ចក្រភពអង់គ្លេស សហរដ្ឋអាមេរិក និងកាណាដា បានប្រកាសការដាក់ទណ្ឌកម្មមួយកញ្ចប់ប្រឆាំងនឹងបុគ្គល និងស្ថាប័ននៅកម្ពុជា ដោយបង្កកទ្រព្យសម្បត្តិនិងហាមប្រាមការធ្វើដំណើររបស់ពួកគេ ជាលទ្ធផលនៃការចោទប្រកាន់ពីការរំលោភសិទ្ធិមនុស្ស ដោយការប្រកាសនេះបានធ្វើឡើងនៅមុនការប្រារព្ធខួបលើកទី៧៥នៃប្រកាសជាសាកលស្ដីពីសិទ្ធិមនុស្សនៅថ្ងៃទី១០ ខែធ្នូ។
លោក David Cameron រដ្ឋមន្ត្រីការបរទេសនៃចក្រភពអង់គ្លេស បានថ្លែងថា៖ «យើងនឹងមិនអត់ឱនឡើយចំពោះឧក្រិដ្ឋជននិងរបបគ្រប់គ្រងកៀបសង្កត់ដែលជាន់ឈ្លីសិទ្ធិ និងសេរីភាពជាមូលដ្ឋានរបស់ប្រជាជនសាមញ្ញនៅជុំវិញពិភពលោក»។ លោកបន្តថា៖ «ខ្ញុំសូមបញ្ជាក់ច្បាស់ថា ៧៥ឆ្នាំក្រោយការប្រកាសជាសាកលអំពីសិទ្ធិមនុស្ស ចក្រភពអង់គ្លេស និងសម្ព័ន្ធមិត្តរបស់យើងនឹងបន្តតាមរកជនទាំងឡាយដែលកាត់ផ្ដាច់សេរីភាពរបស់ប្រជាជន»។
យោងតាមការប្រកាសនោះ ចក្រភពអង់គ្លេសនិងសម្ព័ន្ធមិត្តរបស់ខ្លួនបានដាក់ចេញវិធានការទណ្ឌកម្មបោសសម្អាត ដែលសំដៅទៅលើបុគ្គលនានាដែលជាប់ពាក់ព័ន្ធនឹងការរំលោភសិទ្ធិមនុស្សនៅជុំវិញពិភពលោក។ នៅក្នុងតំបន់ បុគ្គលនិងស្ថាប័នចំនួន១៤ ត្រូវបានដាក់ទណ្ឌកម្មក្រោមបទចោទប្រកាន់ថាពាក់ព័ន្ធនឹងករណីពលកម្មដោយបង្ខិតបង្ខំដែលត្រូវបានគេនិយាយថាប្រព្រឹត្តនៅក្នុងប្រទេសកម្ពុជា ឡាវ និងមីយ៉ាន់ម៉ា។
អ្នកនាំពាក្យស្ថានទូតចក្រភពអង់គ្លេសមួយរូប បានប្រាប់ ខេមបូចា ថា ចក្រភពអង់គ្លេសប្រើប្រាស់ទណ្ឌកម្មដែលស្ថិតក្នុងចំណោមឧបករណ៍ការទូតផ្សេងទៀត ដើម្បីបំពេញគោលបំណងមួយចំនួន និងថា ចក្រភពអង់គ្លេសនឹងបន្តពិចារណាវិធានការផ្សេងៗទៀតដើម្បីសម្រេចគោលបំណងនយោបាយការបរទេសរបស់ខ្លួននៅជុំវិញពិភពលោក។
អ្នកនាំពាក្យដដែលបាននិយាយថា៖ «វិធានការទណ្ឌកម្មទាំងនេះសំដៅទៅលើជនដៃដល់ដែលពាក់ព័ន្ធនៅក្នុង«ការឆបោកដោយបង្ខិតបង្ខំ» ដែលនៅក្នុងអំពើនោះ ជនរងគ្រោះដែលត្រូវបានជួញដូរទៅក្នុងតំបន់ក្រោមលេសការងារដែលទទួលបានប្រាក់ខែខ្ពស់ ត្រូវបានគេបង្ខិតបង្ខំឱ្យឆបោកជនរងគ្រោះនៅជុំវិញពិភពលោក តាមរយៈមជ្ឈមណ្ឌលឆបោកតាមអ៊ីនធឺណិត»។ អ្នកនាំពាក្យរូបនោះបន្តថា៖ «ជារឿយៗ ជនរងគ្រោះត្រូវគេធ្វើទារុណកម្ម និង/ឬរងការធ្វើបាបយ៉ាងឃោរឃៅនិងអមនុស្សធម៌នៅក្នុងមជ្ឈមណ្ឌលទាំងនោះ»។
