ខណៈមានការរិះគន់ពីការសិក្សាតាមប្រព័ន្ធអនឡាញ សាលារៀននៅបន្តបិទទ្វារ

សិស្សនាំគ្នារៀននៅផ្ទះ ជាមេរៀនដែលគ្រូរបស់ពួកគេផ្ញើមកតាមកម្មវិធីតេឡេក្រាម ក្នុងឃុំក្របីរៀល ក្នុងខេត្តសៀមរាប កាលពីថ្ងៃទី០៧ ខែឧសភា ឆ្នាំ២០២១។ ខេមបូចា/ បញ្ញា ឆព័ណ្ណ
សិស្សនាំគ្នារៀននៅផ្ទះ ជាមេរៀនដែលគ្រូរបស់ពួកគេផ្ញើមកតាមកម្មវិធីតេឡេក្រាម ក្នុងឃុំក្របីរៀល ក្នុងខេត្តសៀមរាប កាលពីថ្ងៃទី០៧ ខែឧសភា ឆ្នាំ២០២១។ ខេមបូចា/ បញ្ញា ឆព័ណ្ណ
Share on facebook
Share on twitter
Share on linkedin
Share on telegram
Share on whatsapp

ការបិទខ្ទប់​ត្រូវ​បាន​បញ្ចប់​មួយភាគធំនៃ​ក្រុង​ភ្នំពេញ ប៉ុន្តែសាលារៀន​រដ្ឋ​និង​ឯកជន​បន្ត​បិទទ្វារ​បណ្តោះអាសន្ន​ ដោយសារ​ការ​បន្ត​រាតត្បាត​នៃ​ជំងឺ​កូវីដ១៩។

​រដ្ឋមន្រ្តី​ក្រសួង​អប់រំ ​លោក ហង់ជួន ណារ៉ុន បាន​បញ្ជាក់​កាល​ពី​ថ្ងៃ​សុក្រ​ថា គ្រប់សាលារៀន​នៅ​បន្ត​បិទទ្វារ ជា​វិធានការ​មួយ ​ដើម្បី​ការពារ​ការ​ឆ្លង​ជំងឺ​នៅ​ក្នុង​ចំណោម​សិស្ស។ លោក​បាន​ថ្លែង​ប្រាប់​ ខេមបូចា ដោយ​ខ្លី​ថា គ្មាន​សេចក្តីសម្រេច​ថ្មី​ណា​មួយ​ត្រូវ​បាន​ធ្វើឡើង​ពាក់ព័ន្ធ​នឹង​សាលារៀន ដែល​ត្រូវ​បាន​បញ្ជា​ឲ្យ​បិទ​កាល​ពី​ថ្ងៃ​ទី២០ ខែ​មីនា​នោះ​ទេ។

​អ្នកនាំពាក្យ​ក្រសួង​អប់រំ​លោក ឌី ខាំបូលី ក៏​បាន​ថ្លែង​សំដៅ​ទៅ​គោលនយោបាយ​ពី​គ្រា​មុន​ស្តី​ពី​ការ​បិទ​សាលារៀន​ជា​វិធានការ​ទប់ទល់​នឹង​ការ​ឆ្លង​ជំងឺ​ផង​ដែរ។​

លោក​បាន​និយាយ​ពី​ការ​បិទសាលារៀន​អំឡុងពេល​មាន​ការ​រាតត្បាត​ជំងឺ​​ថា«ជា​ទូទៅ វា​មិនត្រឹម​តែ​ប៉ះពាល់​​កម្ពុជា​នោះ​ទេ ប៉ុន្តែ​នៅ​​កន្លែង​ដទៃ​ទៀត​ផងដែរ»

​កាល​ពី​ថ្ងៃ​ព្រហស្បតិ៍ អាជ្ញាធរ​បាន​បញ្ចប់​វិធានការ​បិទខ្ទប់នៅ​ផ្នែក​មួយភាគធំ​នៃ​ក្រុង​ភ្នំពេញ និង​ក្រុង​តាខ្មៅ​ជាប់​នោះ បន្ទាប់​ពី​ការ​រឹតត្បិត​តឹងរ៉ឹង​អស់រយៈពេល​បី​សប្តាហ៍​កន្លង​មក។ តំបន់​មួយចំនួន ដែល​ត្រូវ​បាន​ចាត់ទុក​ថា​ជា «តំបន់​ក្រហម» ដោយសារ​អាត្រាឆ្លងខ្ពស់​នៃ​ជំងឺ​កូវីដ១៩ នៅ​តែ​បន្ត​ស្ថិត​នៅ​ក្រោម​ការ​បិទខ្ទប់។ ​

