លោក ញឹម សារ៉ុម បេក្ខភាពមេឃុំជាប់ឆ្នោតមកពីគណបក្សភ្លើងទៀន ដែលត្រូវបានចាប់ខ្លួនកាលពីថ្ងៃអង្គារពីបទប្លន់កាលពី២០ឆ្នាំមុន និងត្រូវបានដោះលែងនៅក្រៅឃុំកាលពីថ្ងៃពុធ យល់ថាការចាប់ខ្លួនលោកធ្វើឡើងដោយខុសនិតិវិធីច្បាប់ និងជាការរំខានផ្នែកនយោបាយ។
លោកថ្លែងថា៖ «ខ្ញុំគិតថាការជាប់សំណុំរឿងក្នុងតុលាការនឹងរំខានដល់ការងាររបស់ខ្ញុំជាមេឃុំ។ ខ្ញុំសុំឱ្យតុលាការទម្លាក់បទចោទនេះ ដើម្បីខ្ញុំអាចបំពេញភារកិច្ចបម្រើប្រជាពលរដ្ឋបានពេញលេញ ខ្ញុំគិតថាតុលាការនឹងផ្តល់យុត្តិធម៌ដល់រូបខ្ញុំ»។
លោក ញឹម សារ៉ុម បាននិយាយថា ក្នុងរយៈពេល២០ឆ្នាំមកនេះ លោកមិនដែលបានទទួលដីការបស់តុលាការពាក់ព័ន្ធនឹងការចោទប្រកាន់ពីបទប្លន់នោះទេ ហើយលោកបារម្ភថាសំណុំរឿងដែលកំពុងបន្តនឹងធ្វើឱ្យរំខានដល់តួនាទីរបស់លោកជាមេឃុំ។
លោក សារ៉ុម គឺជាបេក្ខជនម្នាក់ក្នុងចំណោមបេក្ខជនបក្សប្រឆាំងចំនួនបួនរូប ដែលបានឈ្នះអាសនៈមេឃុំនៅក្នុងការបោះឆ្នោតកាលពីថ្ងៃទី៥ ខែមិថុនា។ អាសនៈមេឃុំ ចៅសង្កាត់ចំនួន ១ ៦៤៨ ផ្សេងទៀតបានទៅបក្សកាន់អំណាច។ ការចាប់ខ្លួនលោកបានធ្វើឱ្យមានការរិះគន់ពីក្រុមអង្គការសិទ្ធិមនុស្ស ដែលពួកគេថាធ្វើឡើងក្រោមហេតុផលនយោបាយ។
ការចោទប្រកាន់ប្លន់នេះបានធ្វើឡើងតាំងពីឆ្នាំ ២០០២ ប៉ុន្តែដីកាចាប់ខ្លួនរបស់សាលាដំបូងខេត្តកំពង់ធំត្រូវបានចេញ១០ ឆ្នាំក្រោយមក ពោលគឺនៅថ្ងៃទី ២១ ខែមិថុនា ឆ្នាំ ២០១២។ បើតាមលោក សូ សុវណ្ណារ៉េត អ្នកនាំពាក្យសាលាដំបូងខេត្តកំពង់ធំ ជនជាប់ចោទ មាន៤នាក់ក្នុងនោះក៏មានលោក សារ៉ុម ផងដែរ ត្រូវបានកាត់ទោសកំបាំងមុខកាលពីឆ្នាំ២០១៤ ឲ្យជាប់ពន្ធនាគាររយៈពេលប្រាំឆ្នាំ។
លោក សារ៉ុម បានប្រាប់ខេមបូចាថា លោកមិនបានដឹងពីដីកាចាប់ខ្លួនឆ្នាំ ២០១២ ឬថាលោកត្រូវបានកាត់ទោសកំបាំងមុខនោះឡើយ។
