សមាគមសម្ព័ន្ធអ្នកសារព័ត៌មានកម្ពុជា

អាជីវករផ្សារអូរឫស្សីដាក់ញត្តិសុំអន្តរាគមន៍ពីនាយករដ្ឋមន្រ្តី ក្រោយតម្លៃតូបអាណត្តិថ្មីឡើងថ្លៃ

អាជីវករផ្សារអូរឫស្សីកាន់រូបថតលោកនាយករដ្ឋមន្រ្តីនិងសម្ដេចគតិព្រឹត្តិបណ្ឌិត ខណៈពួកគេទៅដាក់ញត្តិដើម្បីសុំអន្តរាគមន៍ឱ្យបញ្ចុះតម្លៃតូប រាជធានីភ្នំពេញ។ រូបថតថ្ងៃទី១៥ ខែសីហា ឆ្នាំ២០២២។ ខេមបូចា/ សុវណ្ណ ស្រីពេជ្រ
អាជីវករផ្សារអូរឫស្សីកាន់រូបថតលោកនាយករដ្ឋមន្រ្តីនិងសម្ដេចគតិព្រឹត្តិបណ្ឌិត ខណៈពួកគេទៅដាក់ញត្តិដើម្បីសុំអន្តរាគមន៍ឱ្យបញ្ចុះតម្លៃតូប រាជធានីភ្នំពេញ។ រូបថតថ្ងៃទី១៥ ខែសីហា ឆ្នាំ២០២២។ ខេមបូចា/ សុវណ្ណ ស្រីពេជ្រ

អាជីវករផ្សារអូរឫស្សីប្រមាណ១០០នាក់នៅព្រឹកថ្ងៃចន្ទបានប្រមូលផ្ដុំគ្នាដាក់ញត្តិ​ស្នើ​សុំ​កិច្ចអន្តរាគមន៍​ពី​នាយករដ្ឋមន្រ្តី ហ៊ុន សែន ដើម្បីឱ្យជួយបញ្ចុះតម្លៃតូបលក់មកត្រឹម​ពាក់​កណ្ដាល​នៃតម្លៃ​ដែល​ប្រធានផ្សារបានកំណត់ ពីព្រោះពួកគេគ្មានលទ្ធភាពនិងម៉្យាងទៀតកូវីដ​ទើប​ធូរស្បើយ។

យោងតាមតំណាងអាជីវករផ្សារអូរឫស្សីបានឱ្យដឹងថា អាជីវករចំនួន១ ៣០០នាក់ ស្នើសុំ​អន្តរាគមន៍ទៅរដ្ឋាភិបាលបន្ធូរបន្ថយបង់ថ្លៃតូបមកត្រឹម៥០% នៃតម្លៃ​អាណត្តិចាស់​ឆ្នាំ២០០០ និងសុំបន្តសុពលភាពអាណត្តិថ្មីរហូតឆ្នាំ២០៤០ ក្រោមមូលហេតុតម្លៃតូបដែល​ទើបកំណត់ថ្មី​នេះថ្លៃ និងដោយសារសេដ្ឋកិច្ចអាជីវករមិនអំណោយផល។

ជាអាជីវករមួយរូបលោក តាំង គឹមពា បានអះអាងថា ការប្រមូលផ្ដុំគ្នាមកដាក់ញត្តិទៅ​នាយករដ្ឋមន្រ្តី គឺដើម្បីស្នើទៅរដ្ឋាភិបាលឱ្យអនុគ្រោះចុះតម្លៃតូបមកត្រឹមពាក់កណ្ដាលនៃ​តម្លៃ​ដែលបានកំណត់ ព្រោះអាជីវករមិនមានលទ្ធភាពបង់ប្រាក់ក្នុងចំនួនច្រើនបែបនេះឡើយ។

លោក គឹមពា ថ្លែងថា៖ «យើងធ្វើញត្តិមកសុំឱ្យសម្ដេចជួយ ព្រោះអាជីវករយើងក្រោយ​ពី​កូវីដ​មកមានការខ្វះខាត ធម្មតាអាជីវករម្នាក់ៗអត់ដូចគ្នាទេ អ្នកខ្លះជំពាក់បំណុលគេ អ្នកខ្លះមាន​ទុក្ខ​លំបាកផ្សេងៗគ្នា»។

អាជីវកររូបនេះបន្ថែមថា ថ្វីបើរដ្ឋបាលរាជធានីភ្នំពេញផ្ដល់ជម្រើ៣ឱ្យអាជីវករ​បង់ថ្លៃតូបក៏​ដោយ ក៏អាជីវករមិនមានលទ្ធភាពបង់ថ្លៃដែរ​ ដោយសារតែតម្លៃតូបមានការឡើងថ្លៃ១០% ហើយពួកគេលក់មិនកាក់កប បន្ទាប់ពីបញ្ហាកូវីដបានស្រាកស្រាន្ត។

