សមាគមសម្ព័ន្ធអ្នកសារព័ត៌មានកម្ពុជា

កូដករក្រុមហ៊ុនណាហ្គាវើលដ៍ប្រមាណ៦០នាក់ ត្រូវបានឃុំខ្លួនដើម្បីធ្វើចត្តាឡីស័ក បន្ទាប់ពីធ្វើកូដកម្មឡើងវិញ

បុគ្គលិកក្រុមហ៊ុនណាហ្គាវើលដ៍ស្រែកសុំឲ្យជួយ ខណៈអាជ្ញាធរបង្ខំឲ្យពួកគេចូលក្នុងឡានក្រុងមួយ។ ប៉ូលិសនិងមន្រ្តីដទៃទៀតបានឃុំខ្លួនក្រុមនយោជិតនេះ ស្របពេលពួកគេវិលត្រឡប់មកធ្វើកូដកម្មឡើងវិញក្បែរអគារក្រុមហ៊ុនកាស៊ីណូណាហ្គាវើលដ៍ ក្នុងរាជធានីភ្នំពេញ កាលពីថ្ងៃទី២១ ខែកុម្ភៈ ឆ្នាំ២០២២។ ខេមបូចា/ ព្រីង សំរាំង
បុគ្គលិកក្រុមហ៊ុនណាហ្គាវើលដ៍ស្រែកសុំឲ្យជួយ ខណៈអាជ្ញាធរបង្ខំឲ្យពួកគេចូលក្នុងឡានក្រុងមួយ។ ប៉ូលិសនិងមន្រ្តីដទៃទៀតបានឃុំខ្លួនក្រុមនយោជិតនេះ ស្របពេលពួកគេវិលត្រឡប់មកធ្វើកូដកម្មឡើងវិញក្បែរអគារក្រុមហ៊ុនកាស៊ីណូណាហ្គាវើលដ៍ ក្នុងរាជធានីភ្នំពេញ កាលពីថ្ងៃទី២១ ខែកុម្ភៈ ឆ្នាំ២០២២។ ខេមបូចា/ ព្រីង សំរាំង

នៅ​ពេល​សមាជិក​សហជីព​ក្រុមហ៊ុន​ណាហ្គាវើលដ៍​ព្យាយាម​ធ្វើ​កូដកម្ម​ឡើង​វិញ​កាល​ថ្ងៃ​ចន្ទ ប៉ូលិស​បាន​ប្រើប្រាស់​ហេតុផល​សុខភាព​សាធារណៈ​ ដើម្បី​ឃុំ​ខ្លួន​កូដករ​ប្រមាណ ៦០​នាក់ ដោយ​ចាប់​ខ្លួន​ពួកគេ​ឡើង​រថយន្ត​ក្រុង​មួយ​ និង​នាំ​ខ្លួន​ទៅ​កាន់​មណ្ឌល​ចត្តាឡីស័ក​នៅ​ជាយ​រាជធានី​ភ្នំពេញ។ ​

​​កាល​ពី​ថ្ងៃ​ចន្ទ នគរបាល​ និង​កងកម្លាំង​សន្តិសុខ​ដទៃ​ទៀត​បាន​បិទ​ផ្លូវ​ជិត​អគារ​ក្រុមហ៊ុន​កាស៊ីណូ​ណាហ្គាវើលដ៍ ដើម្បី​រារាំង​ការ​ធ្វើ​កូដកម្ម​សាជាថ្មី​ដោយ​ក្រុម​កូដករ។ ក្រុម​កូដករ​ដែល​ត្រូវ​បាន​ឃុំខ្លួន​ បាន​ប្រឈម​គ្នា​ជាមួយ​អាជ្ញាធរ​នៅ​ចំណុច​ប្រសព្វ​រវាង​មហាវិថី​សុធារស​និង​មហាវិថី​សីហនុ។ ​

