សមាគមសម្ព័ន្ធអ្នកសារព័ត៌មានកម្ពុជា

ពលករខ្មែរនៅថៃប្រហែល១លាននាក់បានផុតសុពលភាពឯកសារការងារនិងមិនមានឯកសារស្របច្បាប់

មន្ត្រីស្ថានទូតកម្ពុជាប្រចាំប្រទេសថៃ សាកសួរសុខទុក្ខ ពលករខ្មែរនៅ តំបន់និគម ផាត់តាណា ខេត្តរ៉ាក់យ៉ង កាលពីថ្ងៃទី៦ ខែមិថុនា ឆ្នាំ២០២២។ រូបភាពពីហ្វេសប៊ុកស្ថានទូត កម្ពុជាប្រចាំប្រទេសថៃ។
មន្ត្រីស្ថានទូតកម្ពុជាប្រចាំប្រទេសថៃ សាកសួរសុខទុក្ខ ពលករខ្មែរនៅ តំបន់និគម ផាត់តាណា ខេត្តរ៉ាក់យ៉ង កាលពីថ្ងៃទី៦ ខែមិថុនា ឆ្នាំ២០២២។ រូបភាពពីហ្វេសប៊ុកស្ថានទូត កម្ពុជាប្រចាំប្រទេសថៃ។

មន្ត្រីជាន់ខ្ពស់អង្គការសង់ត្រាល់លើកឡើងថា គិតត្រឹមដើមឆ្នាំ២០២៣នេះ ពលករខ្មែរ​ដែល​កំពុងរស់នៅ និងធ្វើការងារនៅក្នុងប្រទេសថៃមានជាង២លាននាក់ ក្នុងនោះពាក់កណ្តាល ឬស្មើនឹងប្រមាណ១លាននាក់ ដែលមិនមានឯកសារស្របច្បាប់ហើយ​កំពុងប្រឈមការ​កេង​ប្រវ័ញ្ចកម្លាំងពលកម្ម និងបារម្ភពីសមត្ថកិច្ចថៃចាប់ខ្លួន។​

ប្រធាន​កម្មវិធី​ប្រឆាំង​ការ​ជួញដូរ​មនុស្ស និង​ទេសន្តរប្រវេសន៍ នៃ​អង្គការ​សង់ត្រាល់ លោក ឌីថេ ហូយ៉ា ថ្លែងថា ក្នុងចំណោមពលករខ្មែរជាង១លាននាក់ដែលមិនមានឯកសារ​ផ្លូវច្បាប់​នេះគឺមួយចំនួនចូលទៅទឹកដីថៃដោយខុសច្បាប់ និងមួយចំនួនទៀតឯកសារផ្លូវច្បាប់​ផុត​កំណត់តែមិនបានធ្វើបន្ត។​

លោក ឌីថេ អូយ៉ា ថ្លែងថា៖ «តាមការប៉ាន់ប្រមាណរបស់យើងពលករកំពុងធ្វើការងារ​នៅ​ថៃមានជាង២លាននាក់ ហើយក្នុងចំណោមជាង២លាននាក់ហ្នឹង យើងឃើញថា គាត់ផុត​សុពលភាពឯកសារស្របច្បាប់ និងមិនមានឯកសារស្របច្បាប់ហ្នឹងចូលមិនក្រោម​ពី​៥០​ភាគរយទេ ចឹងវាចូលប្រមាណ១លាននាក់»

ពលករដែលរស់នៅ និងធ្វើការងារនៅថៃមិនមានឯកសារស្របច្បាប់ ឬអាចហៅថា​ ខុស​ច្បាប់​នេះ ជួបបញ្ហាប្រឈមច្រើន។ លោក ឌីថេ ហូយ៉ា បញ្ជាក់ថា ពួកគេ​ទទួល​បាន​ប្រាក់​ឈ្នួលពលកម្មទាប និងរួមទាំងប្រឈមមុខការអនុវត្តវិធានការ​ច្បាប់​របស់​អាជ្ញាធរ​ថៃទៀត​ផង។​