លោក គឹមពា បន្ថែមថា៖ «ការរំលោះហ្នឹង ខ្ញុំហើយអាជីវករទាំងអស់គិតទៅតម្លៃហ្នឹង​វាច្រើន​មិនអាចទទួលយកបាន ចឹងបានមកសុំសម្ដេចឱ្យជួយសម្រួលតម្លៃដើម យើងក៏វាធូរ​បន្ទុក​ដែរ»។

ចំណែកអាជីវករមួយរូបទៀតគឺអ្នកស្រី ឈុន អ៊ី​ ប្រាប់ឱ្យដឹងថា អ្នកស្រីចាប់ផ្ដើម​អាជីវកម្ម​លក់​ដូរ​នៅផ្សារអូរឫស្សីអស់១២ឆ្នាំមកហើយ។ ចំពោះការតំឡើងថ្លៃតូបនេះ អ្នកស្រីមិនមាន​លទ្ធភាព​បង់ឡើយ ដោយសារតែការលក់ដូរមិនដាច់ដូចមុនដោយសារតែបញ្ហាកូវីដ ដូច្នេះ​ទើប​នាំគ្នាដាក់ញត្តិទៅថ្នាក់ដឹកនាំសុំបញ្ចុះតម្លៃពាក់កណ្ដាល។

អ្នកស្រីថ្លែងថា៖ «គាត់ទារតម្លៃហ្នឹងដូចលើសពេកហើយ សូមឱ្យសម្ដេចចុះតម្លៃ៥០%​នៃតម្លៃ​តូប កូវីដផងអីផងអ្នកណាទៅមានលុយហ៎ តូបថ្លៃមិនអាចទទួលយកបានទេ​ហើយឥឡូវ​លក់​អត់ដាច់ទេគេទិញតែតាមអនឡាញ»។

អ្នកស្រីបន្តថា អ្នកស្រីធ្លាប់ឮសម្ដេចប្រកាសថា មិនឱ្យយកថ្លៃតូបចំពោះអ្នកលក់ដូរនៅ​ផ្សាររដ្ឋ​ឡើយ បើសិនជាអាចសូមកុំយកលុយថ្លៃតូបអីព្រោះអាជីវករលក់ដូរយូរឆ្នាំមកហើយ។

អ្នកស្រីបន្ថែមថា៖ «ខ្ញុំចង់ឱ្យសម្ដេចជួយមិនឱ្យបង់ ព្រោះកូនចៅអត់មានលុយទេ និយាយទៅ​តាំង​ពីជំនាន់ពីដើមមកយើងទិញតូបមានអាណត្តិ២០ឆ្នាំ តែខ្ញុំឮសម្ដេចផ្សាយថា​អត់ត្រូវបង់​លុយ​ទៀតទេគ្រប់ផ្សាររដ្ឋទាំងអស់»។

អាជីវករស្រីប្រុសអង្គុយនិងឈររង់ចាំដាក់ញត្តិនៅខុទ្ទការល័យលោកនាយករដ្ឋមន្រ្តីហ៊ុន សែន នៅក្បែរវត្តបទុម រាជធានីភ្នំពេញ។ រូបថតថ្ងៃទី១៥ ខែសីហា ឆ្នាំ២០២២។ខេមបូចា/ សុវណ្ណ ស្រីពេជ្រ

បើតាមរដ្ឋបាល​រាជធានី​ភ្នំពេញ​ ​បាន​ផ្ដល់​ជម្រើស​៣​ចំណុច​សម្រាប់​អាជីវករ​ផ្សារ​អូរ​ឫស្សី​ជ្រើសរើស​ ​ដើម្បី​បញ្ចប់​ការ​តវ៉ា​ ​ដែល​អាជីវករ​ក្នុង​ផ្សារ​បាន​ទាមទារ​ចំនួន​៤​ ​រួម​មានកំណត់​អាណត្តិ​២​០​ឆ្នាំ​បន្ត​ទៀត​ ​ផ្តល់​ប​ណ្ណ​តូប​កម្មសិទ្ធិ​ផ្ទាល់ខ្លួន​ដូចមុន​ ​ស្នើសុំ​បង់​ត្រឹម​៥​០​%នៃ​តម្លៃ​អាណត្តិ​ចាស់​ ​និង​ស្នើ​ឱ្យ​ជួសជុល​ផ្សារ​នៅ​ឆ្នាំ​២​០​២​៣​បន្ទាប់ពី​បង់​អាណត្តិ​ថ្មី​រួចរាល់​។​