នៅប្រទេសកម្ពុជា បុគ្គលនិងស្ថាប័នចំនួន ៦ ត្រូវបានដាក់ទណ្ឌកម្មដោយសារត្រូវបានគេចោទប្រកាន់ថាមានជាប់ពាក់ព័ន្ធនឹងប្រតិបត្តិការពលកម្មបង្ខិតបង្ខំ ។ បុគ្គល និងស្ថាប័នទាំងនេះ រួមមាន កាស៊ីណូ Heng He Casino, សណ្ឋាគារ K.B Hotel, ក្រុមហ៊ុន Pacific Real Estate Management Co., Hum Sovanny, Dong Lecheng និងក្រុមហ៊ុន Golden Sun Sky Entertainment Co., Ltd. ។
សណ្ឋាគារ K.B ត្រូវបានគេស្គាល់ថាជាទីតាំង«សម្ងាត់»ដ៏ធំមួយដែលត្រូវគេចោទប្រកាន់ថាជាប់ពាក់ព័ន្ធនឹងសកម្មភាពអនឡាញខុសច្បាប់នៅក្នុងប្រទេសកម្ពុជា រួមជាមួយគ្នានឹង«Jinshui»។ កាលពីខែសីហា ឆ្នាំមុន សារព័ត៌មានហុងកុង HK01 បានរាយការណ៍ថា មេក្លោងនៅពីក្រោយ Jinshui គឺឈ្មោះ Dong Lecheng ជាសហគ្រិនដែលមានមូលដ្ឋាននៅខេត្តយូណាន ដែលជាស្ថាបនិកនៃក្រុមហ៊ុនឈ្មោះ Yunnan Jingcheng Group Co., Ltd.។ លោកជាវិនិយោគិនចិនមួយរូបក្នុងចំណោមវិនិយោគិនចិនដ៏ល្បីល្បាញបំផុតនៅកម្ពុជា។
នៅខែកញ្ញា ឆ្នាំ២០១៨ លោក Dong Lecheng បានចុះហត្ថលេខាលើកិច្ចព្រមព្រៀងសហប្រតិបត្តិការមួយជាមួយនឹងមហាសេដ្ឋីចិនម៉ាកាវដែលត្រូវគេចាប់ខ្លួន ឈ្មោះ Alvin Chau ស្ថាបនិករបស់ក្រុមហ៊ុន Suncity Group ដើម្បីរួមគ្នាវិនិយោគទឹកប្រាក់៣៦០លានដុល្លារអាមេរិក ទៅលើកិច្ចព្រមព្រៀងជាដៃគូជាមួយក្រុមហ៊ុនកម្ពុជាមួយឈ្មោះ Golden Sun Sky Entertainment ដើម្បីកសាងរមណីយដ្ឋានចម្រុះមួយនៅក្នុងខេត្តព្រះសីហនុ។
ទាំងសណ្ឋាគារ K.B Hotel និងទាំងក្រុមហ៊ុន Golden Sun Sky Entertainment Co., Ltd. ពុំបានឆ្លើយតបនឹងសំណួរផ្ញើតាមអ៊ីមែលរបស់ ខេមបូចា ឡើយ – សំណួរទាំងនេះផ្ញើតាមអាសយដ្ឋានទំនាក់ទំនងដែលឃើញមាននៅក្នុងឯកសារចុះបញ្ជីពាណិជ្ជកម្មនៅលើគេហទំព័ររបស់ក្រសួងពាណិជ្ជកម្ម។