លោក ឌីថេ អូយ៉ា៖ «បើប្រាក់ឈ្នួលតាមផ្លូវច្បាប់ឱ្យ៣០០បាតក្នុង១ថ្ងៃអញ្ចឹង! គេអាច​កេង​ប្រវ័ញ្ច​កម្លាំងពលកម្ម​មិនឱ្យប្រាក់ឈ្នួលគ្រប់នេះទី១។ ទី២ ជួញដូរកម្លាំងពលកម្ម​ឱ្យធ្វើការ​លើសម៉ោងជាដើមដោយមិនមានប្រាក់ឈ្នួល។ ទី៣ ការបញ្ឈប់ពីការងារ​ដោយអយុត្តិធម៌​ដោយមិនបានទូទាត់សំណងជាដើម។ ​ទី៤ នៅពេលដែលគាត់មានឯកសារ​គាត់អាចស្វះ​ស្វែង​​រកមេខ្យល់ស៊ីឈ្នួលរត់ឯកសារអីហ្នឹងគាត់អាចចាញ់បោកគេ។ ​ទី៥ គាត់អាចប្រឈម​ការ​អនុវត្តច្បាប់ពីប្រទេសទទួលដែលអនុវត្តចំពោះការចូលក្នុងប្រទេសដែលមិនស្របច្បាប់​ជាដើម»

តាមការចុះផ្សាយរបស់សារព័ត៌មានThe Nation របស់ថៃកាលពីខែកុម្ភៈឆ្នាំ២០១៨ បង្ហាញថា ពលរដ្ឋខ្មែរជាប់ពន្ធនាគារនៅក្នុងប្រទេសថៃមានប្រមាណ២០០០នាក់ ចំណែកពលរដ្ឋថៃ​ជាប់​ពន្ធនាគារនៅកម្ពុជាមានតែ៥២នាក់ប៉ុណ្ណោះ។​

លោក ហ៊ំ ប្រុស អតីតពលករខុសច្បាប់នៅប្រទេសថៃ ហើយបានវិលត្រលប់ចូល​ប្រទេស​កម្ពុជា​វិញ​កាលពីឆ្នាំ២០២២អំឡុងពេលកូវីដ។​ លោកបញ្ជាក់ថា លោកឆ្លងដែនតាមមេខ្យល់​ទៅធ្វើការដោយខុសច្បាប់ជួបបញ្ហាប្រឈមច្រើន ហើយអំឡុងពេលកូវីដកាន់តែមានការ​លំបាកខ្លាំងដោយថៅកែ ឃាត់រូបលោកនៅកន្លែងការងារ៨ខែដោយមិនឱ្យប្រាក់ខែ ហើយ​លោកមិនដឹងតវ៉ាទាមទារនៅទីណា។

ទន្ទឹមនឹងការឃាត់ខ្លួននៅកន្លែងការងារដោយមិនមានប្រាក់ឈ្នួលហើយ លោកត្រូវថៅកែ​ថៃបញ្ជូនត្រលប់មកកម្ពុជាវិញតាមផ្លូវកាត់ត្រូវចំណាយលុយច្រើនកន្លែង។​​

លោក ហ៊ំ ប្រុស៖ «ម្នាក់ថ្លៃឡានអស់២៥០០បាត ហើយឡានហ្នឹងជិះ១២នាក់។ កូនឡាន​កាម៉ារីយើងធម្មតាហ្នឹង១២នាក់។ ទិដ្ឋភាពហ្នឹងយើងដឹងហើយ១២នាក់ កូនឡានហ្នឹង​ជិះតែ​៤ទៅ៦នាក់ទេ។ ​ខាងខ្មែរយើងថា ពលរដ្ឋចេញមកអត់អស់លុយ អត់អីទេ។ ប៉ុន្តែដល់ពួកខ្ញុំ​ចេញមក មួយកន្លែង២០០ កន្លែងខ្លះ ៤០០ ទម្រាំដល់ព្រំដែនខ្មែរអស់១២០០បន្ថែមទៀត ទាំងអស់ អស់៣៧០០បាត។​ អាហ្នឹងតែថ្លៃធ្វើដំណើរទេ ហើយមកដល់ច្រកព្រំដែនគេ​ឃាត់ខ្លួន​មួយយប់ទៀត ម្នាក់៥០០លុយបាតទៀតខាងថៃ»។​

