអត់មករៀនតែម្ដងប្រឡាក់ខោអាវ និយាយទៅគឺពិបាកណាស់។ និយាយរួមទៅ​មន្រ្តី​អាជ្ញាធរភូមិឃុំទាំងអស់ គឺគាត់អត់គិតគូរដល់ភាពលំបាកពលរដ្ឋ និយាយទៅគាត់ប្រងើយ​កន្តើយ»។

ព្រះតេជគុណ បុនណាត មានសង្ឃដីកាថា ព្រះអង្គចង់ឃើញ​អាជ្ញាធរឃុំឫស្សីស្រុក​មានការឈឺឆ្អាលនឹងបញ្ហាផ្លូវខូចខាតនេះ ហើយចូលរួមជាថវិកា ដើម្បីជួសជុល​បណ្ដោះ​អាសន្ន​តាមដែលអាចធ្វើទៅបាន ដើម្បីឱ្យពលរដ្ឋអាចធ្វើដំណើរបានស្រួលខ្លះ ជាជាងមិន​អើពើ​ហើយថែមទាំងចាំយកលទ្ធផលនៃការចំណាយជួសជុលផ្លូវរបស់ព្រះសង្ឃ​និង​ពុទ្ធបរិស័ទទៅរាយការណ៍ជូនថ្នាក់លើ។

ព្រះអង្គបន្ថែមថា៖ «អាត្មាចង់ឱ្យមន្រ្តីភូមិឃុំសម្រួលជាខ្សាច់បាន សម្រួលឱ្យពលរដ្ឋ​ធ្វើ​ដំណើរ​សិន។ ដល់តែពេលលទ្ធផលដែលគេស្រង់ស្ថិតិបំណាច់ឆ្នាំ គឺគេបញ្ជូនឡើងទៅលើ​ គេយក​លទ្ធផលពីអាត្មាទៅតែម្ដង ចំណាយអស់ប៉ុន្មានភូមិឃុំហ្នឹងក្នុងការអភិវឌ្ឍមួយឆ្នាំៗ គេយក​ពីអាត្មារាយការណ៍ទៅថ្នាក់លើ»

ស្ថានភាពផ្លូវនៅពេលភ្លៀងធ្លាក់ម្ដងៗគឺមានជង្ហុកធំៗ រអិលធ្វើដំណើរមិនបាន ក្នុងស្រុកពាមជរ ខេត្តព្រៃវែង។ រូបថតក្នុងខែសីហា ឆ្នាំ២០២២។ រូបភាពផ្ដល់ឱ្យ

នាយកសាលាស្វាយអណ្ដូង លោក ជុន សុផល មានប្រសាសន៍ថា ផ្លូវនេះបង្កការលំបាក​ណាស់​ដល់ការរស់នៅរបស់ពលរដ្ឋក្នុងឃុំ ចំណែកសិស្សសាលាជាច្រើន​កម្រិតថ្នាក់បាន​ផ្អាករៀនពីរទៅបីថ្ងៃ នៅពេលដែលមានភ្លៀងធ្លាក់ខ្លាំង ត្បិតថាមិនអាចធ្វើដំណើរ​ទៅទីណា​កើត ទោះបីថ្មើរជើងក៏ដោយ។

 លោកថ្លែងថា៖ «ការធ្វើដំណើររបស់ប្រជាពលរដ្ឋហ្នឹង សិស្សានុសិស្ស ពុទ្ធបរិស័ទ​ទៅ​បុណ្យ​ទានគឺថាវាពិបាកណាស់ ពិបាកហួសការនិយាយហើយ។ កាលណាពេលភ្លៀង សិស្ស​ទាំង​អស់នៅក្នុងឃុំ៦សាលាគឺត្រូវតែឈប់ពីរឬបីថ្ងៃ ព្រោះអត់ធ្វើដំណើរទៅកើតទេ កុំថា​ឡើយម៉ូតូ តែដើរហ្នឹងដើរមិនកើតផង»

