សមាគមសម្ព័ន្ធអ្នកសារព័ត៌មានកម្ពុជា

ភាសាខ្មែរ
  • English
  • ភាសាខ្មែរ

នៅទីបំផុត ប្រជាពលរដ្ឋប្រមាណ៩០គ្រួសារនៅ​ភូមិប៉ប្រកក្នុងរាជធានីភ្នំពេញ នឹងមានទឹកស្អាតប្រើប្រាស់

អេស្កាវ៉ាទ័រជីកដីដាក់បំពង់ទឹកនៅភូមិប៉ប្រកខាងជើង ថ្ងៃទី១៩ ខែកុម្ភៈ ឆ្នាំ២០២៤ ។ (រូបភាពផ្តល់ឲ្យ)
អេស្កាវ៉ាទ័រជីកដីដាក់បំពង់ទឹកនៅភូមិប៉ប្រកខាងជើង ថ្ងៃទី១៩ ខែកុម្ភៈ ឆ្នាំ២០២៤ ។ (រូបភាពផ្តល់ឲ្យ)

 ប្រជាពលរដ្ឋរស់នៅតាមបណ្តោយផ្លូវរថភ្លើងនៅ​ភូមិប៉ប្រ​កខាងជើងក្នុងរាជធានីភ្នំពេញ នឹងមានទឹកស្អាតប្រើប្រាស់ពេញ​២៤ម៉ោង នៅពេល​​ដែល​រដ្ឋាករទឹកស្វយ័តក្រុងភ្នំពេញ (PPWSA) តភ្ជាប់បំពង់ទឹករួច​រាល់​ទាំងស្រុង។ អ្នកភូមិអន្ទះសារចង់មានទឹកស្អាតប្រើ​ក្នុងរយៈពេលប៉ុន្មានថ្ងៃខាងមុខ បន្ទាប់ពីពួកគាត់​បានស្នើសុំរដ្ឋាករទឹកស្វយ័ត​​ក្រុងភ្នំពេញ​ជាច្រើនលើ​ក​។

នៅឯការដ្ឋាន បុគ្គលិករបស់​រដ្ឋាករ​ទឹក​កំពុងជីកដី និងដាក់បំពង់ទឹក​គ្រប់ផ្ទះ បន្ទាប់​ពីមាន​ការ​ដាក់​ញត្តិ និងការប្រមូល​ផ្តុំ​របស់​ប្រជាពលរដ្ឋចំនួន៥០នាក់នៅការិយាល័យរបស់​រដ្ឋាករ​ទឹក​ស្វយ័ត​ក្រុង​ភ្នំពេញ​កាលពីសប្តាហ៍មុន និងការ​ស្វែងរកការអន្តរាគមន៍ពីអាជ្ញាធរខណ្ឌពោធិ៍សែនជ័យ។

អ្នកស្រី វង្ស សុផានី ជាប្រជាពលរដ្ឋមកពីភូមិប៉ប្រ​កបាននិយាយ​ថា៖ «ចាប់តាំងពីថ្ងៃចន្ទមក អេស្កាវ៉ាទ័របាននឹងកំពុងជីកដីនៅតាមបណ្តោយ​ផ្លូវរថភ្លើង ដើម្បីដាក់បំពង់ទឹក»ដោយ​អ្នកស្រីបន្ថែមថា ការ​ងារ​នេះ​បាន​សម្រេច​៦០ភាគរយ​ហើយ​។ បន្ទាប់​មក​ នឹងមាន​ការ​​ដំឡើង​កុងទ័រ​ទឹក​តាម​ផ្ទះ​អ្នក​ភូមិ ដែល​ក្នុង​មួយ​គ្រួសារ​ត្រូវ​គិត​ថ្លៃ៧០០រៀល​ក្នុង​មួយ​ម៉ែត្រ​គូប។

អ្នកស្រី សុផានី​ បាន​និយាយថា៖«ឥឡូវ ​យើង​កំពុង​រង់ចាំ​ខាងរដ្ឋាករទឹក​បញ្ចប់​ការ​ដាក់​បំពង់ទឹក​ និង​ជួសជុល​កុងទ័រ​ទឹក។ វា​ជិត​រួចរាល់​ហើយ​នៅ​ពេល​នេះ»។ដោយ​បាន​បន្ថែម​ថា ការ​ទទួល​បាន​ទឹក​ស្អាត ​គឺជា​សិទ្ធិ​មនុស្ស។