លោកបញ្ជាក់ថា ជីវិតជួបការលំបាកវេទនាខ្លាំងណាស់៖ «លំបាកគឺលំបាកសព្វគ្រប់បែប​យ៉ាង​ហើយ មិនដឹងនិយាយថាម៉េច។ លំបាកទី១ ការងារ លុយកាក់ហ្នឹង»

លោក ហ៊ំ ប្រុស ឱ្យដឹងទៀតថា អំឡុងពេលដែលលោកត្រូវប្តូរទីតាំងពីកន្លែងមួយទៅកន្លែង មួយទៀតដើម្បីរកការងារធ្វើ និងមានការរឹតត្បិតខ្លាំងពីអាជ្ញាធរថៃ នោះធ្វើឱ្យមិត្តរួមការងារ​ជាមួយលោកជាពលករខ្មែរដូចគ្នា ប៉ុនប៉ងសម្លាប់ខ្លួនតែត្រូវអាជ្ញាធរថៃអន្តរាគមន៍ទាន់។​

អ្នកស្រី ទឿន សារ៉ាមានស្រុកកំណើតនៅខេត្តបន្ទាយមានជ័យឱ្យដឹងថា រូបគាត់សម្រេចចិត្ត​ឆ្លងដែន​ខុសច្បាប់ញឹកញាប់។ អ្នកស្រីក៏បានដឹងខ្លះៗពីគ្រោះថ្នាក់ដែលត្រូវឆ្លងដែន​ខុសច្បាប់​ទៅធ្វើការងារនៅប្រទេសថៃដែរ ប៉ុន្តែគាត់ថា ដោយសារមិនមានលុយរៀបចំឯកសារ​ទៅលួច​ឆ្លងដែន​តាមមេខ្យល់ទាំងប្រថុយ។​

អ្នកស្រី ទឿន សារ៉ា៖ «ខ្ញុំទៅខុសច្បាប់ទេ មានលុយឯណាទៅស្របច្បាប់!»។​

លោក ឡឹង សុផុន មន្ត្រីទទួលបន្ទុកពលករទេសន្តរប្រវេសន៍ នៃអង្គការសង់ត្រាល់​ប្រចាំ​ប្រទេសថៃ លើកឡើងថា បញ្ហាចម្បងមួយដែលពលរដ្ឋនៅតែបន្តធ្វើដំណើរ​ទៅរកការងារ​នៅប្រទេសថៃដោយខុសច្បាប់ គឺដោយសារពួកគេខ្វះការយល់ដឹង និងមិនមាន​លុយ​សម្រាប់​រៀបចំឯកសារ។​

លោក ឡឹង សុផុន៖ «សម្រាប់ថ្លៃឯកសារគាត់ត្រូវធ្វើប៉ាស្ទ័រ ត្រូវធ្វើបណ្ណការងារ បណ្ណស៊ីជម្ពូ​ហ្នឹងវា ចំណាយច្រើន។ ការចំណាយច្រើនហ្នឹងហើយវាធ្វើទាំងលំបាកទៀត ជួនការចំណាយ​លុយហើយធ្វើឯកសារមិនបានទៀត»

លោក បន្តថា ពលករខ្មែរនៅថៃភាគច្រើនពឹងឈ្មួញកណ្តាលរត់ការធ្វើឯកសារឱ្យ ចំណែក​តម្លៃ​ទាមទារតាមចិត្តរបស់ឈ្មួញកណ្តាល។​