អ្នកនាំពាក្យស្ថានទូតបានពន្យល់ថា ការដាក់ទណ្ឌកម្មបញ្ជាក់ពីការបន្តប្ដេជ្ញាចិត្តរបស់ចក្រភពអង់គ្លេសដើម្បីទប់ស្កាត់សកម្មភាពទុច្ចរិតនៅជុំវិញពិភពលោក។ ទណ្ឌកម្មទាំងនេះ ជារឿយៗ ត្រូវគេប្រើប្រាស់ជាផ្នែកមួយនៃយុទ្ធសាស្ត្រនយោបាយទូលំទូលាយ និងត្រូវបានរៀបចំឡើងដើម្បី«ធ្វើឱ្យមានការផ្លាស់ប្ដូរ ដាក់សម្ពាធ និងផ្ញើសារច្បាស់លាស់អំពីអាកប្បកិរិយាជាក់លាក់មួយ»។
អ្នកនាំពាក្យដដែលបានបន្ថែមថា៖ «ប្រទេសកម្ពុជានិងប្រជាជនកម្ពុជាគឺជាជនរងគ្រោះនៃប្រតិបត្តិការទាំងនេះ ដូច្នេះ គេគួរតែស៊ើបអង្កេតករណីទាំងនេះឱ្យបានពេញលេញ ហើយជនដៃដល់គួរត្រូវនាំខ្លួនទៅផ្ដន្ទាទោស ដើម្បីទប់ស្កាត់ប្រតិបត្តិការបែបនេះនាពេលអនាគត»។
ទន្ទឹមគ្នានេះដែរ អ្នកនាំពាក្យក្រសួងមហាផ្ទៃ លោក ខៀវ សុភ័គ បានប្រាប់ ខេមបូចា ថា ទណ្ឌកម្មដោយចក្រភពអង់គ្លេស សហរដ្ឋអាមេរិក និងកាណាដា ទៅលើក្រុមហ៊ុនឆបោកតាមអនឡាញទាំងនេះ មិនមានផលប៉ះពាល់អ្វីទេ បើនិយាយក្នុងន័យជាការកាត់បន្ថយប្រតិបត្តិការឆបោកតាមអនឡាញ នៅកម្ពុជានោះ។
លោក សុភ័គ បានបញ្ជាក់ថា៖ «ប្រសិនបើយើងនិយាយពីច្បាប់ ច្បាប់អង់គ្លេសមិនមានឥទ្ធិពលផ្នែកច្បាប់អ្វីមកលើកម្ពុជានោះទេ។ កម្ពុជាមិនមែនជាប្រទេសក្រោមអាណានិគមរបស់[រដ្ឋាភិបាល]អង់គ្លេសឡើយ ។ កម្ពុជាកំពុងខិតខំធ្វើការដោយខ្លួនឯងដើម្បីកាត់បន្ថយ(ឧក្រិដ្ឋកម្មឆបោក)»។ លោកបានបន្ថែមថា អាជ្ញាធរបានចាត់វិធានការច្បាប់លើជនទាំងឡាយដែលជាប់ពាក់ព័ន្ធនឹងប្រតិបត្តិការឆបោកតាមអនឡាញនៅកម្ពុជាហើយ ។
ទោះបីនិយាយដូច្នេះក្ដី លោកក៏បានស្វាគមន៍ផងដែរចំពោះកិច្ចសហប្រតិបត្តិការរបស់បណ្ដាប្រទេសនានា ដើម្បីកាត់បន្ថយអំពើឆបោកតាមអនឡាញនៅកម្ពុជា ។
កាលពីខែកញ្ញា ឆ្នាំមុន អង្គការសហប្រជាជាតិបានចេញរបាយការណ៍មួយដែលលើកឡើងថា មានមនុស្សយ៉ាងហោចណាស់ ១០០.០០០នាក់ ត្រូវបានបង្ខំឱ្យធ្វើប្រតិបត្តិការឆបោកតាមអនឡាញនៅក្នុងប្រទេសកម្ពុជា។ ប៉ុន្តែ ក្រុមមន្ត្រីបានស្នើសុំភ័ស្តុតាងបន្ថែមទៀតដើម្បីគាំទ្រការប៉ាន់ស្មានតួលេខនេះ ដោយបានសួរយ៉ាងដូច្នេះថា «តើពួកគេទាំងនោះនៅទីណា?» ។