ក្រុម​អង្គការ​សង្គមស៊ីវិល​ ដែល​តាមដាន​ការ​ធ្វើ​កូដកម្ម បាន​ឃើញ​អាជ្ញាធរ​ចាប់​ទាញ​​បុគ្គលិក​ក្រុមហ៊ុន​ណាហ្គាវើលដ៍​ចូល​ក្នុង​រថយន្ត​ក្រុង។ វីដេអូ​ឃ្លីប​ពី​ការ​ចាប់​ខ្លួន​នេះ​ ដែល​ត្រូវ​បាន​បង្ហោះ​លើ​បណ្តាញ​សង្គម​ហ្វេសប៊ុក​ បង្ហាញ​អាជ្ញាធរ​ស្លៀកក្នុង​សម្លៀកបំពាក់​ធម្មតា ស្រែក​មក​លើ​អ្នក​នៅ​លើ​រថយន្ត​ក្រុង​ថា ការ​ប្រមូលផ្តុំ​ត្រូវ​បាន​ហាមឃាត និង​ថា ក្រុម​បុគ្គលិក​ណាហ្គាវើលដ៍​នឹង​ត្រូវ​បញ្ជូន​ទៅ​ធ្វើ​ចត្តាឡីស័ក។

គេ​បាន​ឮ​សម្តី​ស្រី​ម្នាក់​ ​មុន​ពេល​ស្រ្តី​រូប​នេះ​ត្រូវ​បាន​អាជ្ញាធរ​អូសទាញ​ចូល​ក្នុង​រថយន្ត​ក្រុង ​និយាយ​ថា៖ «ខ្ញុំ​មិន​យល់​ទេ យើង​បាន​ធ្វើ​តេស្ត​អវិជ្ជមាន​ពីរ​ដង​ និង​ធ្វើ​ចត្តាឡីស័ក​រួច​ហើយ។ យើង​គ្រាន់​តែ​ត្រូវ​ការ​អាហារ​បី​ពេល​ក្នុង​មួយ​ថ្ងៃ ដោយសារ​ក្រពះ​យើង​ឃ្លាន ហេតុអី​បាន​ជា​ប៉ូលិស​បំពាន​ដោយ​ប្រើ​កម្លាំង​ដូច​នេះ

បន្ទាប់​ពី​កូដករ​ម្នាក់​ត្រូវ​បាន​ធ្វើ​តេស្ត​ឃើញ​វិជ្ជមាន​ជំងឺ​កូវីដ១៩ កាល​ពី​ថ្ងៃ​ទី៤ ខែ​កុម្ភៈ​ អំឡុងពេល​ពិនិត្យ​ផ្ទៃ​ពោះ​ធម្មតា មន្រ្តី​សុខាភិបាល​ទាមទារ​ឲ្យ​កូដករ​ដទៃ​ទៀត​ធ្វើ​តេស្ត​ និង​ដាក់​ខ្លួន​ដោយ​ឡែក​មួយ​សប្តាហ៍ បើ​ទោះ​បី​លទ្ធផល​តេស្ត​រកឃើញ​​ថា អវិជ្ជមាន​ក៏​ដោយ។ កូដករ​ដែល​ធ្វើ​តេស្ត​ឃើញ​វិជ្ជមាន​ រាយការណ៍​ថា ខ្លួន​មិនបាន​មក​ចូលរួម​កូដកម្ម​បី​សប្តាហ៍​ទៅ​ហើយ​ ​មុន​ពេល​រក​ឃើញ​វិជ្ជមាន​កូវីដ១៩។ កូដកម្ម​កាល​ពី​ថ្ងៃ​ចន្ទ គឺ​ជាការ​​ត្រឡប់​មក​វិញ​សាជាថ្មី​របស់​បុគ្គលិក​ណាហ្គាវើលដ៍ បន្ទាប់​ពី​គោរព​តាម​បទបញ្ជា​របស់​សាលារាជធានី​ភ្នំពេញ និង​ក្រសួង​សុខាភិបាល។ ​