លោក ឡឹង សុផុន៖ «ដូចជាការតបណ្ណការងារ តវីសា ហ្នឹង បើថៅកែគាត់ធ្វើផ្ទាល់ម៉ងតែ៥​ទៅ៦ពាន់ហ្នឹងចប់ហើយ ហើយថៅកែហ្នឹងក៏បានចំណេញខ្លះដែរ។ តែបើឱ្យ​ឈ្មួញ​កណ្តាល​ធ្វើគាត់ដាក់ ១៥ ០០០ទៅ១៨ ០០០បាតអីចឹងទៅ។​ អាហ្នឹងសម្រាប់ពួកគាត់​ដែលមាន​ប៉ាស្ព័រ​ស្រាប់អីទេ។​ ហើយបើយើងរាប់តាំងធ្វើប៉ាស្ព័រត្រូវគិតថ្លៃផ្សេងទៀត ធ្វើតាមឈ្មួញកណ្តាល ទៅធ្វើនៅស្រុកខ្មែរ»។​​

លោក ឡឹង សុផុន ឱ្យដឹងទៀតថា ពលករខ្មែរជួបការលំបាកជាងពលករមីយ៉ាន់ម៉ា និង​ពលករ​ឡាវ ដោយលោកបញ្ជាក់ថា ពលករខ្មែរពេលធ្វើលិខិតឆ្លងដែន(ប៉ាស្ព័រ) ត្រូវធ្វើត្រលប់​មក​កម្ពុជា​វិញ តែសម្រាប់ពលករមីយ៉ាន់ម៉ា និងពលករឡាវគេអាចធ្វើនៅស្ថានទូតពួកគេ​នៅក្នុង​ប្រទេស​ថៃបាន។

អាជ្ញាធរថៃដោះស្រាយវិវាទការងាររវាងពលករខ្មែរ និងថៅកែថៃនៅ​ក្នុងខេត្តអាយុធ្យា​ប្រទេសថៃ កាលពីថ្ងៃទី២៨ខែមេសា ឆ្នាំ២០២២។ រូបភាពពីហ្វេសប៊ុកស្ថានទូតកម្ពុជា​ប្រចាំប្រទេសថៃ។

តាមសេចក្តីប្រកាសរបស់ក្រសួងការងារថៃបង្ហាញថា ការពន្យារពេលឱ្យពលករបរទេស​បំពេញ​ឯកសារដើម្បីធ្វើការងារស្របច្បាប់នៅក្នុងប្រទេសថៃ ពន្យារពេលដល់ពាក់កណ្តាល​ខែឧសភា ឆ្នាំ២០២៣។ ក្នុងនោះពលករមីយ៉ាន់កំពុងបំពេញឯកសារតែលអាចនឹង​ចប់នៅ​ត្រឹមថ្ងៃទី១៣ខែកុម្ភៈខាងមុខ។

ក្រសួងការងារថៃក៏បានបញ្ជាក់ដែលថា ពលករមកពីប្រទេសកម្ពុជា ឡាវ និងវៀតណាម ភាគច្រើនកំពុងជួបបញ្ហាប្រឈមដូចគ្នាគឺលិខិតឆ្លងដែនផុតកំណត់ដែលធ្វើឱ្យហើយនៅចុងខែកុម្ភៈ ឬ ដើមខែមីនា ដើម្បីរៀបចំនីតិវិធីបន្តជាមួយអាជ្ញាធរថៃ។​

របាយការណ៍ក្រសួងការងារកម្ពុជាបង្ហាញនៅឆ្នាំ២០២២ គឺពលករធ្វើការងារនៅក្រៅប្រទេស​បានផ្ញើលុយមកស្រុកកំណើតចំនួនជាង៣ពាន់លានដុល្លារក្នុង១ឆ្នាំៗ ដែលចំនួននេះបាន​ជួយ​ច្រើន​ដល់ដំណើរការសេដ្ឋកិច្ចក្នុងស្រុក។

