ប្រជាពលរដ្ឋក្នុងសង្កាត់ស្រង៉ែ ក្រុងសៀមរាប ស្នើឱ្យមណ្ឌលសុខភាពស្រង៉ែ កែលម្អឡើងវិញ នូវចំណុចខ្វះខាត ដោយសារតែពេលពលរដ្ឋមកទទួលសេវា មានការខ្វះខាតថ្នាំ និងមិនមានពេទ្យប្រចាំការវេនយប់ដិតដល់។ បញ្ហានេះជាហេតុបង្កការលំបាកដល់ប្រជាពលរដ្ឋក្នុងមូលដ្ឋាន ហើយពួកគេងាកទៅរកពេទ្យឯកជន និងមណ្ឌលសុខភាពផ្សេងទៀតដែលនៅឆ្ងាយពីលំនៅឋាន។
មិនឆ្ងាយប៉ុន្មានពីក្រុងសៀមរាប សង្កាត់ស្រង៉ែ គឺជាសង្កាត់មួយដែលមានប្រជាជនច្រើនរស់នៅ ហើយក៏មានមណ្ឌលសុខភាពមួយក្បែរសាលាសង្កាត់ផងដែរ ដែលជាហេតុបង្កការងាយស្រួលដល់ពលរដ្ឋក្នុងមូលដ្ឋានមកទទួលសេវា ពេលពួកគេឈឺស្កាត់ម្ដងៗ។
ប៉ុន្តែបើតាមប្រជាពលរដ្ឋក្នុងមូលដ្ឋាន បានត្អូញត្អែរថា ថ្វីបើមណ្ឌលសុខភាពនៅក្បែរផ្ទះក្ដី តែនៅពេលដែលពួកគេទៅទទួលសេវាមិនមានថ្នាំគ្រប់គ្រាន់ តម្រូវទៅតាមសភាពជំងឺរបស់ពួកគេឡើយ។ ម្យ៉ាងពេលពលរដ្ឋឈឺថ្កាត់ពេលយប់ នៅមណ្ឌលសុខភាព មិនមានពេទ្យប្រចាំការដិតដល់ឡើយ។
អ្នកស្រី ទឹម សុងហៀក អាយុ៣៥ឆ្នាំ រស់នៅភូមិចន្លោង ឃុំស្រង៉ែ ក្រុងសៀមរាប បានប្រាប់ឱ្យដឹងថា បញ្ហាខ្វះខាតថ្នាំសង្កូវនៅមណ្ឌលសុខភាពស្រង៉ែ កើតមានយូរក្រែងដែរហើយ។ ថ្វីបើការខ្វះខាតថ្នាំសង្កូវនេះ មិនស្ថិតក្នុងកម្រិតមួយធ្ងន់ធ្ងរ ប៉ុន្តែអ្នកស្រីមិនចង់ឃើញភាពខ្វះចន្លោះបែបនេះបន្តទៀតឡើយ និងស្នើសុំអ្នកពាក់ព័ន្ធដោះស្រាយជូនប្រជាពលរដ្ឋក្នុងតំបន់ឱ្យបានឆាប់។
អ្នកស្រីថ្លែងថា៖ «បញ្ហានេះវាមានយូរគ្រាន់ហើយ ហើយចង់ឱ្យវាល្អជាងនឹងទៀត។ ពេលមកខ្វះថ្នាំទៅវាប៉ះពាល់[ជីវភាព]ដែរណា៎ បើថាយើងមកមានថ្នាំទៅវាអត់ចុះលុយហ្នឹងឯង»។
អ្នកស្រី ហៀក បន្ថែមថា កាលបើមណ្ឌលសុខភាពក្នុងឃុំសង្កាត់ មិនមានថ្នាំឱ្យអ្នកជំងឺគ្រប់គ្រាន់ធ្វើឱ្យពលរដ្ឋដូចជាអ្នកស្រីត្រូវចំណាយលុយច្រើនលើសលប់ហួសពីសមត្ថភាព ដើម្បីទៅទិញថ្នាំនៅពេទ្យឯកជន។ សម្រាប់ពលរដ្ឋរូបនេះរំពឹងថា មណ្ឌលសុខភាពក្នុងមូលដ្ឋានរបស់គាត់នឹងមានថ្នាំសង្កូវសម្រាប់ព្យាបាលអ្នកជំងឺ ព្រោះវាបានជួយសម្រាលបន្ទុកគ្រួសារមួយផ្នែកធំ ពិសេសប្រជាពលរដ្ឋមានជីវភាពក្រីក្រដូចជាអ្នកស្រី។
