សមាគមសម្ព័ន្ធអ្នកសារព័ត៌មានកម្ពុជា

សមត្ថកិច្ចចាប់ខ្លួន ធែល ធីលែន ដែលតែងតែរិះគន់ការផ្តល់បណ្ណស្នាក់​នៅអចិន្ត្រយ៍ដល់ជនបរទេស

មន្រ្តីប៉ូលិសនៅក្រសួងមហាផ្ទៃ កំពុងពិនិត្យខ្លឹមសារនៃញត្តិ មុននឹងអនុញ្ញាតឱ្យលោក ធែល ធីលែន និងក្រុមយុវជន ចូលទៅដាក់ញត្តិនៅខាងក្នុងក្រសួង។ រូបថតថ្ងៃទី១៩ ខែកញ្ញា ឆ្នាំ២០២២។ ខេមបូចា/ សុវណ្ណ ស្រីពេជ្រ
មន្រ្តីប៉ូលិសនៅក្រសួងមហាផ្ទៃ កំពុងពិនិត្យខ្លឹមសារនៃញត្តិ មុននឹងអនុញ្ញាតឱ្យលោក ធែល ធីលែន និងក្រុមយុវជន ចូលទៅដាក់ញត្តិនៅខាងក្នុងក្រសួង។ រូបថតថ្ងៃទី១៩ ខែកញ្ញា ឆ្នាំ២០២២។ ខេមបូចា/ សុវណ្ណ ស្រីពេជ្រ

យុវជន ធែល ធីលែន ដែលចេញមុខរិះគន់ការផ្ដល់បណ្ណស្នាក់នៅអចិន្រ្តៃយ៍ និង​ប្រឆាំង​ការបង្កើតដេប៉ាតឺម៉ង់វៀតណាម នៅសកលវិទ្យាល័យភូមិន្ទភ្នំពេញ ត្រូវបានប៉ូលិស​ចាប់ខ្លួន បន្ទាប់​ពីគាត់ចាកចេញពីកិច្ចប្រជុំនៅសាលាក្រុងភ្នំពេញ នាព្រឹកថ្ងៃទី៤ ខែតុលា ឆ្នាំ២០២២​នេះ។ នេះបើតាមការបញ្ជាក់ពីលោក អ៊ំ ឆុម សមាជិកនៃក្រុមយុវជន។

លោក អ៊ំ ឆុម អាយុ ៣៥ឆ្នាំ ជាសមាជិកនៃក្រុមយុវជន ដែលដាក់ញត្តិប្រឆាំងការផ្ដល់បណ្ណ​ស្នាក់​នៅអចិន្រ្តៃយ៍ និងការបង្កើតដេប៉ាតឺម៉ង់ភាសាវៀតណាម អះអាងថា សមាជិករបស់ខ្លួន គឺលោក ធែល ធីលែន ត្រូវបានជនស្លៀកពាក់ស៊ីវិលជាច្រើននាក់ ចាប់ខ្លួនវាយខ្នោះដាក់ឡាន បន្ទាប់ពីបញ្ចប់កិច្ចប្រជុំជាមួយសាលាក្រុងភ្នំពេញទាក់ទងនឹងការធ្វើបាតុកម្មនៅទីលានប្រជា​ធិបតេយ្យ។

លោកថ្លែងថា៖ «គេចាប់ខ្លួនគាត់នៅម៉ោងប្រមាណ១១ព្រឹកនៅខាងមុខសាលាក្រុងភ្នំពេញ គឺសាហាវមែនទែន​ដូចពលពតអ៊ីចឹង សង្កត់កគាត់ហើយវាយខ្នោះ។ ហើយនៅពេលខ្ញុំទាញ​ទូរសព្ទថតចាប់ដោយទាំងខ្ញុំទៀត»។

លោក ឆុម សន្មតថា ការចាប់ខ្លួនលោកធីលែនភ្លាមៗបែបនេះ គឺជាការរៀបចំហើយ​ទាក់ទង​នឹងបញ្ហាដែលក្រុមលោក រិះគន់ការផ្ដល់បណ្ណស្នាក់នៅអចិន្រ្តៃយ៍ដល់ជនបរទេស និងការ​បង្កើត​ដេប៉ាតឺមង់ភាសាវៀតណាម។

លោកអះអាងយ៉ាងដូច្នេះថា៖ «តាមខ្ញុំគិតគឺជាការរៀបចំរបស់គេ ដែលគេលាបពណ៌ ឬដាក់​គំនាប។ ការចាប់ខ្លួននេះ គឺវាពាក់ព័ន្ធនឹងរឿង២ ទីមួយរឿងដែលយើងកំពុងតែធ្វើនេះ​គឹធ្វើ​បាតុកម្មបញ្ឈប់ដេប៉ាតឺម៉ង់ភាសាវៀតណាមនៅកម្ពុជា ក៏ដូចជាបណ្ណស្នាក់នៅអចិន្រ្តៃយ៍។ រឿងទី២ គាត់ធ្លាប់មានវិវាទដីធ្លីជាមួយបុគ្គលម្នាក់នៅខេត្តកណ្ដាល ហើយរឿងហ្នឹង​កើតឡើង​តាំងពីឆ្នាំ២០២០»។