ស្រប​ពេល​ដូចគ្នា​នេះ​ដែរ មេធាវី​តំណាង​ឲ្យ​កូដករ​ណាហ្គាវើលដ៍​បួន​នាក់ ដែល​ត្រូវកោះហៅ​ឲ្យ​បង្ហាញ​ខ្លួន​ដើម្បី​សាកសួរ កាល​ពី​ថ្ងៃ​សុក្រ​សប្តាហ៍​មុន ពីបទចោទប្រកាន់​រារាំង​វិធានការ​សុខាភិបាល ត្រូវ​បាន​នគរបាល​ប្រាប់​ឲ្យ​ត្រឡប់​ទៅ​វិញ​ ដោយ​និយាយ​ថា រឿងក្តី​របស់​ពួកគេ​ត្រូវ​បាន​បញ្ជូន​ទៅ​តុលាការ​រួច​ហើយ។ ​

​លោក កើត​ ឆែ អភិបាល​រង​រាជធានីភ្នំពេញ បាន​ប្រាប់​ ខេមបូចា ថាក្រុមកូដករ​ត្រូវ​បាន​នាំខ្លួន​ទៅ​កាន់​មណ្ឌល​ចត្តាឡីស័ក​មួយ​ក្នុង​ខណ្ឌ​ព្រែកព្នៅ។ លោក​បាន​លើកឡើងថា ហេតុផល​នៃ​ការ​ធ្វើ​ដូចនេះ​គឺ ដើម្បី​កំណត់​ថា​តើ​មាន​កូដករ​ណា​ម្នាក់​ក្នុង​នោះ មិន​ទាន់​បាន​ធ្វើ​តេស្ត​រក​ជំងឺ​កូវីដ១៩ ចំនួន​ពីរ​លើក​ហើយ​ឬ​នៅ។​

លោក​បាន​និយាយ​ថា បុគ្គលិក​ចំនួន ​៨៧៩​នាក់​បាន​ផ្តល់​សំណាក​ដើម្បី​ធ្វើ​តេស្ត ហើយ​នៅ​ក្នុង​នោះ​ ៥០០​នាក់ បាន​ត្រឡប់​មក​ធ្វើ​តេស្ត​សារជាថ្មី នៅ​ពេល​បញ្ចប់​ការ​តម្រូវ​ឲ្យ​ធ្វើ​ចត្តាឡីស័ក។ លោក​បាន​បន្ត​ថា បុគ្គលិក​ប្រមាណ ៣០០​នាក់​ទៀត មិនទាន់​បាន​ធ្វើ​តេស្ត​លើក​ទី​ពីរ​នៅ​ឡើយ​ទេ។

លោក​បាន​ថ្លែង​ថា៖ «យើង​បាន​យក [ពួកគេ​] ដើម្បី​បញ្ជាក់​ថា​តើ​ពួកគេ​បាន​ធ្វើ​តេស្ត​ហើយ​ឬ​នៅ»

លោក​ កើត​ ឆែ បាន​បញ្ជាក់​ថា បុគ្គលិក​ដែល​ត្រូវ​បាន​រក​ឃើញ​ថា មិន​បាន​គោរព​តាម​វិធានការ​សុខាភិបាល​ក្នុង​ការ​បង្ការ​ជំងឺ​កូវីដ១៩ អាច​ប្រឈម​នឹង​ការ​ពិន័យ​ដូចជា ការ​ណែនាំ ឬ​ការ​ផាកពិន័យ​ជា​ប្រាក់។ លោក​ក៏​បាន​យោង​ទៅ​សេចក្តីប្រកាស​របស់​សាលារាជធានី​ភ្នំពេញ​កាល​ពី​ថ្ងៃ​ទី១៥ ខែ​កុម្ភៈ​ ដែល​ថា កូដករ​មិន​ត្រូវ​បាន​អនុញ្ញាត​ឲ្យ​ធ្វើ​កូដកម្ម និង​ត្រូវ​ការ​ការ​អនុញ្ញាត​ពី​អាជ្ញាធរ។