អ្នកស្រីបន្តថា៖ «បើទៅទិញនៅហ្វាម៉ាស៊ីវាថ្លៃដែរ វាប៉ះពាល់ជីវភាពយើងហ្នឹងហើយ។ មានតែសំណូមពរឱ្យមានថ្នាំឱ្យច្រើន និងប្រចាំឱ្យគ្រប់គ្រាន់ទៅណា»។
មិនខុសពីពលរដ្ឋខាងលើ អ្នកនាង ប្រុស ហេង អាយុ២០ឆ្នាំ រស់នៅភូមិរកាធំ សង្កាត់ស្រង៉ែ ប្រាប់ឱ្យដឹងថា មណ្ឌលសុខភាពស្រង៉ែខ្វះខាតច្រើនផ្នែកហេដ្ឋារចនាសម្ព័ន្ធ តែអ្វីដែលអ្នកនាងចាប់អារម្មណ៍គឺកង្វះខាតឱសថតែម្ដង។
អ្នកនាងរៀបរាប់ថា៖ «ចង់ឱ្យបន្ថែមថ្នាំឱ្យគ្រប់គ្រាន់ពេលប្រជាពលរដ្ឋមករកថ្នាំទៅមានគ្រប់គ្រាន់ ព្រោះពេលឈឺអីអត់សូវមានឱសថគ្រប់គ្រាន់ លក្ខណៈថាខ្វះខាត ចង់ស្នើឱ្យបានបបូរណ៍»។
នារីវ័យ២០ឆ្នាំរូបនេះ អះអាងថា ពេលឈឺថ្កាត់បន្តិចបន្តូចទៅបើកថ្នាំនៅមណ្ឌលសុខភាពតែមិនមានថ្នាំគ្រប់គ្រាន់ ជួនកាលលេបហើយមិនជាសះស្បើយ ទើបចំណាយលុយទៅផ្សំថ្នាំនៅពេទ្យឯកជនក៏មាន។ អ្នកនាង ហេង បន្ថែមថា ប្រសិនបើបញ្ហាទាំងនេះដោះស្រាយឆាប់ៗ អ្នកនាងពិតជារំភើបព្រោះទទួលបានអារម្មណ៍កក់ក្ដៅ ហើយមិនចំណាយលុយច្រើនទៀតផង។
អ្នកនាង ហេង បន្ថែមថា៖ «ពេលខ្លះនៅមណ្ឌលលេបអត់ជា ទៅទិញថ្នាំក្រៅ តែបើនៅមណ្ឌលមានថ្នាំលេបជាទៅ ក៏មិនបាច់ទៅក្រៅ។ វាធូរលុយយើងដែរ ព្រោះទៅពេទ្យក្រៅអស់ច្រើន បើមកពេទ្យមណ្ឌលអត់អស់លុយច្រើន ធូរក្នុងជីវភាពគ្រួសារយើងទៀត»។
ពលរដ្ឋមួយរូបទៀត គឺអ្នកស្រី អឿន សំណាន អាយុ៣៥ឆ្នាំ បានលើកឡើងស្រដៀងគ្នាថា ជានិច្ចជាកាល នៅពេលកូនអ្នកស្រីឈឺថ្កាត់ម្ដងៗមិនដែលរំលងមណ្ឌលសុខភាពឡើយ តែពេលមកបើកថ្នាំ មិនមានថ្នាំត្រូវនឹងជំងឺកូនអ្នកស្រីឡើយ មានតែថ្នាំប៉ារ៉ាសេតាមុល ដែលពេទ្យបើកឱ្យដើម្បីលេបបណ្ដោះអាសន្ន។