សម្រាប់លោក ឆុម យល់ឃើញថា ប្រសិនបើលោកធីលែន មានទោសកំហុសទាក់ទងនឹងរឿង​ដីធ្លី​ពិតមែន អាជ្ញាធរគួរមានដីកាចាប់ខ្លួនពីតុលាការ មិនមែនចាប់នៅតាមផ្លូវ​ដូចពិរុទ្ធជន​កំឡុង​ពេលដែលក្រុមលោកកំពុងធ្វើការតវ៉ាដូច្នេះទេ។

លោកបញ្ជាក់ថា៖ «ការចាប់ខ្លួននេះមិនមានដីកា ពួកគាត់ស្លៀកពាក់ស៊ីវិល ហើយគាត់​មក​ចាប់យើងក្រៀកដូចអ្នកទោសសម្លាប់មនុស្សចឹង»

លោក ឆុម ដាក់ការសង្ស័យថា សាលាក្រុងភ្នំពេញប្រាកដជាបានដឹងរឿងនេះជាមុន ត្បិតថា​នៅពេលប្រជុំចប់ មន្រ្តីនៅសាលាក្រុងព្យាយាមដេញសមាជិកផ្សេងទៀតចេញក្រៅ ដោយទុក​តែលោក ធីលែន តែម្នាក់ក្នុងបន្ទប់ប្រជុំ។

លោកឆុមនិយាយថា៖ «រឿងនេះជាគម្រោង ហើយសាលារាជធានីក៏ដឹងរឿងនេះដែរ ព្រោះ​ព្រឹក​​មិញ​នេះ​គាត់ព្យាយាមដេញពួកខ្ញុំឱ្យមកមុន ទុកតែលោកធីលែនម្នាក់ទេ តែពួកខ្ញុំមាន​ការ​សង្ស័យ ពួកខ្ញុំអត់ចេញទេ គ្រាន់តែចេញផុតពីក្លោងទ្វារ ពួកគាត់ធ្វើសកម្មភាពលោក ធីលែន តែម្ដង»។

សមាជិកម្នាក់ទៀត គឺលោក អន រតនា លើកឡើងស្រដៀងគ្នាថា សមត្ថកិច្ចបាន​ចាប់ខ្លួន​លោក ធែល ធីលែន នៅខាងមុខសាលាក្រុងភ្នំពេញ ប៉ុន្តែលោកមិនប្រាកដថា​ចាប់ពីបទចោទ​អ្វីឡើយ ដោយសារតែអ្នកដែលមកចាប់ខ្លួនគឺជាជនស៊ីវិល និងមិនមានដីកា។

លោក រតនា ឱ្យដឹងថា៖ «យើងមិនដឹងច្បាស់ថាគេចាប់ពីបទអ្វី ក៏ប៉ុន្តែវាស្របពេល​ដែល​លោក ធីលែន ចេញមុខតវ៉ាសម្ដែងមតិ​ឈឺឆ្អាលបញ្ហាសង្គម ហើយក៏មានការចាប់ខ្លួន ចឹងរឿងវា​ពាក់​ព័ន្ធគ្នា»។

លោក រតនា សម្ដែងការមិនពេញចិត្ត ចំពោះចំណាត់ការសមត្ថកិច្ច ចុះមកចាប់ខ្លួន​លោក ធីលែន កណ្ដាលផ្លូវ ព្រោះប្រសិនបើទាក់ទងនឹងបទល្មើសណាមួយ អាជ្ញាធរគួរបង្ហាញដីកា និងកោះហៅទៅសាកសួរជាមុនសិន។

ជុំវិញបញ្ហានេះ លោក ស ថេត អគ្គ​ស្នងការរង​នគរបាលជាតិ និង​ជា​ស្នងការ​នគរបាល​រាជធានី​​ភ្នំពេញ​ ថ្លែងថា ពិតជាមានការចាប់ខ្លួន យុវជន ធែល ធីលែន ប៉ុន្តែលោកមិនបាន​បញ្ជាក់បីបទអ្វីឡើយ។