បន្ទាប់ពីមន្រ្តីអាជ្ញាធរបានចាប់កូដករក្រុមហ៊ុនណាហ្គាវើលដ៍ដាក់ចូលក្នុងរថយន្តក្រុង ពួកគេបាននាំខ្លួនកូដករទាំងនោះទៅកាន់មណ្ឌលចត្តាឡីស័កមួយនៅជាយរាជធានីភ្នំពេញ កាលពីថ្ងៃទី២១ ខែកុម្ភៈ ឆ្នាំ២០២២។ ខេមបូចា/ ព្រីង សំរាំង
បន្ទាប់ពីមន្រ្តីអាជ្ញាធរបានចាប់កូដករក្រុមហ៊ុនណាហ្គាវើលដ៍ដាក់ចូលក្នុងរថយន្តក្រុង ពួកគេបាននាំខ្លួនកូដករទាំងនោះទៅកាន់មណ្ឌលចត្តាឡីស័កមួយនៅជាយរាជធានីភ្នំពេញ កាលពីថ្ងៃទី២១ ខែកុម្ភៈ ឆ្នាំ២០២២។ ខេមបូចា/ ព្រីង សំរាំង

​ស្នងការ​នគរបាល​រាជធានី​ភ្នំពេញ​ លោក​ ស ថេត បាន​ព្រមាន​ថា ប៉ូលិស​នឹង​ចាប់ខ្លួន​កូដករ​ ដែល​ចេញ​មក​ធ្វើ​កូដកម្ម​ អំឡុងពេល​ពេល​មាន​ការ​កើនឡើង​ករណី​ឆ្លង​វីរុស​កូវីដ១៩ ប្រភេទ​អូមីក្រុង នៅ​រាជធានី​ភ្នំពេញ។

លោក​បាន​ថ្លែង​ថា៖ «ដូច្នេះ [ពួកគេ] នៅ​តែ​ចចេស​ចេញ​មក​ធ្វើ​កូដកម្ម ដោយ​មិន​គោរព​វិធានការ​សុខាភិបាល។ ជា​រឿង​ខុស​ក្នុង​ការ​ធ្វើ​ដូចនេះ ហើយ​អាជ្ញាធរ​មាន​សមត្ថកិច្ច​នឹង​អនុវត្ត​ទៅ​តាម​ច្បាប់»

លោក​បាន​បន្ត​ថា៖ «ខ្ញុំ​សូម​អំពាវនាវ​ទៅ​អ្នក​ដែល​មក​ធ្វើ​កូដកម្ម ឲ្យ​ពិចារណា​គ្រប់ជ្រុងជ្រោយ​ពី​រឿង​នេះ។ ប្រសិន​បើ​មិន​ដូច្នេះ​ទេ យើង​នឹង​ចាត់​វិធានការ​តាម​ផ្លូវ​ច្បាប់»

​លោក​បាន​បញ្ជាក់​ថា ក្រុម​បុគ្គលិក​ណាហ្គាវើលដ៍​ ដែល​ត្រូវ​បាន​ធ្វើ​តេស្ត​កូវីដ១៩ ត្រូវ​តែ​ធ្វើ​ចត្តាឡីស័ក​ជា​ដាច់​ខាត មិនថា​ លទ្ធផល​យ៉ាង​ណា​នោះ​​ទេ។

សមាជិក​សហជីព​ និង​ជា​កូដករ​មួយ​រូប អ្នកស្រី​ ណុប ទិត្យ​បូរ៉ាវី ដែល​ធ្វើការ​ផ្នែក​អាហារ​និង​ភេសជ្ជៈ​នៅ​ក្រុមហ៊ុន​ណាហ្គាវើលដ៍​ និយាយ​ថា អ្នកស្រី​​អស់សង្ឃឹម ដោយ​សារ​ការ​បង្រ្កាប​របស់​អាជ្ញាធរ​មក​លើ​វិវាទ​ការងារ​នេះ។ អាជ្ញាធរ​ក៏​បាន​ស្នើ​ឲ្យ​កូដករ​ផ្លាស់ទីតាំង​កូដកម្ម​ទៅ​កាន់​ទីលាន​ប្រជាធិបតេយ្យ នៅ​ជាយ​ភាគខាង​ជើង​រាជធានី​ភ្នំពេញ តែ​ក្រុម​កូដករ​បាន​បដិសេធ។

