អ្នកជំនាញថា វិនិយោគចិនកើនកាន់តែច្រើន ធ្វើឲ្យកម្ពុជាពឹងពាក់ចិនកាន់តែខ្លាំង

កំណើនវិនិយោគចិនបានមើលឃើញថាមានភាពប្រហាក់ប្រហែលនឹងការកើនឡើងក្រុមហ៊ុនសំណង់ពីប្រទេសចិន ចូលមកកម្ពុជាដើម្បីសាងសង់ហេដ្ឋារចនាសម្ព័ន្ធ។ បញ្ញា ឆព័ណ្ណ
កំណើនវិនិយោគចិនបានមើលឃើញថាមានភាពប្រហាក់ប្រហែលនឹងការកើនឡើងក្រុមហ៊ុនសំណង់ពីប្រទេសចិន ចូលមកកម្ពុជាដើម្បីសាងសង់ហេដ្ឋារចនាសម្ព័ន្ធ។ បញ្ញា ឆព័ណ្ណ
Share on facebook
Share on twitter
Share on linkedin
Share on telegram
Share on whatsapp

ស្ថាន​​ទូត​​ចិន​​ប្រ​ចាំ​​ទីក្រុង​ភ្នំពេញ​ប្រកាស​ថា​ការ​វិនិយោគ​​របស់​ប្រទេស​ខ្លួន​​ក្នុង​ប្រ​ទេស​កម្ពុជា​មានការ​កើនឡើង​យ៉ាង​ខ្លាំង ខណៈ​ក្រុ​ម​អ្នកឃ្លាំមើលថា​នេះ​ជា​កាដូ​​សម្រាប់​ភាព​ស្មោះត្រង់​របស់​​កម្ពុជា​​លើ​មិត្ត​ជិតស្និទ្ធ​មួយ​នេះ។​

ស្ថាន​​ទូត​​ចិន​បាន​សរសេរ​លើ​ទំព័រ​ហ្វេស​ប៊ុក​របស់​ខ្លួន​​កាលពី​សប្ដាហ៍​កន្លង​ទៅ​ថា​ការ​វិនិយោគ​របស់​ចិន​ក្នុង​ប្រទេស​កម្ពុជា​បាន​ឡើង​ដល់​៨៦០​​លាន​ដុល្លារ សម្រាប់​១១​ខែ​ដំបូង​ក្នុង​ឆ្នាំ​២០២០ មាន​ការ​កើន​ឡើង​៧០ភាគ​រយ​ច្រើន​ជាង​រយៈពេល​ដូច​គ្នា​ក្នុង​ឆ្នាំ​២០១៩។​

ស្ថាន​​ទូត​បាន​រាប់​បញ្ចូល​ទាំង​គម្រោង​ និង​ការ​វិនិយោគ​ធំៗ ដូច​ជា​ផ្លូវ​ល្បឿន​លឿនភ្នំពេញ-​ក្រុង​ព្រះ​សីហនុ គម្រោង​អាកាសយានដ្ឋាន​អន្តរជាតិ​ថ្មីក្រុង​​សៀម​រាប និងលំហូរ​នៃ​ការ​ធ្វើ​ពាណិជ្ជកម្ម​របស់​អ្នកជំនួញ​ចិន​ក្នុង​ប្រទេស​កម្ពុជា​។​​​

ស្ថាន​​ទូត​បាន​សរសេរថា៖ «​ចំនួន​សហគ្រាស​ក្នុង​តំបន់សេ​ដ្ឋកិច្ច​ពិសេស​ខេត្តព្រះ​សីហនុ​មានចំនួនកើន​ឡើង​ជាបន្តបន្ទាប់​ ហើយ​បរិមាណ​នៃការ​នាំចូល​ និងនាំចេញ​បានឈាន​ដល់​កម្រិតខ្ពស់ជាប្រវត្តិសាស្រ្ត»។​

អគ្គលេខាធិការក្រុមប្រឹក្សាអភិវឌ្ឍន៍កម្ពុជា លោក សុខ ចិន្ដាសោភា និង​លោក មាស សុខសេនសាន អ្នក​នាំ​ពាក្យ​​ក្រសួង​​សេដ្ឋកិច្ច និង​​ហិរញ្ញវត្ថុ​ មិន​អាច​ទាក់ទង​សុំ​ការ​ត្ថាធិប្បាយ​លើ​តួលេខ​វិនិយោគ​ចិននាពេល​ថ្មីៗនេះ​​បាន​ទេ។​