អ្នកនាំពាក្យស្ថានទូតសហរដ្ឋអាមេរិក លោក Wesley Holzer បានប្រាប់ ខេមបូចា តាមសារអ៊ីមែលថា របាយការណ៍នានាពីអង្គការក្រៅរដ្ឋាភិបាល និងពីរដ្ឋាភិបាល បានបង្ហាញពីការប្រព្រឹត្តបទឧក្រិដ្ឋក្រោមការបង្ខិតបង្ខំ គឺជាធាតុសំខាន់មួយនៃប្រតិបត្តិការឆបោកតាមអ៊ីនធឺណិត និងថាភាគច្រើននៃជនដែលអនុវត្តប្រតិបត្តិការឆបោក គឺជាជនរងគ្រោះនៃអំពើជួញដូរសម្រាប់ពលកម្មដោយបង្ខិតបង្ខំ។
លោក Holzer បាននិយាយថា៖ «សហរដ្ឋអាមេរិកធ្វើការជាមួយអ្នកពាក់ព័ន្ធចម្រុះនៅជុំវិញពិភពលោក ក្នុងនោះរាប់ទាំងប្រទេសកម្ពុជាផងដែរ ដើម្បីលើកទឹកចិត្តដល់រដ្ឋាភិបាលនៃប្រទេសនានាឱ្យទប់ស្កាត់អំពើជួញដូរមនុស្ស ការពារជនរងគ្រោះ និងចាប់ឱ្យទទួលខុសត្រូវចំពោះមុខច្បាប់មិនត្រឹមតែជនដៃដល់ជួញដូរមនុស្សប៉ុណ្ណោះនោះទេ ប៉ុន្តែ ថែមទាំងជនដែលបង្កលក្ខណៈដល់ការជួញដូរផងដែរ»។
លោកបានបន្ថែមថា សហរដ្ឋអាមេរិកគាំទ្រពេញទំហឹងចំពោះកិច្ចប្រឹងប្រែងរបស់ចក្រភពអង់គ្លេសដើម្បីធានាយុត្តិធម៌សម្រាប់ជនរងគ្រោះទាំងអស់ និងទំនួលខុសត្រូវចំពោះជនទាំងឡាយដែលផ្សំគំនិតនៅក្នុង«ឧក្រិដ្ឋកម្មដ៏ឃោរឃៅ»នេះ។
លោក អំ សំអាត នាយកចាត់ការទូទៅនៃអង្គការសិទ្ធិមនុស្ស លីកាដូ បានប្រាប់ ខេមបូចា ថា ទណ្ឌកម្មទាំងនេះនឹងរួមចំណែកកាត់បន្ថយអំពើឆបោកតាមអនឡាញនៅកម្ពុជា ពីព្រោះពួកគេកំពុងស្ថិតក្រោមការតាមដានឃ្លាំមើលពីប្រទេសទាំងនោះ។
លោកបានសង្កេតឃើញថា រដ្ឋាភិបាលកំពុងខិតខំប្រឹងប្រែងដើម្បីបញ្ឈប់ប្រតិបត្តិការឆបោកតាមអនឡាញនេះ ប៉ុន្តែ លោកថា រដ្ឋាភិបាលក៏គួរតែពង្រឹងប្រសិទ្ធភាពរបស់ខ្លួននៅក្នុងការទប់ស្កាត់កំណើននៃឧក្រិដ្ឋកម្មឆបោកនេះផងដែរ តាមរយៈការពង្រឹងការអនុវត្តច្បាប់ និងការផ្ដល់ជំនាញបច្ចេកវិទ្យាដល់មន្ត្រីអនុវត្តច្បាប់៕
ប្រែសម្រួលពីអត្ថបទភាសាអង់គ្លេស៖ Alleged Cambodian Scam Operators Sanctioned by the UK, US, and Canada
