សមាគមសម្ព័ន្ធអ្នកសារព័ត៌មានកម្ពុជា

លោក កឹម សុខា អំពាវនាវឲ្យទម្លាក់ចោលសំណុំរឿង ខណៈតុលាការបន្តសវនាការលើសំណុំរឿងក្បត់ជាតិរបស់លោក

លោក កឹម សុខា ស្វាគមន៍អ្នកគាំទ្រលោកកាលពីថ្ងៃពុធ ពេលចាកចេញពីសាលាដំបូងរាជធានីភ្នំពេញ បន្ទាប់ពីចូលរួមសវនាការនៅថ្ងៃនោះ។ រូបភាពថតកាលពីថ្ងៃទី១៩ មករា។ ខេមបូចា/ ព្រីង សំរាំង
លោក កឹម សុខា ស្វាគមន៍អ្នកគាំទ្រលោកកាលពីថ្ងៃពុធ ពេលចាកចេញពីសាលាដំបូងរាជធានីភ្នំពេញ បន្ទាប់ពីចូលរួមសវនាការនៅថ្ងៃនោះ។ រូបភាពថតកាលពីថ្ងៃទី១៩ មករា។ ខេមបូចា/ ព្រីង សំរាំង

សាលាដំបូង​រាជធានីភ្នំពេញបាន​បន្ត​សវនាការជុំវិញ​បទ​ចោទ​ក្បត់​ជាតិ​លើ​លោក កឹម សុខា អតីត​ប្រធាន​គណបក្ស​សង្គ្រោះ​ជាតិនៅថ្ងៃ​ពុធ​នេះជាថ្ងៃដែលរង់ចាំយូរមកហើយ​ បន្ទាប់ពីបានពន្យារពេលជិតពីរឆ្នាំ។

សំណុំរឿងប្រឆាំងនឹងឥស្សរជនបក្សប្រឆាំងដ៏យូរអង្វែងរូបនេះត្រូវបានពន្យារពេលតាំងពីខែមីនា ឆ្នាំ២០២០ ចំពេលមានការរីករាលដាលជំងឺកូវីដ-១៩។ ទោះជាយ៉ាងណាក៏ដោយ ដំណើរការធម្មតារបស់តុលាការបានបន្តឡើងវិញជាច្រើនខែមកហើយ រួមទាំងការចាប់ផ្តើមសវនាការថ្មីលើសកម្មជនសិទ្ធិមនុស្ស និងសមាជិកផ្សេងទៀតរបស់គណបក្សសង្គ្រោះជាតិដែលត្រូវបានរំលាយចោល។

មុន​នឹង​ចេញ​ដំណើរទៅ​ចូលរួម​សវនាការ​នៅ​ថ្ងៃ​ពុធនេះ លោក កឹម សុខា បាន​និយាយ​ដោយខ្លី​ជាមួយ​អ្នក​សារព័ត៌មាន​នៅ​គេហដ្ឋាន​របស់​លោក​ក្នុង​ខណ្ឌ​ទួលគោក រាជធានី​ភ្នំពេញ។ លោក​បាន​ថ្លែង​ថា លោក​រីករាយ​ក្នុង​ការ​បន្ត​សវនាការ​ឡើង​វិញ ហើយ​សង្ឃឹម​ថា ​តុលាការ​នឹង​ទម្លាក់​ចោល​រាល់​ការ​ចោទ​ប្រកាន់​លើ​រូប​លោក។

លោក សុខា បានប្រាប់អ្នកសារព័ត៌មានថា៖ «ថ្ងៃនេះ គឺថ្ងៃដែលខ្ញុំបានទន្ទឹងរង់ចាំជា យូរមកហើយ ដើម្បីបន្តសវនាការឡើងវិញ និងបញ្ចប់បញ្ហាទាំងអស់នេះ»