ការវិនិយោគ​ចិន​ក្នុង​ចំនួន​ដ៏​ច្រើន​ក្នុង​ប្រទេស​កម្ពុជា​មាន​នៅ​ទឹក​ដីជាប់​មាត់​សមុទ្រ​​ក្រុង​ព្រះសីហនុ និង​ក៏​មាន​ដែរ​ការ​ធ្វើអាជីវកម្ម​ល្បែង​អនឡាញ​ខុស​ច្បាប់​កន្លង​មក។ ការ​វិនិយោគ​របស់​ចិ​នក៏​មាន​ដែរលើ​គម្រោង​ហេដ្ឋា​រចនាសម្ព័ន្ធ​ធំ​ៗនៅទូទាំង​ប្រទេស​។​

លោក ឃាង ភារម្យ អ្នកនាំ​ពាក្យ​សាលា​ខេត្ត​ព្រះ​សីហនុ មាន​ប្រ​សាសន៍ថា​នៅ​ក្នុង​ខេត្ត​នេះ​មាន​គម្រោង​វិនិយោគ​របស់​ចិន​ចំនួន​៧១ មាន​ទឹក​ប្រាក់​វិនិយោគ​សរុប​១៧​ពាន់​លាន​ដុល្លារ។ យ៉ាងណា លោក​បាន​បដិសេធ​ថា​គម្រោង​ទាំង​នេះ មិន​បាន​បង្ក​ឲ្យ​មាន​ជម្លោះ​ដីធ្លី​នោះទេ។​

លោក​បន្ថែមថា៖ «​យើង​មាន​យន្តការ​ច្បាស់​លាស់​ដោះ​ស្រាយ​តាម​ច្បាប់។​ យើង​ត្រូវ​តែ​បែង​ចែក​ឲ្យ​ច្បាស់​រវាង​ជម្លោះពី ​ដី​ដែល​មាន​បណ្ណកម្មសិទ្ធិត្រឹម​ត្រូវ និង​ដី​គ្មាន​ចុះបញ្ជី និង​ការ​ទន្ទ្រាន​កាន់​កាប់​ដីរបស់​រដ្ឋដោយ​ខុស​ច្បាប់​ ដែល​ទាំងនេះ​មិន​​ចាត់ទុក​ថា​ជាជម្លោះ​ដីធ្លីនោះទេ។ វា​ជា​វិធានការ​ស្រប​ច្បាប់»។​

ជាមួយ​នឹង​ការ​កើន​ឡើង​នៃ​ការ​វិនិយោគ​របស់​ចិន កម្ពុជា​ក៏​ត្រូវ​គេ​មើល​ឃើញ​ថា​បាន​កើន​បំណុល​បរទេស​ដូច​គ្នា​ ដែល​ក្នុង​នោះ​មាន​៤០​ភាគ​រយ​នៃ​បំណុល​សារធាណៈ​ ជា​បំណុល​របស់​ចិន។ ដោយគិតត្រឹម​ថ្ងៃទី​៣០ ខែ​មិថុនា ឆ្នាំ​២០២០ កម្ពុជា​មាន​បំណុល​សាធារណៈសរុប​៧,៩​ពាន់​លាន​ដុល្លារ។​

លោក អៀ សុផល សាស្ត្រាចារ្យ នៃ​សាកល​វិទ្យាល័យ Occidental College ក្នុង​ទីក្រុង Los Angeles ​​មាន​ប្រ​សាសន៍ថា ទំហំវិនិយោគ​នេះ​នៅ​តូច​ទេ​​ បើធៀប​ទៅ​នឹង​ផល​ប្រ​យោជន៍​ភូមិសាស្រ្ត​នយោបាយ​ដែល​ចិន​បាន​ទទួលពី​ទំនាក់ទំនង​មិត្តភាព​ជាមួយ​កម្ពុជា។​​

លោក​មានប្រសាសន៍ថា៖ «ការវិនិយោគនេះ បំពេញ​ចន្លោះ​ដែល​កម្ពុជា​មិន​អាច​ធ្វើ​បាន។ វាបាន​នាំមក​នូវ​បច្ចេកវិទ្យា ជាជាង​ហិរញ្ញវត្ថុ។ វា​បាន​ជួយ​កសាងហេដ្ឋារចនាសម្ព័ន្ធ​ដើម្បី​ប្រ​ជាជន​កម្ពុជា​ប្រើ​ប្រាស់»។​

លោក​ឲ្យ​ដឹងទៀត​ថា៖ «​យ៉ាង​ណា វាក៏​មក​ជាមួយ​នឹង​គោលបំណង ដូច​ជា​គ្មាន​ការ​សិក្សា​ពីហេតុ​ប៉ះពាល់​បរិស្ថាន​ច្បាស់​លាស់ ដែល​ភាគីចិន​អាច​ធ្វើ​ដោយ​ខ្លួន​ឯង​ក្នុងពេលអនុវត្តគម្រោង​របស់​គេ»។​