អ្នកស្រី សុផានី បាន​និយាយ​ថា សហគមន៍​របស់​អ្នក​ស្រី​​មិន​មាន​បណ្ណ​កម្មសិទ្ធិ​ដីធ្លី​​ទេ បើ​ទោះ​ជា​ពួក​គាត់​​បាន​រស់​នៅ​ទីនោះ​ជិត​មួយ​ទសវត្សរ៍​មក​ហើយក៏ដោយ។

អ្នក​ស្រី​បាន​បន្ថែម​ថា៖«អាជ្ញាធរ​បាន​ប្រាប់​ខ្ញុំ​ថា យើង​កំពុង​រស់​នៅ​ក្នុង​តំបន់​មិនទាន់រៀបរយ [ប៉ុន្តែ] បន្ទាប់​ពី​គាត់​​រៀបចំ​តំបន់​នេះ​ឡើង​វិញ គាត់​​នឹងមាន​គម្រោង [អ្វី​មួយ] ប៉ុន្តែ​ខ្ញុំ​មិន​ប្រាកដ​ថា [គាត់​ចង់​និយាយសំដៅ​​​លើអ្វីទេ]»។

សហគមន៍ «បានព្យាយាមយ៉ាងខ្លាំង» ដើម្បីដាក់ញត្តិ និងជួបជាមួយអាជ្ញាធរមូលដ្ឋាន និងរដ្ឋាករទឹក ដែលថ្មីៗនេះបានយល់ព្រមផ្តល់លទ្ធភាពឲ្យ​អ្នក​ភូមិ​ទទួលបានទឹកស្អាត។

អ្នកស្រី សុផានី អាយុ៥៧ឆ្នាំ​បាន​និយាយថា៖«ខ្ញុំ​សប្បាយ​ចិត្ត​ណាស់ ព្រោះ​យើង​នឹង​មាន​ទឹក​ឆាប់ៗ។ សុខភាពរបស់យើងនឹងប្រសើរឡើង ហើយតម្លៃ​ក៏​អាច​ទទួល​យក​បាន​ដែរ»។​

អ្នកស្រី​បាន​និយាយ​ថា បើ​គ្មាន​ទឹក​ស្អាត​សូម្បី​តែ​មួយ​ថ្ងៃ គ្រួសារ​ទាំង​មូល​រង​ទុក្ខ​លំបាក​៖ «យើង​គេង​​មិន​បាន​គ្រប់​គ្រាន់​ទេ យើង​ត្រូវ​រង់ចាំ​ការ​ផ្គត់ផ្គង់​ទឹក​​នៅ​ចន្លោះ​​ម៉ោង១២យប់​ដល់ម៉ោង​៤ព្រឹក។ វាធ្វើឱ្យខ្ញុំធ្លាក់ខ្លួន​ឈឺ។ ប្អូន​ដឹង​ទេ សូម្បី​​ពេល​​ខ្ញុំ​គេង​ ក៏​ខ្ញុំ​យល់សប់​​ចង់​បាន​ទឹក​ដែរ»។

អ្នកស្រី សុផានី សង្ឃឹមថា អាជ្ញាធរនឹងឆ្លើយតបឱ្យបានឆាប់នៅពេលដែលប្រជាពល​រដ្ឋត្រូវការការគាំទ្រ ដូចជាការទទួលបានទឹកស្អាត និងផ្លូវថ្នល់កាន់តែប្រសើរ។ «យើង​សប្បាយចិត្ត​ក្នុង​ការ​ទទួល​បាន​ការ​ឆ្លើយ​តប​បន្ថែម​ទៀត​នៅ​ពេល​ណា​ដែល​​ប្រជា​ពល​រដ្ឋ​ត្រូវ​ការ​ជំនួយ»។