នាយកសាលារូបនេះ អះអាងថា ដោយសារតែមិនឃើញមានក្រសួងពាក់ព័ន្ធចុះមកធ្វើផ្លូវ ប្រជាពលរដ្ឋ ព្រះសង្ឃ បានប្រមូលលុយគ្នាដើម្បីជួសជុលផ្លូវបណ្ដោះអាសន្ន។ លោករំពឹងថា ក្រសួងពាក់ព័ន្ធនឹងដោះស្រាយបញ្ហាផ្លូវលំក្នុងមូលដ្ឋានលោកឱ្យបានឆាប់ៗនេះ។

ចំណែកលោក ហៀង ប៊ុនធឿន ជាស្មៀននៅឃុំកោះសំពៅ លើកឡើងថា កន្លងមកផ្លូវនេះ ធ្លាប់មានកងវិស្វកម្មក្រសួងមហាផ្ទៃចុះមកធ្វើម្ដងដែរ តែមិនបានបញ្ចប់ការជួលជុលទេ រួចក៏​ទៅវិញបាត់ទៅ និងបណ្ដាលឱ្យផ្លូវខូចលើសដើម។លោកថា ជាង៣០ឆ្នាំហើយ តាំងពី​លោក​ធំដឹងក្ដីមក គឺឃើញតែផ្លូវពិបាក មិនដែលឃើញមានផ្លូវស្អាតធ្វើដំណើរនឹងគេទេ។

 លោក ប៊ុនធឿន បញ្ជាក់ថា៖ «បើនិយាយទៅជាប់៣០ឆ្នាំហើយ ដែលខ្ញុំនៅស្រុកនេះ ខាង​កោះ​សំពៅគឺពិបាកណាស់ មិនដែលមានផ្លូវប្រើប្រាស់បានល្អនឹងគេទេ ហើយបើមាន​ផ្លូវ​ល្អក៏ប្រើមិនបានយូរដែរ ដោយសារស្ដង់ដារនៃការធ្វើវានៅមានកម្រិត» ។

លោកបន្ថែមថា កន្លងមកភូមិឃុំបានបញ្ចេញថវិកាដើម្បីធ្វើផ្លូវដែរ តែមិនដែលបានបញ្ចប់ទេ​ដោយសារបញ្ហាគ្រោះធម្មជាតិ។ តួយ៉ាង ដល់រដូវបិណ្ឌភ្ជុំ កាន់តែពិបាកក្នុងការធ្វើដំណើរ សិស្សក៏មិនអាចទៅរៀន ហើយមិនអាចទៅវត្តធ្វើបុណ្យទៀតផង។ 

លោកថា៖ «ពិបាកណាស់ ឥឡូវហ្នឹងដល់រដូវកាន់បិណ្ឌហ្នឹងប្រហែលជាទៅវត្ត​មិនរួចទេ​ខាងខ្ញុំនេះ។ កូនខ្ញុំវិញទៅរៀនបានតែ២ថ្ងៃអីទេ ភ្លៀងមួយថ្ងៃចឹងខាន៣ថ្ងៃ កូនខ្ញុំ​ខាន​រៀន​មួយអាទិត្យអីចឹងគាត់ខ្មាស់លែងចង់ទៅ ក្មេងខ្លះតស៊ូគាត់ដើរទៅរៀន»

កូនសិស្សសាលាតូចៗរអិលដួលប្រឡាក់សំលៀកបំពាក់ ពេលពួកគេចេញ​ពីរៀនដោយ​ធ្វើដំណើរតាមផ្លូវមួយខ្សែ ស្ថិតក្នុងស្រុកពាមជរ ខេត្តព្រៃវែង។ រូបថត​ក្នុង​ខែសីហា ឆ្នាំ២០២២។ រូបភាពផ្ដល់ឱ្យ