បើទោះជារបាយការណ៍របស់អង្គការសង់ត្រាល់បញ្ជាក់ថា ពលករខ្មែរនៅថៃមាន​ជាង២​លាន​នាក់​ក៏ដោយ ប៉ុន្តែរបាយការណ៍ក្រសួងការងារកម្ពុជាបញ្ជាក់ថា ពលករខ្មែរដែលកំពុង​ធ្វើ​ការងារ​នៅក្រៅប្រទេសមានតែ១លាន៣សែននាក់ ក្នុងជាង១លាន២សែននាក់ប៉ុណ្ណោះ​ដែល​កំពុងធ្វើការងារនៅក្នុងប្រទេសថៃក្នុងវិស័យកសិកម្ម សំណង់ នេសាទ និងជាកម្មករ​រោងចក្រ​នៅក្នុងប្រទេសថៃ។​

ខេមបូចាបានទាក់ទងទូរសព្ទទៅស្ថានទូតកម្ពុជាប្រចាំប្រទេសថៃ ដើម្បីសួរពីស្ថានភាព ពលករ​នៅទីនោះ តែមិនមានអ្នកទទួល ខណៈលេខទូរសព្ទរបស់ស្ថានអគ្គកុងស៊ុលកម្ពុជា ប្រចាំខេត្តសាកែវ ប្រទេសថៃ ដែលដាក់នៅលើទំព័រហ្វេសប៊ុកផ្លូវការរបស់ខ្លួននោះ គឺមិនមាន​ក្នុងប្រព័ន្ធផងទេ។ ជាមួយគ្នានេះ ក្រុមការងារក៏បានផ្ញើសារតាមរយៈទំព័រហ្វេសប៊ុកផ្លូវការ​ទៅកាន់ស្ថាប័នទាំងពីរខាងលើនេះ អស់រយៈពេលជាង១សប្តាហ៍មកហើយ ក៏មិន​មានអ្នក​ឆ្លើយតប ដោយគ្រាន់តែមានលោតសញ្ញាបញ្ជាក់ថាមានអ្នកបានចូលអានសារ។ 

ឆ្លើយនឹងសំណួររបស់អ្នកសារព័ត៌មានខេមបូចា លោក ហេង សួរ​ អ្នកនាំពាក្យ​ក្រសួងការងារ​កម្ពុជា មិនបានបញ្ជាក់ថា ពលករខ្មែរដែលផុតឯកសារស្របច្បាប់ និងមិនមាន​ឯកសារ​ស្រប​ច្បាប់​នៅប្រទេសថៃមានប៉ុន្មាននាក់នោះទេ ប៉ុន្តែលោកឱ្យដឹងថា ពលករខ្មែរនៅថៃមាន​បណ្ណ​ស៊ីជម្ពូមាន១១ម៉ឺននាក់។ លោកឱ្យដឹងទៀតថា ចំណែកពលករដែលទៅធ្វើការងារតាមរដូវ  ទៅព្រឹកវិលល្ងាច ដែលស្នាក់នៅក្នុងប្រទេសថៃហួសការកំណត់មានតែ៣ម៉ឺននាក់ប៉ុណ្ណោះ។​

លោក ហេង សួរ បន្តថា ប្រទេសទាំងពីរកម្ពុជា និងថៃ មានកិច្ចព្រមព្រៀងយកចិត្តទុកដាក់​ការពារសិទ្ធិពលករ ធ្វើឱ្យមិនសូវមានបញ្ហាជម្លោះការងារដូចកាលពីជាង១០ឆ្នាំមុនទេ។​