អ្នកស្រីបន្តថា នៅពេលកូនអ្នកស្រីគ្រុនផ្ដាសាយ ពេទ្យឱ្យតែថ្នាំប៉ារ៉ាមកលេប ព្រោះមិនមានថ្នាំល្អៗ ឬចំមុខជំងឺ ដូច្នេះកូនអ្នកស្រីមិនអាចសះស្បើយទេ ទើបអ្នកស្រីយកកូនទៅពេទ្យឯកជនព្យាបាលអស់ប្រាក់ក្នុងចំនួនច្រើនគួរសម ហើយប្រាក់ទាំងនោះគឺអ្នកស្រីខ្ចីលុយគេ ដើម្បីយកកូនទៅពេទ្យ។
អ្នកស្រី សំណាន អះអាងថា៖ «នៅពេលអត់ថ្នាំទៅ ពេទ្យឱ្យតែប៉ារ៉ាយើងដើម្បីលេបកាត់បន្ថយសិនទៅណា ដូចកូនខ្ញុំគ្រុនផ្ដាសាយឱ្យតែថ្នាំប៉ារ៉ាលេបវាអត់បាត់ទេ។ ចឹងទាល់ខ្ញុំទៅរកពេទ្យឈ្នួល ចុះលុយណាស់ព្រោះគ្រួសារខ្ញុំក្រីក្រ បើមកពេទ្យមណ្ឌលអត់អស់លុយទេ»។
អ្នកស្រីបន្តថា៖ «ខ្ញុំខ្ចីលុយគេយកកូនទៅពេទ្យអស់២០ ៣០ម៉ឺន ដាក់សេរ៉ូម ខកចិត្តដែរណា តែមិនដឹងធ្វើម៉េចបើមណ្ឌលអត់មាន[ថ្នាំ]ដែរ មានតែខ្ចីលុយគេទៅពេទ្យឯកជន»។
អ្នកស្រីបន្ថែមទៀតថា បញ្ហាមួយទៀតដែលអ្នកស្រីចង់ឱ្យដោះស្រាយនោះគឺ ស្នើឱ្យមានពេទ្យប្រចាំការវេនយប់គ្រប់គ្រាន់ ព្រោះធ្លាប់មានករណីអ្នកឆ្លងទន្លេពេលយប់មករកពេទ្យ តែគ្មានពេទ្យប្រចាំការ តម្រូវឱ្យអ្នកឆ្លងទន្លេនោះត្រូវធ្វើដំណើរទៅមណ្ឌលសុខភាពផ្សេង ប៉ុន្តែទម្រាំតែដល់មណ្ឌលសុខភាពផ្សេង ធ្វើឱ្យកូននោះស្លាប់ក្នុងផ្ទៃទៅវិញ។
អ្នកស្រី ចំណាន បញ្ជាក់ថា៖«ដូចថាវេនយាមអត់ប៉ះពេទ្យឆ្មបនោះណា ទម្រាំមកដល់គ្នានេះ កូនវាស្លាប់តាមតុកៗហ្នឹង ករណីហ្នឹងយូរហើយ។ ខ្ញុំចង់ឱ្យមានពេទ្យប្រចាំការពេលយើងមកយប់ប្រលប់ចឹងមានពេទ្យនៅប្រចាំការគ្រប់គ្រាន់»។
សម្រាប់អ្នកស្រីចំណាន ពិតជាចង់ឃើញមណ្ឌលសុខភាពក្នុងតំបន់អ្នកស្រីមានការកែលម្អឡើងវិញនូវបញ្ហាដែលប្រជាពលរដ្ឋបានលើកឡើង ព្រោះប្រជាជនដែលមានជីវភាពខ្វះខាតងាយស្រួលក្នុងការទទួលសេវា ដោយមិនចាំបាច់ចំណាយប្រាក់ច្រើន។
ចំណែកចៅសង្កាត់រងទី១ នៃសង្កាត់ស្រង៉ែ អ្នកស្រី ធីវ រួន បានឱ្យដឹងថា បញ្ហាខ្វះខាតថ្នាំនេះពិតជាកើតមានពិតមែន ហើយពលរដ្ឋក៏ធ្លាប់បានរាយការណ៍ទៅសមាជិកភូមិផងដែរ។ ចំណែកបញ្ហាខ្វះពេទ្យយាមកាម អ្នកស្រីបដិសេធ ថាមានពេទ្យយាមពេលយប់គ្រាន់តែពេទ្យប្រចាំការនៅអគារក្រោយ ហើយពលរដ្ឋមកស្រែកហៅខាងមុខមណ្ឌលសុខភាព ដូច្នេះទើបមានការយល់ច្រលំ។