បើតាមមេឃុំកោះសំពៅ លោក ម៉ម សំបូរ មានប្រសាសន៍ថា ផ្លូវលំមួយខ្សែក្នុងភូមិ​កោះ​សំពៅ​ប្រវែងប្រមាណ១០គីឡូម៉ែត្រទទួលស្គាល់ថាផ្លូវលំនេះ រងការខូចខាត​ និងបង្កការ​លំបាកដល់ការធ្វើដំណើរប្រចាំថ្ងៃរបស់ប្រជាពលរដ្ឋ សិស្សសាលាមិនបានទៅរៀន និងរាំង​ស្ទះការងារមន្រ្តីភូមិឃុំយូរឆ្នាំមកហើយ។

លោក សំបូរ ឱ្យដឹងថា៖ «វាមិនមែនតែផ្លូវហ្នឹងទេ ផ្លូវផ្សេងក៏ខូចដែរ ជួបការលំបាកនោះ សិស្ស​ទៅរៀនរអិលដួលទទឹកអស់អ៊ីចឹងទៅក៏ខានរៀនទៅ និយាយរួមការធ្វើដំណើរ វាពិបាក​គ្រប់​សព្វ​តែម្ដង​ សូម្បីតែខ្ញុំមន្រ្តីរបស់យើងត្រូវប្រជុំក៏យើងអាក់ខានដែរ ព្រោះទៅមិនរួច»

លោកបន្តថា លោកបានបង្កើតជាគណៈកម្មការថែទាំងផ្លូវប្រចាំភូមិ ដើម្បីមើលថែផ្លូវ ប៉ុន្តែ​ដោយ​សារតែមេឃភ្លៀង និងតម្រូវការប្រើប្រាស់ផ្លូវមមាញឹក ទើបបណ្ដាល​ឱ្យផ្លូវ​ខូចធ្ងន់ធ្ងរ គួបផ្សំផ្លូវនេះក្រសួងពាក់ព័ន្ធមិនមកស្ថាបនាត្រឹមត្រូវតាមស្ដង់ដារកំណត់ទើបបង្កផលលំបាកដូច្នេះ។

លោកថ្លែងថា៖ «ផ្លូវនេះក្រសួងទទួលខុសត្រូវធ្វើហ្នឹងចាប់ពីឆ្នាំ២០១៣ ទើបតែ​ដើមឆ្នាំទៅហ្នឹង​ទេក្រសួងបានចុះមកបំពេញកន្លែងខូចៗទៀត ហើយក៏ដកគ្រឿងចក្រទៅអស់ទៅ។ អ៊ីចឹង​ថ្នល់​នេះវាជួបការលំបាកត្រង់ថាស្រុកនេះជាស្រុកធ្វើស្រែប្រាំង ចឹងការដឹកជញ្ជូនស្រូវវាច្រើន ចឹងវាមានការផុង តែដឹកធ្ងន់វាត្រូវតែផុង»

លោករំលឹកថា​ ផ្លូវលំនេះរដ្ឋបាលភូមិឃុំធ្លាប់បានលើកទៅថ្នាក់លើជារឿយៗ តែមិនឃើញ​មាន​ចំណាត់ការឡើយ ដោយក្រសួងសាមីបានត្រឹមតែមកជួសជុលបន្តិច រួចក៏មិនឃើញមក​ទៀត រហូតមកទល់ពេលនេះប្រជាជននាំគ្នារៃលុយគ្នាជួសជុលផ្លូវដោយទិញថ្មភ្នំក្រាល​ដើម្បី​សម្រួលការធ្វើដំណើរបានខ្លះ។

លោក សំបូរ បញ្ជាក់ទៀតថា៖ «ចំពោះរដ្ឋបាលឃុំសំណើរជាបន្តបន្ទាប់ តាមរយៈការប្រជុំ​ថ្នាក់​ស្រុក និយាយរួមយើងបានជម្រាបជូនខាងលើជាបន្តបន្ទាប់ ប៉ុន្តែមិនទាន់ឃើញលទ្ធផល។ ផ្លូវហ្នឹងក្រសួងអភិវឌ្ឍន៍ជនបទធ្វើតែ១០គីឡូ គឺវា[ខូច]ទាំងអស់តែម្ដង»

