បុគ្គលិកនៃក្រុមហ៊ុនណាហ្គាវើលដ៍ស្នើសុំដល់អាជ្ញាធរកុំឱ្យលាបពណ៌ក្រុមកូដករថា ជាក្រុម​ធ្វើបដិវត្តពណ៌ឱ្យសោះ ពីព្រោះពួកគេគ្រាន់តែទាមទារឱ្យដោះស្រាយវិវាទការងារដែលជា​បញ្ហាក្រពះរបស់ពួកគេតែប៉ុណ្ណោះ។

បុគ្គលិកក្រុមហ៊ុនណាហ្គាវើលដ៍មិនទាន់ទទួលដំណោះស្រាយនៅឡើយ បន្ទាប់ពីតំណាង​បុគ្គលិកបានចូលរួមប្រជុំជាមួយសាលាក្រុង ក្រសួងការងារ និងតំណាងក្រុមហ៊ុន​ណាហ្គាវើលដ៍ កាលពីថ្ងៃអង្គារនៅសាលាក្រុង ដោយសារក្រុមហ៊ុន​មិនព្រមទទួលយក​បុគ្គលិក៣៦៥នាក់​ចូលធ្វើការវិញ។ ថ្ងៃពុធនេះ តំណាងភាគីទាំងអស់បានជួបប្រជុំគ្នាបន្តទៀត​នៅ​ក្រសួងការងារវិញម្តង។

បុគ្គលិកនៃក្រុមហ៊ុនណាហ្គាវើលដ៍ ថានឹងបន្តធ្វើកូដកម្មដោយស្របច្បាប់ និងអហិង្សា រហូត​ក្រុមហ៊ុនដ៏ធំមួយនេះ ចូលខ្លួនដោះស្រាយបញ្ហាដោយឆន្ទៈ និងសន្តិវិធីដើម្បីស្វែង​រកយុត្តិធម៌​សម្រាប់កម្មករ​និយោជិត​ចំនួន៣៦៥នាក់ដែលទាមទារឲ្យក្រុមហ៊ុនយកពួកគេចូលធ្វើការវិញ ក្នុងចំណោមកម្មករនិយោជិត​១៣២៩​នាក់ ដែលបាន​បញ្ឈប់តាំងពីខែមេសា ឆ្នាំ២០២១។

កម្មករនិយោជិតប្រមាណជាងមួយពាន់នាក់ បានធ្វើកូដកម្មនៅមុខក្រុមហ៊ុនណាហ្គាវើលដ៍​ថ្ងៃទី១៨ ខែធ្នូនេះ បើទោះបីខាងសាលាក្រុងចចារឱ្យផ្អាកមិនឱ្យមានការប្រមូលផ្ដុំធ្វើកូដកម្ម ដើម្បីទាមទារដំណោះស្រាយ ដែលក្រុមហ៊ុនមិនអនុវត្តតាមច្បាប់​ស្តីពី​ការងារ​កន្លងមក។