​ជុំវិញករណីនេះ​ ប្រធាន​ផ្សារ​អូរ​ឫស្សី​ ​លោក​ ​ហ៊​ត​ ​វ៉ាន់​ធី​ ថ្លែងប្រាប់ ខេមបូចា ថា អាជីវករនៅ​ផ្សារអូរឫស្សីមានប្រមាណ៥ពាន់តូប ខណៈអ្នកដែលទៅតវ៉ារឿងតម្លៃតូបអាណត្តិថ្មីមានមិន​ដល់១០០នាក់ផង។

លោកបន្តថា ខាងគណៈកម្មការផ្សារបានដោះស្រាយ និងសម្រួលជូនអាជីវករតាមដែលអាច​ធ្វើ​ទៅ​បានហើយ មានតែអាជីវករប្រមាណ១០០នាក់ប៉ុណ្ណោះ​ដែលមិនមានឆន្ទៈ​ក្នុងការ​ចូល​រួម ខណៈអាជីវករផ្សេងមិនមានការតវ៉ាអ្វីឡើយ។

លោកអះអាងថា តម្លៃដែលដាក់ជូន គឺមិនលើសពីលទ្ធភាពអាជីវករឡើយ ហើយក្នុង​លក្ខខណ្ឌ​មិនទាន់​មានលទ្ធភាព រដ្ឋបាលរាជធានីភ្នំពេញមានជម្រើសឱ្យ៣ គឺបង់ផ្ដាច់បង់​១០ឆ្នំា​ម្ដង និងបង់៥ឆ្នាំម្ដង។ 

លោកថ្លែងថា៖ «អ្វីដែលសមហេតុផលគឺថ្នាក់ដឹកនាំបានដោះស្រាយជូនហើយ តែគាត់នៅតែ​មិនព្រមមិនដឹងធ្វើម៉េច បើគាត់អេចអូចមិនប្រឹងរកស៊ីប្រឹងតែអ៊ីចឹង ផ្សេងៗគេយល់គេអត់ចូល​រួម​ជាមួយទេ វាហួសហេតុពេក ទារម៉ែឪទារប្រុងម៉េចខ្ញុំឆ្ងល់គាត់ដែរ»។

ចំណែកលោក គង់ ចម្រើន មន្ត្រីខុទ្ទកាល័យនាយករដ្ឋមន្រ្តី បញ្ជាក់ប្រាប់ថា លោក​មិន​ទាន់​មានចម្លើយសម្រាប់ញត្តិរបស់អាជីវករផ្សារអូរឫស្សីទេ ដោយសារតែលោកទើបតែ​ទទួល​លិខិត និងទើបបញ្ជូនបន្តទៅលោកនាយករដ្ឋមន្រ្តី។

លោកថ្លែងថា៖ «បាទ ខ្ញុំកំពុងបញ្ជូនលិខិតសិន ដល់តែខ្ញុំបញ្ជូនលិខិតដល់គោលដៅ ហើយ​បាន​គោលដៅសម្រចយ៉ាងណា បានសួរទៀតបាន ព្រោះព្រឹកមិញនៅវត្តបទុម ត្រូវយក​ឯកសារហ្នឹងមកតាខ្មៅ»។

អាជីវករផ្សារអូរឬស្សីប្រមាណ១០០នាក់ នាំគ្នាមកដាក់ញត្តិសុំកិច្ចអន្តរាគមន៍​ពីនាយករដ្ឋមន្ត្រី​ឱ្យបញ្ចុះតម្លៃតូប រាជធានីភ្នំពេញ។ រូបថតថ្ងៃទី១៥ ខែសីហា ឆ្នាំ២០២២។ ខេមបូចា/ សុវណ្ណ ស្រីពេជ្រ

ចំណែកអ្នកនាំពាក្យរដ្ឋបាលរាជធានីភ្នំពេញ លោក ម៉េត មាសភក្ដី មិនអាចទាក់ទង​សុំការ​បំភ្លឺបានឡើយនៅរសៀលថ្ងៃទី១៥ សីហា ឆ្នាំ២០២២នេះ។

ដោយឡែក សេចក្ដីប្រកាសរបស់រដ្ឋបាលរាជធានីភ្នំពេញកន្លងមក បាន​បញ្ជាក់​ថា ​អាជីវករ​អាច​បន្ត​លក់ដូរ​រហូត​ត​កូន​ត​ចៅ​ក្នុង​អំឡុង​ពេល​អាណត្តិ​នៃ​កិច្ច​សន្យា​ ​ហើយ​អាច​ផ្ទេរ​សិទ្ធិ​កាន់កាប់​ ​ប្រើប្រាស់​ ​និង​អាស្រ័យ​ផល​ទៅ​កូនចៅ​ ​ឬ​អ្នកដទៃ​បាន​។​