ចំពោះលោកមេឃុំរូបនេះ លោកពិតជាចង់បានផ្លូវល្អស្អាតសម្រាប់ប្រជាពលរដ្ឋធ្វើដំណើរ ពិសេស​លោកចង់ឃើញក្រសួងដែលទទួលខុសត្រូវកិច្ចការការងារផ្លូវនេះ ស្ថាបនាផ្លូវ​ទៅ​តាម​ការកំណត់ស្ដង់ដារថ្នាក់ជាតិ។

លោកបន្ថែមថា៖ «បើផ្លូវមូលនិធិឃុំ ឃុំជាអ្នកធ្វើ ហើយផ្លូវណាដែលក្រសួងទទួលខុសត្រូវ អាហ្នឹង​ជារឿងរបស់ក្រសួង ចឹងខ្ញុំតំណាងឱ្យប្រជាពលរដ្ឋទាំងមូលចង់បានផ្លូវ​តាមប្រសាសន៍​របស់ថ្នាក់ដឹកនាំ គឺសម្ដេចក្រឡាហោម ផ្លូវជនបទគឺក្រាលកៅស៊ូ»

ត្រាក់ទ័រសណ្ដោងគោយន្ដដឹកស្រូវដែលកំពុងជាប់ផុងលើផ្លូវមួយខ្សែ ស្ថិតក្នុងស្រុកពាមជរ ខេត្តព្រៃវែង។​ រូបថតនៅក្នុងខែសីហា ឆ្នាំ២០២២។ រូបភាពផ្ដល់ឱ្យ

លោក សេង ធា អភិបាលស្រុកពាមជរ មានប្រសាសន៍ថា បញ្ហាផ្លូវលំនេះ គឺស្ថិតក្នុង​គម្រោង​របស់ក្រសួងអភិវឌ្ឍន៍ជនបទ ហើយខាងស្រុកមិនមានលទ្ធភាព ឬលូកដៃក្នុងគម្រោង​របស់​ថ្នាក់​ជាតិឡើយ ខាងស្រុកចាំតែទទួលយកផ្លូវដែលក្រសួងធ្វើឱ្យតែប៉ុណ្ណោះ។

លោកថ្លែងថា៖ «អ្នកកាន់គម្រោងរបស់ក្រសួងអភិវឌ្ឍន៍ជនបទអ្នកកាន់ អ្នកទទួលខុសត្រូវ ថ្នាក់ស្រុក ថ្នាក់ឃុំហ្នឹងគ្មានលទ្ធភាពអីទៅធ្វើផ្លូវរបស់ថ្នាក់ជាតិហ្នឹងដែរ ធ្វើម៉េចខែ​ភ្លៀង​ពលរដ្ឋគាត់ចេះតែរអ៊ូហើយ»។

លោកបន្តថា ថ្នាក់ស្រុកមិនមានសិទ្ធិអ្វីទៅស្នើសុំដល់ថ្នាក់ជាតិទេ ហើយលោករំពឹងថា​ក្រសួង​ហិរញ្ញវត្ថុនឹងទម្លាក់ថវិកាទៅឱ្យក្រសួងអភិវឌ្ឍន៍ជនបទឱ្យបានឆាប់ នឹងបាន​ស្ថាបនាផ្លូវ​លំ​នេះ។

ជុំវិញករណីនេះ លោក គង់ ភឿន ប្រធាននាយកដ្ឋានផ្លូវលំជនបទនៃក្រសួងអភិវឌ្ឍន៍ជនបទ បានថ្លែងប្រាប់ ខេមបូចា ថា លោកមិនដែលបានដឹងព័ត៌មានលម្អិតពីផ្លូវលំមួយខ្សែ​ដែល​កំពុង​ខូចខាតនេះទេ ត្បិតថាផ្លូវលំមានច្រើនខ្សែច្រើនតំបន់ ដូច្នេះលោកស្នើឱ្យខាងអាជ្ញាធរឃុំ ស្រុក ខេត្ត រាយការយ៍ពីផលប៉ះពាល់មកកាន់ក្រសួងតាមរយៈមន្ទីរអភិវឌ្ឍន៍ជនបទខេត្ត នោះលោក​នឹង​ឱ្យមន្រ្តីជំនាញចុះទៅពិនិត្យ។