លោកមានប្រសាសន៍បន្ថែមថា៖ «ខ្ញុំសង្ឃឹមថា ថ្ងៃនេះ តុលាការនឹងសម្រេចទម្លាក់ចោលការចោទប្រកាន់មកលើរូបខ្ញុំ ដើម្បីកម្ពុជាយើងឈានទៅរកការបង្រួបបង្រួមជាតិ និងឯកភាពជាតិ ដើម្បីអភិវឌ្ឍន៍ប្រទេសរបស់យើងទាំងអស់គ្នា»

មនុស្សប្រហែល៥០នាក់បានចុះឈ្មោះ ដើម្បីស្តាប់សវនាការរបស់លោក ប៉ុន្តែមានតែមនុស្ស២៨នាក់ប៉ុណ្ណោះដែលត្រូវបានអនុញ្ញាតឲ្យចូលបន្ទប់សវនាការដោយសារតែវិធានការណ៍ទប់ស្កាត់ជំងឺកូវីដ-១៩ ។ អ្នកផ្សេងទៀតមិនត្រូវបានអនុញ្ញាតទេ រួមទាំងអ្នកសារព័ត៌មាន និងសមាជិកសង្គមស៊ីវិលផងដែរ។

សវនាការ​រយៈពេល​បី​ម៉ោង​នេះ ​ផ្តោត​ជា​សំខាន់​លើ​នីតិវិធី​ នេះ​បើ​តាម​លោក ចាន់ ចេន មេធាវី​របស់​លោក កឹម សុខា ដែល​បាន​ប្រាប់​អ្នក​សារព័ត៌មាន​បន្ទាប់​ពី​សវនាការ ។

លោកមានប្រសាសន៍​ថាតុលាការ​ក៏​បាន​បង្ហាញ​វីដេអូ​របស់លោក កឹម សុខា ស្តីពីការជួបជុំមួយ​នៅក្នុង​ប្រទេស​អូស្ត្រាលី ដែល​ព្រះរាជអាជ្ញា​​ប្រើប្រាស់ធ្វើជា​ភស្តុតាង​សម្រាប់​​ចោទ​ប្រកាន់​លោក កឹម សុខា ពី​បទ​ក្បត់​ជាតិ។

លោក ចាន់ ចេន បានមានប្រសាសន៍ថា៖ «វីដេអូពេញដែលយើងបានឃើញនោះ មិនមែនជាករណីនៃការឃុបឃិតជាមួយបរទេស ឬប្រើប្រាស់អំពើហិង្សា និងការផ្តួលរំលំរដ្ឋាភិបាលទេ»ដោយលោកបានបន្ថែមថា លោក កឹម សុខា បានទៅអូស្ត្រាលីដើម្បីថ្លែងអំណរគុណប្រជាពលរដ្ឋនៅទីនោះចំពោះការផ្តល់ជំនួយសង្គ្រោះអំឡុងពេលមានគ្រោះទឹកជំនន់នៅកម្ពុជា។

លោក ចាន់ ចេន ក៏បានមានប្រសាសន៍ផងដែរថា លោក កឹម សុខា បានប្រាប់តុលា ការថា លោកគោរពវិធានការរបស់រដ្ឋាភិបាលក្នុងការទប់ស្កាត់ជំងឺកូវីដ-១៩ ហើយមានបំណងអនុវត្តតាមនីតិវិធីរបស់តុលាការ ប៉ុន្តែក៏ចង់ឲ្យតុលាការពន្លឿនដំណើរការនីតិវិធីរបស់ខ្លួននិងដំណើរការដោយយុត្តិធម៌និងតម្លាភាពផងដែរ។

លោក ចាន់ ចេន បាន​មាន​ប្រសាសន៍​អំពី​លោក សុខា ថា៖​ «រយៈពេល៤ឆ្នាំ​មក​ហើយ ការ​ចាប់​ខ្លួន​កូន​ក្តី​របស់​យើង​បាន​ប៉ះ​ពាល់​ដល់​ផល​ប្រយោជន៍​របស់​កូន​ក្តី ជា​ពិសេស​សិទ្ធិ​ពលរដ្ឋ និង​សិទ្ធិ​នយោបាយ»