អ្នកស្រី ខាត់ សាឃាង ភរិយារបស់លោក សារ៉ុម បាននិយាយថា ដើមបណ្តឹងបានចោទប្តីគាត់ថាប្លន់ម៉ាស៊ីនភ្លើងបន្ទាប់ពីគ្រួសារអ្នកស្រីបានទៅដកយកម៉ាស៊ីនភ្លើងនោះ ពីកូនបំណុលដែលជំពាក់ប្រាក់មិនសង។ អ្នកស្រីបានបន្តថាដើមបណ្តឹងបានប្ដឹងពីបទចូលផ្ទះដោយគ្មានការអនុញ្ញាត និងលួច ហើយបានប្តឹងទៅតុលាការ។ ប៉ុន្តែលោក សារ៉ុម បានសម្របសម្រួលនៅក្រៅប្រព័ន្ធតុលាការ ដោយយល់ព្រមបង់ប្រាក់ចំនួន ១០០០ ដុល្លារទៅឲ្យដើមបណ្តឹង និងបានសុំដើមបណ្តឹងដកពាក្យបណ្តឹងវិញ។
ខណៈលោក សារ៉ុម បានលើកឡើងពីការព្រួយបារម្ភថា ករណីដែលកំពុងបន្តអាចរំខានដល់ការងារជាមេឃុំថ្មីលោក ហង្ស ពុទ្ធា អ្នកនាំពាក្យគណៈកម្មាធិការជាតិរៀបចំការបោះឆ្នោត (គ.ជ.ប) បានឲ្យដឹងថា លោក សារ៉ុម នៅតែអាចត្រូវបានតែងតាំងជាមេឃុំ។
លោកថ្លែងថា៖ «សំណុំរឿងនេះមិនទាន់បញ្ចប់នៅឡើយទេ ហើយ [គាត់] នៅតែបន្តប្តឹងជំទាស់បន្តទៀត។ ដូច្នេះ គ.ជ.ប រក្សាឈ្មោះគាត់ជាបេក្ខជនជាប់ឆ្នោតដដែល»។
នៅក្នុងសេចក្តីថ្លែងការណ៍មួយដែលបានចេញផ្សាយកាលពីថ្ងៃពុធ គណបក្សភ្លើងទៀនបានលើកឡើងថា អាជ្ញាធរកំពុងប្រើប្រាស់ប្រព័ន្ធតុលាការដើម្បីធ្វើទុក្ខបុកម្នេញគណបក្សប្រឆាំង។
អ្នកនាំពាក្យគណបក្សប្រជាជនកម្ពុជា លោក សុខ ឥសាន បានហៅទង្វើររបស់គណបក្សភ្លើងទៀនថា ជាការបរិហារ ដែលត្រូវប្រឈមផ្លូវច្បាប់។ ក្នុងករណីនេះ គណបក្សប្រជាជនកម្ពុជាបានប្តឹងលោក សុន ឆ័យ អនុប្រធានគណបក្សភ្លើងទៀន បន្ទាប់ពីថ្នាក់ដឹកនាំបក្សប្រឆាំងរូបនេះបានរិះគន់ការបោះឆ្នោតឃុំសង្កាត់នាពេលថ្មីៗតាមប្រព័ន្ធផ្សព្វផ្សាយ ថាមិនភាពមិនសេរី និងយុត្តិធម៌ និងបង្ខូចឈ្មោះគណបក្សប្រជាជន។
លោកថ្លែងថា៖ «គេ [CPP] ជាជនរងគ្រោះ មិនឃើញរករឿងអីផង តែពេលខាងប្រឆាំងនិយាយបរិហាកេរ្តិ៍គេដោយគ្មានភស្តុតាង អាហ្នឹងមិនមែនជាសិទ្ធិទេ។ អ្នកមានសិទ្ធិ [ធ្វើអ្វីក៏ដោយ] ប៉ុន្តែកុំប៉ះពាល់សិទ្ធិអ្នកដទៃ»។
មេឃុំបក្សប្រឆាំងដែលទើបជាប់ឆ្នោតថ្មីផ្សេងទៀតនិយាយថាករណីរបស់សារ៉ុម ក៏ធ្វើឱ្យពួកគេព្រួយបារម្ភដែរ។