សេចក្ដីប្រកាសដដែល ​ចំពោះ​តម្លៃ​នៃ​ការ​បង់​រយៈពេល​២​០​ឆ្នាំ​ ​គឺជា​តម្លៃ​កាលពី​២​០​ឆ្នាំមុន​ ​ដែល​អាជីវករ​ធ្លាប់​បាន​បង់​រួចមកហើយ។ ចំណែក​ប្រភេទ​តូប​ ​ឬ​ស្តង់​តម្លៃ​ខ្ពស់​បំផុត​មាន​តម្លៃ​ ​៣​​ ៣​០​០​ដុល្លារ​ ​ក្នុងរយៈពេល​២​០​ឆ្នាំ​ ​បើ​ចែក​ជាប្រចាំ​ឆ្នាំ​ ​គឺ​ទឹកប្រាក់​ដែល​ត្រូវ​បង់​ចំនួន​១៦៥​ដុល្លារ​​ក្នុង​មួយ​ឆ្នាំ​ ​តែ​បើ​ចែក​ជា​ខែ​ត្រូវ​បង់​១​៣​,​៧៥​ ​ដុល្លារ​ ក្នុង​មួយ​ខែ​ ​ហើយ​បើ​ចែក​ជា​ថ្ងៃ​ត្រូវ​បង់​០,​៤​៥​ដុល្លារ​ក្នុង​មួយ​ថ្ងៃ​ ​ឬ​ស្មើ​​១​,​៨​០​០​រៀល​តែប៉ុណ្ណោះ។​

គួរជម្រាបជូនថា​ អាជីវករផ្សារអូរឫស្សី បានផ្ទុះការតវ៉ា ជុំវិញការតំឡើងថ្លៃតូបអាណត្តិថ្មី។ តែបើយោងតាមលិខិតរបស់គណៈកម្មការផ្សារអូរឫស្សី ប្រកាសកាលពី​ថ្ងៃ​ទី​១​៨​ ​ខែ​កក្កដា​ តម្រូវ​ឱ្យ​អាជីវករ​ដែល​ជា​ម្ចាស់​តូបនៅផ្សារអូរឫស្សី​ទាំងអស់បំពេញបែបបទ ​នៃ​កិច្ចសន្យា​ជួលតួបនៅអាណត្តិថ្មី​ ​គិត​ចាប់ពី​ចុងខែ​ធ្នូ​ ​ឆ្នាំ​២​០​២​២​ ​រហូតដល់​ថ្ងៃ​ទី​៣​១​ ​ខែ​ធ្នូ​ ​ឆ្នាំ​២​០​៤​២​។​

លិខិតដដែលបញ្ជា់ថា ​ចំពោះ​ការ​បង់​ប្រាក់​សម្រាប់​អាណត្តិ​ថ្មី​នៃ​កិច្ចសន្យា​ ​​អាជីវករ​អាច​ធ្វើការ​បង់​ទៅតាម​លទ្ធភាព​ជាក់ស្តែង ​ដោយ​អាច​ជ្រើសយកជម្រើស​មួយ​ក្នុងចំណោម​​ជម្រើស​០៣ ដែលគណៈកម្មការផ្សារផ្ដល់ឱ្យ៖​ ​ទី​១)​ ​បង់​ប្រាក់​១​លើក​ ​សម្រាប់​អាណត្តិ​រយៈពេល​២​០​ឆ្នាំ​ ​ទី​២​) ​បង់​ប្រាក់​​២​លើក​ ​សម្រាប់​អាណត្តិ​រយៈពេល​២​០​ឆ្នាំ​ ​ដោយ​បង់​១​០​ឆ្នាំ​ម្តង​ ​ទី៣)​ ​បង់​ប្រាក់​០​៤​លើក​ ​សម្រាប់​អាណត្តិ​រយៈពេល​២​០​ឆ្នាំ​ ​ដោយ​បង់​០​៥​ឆ្នាំ​ម្តង​។​

ជុំវិញតម្លៃតូបដែលតម្រូវឱ្យអាជីវករបង់នូវក្នុងអាណត្តិថ្មីនេះ ​ គឺមាន៥ប្រភេទនៃតូបលក់ រីឯ តម្លៃវិញចាប់ពី ២​,​១​៧​៨​ដុល្លារ​ ទៅដល់៣​,​៦​៣​០​ដុល្លារ​ សម្រាប់កិច្ចសន្យា២០ឆ្នាំ ៕

247 views

ព័ត៌មានទាក់ទង

ព័ត៌មានថ្មីៗ

អត្ថបទពេញនិយម