លោក ចាន់ ចេន បាននិយាយថា លោកនៅតែជឿជាក់ថា សំណុំរឿងប្រឆាំងនឹងឥស្សរជនគណបក្សប្រឆាំងគឺជារឿងនយោបាយ ហើយគួរតែត្រូវបានដោះស្រាយតាមមធ្យោបាយនយោបាយ មិនមែនតាមផ្លូវច្បាប់នោះទេ។

លោក កឹម សុខា អមដំណើរដោយក្រុមមេធាវីរបស់លោក និងអតីតមន្ត្រីគណបក្សសង្គ្រោះជាតិកាលពីថ្ងៃពុធ បន្ទាប់ពីសវនាការរបស់លោកនៅសាលាដំបូងរាជធានីភ្នំពេញ។ រូបភាពថតកាលពី​ថ្ងៃ​ទី១៩ ខែមករា ឆ្នាំ២០២២។ ខេមបូចា/ ព្រីង សំរាំង

លោក គី តិច មេធាវីរបស់​រដ្ឋាភិបាលបាន​ថ្លែង​ថា ព្រះរាជអាជ្ញា​បាន​ឆ្លើយតប​ទៅ​លោក កឹម សុខា ថា​ នីតិវិធី​កំណត់​ច្បាស់ថា សំណុំ​រឿង​នេះនឹង​បន្ត​រហូត​ លុះត្រាជនជាប់​ចោទ​ទទួលមរណភាព តុលាការ​សម្រេច​សាលក្រម ឬ​ក៏ជន​ជាប់​ចោទ​សារភាព។

លោក គឺ តិច បានមានប្រសាសន៍ថា៖ «ប្រសិនបើជនជាប់ចោទបានសារភាពពីបទ ល្មើសអ្វីដែលគាត់បានប្រព្រឹត្តហើយគាត់សារភាពកំហុសនោះ សំណុំរឿងនេះនឹងត្រូវបញ្ចប់»

លោក កឹម សុខា ត្រូវបានចាប់ខ្លួនកាលពីថ្ងៃទី០៣ ខែកញ្ញា ឆ្នាំ២០១៧ និងត្រូវបានចោទប្រកាន់ពីបទសមគំនិតជាមួយបរទេស។ រដ្ឋាភិបាលបានចោទប្រកាន់លោកថា បានធ្វើការជាមួយសហរដ្ឋអាមេរិកដោយប៉ុនប៉ងធ្វើបដិវត្តន៍ពណ៌ ដើម្បីផ្តួលរំលំរដ្ឋាភិបាលរបស់គណបក្សកាន់អំណាច។

លោក កឹម សុខា បាន​អះអាង​ថា លោក​គ្រាន់តែ​ធ្វើ​សកម្មភាព​ស្រប​ច្បាប់និង​តម្លាភាព ដើម្បី​ព្យាយាម​ឈ្នះការបោះ​ឆ្នោត។

គណបក្ស​សង្គ្រោះ​ជាតិ​ត្រូវ​បាន​តុលាការ​កំពូល​រំលាយ​ចោលកាលពី​ឆ្នាំ២០១៧ ដោយ​​សមាជិក​បក្ស​ជាច្រើន​នាក់​ត្រូវ​ចាប់ខ្លួនជុំវិញអ្វី​ដែល​គេ​ជឿ​ជាទូទៅថា ​ជា​បទ​ចោទ​ពាក់ព័ន្ធ​នយោបាយ។ មេដឹកនាំកំពូលរបស់គណបក្សនេះបាននិរទេសខ្លួនទៅក្រៅប្រទេសហើយសមាជិកជាង១០០នាក់ត្រូវបានហាមឃាត់មិនឲ្យធ្វើនយោបាយរយៈពេល៥ឆ្នាំ។

លោក អំ សំអាត អនុប្រធាន​អង្គការ​សិទ្ធិ​មនុស្ស​លីកាដូ បាន​ចូល​រួម​សវនាការ​នៅថ្ងៃពុធនេះ។ លោកមានប្រសាសន៍​ថា ព្រឹត្តិការណ៍ថ្ងៃ​នេះ​គឺផ្តោត​ជា​សំខាន់​លើ​ដំណើរការ​នីតិវិធីជាជាង​ការ​សួរ​ដេញដោលពី​បទ​ក្បត់ជាតិ​ដែលចោទ​លោក កឹម សុខា។