ចំណែកលោក ឡាក់ ម៉េងធី ប្រធានការិយាល័យព្រហ្មទណ្ឌកម្រិតស្រាល ខេត្តកណ្ដាល បញ្ជាក់ថា សមត្ថកិច្ចបានចុះចាប់ខ្លួនលោក ធែល ធីលែន តាមដីកាបង្គាប់របស់តុលាការខេត្ត​កណ្ដាល និងបានបញ្ជូនខ្លួនទៅតុលាការហើយ។  ប៉ុន្តែលោក ម៉េងធី មិនបានបញ្ជាក់​ពីបទចោទអ្វីឡើយ ដោយបង្វែរសំណួរទៅអ្នកនាំពាក្យតុលាការខេត្តកណ្ដាល។​

លោកថា៖ «ខ្ញុំអនុវត្តទៅតាមដីកាបង្គាប់ឱ្យនាំខ្លួនរបស់តុលាការ ចឹងបងអាចសួរ​ទៅ​ខាងអ្នកនាំពាក្យតុលាការបន្ថែមបាន»

អ្នកនាំពាក្យតុលាការខេត្តកណ្ដាល លោក ឯក ស៊ុនរស្មី ឆ្លើយថា លោកមិនទាន់​ទទួល​បាន​ព័ត៌មានលម្អិតឡើយ។

លោកថា៖ «ខ្ញុំអត់ទាន់បានទទួលព័ត៌មានផង ពីព្រោះខ្ញុំកំពុង​រវល់ស្វែងរក​ភស្ដុតាង​បទល្មើស​ព្រហ្មទណ្ឌមួយ»។

យ៉ាងណាមិញ​លោក អំ សំអាត នាយកចាត់ការទូទៅនៃអង្គការ លីកាដូ មានប្រសាសន៍ថា យុវជន ធែល ធីលែន ត្រូវបានតុលាការដំបូងខេត្តកណ្ដាលចេញដីកាចាប់ខ្លួនតាំង​ពី​ឆ្នាំ​២០២១ ពីបទលួចលក់អចលនទ្រព្យអ្នកដទៃ។

លោកថ្លែងថា៖ «គេឃាត់ទៅតាមដីកាបស់សាលាដំបូងខេត្តកណ្ដាល ដីកាបង្កាប់​ឱ្យឃាត់​ខ្លួន​ហើយរឿងហ្នឹងតាំងពីថ្ងៃទី២៣ ខែមិថុនា ឆ្នាំ២០២១ ហើយដីកាបង្គាប់តាំងពីថ្ងៃ២៨ ខែមិថុនា ឆ្នាំ២០២១»

លោក សំអាត ចាត់ទុកថា ការចាប់ខ្លួនយុវជនរូបនេះ គឺជាការគំរាមកំហែងចំពោះការនិយាយ​ពីបញ្ហាសង្គម ពិសេសការតវ៉ារឿងដេប៉ាតឺម៉ងភាសាវៀតណាម និងការតវ៉ារឿងបណ្ណស្នាក់នៅ​អចិន្ត្រៃយ៍ដល់ជនបរទេស។

លោកបន្ថែមថា៖ «បើផ្អែកទៅលើដីកា គេចេញតាំងពីឆ្នាំ២០២១ ចឹងធ្វើឱ្យមានគេសង្ស័យថា ការចាប់ខ្លួននេះ ជាការគំរាម បំផិតបំភ័យការចូលរួមសកម្ម និងក្រុមយុវជន ព្រោះមួយឆ្នាំជាង​ហើយហេតុអ្វីមិនចាប់ខ្លួន? ស្រាប់តែពេលដែលគាត់មានសកម្មការងារ​សង្គម បែរទៅជាមាន​ការ​ចាប់ខ្លួនទៅវិញ?»

គួរជម្រាបជូនថា លោក ធែល ធីលែន ជាយុវជនមួយរូបរស់នៅខេត្តសៀមរាប ថ្មីៗនេះ លោក​បាន​ចេញមុខសម្ដែងមតិរិះគន់ និងដាក់ញត្តិឱ្យក្រសួងមហាផ្ទៃបញ្ឈប់ការផ្ដល់បណ្ណ​ស្នាក់នៅ​អចិន្រ្តៃយ៍ដល់ជនបរទេស និងប្រឆាំងការដាក់បញ្ចូលដេប៉ាតឺម៉ង់ភាសាវៀតណាម។

ដោយ​ឡែក កាលពីថ្ងៃ៣០ ខែកញ្ញា កន្លងទៅ រូបលោកក៏បានទៅដាក់ញតិ្តនៅ​សាលាក្រុង​ភ្នំពេញ ដើម្បីស្នើសុំការប្រមូលផ្ដុំទ្រង់ទ្រាយធំនៅទីលានប្រជាធិបតេយ្យ នៅថ្ងៃទី៧ ខែតុលា ដើម្បីសម្ដែងមតិជុំវិញបញ្ហាខាងលើ៕

333 views

ព័ត៌មានទាក់ទង

ព័ត៌មានថ្មីៗ

អត្ថបទពេញនិយម