លោកបញ្ជាក់ថា៖ «ខ្ញុំអត់បានដឹងទេណា៎ព័ត៌មានហ្នឹង ចាំខ្ញុំដឹងច្បាស់បានខ្ញុំឆ្លើយកើត។ បើ​សិន​ក្នុងករណីខ្សែផ្លូវវាច្រើនក្នុងស្រុកនីមួយៗ ចឹងយើងរាយការណ៍ឱ្យអាជ្ញាធរដែនដី​ធ្វើ​លិខិត​ស្នើសុំមកស្រុក មកខេត្តតាមរយៈមន្ទីរអភិវឌ្ឍន៍ជនបទ ហើយផ្ញើមកក្រសួងមក ព្រោះខ្ញុំ​អត់​ដឹង​ខ្សែផ្លូវមួយណាទេ ចឹងឱ្យធ្វើសំណើរឡើងមកលើមកណា៎»

ដោយសារតែផ្លូវលំមួយខ្សែនេះភ្ជាប់ពីឃុំមួយទៅឃុំមួយទៀត ចំពោះលោក សន ជ័យ នាយកប្រតិបត្តិ​អង្គការ​សម្ព័ន្ធ​គណនេយ្យភាព​សង្គម​កម្ពុជា យល់ឃើញថា វាជាការទទួល​ខុសត្រូវ​របស់ក្រសួងអភិវឌ្ឍន៍ជនបទ ដូច្នេះអាជ្ញាធរមូលដ្ឋាន​គម្បីដាក់សំណើរទៅ​ក្រសួង​ពាក់ព័ន្ធ​សុំអន្តរាគមន៍ ដើម្បីសម្រួលដល់ការរស់នៅរបស់ប្រជាពលរដ្ឋ។

លោកបន្ថែមទៀតថា៖ «យើងលើកទឹកចិត្តឱ្យមានការពិគ្រោះយោបល់ រវាងប្រជាពលរដ្ឋ និងអាជ្ញាធរមូលដ្ឋាន ធ្វើការកំណត់លក្ខខណ្ឌថាតើផ្លូវនោះគួរតែជាការឆ្លើយតប​របស់​ក្រសួង​អភិវឌ្ឍន៍ជនបទ ឬរបស់ឃុំ ព្រោះតម្រូវការត្រូវបានកំណត់ហើយ គឺអាជ្ញាធរមូលដ្ឋាន​អាចសុំ​ការអន្តរាគមន៍ដើម្បីដោះស្រាយផ្លូវថ្នល់ជូនពលរដ្ឋក្នុងសហគមន៍»

គួររំលឹកថា កាលពីឆ្នាំ២០២០ នាយកដ្ឋានផ្លូវលំជនបទ ធ្លាប់លើកឡើងថា ក្នុងមួយឆ្នាំ ក្រសួងទទួលបានសំណើសុំស្ថាបនា ជួសជុល និងថែទាំផ្លូវលំជនបទទូទាំងប្រទេស​ជាង​២ពាន់ករណី។

សូមជម្រាបថា ក្រសួងអភិវឌ្ឍន៍ជនបទបានចេញគោលនយោបាយអភិវឌ្ឍន៍ជនបទ ២០១៩-២០២៣ ដើម្បីពង្រឹងស្ថាប័ន និងអភិវឌ្ឍធនធានមនុស្ស ពង្រីកហេដ្ឋារចនាសម្ព័ន្ធជនបទ និងគុណភាពសេវាសាធារណៈនៅទីជនបទ ព្រមទាំងធានាអំពីគុណភាពនៃការរស់នៅ តាមរយៈការអភិវឌ្ឍសង្គម-សេដ្ឋកិច្ចបរិយាប័ន្ននៅតាមទីជនបទ៕

370 views

ព័ត៌មានទាក់ទង

ព័ត៌មានថ្មីៗ

អត្ថបទពេញនិយម