​ប៉ុន្តែ​ក្រៅ​ពី​នេះ រដ្ឋាភិបាល​បាន​ចាប់ផ្តើម​ធ្វើការ​បើក​ឡើង​វិញ ដោយ​លោក​នាយករដ្ឋមន្រ្តី​ ហ៊ុន សែន​ កាល​ពី​ថ្ងៃ​ព្រហស្បតិ៍ បាន​បញ្ជា​ឲ្យ​រដ្ឋបាល​ខេត្ត​ដក​ចេញ​ការ​ហាមឃាត់​ការ​ធ្វើ​ដំណើរ​ចេញ​ចូល​ខេត្ត និងមិនតម្រូវឲ្យធ្វើចត្តាឡីស័ក។

​គិត​មក​ត្រឹម​ថ្ងៃ​សុក្រ កម្ពុជា​បាន​កត់ត្រា​ករណីឆ្លង​ជំងឺ​កូវីដ១៩ សរុប​ចំនួន ១៨.១៧៩ និង​ការ​ស្លាប់​ចំនួន ១១៤​ ចាប់តាំង​ពី​ការ​រាតត្បាត​ជំងឺ​កូវីដ១៩​ នៅ​ដើម​ឆ្នាំ​២០២០។

​កាល​ពី​ឆ្នាំ​មុន សិស្ស​ត្រូវ​ពឹងផ្អែក​លើ​កម្មវិធី​សិក្សា​តាម​ប្រព័ន្ធ​អនឡាញ​​ ដែល​ត្រូវ​បាន​រៀបចំ​ដោយ​ក្រសួង​អប់រំ។ ​កាល​ពី​ថ្ងៃ​សុក្រ ក្រសួង​អប់រំ​បាន​បញ្ចេញ​កម្មវិធីសិក្សា​តាម​ប្រព័ន្ធ​ឌីជីថល​ថ្មី​ឈ្មោះ​ថា E-Learning សម្រាប់​សិស្ស​គ្រប់​ថ្នាក់​សិក្សា។

លោក ខាំបូលី បាន​ថ្លែង​ថា៖ «សិស្ស​អាច​រៀន​តាម​អនឡាញ តាម​ប្រព័ន្ធ​ផ្សព្វផ្សាយ ហើយ​សម្រាប់​អ្នក​ដែល​មាន​ទូរសព្ទ​ស្មាតហ្វូន ពួកគេ​អាច​រៀន​នៅ​តាម​កម្មវិធី App ដូច្នេះ​យើង​មាន​ប្រព័ន្ធ​ឌីជីថល​ជា​ច្រើន​ប្រភេទ»

​យ៉ាងណាក៏ដោយ មិនមែន​សិស្ស​គ្រប់គ្នា​អាច​ពឹងផ្អែក​លើ​មធ្យោបាយ​សិក្សា​ក្នុង​ទម្រង់​ថ្មី​នោះ​ទេ។

​សិស្ស​ថ្នាក់​ទី០៨ អាយុ ១៤​ឆ្នាំ​ម្នាក់​ក្នុង​ឃុំ​ក្របីរៀល ក្នុង​ខេត្ត​សៀមរាប បាន​ប្រាប់ ខេមបូចា ថានាង​ប្រើប្រាស់​អ៊ីនធឺណិត​តាម​ទូរសព្ទ​ស្មាតហ្វូន។ អាស្រ័យ​ហេតុ​នេះ នាង​ជួប​ការ​លំបាក​ក្នុង​ការ​សិក្សា​ ដោយសារ​ប្រព័ន្ធអ៊ីនធឺណិត​មិន​ល្អ។

នៅ​ខណៈ​ប្រព័ន្ធ​អប់រំ​ត្រូវ​សម្រប​ថ្នាក់​រៀន​​ទៅ​តាម​ប្រព័ន្ធ​សិក្សា​ពី​ចម្ងាយ មិញត្រា ​មាន​អារម្មណ៍​ថា នាង​រៀន​មិនសូវ​ចេះ​ ពេល​រៀន​នៅ​ផ្ទះ បើ​ប្រៀប​នឹង​ពេល​នាង​ទៅ​រៀន​នៅ​សាលារៀន។

នាង​បាន​និយាយថា៖ «ការ​សិក្សា​តាម​ប្រព័ន្ធ​អនឡាញ​គឺ​លំបាក ពីព្រោះ​យើង​មិន​យល់ [ពី​មេរៀន] ហើយ​អត់មាន​គ្រូមក​ពន្យល់​នោះ​ទេ» ដោយ​បន្ថែម​ថា ការ​សិក្សា​ពី​ចម្ងាយ​បាន​ក្លាយ​ត្រឹម​ជា​កិច្ចការ​ផ្ទះ​ប៉ុណ្ណោះ​ភាគច្រើន។ នាង​បាន​និយាយ​ទៀត​ថា៖ «អ៊ីនធឺណិត​ដើរយឺតណាស់ ទោះបីនៅ​ពេល​យើងបញ្ចូលលុយ​តាម​កាត​ក៏ដោយ»