អ្នកស្រីពន្យល់ថា៖ «ថ្នាំក្នុងមណ្ឌលវាមានការខ្វះខាតមែន ជួនកាលអត់គ្រប់មែន ដូចជាថ្នាំណាដែលត្រូវអត់មានអត់មានទេ នេះរឿងពិត»។
អ្នកស្រីចៅសង្កាត់រងបន្តថា ពលរដ្ឋគាត់អត់សូវយល់ គេ[ពេទ្យ]យាម តែកន្លែងយាមនៅសាលខាងលិច ហើយពលរដ្ឋហៅតែពីមុខ ចឹងគាត់ក៏និយាយថាអត់យាមកាមទៀងទាត់។
ចំពោះបញ្ហានេះ អ្នកស្រី រួន បញ្ជាក់ថាខាងសង្កាត់បានប្រជុំរកដំណោះស្រាយ ហើយបានជំរុញឱ្យមណ្ឌលសុខភាពមានថ្នាំគ្រប់ប្រភេទ ដើម្បីផ្ដល់ជូនពលរដ្ឋឱ្យបានដិតដល់ ត្បិតថាតម្រូវការប្រើប្រាស់មានច្រើន ដូច្នេះពលរដ្ឋដែលមកបើកថ្នាំខ្លះចំពេលអស់ថ្នាំ ទើបមានការត្អូញត្អែរ។
ប្រធានមណ្ឌលសុខភាពស្រង៉ែ លោក ហ៊ីង ពីរ៉ា អះអាងថា នៅមណ្ឌលសុខភាពស្រង៉ែ មានថ្នាំសម្រាប់ព្យាបាលពលរដ្ឋគ្រប់គ្រាន់ មិនខ្វះខាតដូចការលើកឡើងរបស់ពលរដ្ឋឡើយ ហើយលោកទទួលស្គាល់ថាបញ្ហាពេទ្យប្រចាំការនៅពេលយប់មានភាពខ្វះចន្លោះពិតមែន តែលោកបានពង្រឹងបុគ្គលិកហើយ។
ប្រធានមណ្ឌលសុខភាពរូបនេះថ្លែងថា៖«បញ្ហាហ្នឹង ពេលយប់ជ្រៅពេក ខ្លះអ្នកយាមគាត់គេងលក់ តែយើងបានដោះស្រាយដាក់កណ្ដឹង និងផ្សព្វផ្សាយឱ្យគាត់[ពលរដ្ឋ]មកចុចកណ្ដឹង។ បញ្ហាថ្នាំវិញ យើងអត់អត់ទេ យើងទិញដាក់ជាប្រចាំ»។
លោកបន្ថែមថា មណ្ឌលសុខភាពស្រង៉ែ មិនខ្វះថ្នាំទេ គឺមានថ្នាំ៣៣មុខ ត្រៀមទុកសម្រាប់ព្យាបាលអ្នកជំងឺជានិច្ច ហើយលោកនឹងប្ដេជ្ញាពង្រឹងសេវាកម្មនៅមណ្ឌលសុខភាពនេះឱ្យកាន់តែល្អប្រសើរថែមទៀត។
ដោយឡែកលោក ក្រុស សារ៉ាត់ ប្រធានមន្ទីរសុខាភិបាលខេត្តសៀមរាប មិនអាចបកស្រាយបានឡើយនៅពេល ខេមបូចា សួរសំណូរទៅកាន់លោកតាមទូរសព្ទ ដោយលោកថាមិនបានចុះទៅជួបប្រជាពលរដ្ឋ និងឱ្យទៅសួរនៅការិយាល័យសុខាភិបាលស្រុកប្រតិបត្តិសៀមរាបវិញ។
ទន្ទឹមនឹងនេះ ប្រធានមន្ទីរូបនេះ លើកឡើងថា ធ្វើជាអ្នកសារព័ត៌មានកុំធ្វើការតាមទូរសព្ទ គួរចុះទៅទីតាំងផ្ទាល់ដើម្បីសម្ភាស ប៉ុន្តែខេមបូចា បានចុះទៅផ្ទាល់រួចហើយទើបសុំការបកស្រាយបន្ថែមពីប្រធានមន្ទីរសុខាភិបាល។