លោក យ៉ាប់ យ៉ូត អាយុ ៥២ ឆ្នាំ ដែលឈ្នះជាមេឃុំក្រយា ខេត្តកំពង់ធំ ត្រូវបានប្ដឹងពីបទគំរាមកំហែងទារប្រាក់កាលពីឆ្នាំ ២០១៣ ដោយសារតែគាត់បានសម្របសម្រួលករណីស្នេហា។ បើទោះបីជាសំណុំរឿងនេះត្រូវបានទម្លាក់កាលពីឆ្នាំមុនក្តី លោកនៅតែមានការព្រួយបារម្ភថាវាអាចត្រូវបានសើរើឡើងវិញ។
លោកបន្តថា៖ «ខ្ញុំក៏មានការព្រួយបារម្ភដែរ ព្រោះកាលពីមុនខ្ញុំត្រូវបានចោទប្រកាន់ពីបទជំរិតទារប្រាក់អំឡុងពេលខ្ញុំធ្វើជាមេឃុំរបស់គណបក្ស សម រង្ស៊ី កាលពីឆ្នាំ ២០១៣»។ លោកបន្តថា មេឃុំមកពីបក្សក្រៅរដ្ឋាភិបាលត្រូវការប្រុងប្រយ័ត្នខ្ពស់ពេលបំពេញការងារ។
លោកថ្លែងថា៖ «បើមិនអ៊ីចឹងទេ យើងអាចប្រឈមមុខនឹងការចោទប្រកាន់រឿងផ្សេងៗ ពីព្រោះគេឈរឃ្លាំមើលយើងរហូត ហើយវាពិតណាស់ នៅពេលដែលយើងធ្វើអ្វីខុស គេនឹងចាប់យើងភ្លាម គេមិនដែលអត់អោនឡើយ»។
លោក ពឹង សុខហន់ នៅឃុំដូង ដែលជាមេឃុំទើបជាប់ឆ្នោតថ្មីមកពីបក្សភ្លើងទៀនដែរនោះ បានថ្លែងថាការគំរាមកំហែងបែបនោះតែងកើតមានលើអ្នកតស៊ូបក្សប្រឆាំងដូចលោក។
លោកថ្លែងថា៖ «អ្នកតស៊ូតែងតែប្រឈមមុខនឹងបញ្ហាបែបនេះ។ អ្នកតស៊ូប្រៀបដូចជាទាហាននៅសមរភូមិដែលតែងតែជួបឧបសគ្គគ្រប់ពេលវេលា។ ខ្ញុំតែងតែណែនាំក្រុមការងាររបស់ខ្ញុំឱ្យមានការប្រុងប្រយ័ត្នខ្ពស់ក្នុងការធ្វើអ្វីមួយ។ យើងត្រូវតែអនុវត្តតាមច្បាប់ អ្វីដែលខុសច្បាប់ កំធ្វើ»។
អ្នកវិភាគនយោបាយ លោក ឯម សុវណ្ណារ៉ា កត់សម្គាល់ថា ចាប់តាំងពីការផ្តើមយុទ្ធនាការឃោសនាបោះឆ្នោត រហូតមកដល់ពេលនេះ គណបក្សប្រឆាំងបាននឹងកំពុងប្រឈមសម្ពាធយ៉ាងខ្លាំង។
លោកបន្តថា៖ «នៅពេលសេរីភាពត្រូវបានរឹតត្បិត វាប៉ះពាល់ដល់យន្តការប្រជាធិបតេយ្យជាទូទៅ។ ប្រសិនបើសកម្មជនសិទ្ធិមនុស្ស សកម្មជននយោបាយ និងសកម្មជនបរិស្ថានត្រូវបានរំលោភបំពាន និងឃុំខ្លួន វានឹងនាំឱ្យបាត់បង់ដំណើរការបោះឆ្នោតដោយសេរី និងយុត្តិធម៌»៕
ប្រែសម្រួលពីអត្ថបទភាសាអង់គ្លេស៖ After release on bail, Candlelight Party commune chief remains in limbo