​ឪពុកម្តាយ​ក៏​មាន​ការ​បារម្ភ​ថា ការ​សិក្សា​តាម​ប្រព័ន្ធ​អនឡាញ​មិន​អាច​ជំនួស​ការសិក្សា​នៅ​សាលារៀន​បាន​នោះ​ទេ​ផងដែរ។

​អ្នកស្រី​ ណន ង៉ា អាយុ​ ៤៩​ឆ្នាំ បាន​និយាយ​ថា ការ​ផ្លាស់ប្តូរ​ទៅ​កាន់​ការ​សិក្សា​តាម​ប្រព័ន្ធឌីជីថល​បាន​ប៉ះពាល់​ដល់​គុណភាព​សិក្សា​សម្រាប់​កូនស្រី​ទាំងពីរ​របស់​អ្នកស្រី ដែល​កំពុង​រៀន​នៅ​ថ្នាក់​ទី០៨ និង​ទី១២។ អ្នកស្រី​ង៉ា​ក៏​បាន​លើកឡើង​ពី​ការ​ចំណាយ​លើ​ការ​សិក្សា​តាមរយៈ​ការ​ប្រើប្រាស់​អ៊ីនធឺណិត​តាម​ទូរសព្ទ​ស្មាតហ្វូន​ផង​ដែរ ដែល​ការ​ចំណាយ​នេះ​ អ្នកស្រី​និយាយ​ថា មិនបាន​ផល​នោះ​ទេ។ ​

​អ្នកស្រី​បាន​ថ្លែង​ថា៖ «ពួកគេ​រៀន​មិនចេះ ដូចរៀន​នៅ​សាលា​នោះ​ទេ»

កុមារី​ម្នាក់​ជិះកង់​កាត់មុខ​សាលាបឋមសិក្សា​មួយ​ក្នុង​ស្រុកពួក ខេត្ត​សៀមរាប​ កាល​ពី​ថ្ងៃ​ទី០៧ ខែ​ឧសភា ឆ្នាំ​២០២១។ ខេមបូចា/ បញ្ញា ឆព័ណ្ណ

អ្នកស្រី​ អ៊ុក ឆាយវី ប្រធាន​សមាគម​គ្រូ​បង្រៀន​ឯករាជ្យ​កម្ពុជា បាន​យល់​ស្រប​ជាមួយ​នឹង​សេចក្តីសម្រេច​បិទសាលារៀន​មួយ​រយៈ​ ជា​ផ្នែក​មួយ​នៃ​វិធានការ​ការពារ​សុវត្ថិភាព​។ ប៉ុន្តែ​អ្នកស្រី​បាន​លើកឡើង​ថា ការ​សិក្សា​តាម​ប្រព័ន្ធ​អនឡាញ​មិន​អាច​ជំនួស​ការ​សិក្សា​ក្នុង​ថ្នាក់រៀន​បាន​នោះ​ទេ។​

​អ្នកស្រី​បាន​ថ្លែង​ថា៖ «វា​ពិតជា​ប៉ះពាល់​ដល់​គុណភាព​សិក្សា។ ប៉ុន្តែ​យើង​យល់​ពី​ស្ថានភាព​ជំងឺ​កូវីដ១៩»

​កាល​ពី​ខែ​មករា សិស្ស​រាប់​លាន​នាក់​បាន​ចាប់ផ្តើមឆ្នាំ​សិក្សា​ថ្មី បន្ទាប់​ពី​ត្រូវ​បាន​អាក់ខាន​កាល​ពី​មួយ​ឆ្នាំ​មុន ដោយសារ​ការ​រាតត្បាត​ជំងឺ​កូវីដ១៩។ កាល​ពី​គ្រា​នោះ សាលារៀន​ប្រមាណ ៣៥​នៅ​តាម​បណ្តោយ​ព្រំដែន​ជាប់​ប្រទេស​ថៃ បន្ត​បិទទ្វារ ដោយសារ​ត្រូវ​បាន​យក​មក​ប្រើជា​មណ្ឌល​ចត្តាឡីស័ក​ សម្រាប់​ពលរដ្ឋ​ត្រឡប់​មក​ស្រុក​កំណើត​វិញ។ សិស្ស​នៅ​សាលារៀន​ទាំង​នោះ​ត្រូវ​បាន​បញ្ជូន​ឲ្យ​ទៅ​សិក្សា​​នៅ​ឯសាលារៀន​ដទៃ​ទៀត។ ​