លោក ហេង សួរ៖ «តាមការព្រមព្រៀងជាមួយភាគីថៃ បងប្អូនពលករដែលកាន់បណ្ណស៊ីជម្ពូ​គឺចាត់ទុក​ជាពលករដែលមានសិទ្ធិពេញលេញ និងទទួលបានការការពារពេញ​លេញពីច្បាប់​របស់ថៃ។ ប្រទេសថៃក៏ជាប្រទេសនាំចេញផលិតផលកែច្នៃម្ហូបអាហារ គ្រឿងសមុទ្ទ និង​កសិកម្ម​ទៅអឺរ៉ុប អាមេរិក និងប្រទេសអ្នកមានផ្សេងទៀត។ ដើម្បីនាំចេញ រោងចក្រ និង​រដ្ឋាភិបាលថៃក៏មានកាតព្វកិច្ចគោរព និងការពារសិទ្ធិពលករទេសន្តប្រវេសន៍»។​

លោក ឌិន ពុទ្ធីប្រធានសមាគមពង្រឹងសេដ្ឋកិច្ចក្រៅប្រព័ន្ធថ្លែងថា ពលករឆ្លងដែន​ខុសច្បាប់​ទៅប្រទេសថៃ ដើម្បីស្វែងរកការងារធ្វើមិនមានការថយចុះទេ។ លោកថា ពលករទាំងនោះ​ប្រឈមការជំរិតទារប្រាក់ពីអាជ្ញាធរ ការកេងប្រវ័ញ្ចពីថៅកែថៃ និងប្រឈមការចាប់ខ្លួន។​

លោក ឌិន ពុទ្ធី ជំរុញឱ្យអាជ្ញាធរយកចិត្តទុកដាក់ការពារសិទ្ធិពលករខ្មែរ។ លោកបន្តថា បើ​ពលករជួបការលំបាក ពួកគេផ្ញើលុយមកស្រុកបានតិចក៏ជាផ្នែកមួយប៉ះពាល់​ដល់​ចំណូល​ក្នុងស្រុកដែរ។​

លោក ឌិន ពុទ្ធី៖ «យឺតយ៉ាវឯកសារ ឬពួកគាត់រងគ្រោះដោយសារមេខ្យល់បោកប្រាស់អីហ្នឹង ហើយពួកមន្ត្រីនៅតាមព្រំដែនបើកទ្វារឱ្យពួកគាត់ចេញ ហើយជំរិតយកលុយច្រើនៗ ហើយ​គាត់​ចេញទៅរងគ្រោះទៀតគឺជាការខាតបង់គ្រួសារខ្មែរធ្ងន់ធ្ងរណាស់។ កាលណា​គាត់អត់​មានប្រាក់ចំណូលគាត់លក់ដីស្រែ គាត់អត់មានលុយទិញម្ហូបអាហារ អត់មានលុយ​ទិញ​សម្លៀកបំពាក់ស្អាតៗ ឬទំនិញនៅលើទីផ្សារ ព្រោះទំនិញទីផ្សារបង់ពន្ធឱ្យរដ្ឋ [អ៊ី]ចឹងរាស្ត្រ​ក៏ខាត រដ្ឋក៏ខាតដូចតែគ្នាទេ»។​​

កម្ពុជាមានខេត្តជាប់ព្រំដែនជាមួយថៃចំនួន៧គឺខេត្តកោះកុង ពោធិ៍សាត់ បាត់ដំបង ប៉ៃលិន ព្រះវិហារ បន្ទាយមានជ័យ និង​ឧត្តរមានជ័យ។​ ក្នុងចំណោមខេត្តទាំងនេះគឺច្រកព្រំដែន​ខេត្តបន្ទាយមានជ័យមានពលរដ្ឋខ្មែរឆ្លងដែនទៅធ្វើការងារនៅក្នុងប្រទេសថៃច្រើនជាងគេ។

របាយការណ៍អាជ្ញាធរខេត្តបន្ទាយមានជ័យនៅឆ្នាំ២០២២ បង្ហាញថា ពលរដ្ឋខ្មែររាប់ពាន់នាក់​ឆ្លងដែនក្នុង១ថ្ងៃៗទៅរកការងារធ្វើនៅក្នុងប្រទេសថៃក្រោយស្ថានភាពកូវីដធូរស្រាល ហើយ​ក្នុង​នោះប្រមាណ៧០ភាគរយឆ្លងដែនដោយខុសច្បាប់។