លោក​បាន​មានប្រសាសន៍ថា៖ «យើង​មើល​ឃើញ​ថា ​សំណុំរឿង​នេះ​មាន​ភាព​ស្មុគ ស្មាញ​ណាស់​ ដូច​ដែល​យើង​បាន​ដឹងហើយ​ថា ​សំណុំរឿង​នេះ​គឺជារឿង​នយោបាយ ដូច្នេះ​ការ​ដោះស្រាយ​គឺ​ត្រូវ​មាន​ការ​ចរចា​នយោបាយ​»។

លោក​មានប្រសាសន៍ថា សំណុំរឿងនេះ​អាច​បញ្ចប់​ឆាប់​ៗតាម​ដែល​អាច​ធ្វើ​ទៅ​បាន​តាម​រយៈ​ការ​សន្ទនា​នយោបាយ ប៉ុន្តែ​វាត្រូវ​អនុវត្ត​តាម​នីតិវិធី​របស់​តុលាការ។ លោក​បានប៉ាន់​ប្រមាណ​ថា ​អាច​ចំណាយ​ពេល​យូរ ហើយ​ទំនង​ជា​រារាំង​លោក កឹម សុខា មិន​ឲ្យ​ចូល​រួម​ការ​បោះឆ្នោត​ក្រុម​ប្រឹក្សា​ឃុំ​សង្កាត់​នៅ​ចុង​ឆ្នាំ​នេះ។

លោក ហ្វីល រ៉ូបឺតសិន (Phil Roberson ) នាយករងប្រចាំតំបន់អាស៊ីនៃអង្គការឃ្លាំមើលសិទ្ធិមនុស្ស (HRW) បាននិយាយនៅក្នុងសេចក្តីថ្លែងការណ៍កាលពីថ្ងៃអង្គារថា ការបន្តសវនាការរបស់លោក កឹម សុខា បន្ទាប់ពីការផ្អាកអស់រយៈពេលជិតពីរឆ្នាំនេះ មិនផ្លាស់ប្តូរការពិតដែលថា «ការចោទប្រកាន់ក្លែងក្លាយនិងបែបនយោបាយ» ទាំងនេះ មិនគួរត្រូវបានចោទប្រកាន់លើលោក កឹម សុខា តាំងពីដំបូង។

លោក រ៉ូបឺតសិន បាន​ថ្លែង​ថា៖​ «ឆាកល្ខោនទាំងមូល​នេះ​គឺ​និយាយអំពី​ការ​រារាំង​អ្នក​ណា​ម្នាក់​មិនឲ្យ​ប្រើ​ប្រាស់ការបោះ​ឆ្នោត ដើម្បីប្រកួតប្រជែងប្រកបដោយអត្ថន័យ​នឹងការ​ដឹកនាំ​របស់​លោក ហ៊ុន សែន»

លោកបន្តថា៖ «គួរឲ្យសោកស្ដាយ វាហាក់បីដូចជាវិធីល្អបំផុតនោះគឺថា កឹម សុខា អាចសង្ឃឹមបានការលើកលែងទោសឆាប់រហ័សពីលោក ហ៊ុន សែន បន្ទាប់ពីអ្វីដែលជាការកាត់ទោសមិនអាចជៀសរួចនៅចុងបញ្ចប់នៃសវនាការដ៏អូសបន្លាយនេះ»

សវនាការនឹងបន្តនៅសប្តាហ៍ក្រោយនៅថ្ងៃទី២៥ ខែមករា៕

ប្រែសម្រួលពីអត្ថបទភាសាអង់គ្លេស៖ As his treason trial resumes, Kem Sokha calls on court to drop its case

363 views

ព័ត៌មានទាក់ទង

ព័ត៌មានថ្មីៗ

អត្ថបទពេញនិយម