អ្នកភូមិម្នាក់ទៀតឈ្មោះ ផាន់ ភក្តី អាយុ៤២ឆ្នាំ បានប្រាប់ខេមបូចាថា លោក​សប្បាយចិត្តដែលមានទឹកស្អាតប្រើ​ប្រាស់​គ្រប់ពេលក្នុងរយៈពេលបីថ្ងៃទៀត។

មុនពេលរដ្ឋាករទឹកស្វយ័តក្រុងភ្នំពេញយល់ព្រមភ្ជាប់បណ្តាញ​ទឹកស្អាត​ជូនអ្នកភូមិ ពួកគាត់​ត្រូវ​បាន​ស្នើ​ឲ្យ​​ផ្តិតមេដៃលើញត្តិ ដើម្បីដាក់ជូនអភិបាលខណ្ឌ និងរដ្ឋា​ករទឹកស្វយ័តក្រុងភ្នំពេញ។ អាស្រ័យ​ហេតុ​នេះ អ្នក​ភូមិ​បាន​ស្នើ​ឲ្យ​រដ្ឋាករ​ទឹក​ស្វយ័ត​ក្រុង​ភ្នំពេញ​ជួប​ប្រជុំ ​ដើម្បី​ដំណើរការ​ពាក្យ​សុំ​របស់​ខ្លួន​ឲ្យ​បាន​ឆាប់តាម​ដែល​អាច​ធ្វើ​ទៅ​បាន​។

លោក ភក្តី បាននិយាយថា៖«បន្ទាប់ពីសួរនាំ​ពួកគាត់​ជាច្រើនដង រដ្ឋាករទឹកស្វយ័តក្រុងភ្នំពេញបានមកជួបយើងនៅវត្ត [ក្បែរនោះ] ដើម្បីប្រាប់យើងថា យើងរស់នៅតំបន់អនាធិបតេយ្យ ដូច្នេះពួកគាត់​មិនអាចផ្គត់ផ្គង់ទឹកស្អាតបានឡើយ»។

លោកបានបន្ថែមថា ទោះបីជា​យ៉ាងណាក៏ដោយ អ្នកភូមិត្រូវបានស្នើសុំឱ្យជ្រើសរើស​មនុស្សបីនាក់ធ្វើ​ជាតំណាងរបស់ពួកគាត់​ ដើម្បីចុះកិច្ចសន្យាជាមួយរដ្ឋាករទឹក​ស្វយ័តក្រុងភ្នំពេញ ក្នុងដំណើរការស្នើសុំទឹកប្រើប្រាស់នេះ​។

អ្នក​ភូមិ​ប៉ប្រ​ក​ខាង​ជើង​ឈរ​មើល ខណៈ​អេស្កាវ៉ាទ័រ​របស់​រដ្ឋាករ​ទឹកស្វ័តក្រុងភ្នំពេញ​​ជីក​ដី​ក្បែរ​​ផ្លូវ​រថភ្លើង ​ដើម្បី​ដាក់​បំពង់​ទឹក ថ្ងៃ​ទី១៩ ខែ​កុម្ភៈ ឆ្នាំ ២០២៤។ (រូបភាពផ្តល់ឲ្យ)

ប្រជាពលរដ្ឋដែលរស់នៅជាយក្រុងភ្នំពេញ និងនៅតំបន់មួយ​ចំនួន​ក្នុង​ទីក្រុង ជាធម្មតាមិនមានទឹកសម្រាប់ប្រើប្រាស់រយៈពេលខ្លីនៅ​រដូវប្រាំង។ រដ្ឋាករ​ទឹក​តែង​លើក​ហេតុផល​ថា ការ​អភិវឌ្ឍនិង​កំណើន​​ចំនួន​ប្រជាពលរដ្ឋ​ធ្វើឲ្យមាន​កង្វះ​ខាត​ទឹក​ស្អាត។

លោកស្រី​ ទៀប វណ្ណរឿង ចៅសង្កាត់កាកាប​១ បានសម្តែងក្តីសប្បាយរីករាយ បន្ទាប់​​ពីបានដឹងថា ប្រជាពលរដ្ឋចំនួន៩៣គ្រួសារនៅភូមិប៉ប្រ​កនឹងមានទឹកប្រើប្រាស់ក្នុងពេលឆាប់ៗនេះ ព្រោះ​លោកស្រី​ដឹងថា ជីវភាពរបស់ពួកគាត់​ជួបការលំ​បាក​ដោយគ្មាន​ទឹកស្អាតប្រើប្រាស់។