អ្នកស្រី​បាន​ថ្លែង​ថា៖ «យើង​នឹង​មិន​ធ្វើ​កូដកម្ម​នៅ​ទីលាន​ប្រជាធិបតេយ្យ​នោះ​ទេ ដោយសារ​តែ​យើង​មាន​វិវាទ​ការងារ​ជាមួយ​ក្រុមហ៊ុន។ យើង​មិនមាន​សារ​ណា​មួយ​ដើម្បី​ផ្សព្វផ្សាយ​នៅ​ទីលាន​ប្រជាធិបតេយ្យ​នោះ​ទេ ពីព្រោះ​ក្រុមហ៊ុន​នឹង​មិន​ឮ​សំឡេង​របស់​ពួក​យើង»

បុគ្គលិក​ក្រុមហ៊ុន​ណាហ្គាវើលដ៍​បាន​ធ្វើ​កូដកម្ម​ចាប់តាំង​ពី​ចុង​ខែ​វិច្ឆិកា​មក​ដើម្បី​ទាមទារ​ឲ្យ​មាន​ការ​ឲ្យ​ចូលធ្វើ​ការ​វិញ​បុគ្គលិក​ចំនួន​ ១.៣០០​នាក់ ដែល​ត្រូវ​បាន​បញ្ឈប់​ពី​ការងារ។ ក្រុម​កូដករ​ក៏​បាន​ទាមទារ​ការ​ផ្តល់​ប្រាក់​អត្ថប្រយោជន៍​ត្រឹមត្រូវ​ចំពោះ​អ្នក​ដែល​ត្រូវ​បាន​បញ្ឈប់​ពី​ការងារ​ផង​ដែរ។ អាជ្ញាធរ​ក៏​បាន​ចាប់ខ្លួន​ និង​ដាក់​ពន្ធនាគារ​ក្រុម​មេដឹកនាំ​សហជីព​ចំនួន​ ១១​នាក់ ក្នុង​នោះ​រួម​មាន ប្រធាន​សហជីព​ កញ្ញា​ ឈឹម ស៊ីថរ ពាក់ព័ន្ធ​នឹង​បទចោទប្រកាន់​ផ្សេងៗ​ រួម​មាន​ការ​ញុះញង់​ជាដើម។

​នាយករង​ទទួល​បន្ទុក​ផ្នែក​សិទ្ធិ​មនុស្ស​នៃ​អង្គការ​លីកាដូ​ លោក អំ សំអាត​ និយាយ​ថា អ្នក​ជំនាញ​ផ្នែក​សិទ្ធិ​មនុស្ស​ បាន​រិះគន់​ការ​ប្រើប្រាស់​ច្បាប់​ស្តី​ពី​វិធានការ​សុខាភិបាល​ ដើម្បី​ដាក់​កំហិត​មក​លើ​ក្រុម​កូដករ។

លោក​បាន​បន្ត​ថា វិធានការបង្ការ​ជំងឺ​កូវីដ១៩ គួរ​តែ​រួមបញ្ចូល «ដំណោះស្រាយ​វិវាទ​ការងារ​ដែល​មិន​ទាន់​ត្រូវ​បាន​ដោះស្រាយ​រួចរាល់» ដូចជា ករណី​បុគ្គលិក​ក្រុមហ៊ុន​ណាហ្គាវើលដ៍​ជា​ដើម។ ​

លោក​បាន​ថ្លែង​ថា៖ «ខ្ញុំ​គិត​ថា ពួកគាត់​នឹង​ធ្វើ​កូដកម្ម​នៅ​ថ្ងៃ​ណា​មួយ​ទៅ​មុខ​ទៀត ប្រសិន​បើ​នៅ​តែ​មិនមាន​ដំណោះស្រាយ»

ប្រែសម្រួលពីអត្ថបទភាសាអង់គ្លេស៖ About 60 NagaWorld strikers detained for quarantine after resuming protest

285 views

ព័ត៌មានថ្មី

អត្ថបទពេញនិយម