​ការ​វិនិយោគ​មួយ​ចំនូន​នៅ​ក្នុងក្រុង​ព្រះ​សីហនុ​ត្រូវ​រងការ​ចោទ​ប្រកាន់ថា​ស្ថិត​ក្រោម​ស្លាក​ផ្លូវ​មួយ ខ្សែក្រវ៉ាត់​មួយ​របស់​ចិន ដែល​ជា​មហិចតា​​ធ្វើ​គម្រោង​ហេដ្ឋារចនាសម្ព័ន្ធ​ឆ្លង​ប្រទេសនានា​ ដែល​ភ្ជាប់ទៅ​នឹង​មហិចតា​ភូមិសាស្រ្ត​នយោបាយ​ចិន​។ មិន​មាន​គោល​ការណ៍​ច្បាស់​លាស់​ដើម្បី​បញ្ជាក់​ថា​គម្រោង​មួយ​ណា​ស្ថិត​ក្រោម​ស្លាក​នៃគម្រោង​ផ្លូវ​មួយ ខ្សែ​ក្រវ៉ាត់​មួយ​នោះដែរ។

​​ផ្លូវ​ល្បឿន​លឿន​ភ្នំពេញ-ក្រុងព្រះ​សីហនុ ជា​ផ្នែក​មួយ​នៃ​គម្រោង​ផ្លូវ​មួយ ខ្សែក្រវ៉ាត់​មួយ​របស់​ចិន ដែល​ចំណាយ​ថវិកា​ជិត​ពីរ​ពាន់​លាន​ដុល្លារ និង​ទើប​សម្រេច​បាន​៣៩​ភាគ​រយ​។​

អាកាសយាន​ដ្ឋាន​អន្តរជាតិ​សៀមរាប​អង្គរថ្មី​បានចាប់ផ្តើមសាងសង់អគារច្រក​ចូល​ (Terminal) និងទីតំបន់សម្រាប់ការហោះហើរ ហើយ​ក្រុម​ហ៊ុន​ចិន​ Sinomach Heavy Equipment Group Co., Ltd ក៏​បាន​ចុះ​កិច្ចព្រមព្រៀង​លើ​គម្រោង​វិនិយោគ​ សាង​សង់ ប្រតិបត្តិការ និង​ផ្ទេរ (BOT)​នៃស្ថានីយ៍​វារីអគ្គិស​នីស្ទឹង​តាតៃលើ។​

លោក Anthony Galliano អគ្គនាយក​ក្រុមហ៊ុន Cambodia Investment Management Holding មាន​ប្រសាសន៍ថា​កម្ពុជា​បាន​ទទួល​កាដូនេះ សម្រាប់​ភាព​ស្មោះ​ត្រង់​របស់​ខ្លួន​ និង​សាមគ្គីភាពជាមួយចិន ប៉ុន្តែ​ថា​ការ​ឲ្យ​មាន​ការ​វិនិយោគចិន​ក្នុង​ប្រទេស​ស្ទើរ​តែ​៥០​ភាគ​រយ​បែប​នេះ គឺ​ធ្វើ​ឲ្យ​កម្ពុជា​មាន​ហានិភ័យ និង​ត្រូវ​ពឹង​ផ្អែក​លើ​ចិន។​

លោក​បន្ថែម​ថា៖ «​ខណៈដែលមិន​មាន​អ្វី​គួរ​ឲ្យ​ឆ្ងល់ទាក់ទង​នឹង​អត្ថ​ប្រយោជន៍​ដែល​កម្ពុជា​ទទួល​បាន តែ​ការ​ខ្វះខាត​លើ​​ពិពិធកម្ម​វិនិយោគ​ពីប្រទេស​ផ្សេង ជាកង្វល់​មួយ។ ជាការ​ពិត ការ​មិន​ទទួល​បានការ​វិនិយោគពី​ប្រទេស​ធំៗផ្សេងទៀត នឹង​ធ្វើ​ឲ្យ​ចិន​មាន​ឥទ្ធិ​ពល​ខ្លាំង​នៅ​តំបន់នេះ​ »

ប្រែសម្រួលពីអត្ថបទភាសាអង់គ្លេស៖ As Chinese FDI grows, so does Cambodia’s dependency on China, say experts

18 views
Share on facebook
Share on twitter
Share on linkedin
Share on telegram
Share on whatsapp
ព័ត៌មានថ្មីៗ »
អត្ថបទពេញនិយម »