លោក​ស្រី​ វណ្ណរឿង មានប្រសាសន៍ថា៖«យើង​សប្បាយ​ចិត្ត។ ពួកគាត់​​​ប្រឈម​នឹង​​ការ​លំបាក​ ដូច្នេះ​ហើយ​​ពួក​គាត់​បាន​ស្នើ​សុំ [ឲ្យ​​តភ្ជាប់​បណ្តាញ​ទឹកស្អាត]។ ប្រជាពលរដ្ឋ​នៅទីនោះត្រូវការទឹកខ្លាំង​ណាស់​។ ខ្ញុំ​រំភើប​ចិត្ត​ណាស់​ដែល​ពួក​គាត់​​អាច​មានទឹកប្រើ​ប្រាស់នៅ​ពេល​​នេះ»។

លោកស្រី​សង្ឃឹមថា នៅថ្ងៃអនាគត អាជ្ញាធរមូលដ្ឋាននឹងជួយអ្នកភូមិបន្ថែម​ទៀត​​ឱ្យទទួលបានទឹកស្អាតក្នុងអត្រាដែលអាចទទួលយកបាន សម្របសម្រួលកិច្ច​ប្រជុំ ជ្រើសរើសតំណាងនៅក្នុងភូមិ និងចរចាការតភ្ជាប់បណ្តាញ​ទឹកស្អាត​ជាមួយរដ្ឋាករទឹកស្វយ័ត​ក្រុងភ្នំពេញ​។

រដ្ឋាភិបាលបានសន្យាជាមួយប្រជាពលរដ្ឋ​កម្ពុជាថា គ្រប់គ្នា​នឹងទទួលបានទឹកស្អាតប្រើប្រាស់​នៅឆ្នាំ២០២៥។ ប្រជាពលរដ្ឋនៅរាជធានីភ្នំពេញ និងក្រុងតាខ្មៅនឹងមានទឹកស្អាតប្រើប្រាស់​គ្រប់គ្រាន់​នៅឆ្នាំនេះ នេះបើយោងតាមសេចក្តី​ប្រ​កាស​ព័ត៌មាន​របស់រដ្ឋាករទឹកស្វយ័ត​ក្រុង​ភ្នំពេញ​កាល​ពី​ខែមីនា ឆ្នាំ២០២៣។

លោក សោម សុវណ្ណ ប្រធាន​នាយកដ្ឋាន​អាជីវកម្មនៅ​រដ្ឋាករទឹក​ស្វយ័តក្រុង​​ភ្នំ​ពេញបាន​​ប្រាប់ខេមបូចាថា ដំណើរការ​ត​ភ្ជាប់​បណ្តាញ​ទឹកស្អាត​សម្រាប់​ភូមិ​ប៉​ប្រក ឥឡូវ​បាន​រួច​រាល់​ហើយ។ ជំហានបន្ទាប់គឺត្រូវភ្ជាប់បំពង់ទៅនឹងកុងទ័រ​ទឹក​ដែលបានដំឡើង។

លោក​មាន​ប្រសាសន៍​ថា​៖«យើង​បាន​ប្រើ​អេស្កាវ៉ាទ័រ ​ដើម្បី​កាយ​ដាក់​បំពង់ទឹក​​និង​ដំឡើង​កុងទ័រ​ទឹក​តាំង​ពី​ថ្ងៃ​សៅរ៍​មក។ យើង​ក៏​បាន​ជួយ​ពួកគាត់​​ក្នុង​ការ​រៀបចំ​ឯកសារ​មួយ​ចំនួន​ជាមួយ​ចៅសង្កាត់ផងដែរ»៕

ប្រែសម្រួលពីអត្ថបទភាសាអង់គ្លេស៖ At Long Last, Some 90 Families in The Capital’s Por Prork Village Will Have Clean Water

ព័ត៌មានថ្មី

អត្ថបទពេញនិយម