​នៅ​ពេល​នោះ​ផង​ដែរ ក្រសួង​អប់រំ​បាន​ចេញ​សេចក្តីបង្គាប់​ឲ្យ​អនុវត្ត​ដើម្បី​សុវត្ថិភាព​សម្រាប់​សាលារៀន​ឯកជន និង​រដ្ឋ​នៅ​ទូទាំងប្រទេស។ ប៉ុន្តែ​កាលពី​ថ្ងៃ​២០ ខែ​មីនា ក្រសួង​អប់រំ​បាន​ប្រកាស​ពី​ការ​ផ្អាក​គ្រប់គ្រឹះស្ថាន​សិក្សា​ជា​បណ្តោះអាសន្ន​នៅ​ក្នុង​ប្រទេស ដោយសារ​ការ​រាតត្បាត​ជំងឺ​កូវីដ១៩ ពាក់ព័ន្ធ​នឹង​ព្រឹត្តិការណ៍​សហគមន៍ ២០​កុម្ភៈ នៅ​ក្រុង​ភ្នំពេញ។ ​

​ការ​បិទ​នេះ​ត្រូវ​បាន​អនុវត្ត​ទូទាំង​ប្រទេស​ រួម​ទាំង​ ខេត្ត​បន្ទាយ​មាន​ជ័យ​ ផងដែរ ជា​ទី​ដែល​ប្រធាន​មន្ទីរ​អប់រំ​ខេត្ត​លោក ប៉ិច រតនា មើល​ការ​ខុសត្រូវ​លើ​ការ​សិក្សា​របស់​សិស្ស​​ប្រមាណ ៥​ម៉ឺន​នាក់។ លោក​រតនា ​បាន​និយាយ​ថា លោក​មិនទាន់​ទទួល​បាន​ការ​បញ្ជា​ណា​មួយ​ឲ្យ​បើកសាលារៀន​នោះ​ទេ។

​លោក​បាន​ថ្លែង​ថា៖ «យើង​នៅ​តែ​បន្តសិក្សា​តាម​ប្រព័ន្ធ​អនឡាញ ហើយ​នៅ​កន្លែង​ខ្លះ យើង​ផ្តល់​​ជា​ឯកសារ​ឲ្យ​សិស្ស។ វា​ប៉ះពាល់​សិស្ស​នៅ​ពេល​ពួកគេ​មិនបាន​រៀន​នៅ​សាលា។ ការ​រៀន​តាម​ប្រព័ន្ធ​អនឡាញគឺ​មិន​ល្អ​ដូចការ​រៀន​រួម​គ្នា​នោះ​ទេ»

​ស្ថានភាព​ជំងឺ​កូវីដ១៩ នៅបន្ត​បង្ក​ជា​បញ្ហា​ចោទ​មួយ​សម្រាប់​ខេត្ត​តាម​បណ្តោយ​ព្រំដែន​ ដោយសារ​តែ​អ្នកធ្វើដំណើរ​ចេញ​ចូល​ខេត្ត និង​ពលករ​វិលត្រឡប់​ពី​ប្រទេស​ថៃ។ ​

នៅ​ស្របពេល​ដូចគ្នា​នេះ​ដែរ លោក​រតនា​និយាយ​ថា ក្រសួង​អប់រំ​បាន​បង្កើត​ជា​ប្រព័ន្ធ​ឌីជីថល និង​វីដេអូ​ឃ្លីប​ដើម្បី​ឲ្យ​សិស្ស​ប្រើប្រាស់។ ប៉ុន្តែ​លោក​បាន​លើកឡើង​ថា មិនមែន​សិស្ស​គ្រប់គ្នា​អាច​រៀន​តាម​ប្រព័ន្ធ​អនឡាញ​បាន​នោះ​ទេ ជាពិសេស​សិស្ស​នៅ​តំបន់​ជនបទដាច់ស្រយាល​ ដែល​មិនមាន​អ៊ីនធឺណិត។

លោក​បាន​បន្ថែមថា៖ «សាលារៀន​គឺ​នៅ​ឆ្ងាយ​ពី​ទីរួមស្រុក ដូច្នេះ​ពួកគេ​ជួប​ការ​លំបាក​ក្នុង​ការ​ប្រើប្រាស់​អ៊ីនធឺណិត»

ប្រែសម្រួលពីអត្ថបទភាសាអង់គ្លេស៖ Amid criticism of online education, schools remain suspended as lockdown lifts

92 views
Share on facebook
Share on twitter
Share on linkedin
Share on telegram
Share on whatsapp
ព័ត៌មានទាក់ទង
ព័ត៌មានថ្មីៗ »
អត្ថបទពេញនិយម »