ថៃជាប្រទេសមួយនៅក្នុងតំបន់អាស៊ីប៉ាស៊ីហ្វិកដែលមានពលរដ្ឋនៅប្រទេសក្បែរខាងសម្រុកទៅរកការងារធ្វើមានចំនួនច្រើន។ ស្របពេលដែលការឆ្លងដែនមានទាំងខុសច្បាប់​និង​ស្រប​ច្បាប់​នេះ ការរំលោភបំពានលើសិទ្ធិ និងការជួញដូរកម្លាំងពលកម្មនៅក្នុងប្រទេសថៃ​ក៏​ក្លាយ​ជាក្តីបារម្ភមួយនៅក្នុងតំបន់។​

កាលពីឆ្នាំ២០១៤ អង្គការអន្តរជាតិខាងការងារ(ILO) ការិយាល័យប្រចាំតំបន់អាស៊ី និង​ប៉ាស៊ីហ្វិក បានបោះពុម្ពសៀវភៅណែនាំជាភាសាខ្មែរស្តីពីការទៅធ្វើការងារ​ដោយវ័យឆ្លាត​និងសុវត្ថិភាពនៅក្នុងប្រទេសថៃ។ សៀវភៅនេះ បានលើកឡើងថា ថៃជាគោលដៅដែល​ពលករ​ពីប្រទេសជិតខាងទៅស្វែងរកការងារធ្វើ ហើយមួយចំនួនក៏រងការរំលោភបំពាន​សិទ្ធិ​ធ្ងន់ធ្ងរ។​ អង្គការអន្តរជាតិមួយនេះបញ្ជាក់ថា មិនថាពលករឆ្លងដែនដោយខុសច្បាប់ ឬស្រប​ច្បាប់ទេគឺមានសិទ្ធិការពារខ្លួនមិនឱ្យគេរំលោភបំពានដូចគ្នា។​

សៀវភៅណែនាំរបស់ILO រំឭកដល់ពលករចំណាកស្រុកទៅថៃទាំងនោះ ត្រូវការងារនៅ​កន្លែង​ដែលមានកិច្ចសន្យាច្បាស់លាស់ដែលកិច្ចសន្យាត្រូវមាន ឈ្មោះពលករខ្លួនឯង ឈ្មោះ​ថៅកែ កន្លែងការងារ ម៉ោងធ្វើការ ចំនួនប្រាក់ខែ និងភារកិច្ចដែលទទួលខុសត្រូវជាដើម។​

​ងាកមកតាមដានអារម្មណ៍អតីតពលករទៅថៃដែលទើបត្រលប់មកវិញនាអំឡុងវិបត្តិកូវីដឆ្នាំ​២០២២ លោក ហ៊ំ ប្រុស នៅតែមានអារម្មណ៍ភ័យខ្លាចមិនហ៊ានទៅធ្វើការងារនៅ​ស្រុកថៃ​ទៀត​ទេ។

លោក ហ៊ំ ប្រុស វ័យ៣៧ឆ្នាំ ឱ្យដឹងថា លោកនឹងរៀបការនៅខែមីនា ខាងមុខ ហើយ​ជ្រើសរើសយកការប្រកបរបរនៅក្នុងប្រទេសជាជាងនាំប្រពន្ធទៅធ្វើការងារនៅក្នុង​ប្រទេសថៃ។​ លោក ហ៊ំ ប្រុស បញ្ជាក់ថា៖ «មិនយកប្រពន្ធ យកគ្រួសារទៅថៃនាំតែពិបាកទេ សុខចិត្តបាន​តិច បាន​ច្រើន​នៅស្រុកខ្មែរយើងហើយ។ គេរស់កើតយើងក៏រស់កើតដូចតែគ្នាហ្នឹង។ ​ទៅស្រុក​គេ​វេទនាណាស់»

740 views

ព័ត៌មានទាក់ទង

ព័ត៌មានថ្មីៗ

អត្ថបទពេញនិយម