លោកថ្លែងថា៖ «ខេមបូចាហ្នឹងបានចុះទៅផ្ទាល់នៅមណ្ឌលសុខភាពស្រង៉ែនៅ? ចុះទៅផ្ទាល់ហើយទៅជួបជាមួយប្រធានមណ្ឌលសុខភាពស្រង៉ែហ្នឹងទៅ អានឹងបានវាជាក់ស្ដែង ចុះទៅផ្ទាល់ហើយទៅសួរគាត់ ហើយចុះទៅស្រុកប្រតិបត្តិ អាហ្នឹងបានជាអ្នកកាសែត។ ហើយបើអ្នកកាសែតបើអង្គុយចាំតែសួរគេអ៊ីចេះ អាហ្នឹងវាអត់ទេ អាហ្នឹងឱ្យច្បាស់អ៊ីចឹង កុំទម្លាប់យកព័ត៌មានតាមរយៈទូរសព្ទ»។
នាយកប្រតិបត្តិអង្គការតម្លាភាពកម្ពុជា លោក ប៉ិច ពិសី មានប្រសាសន៍ថា សេវានៅតាមមណ្ឌលសុខភាពក្នុងមូលដ្ឋាន គឺជារឿងមួយចំបាច់ណាស់សម្រាប់ប្រជាពលរដ្ឋ ព្រោះអ្នកទាំងនោះភាគច្រើនជ្រើសយកមណ្ឌលសុខភាពជាជម្រើសដំបូង មុននឹងពួកគេទៅពេទ្យឯកជន។ ដូច្នេះ ការពង្រឹងប្រសិទ្ធភាពនៃការផ្ដល់សេវាសុខាភិបាលជូនពលរដ្ឋមូលដ្ឋាន គឺជារឿងចាំបាច់។
លោកបន្តថា៖ «ខ្ញុំគិតថាបើសិនការផ្ដល់សេវាមិនត្រឹមត្រូវ មានបញ្ហាមិនប្រក្រតី ឬការមិនយកចិត្តទុកដាក់ ពលរដ្ឋគួរតែមានការបញ្ចូនព័ត៌មានទៅថ្នាក់លើ ដើម្បីចុះត្រួតពិនិត្យរាល់បញ្ហាដែលកើតមានឡើង»។
លោកបញ្ជាក់ថា ក្រសួងសុខាភិបាល គួរពនិត្យឡើងវិញចំពោះក្រមសីលធម៌វិជ្ជាជីវៈ និងជំរុញប្រសិទ្ធភាពទៅតាមក្របខណ្ឌដែលក្រសួងដាក់ជូន ក្នុងការផ្ដល់សេវាកម្មល្អទៅកាន់ពលរដ្ឋ។
គួររំលឹកជូនថា លោកនាយករដ្ឋមន្រ្តី ហ៊ុន សែន ធ្លាប់បានអំពាវនាវឱ្យពង្រាយក្រុមគ្រូពេទ្យជំនាញបន្ថែមទៀត នៅតាមមន្ទីរពេទ្យសាធារណៈទូទាំងប្រទេស ជាពិសេសនៅតាមទីប្រជុំជនដាច់ស្រយាល ដើម្បីបំពេញតម្រូវការខ្វះខាត និងពង្រឹងវិស័យសុខាភិបាលនេះឡើងវិញ ដើម្បីកាត់បន្ថយការប្រើប្រាស់សេវាសុខាភិបាលនៅក្រៅប្រទេស។
យ៉ាងណាមិញ រដ្ឋាភិបាលបានចាត់ទុកវិស័យសង្គមកិច្ច ជាវិស័យអាទិភាពទីមួយ ដើម្បីគាំទ្រនិងពង្រីកដល់វិស័យមួយចំនួនក្នុងនោះវិស័យសុខាភិបាលត្រូវបានលើកកម្ពស់ និងជំរុញ ពង្រីកសេវានេះឱ្យកាន់តែខិតជិតប្រជាពលរដ្ឋ៕
