មន្ត្រីជាន់ខ្ពស់ក្រសួងមហាផ្ទៃបានលើកឡើងថា សមត្ថកិច្ចបានបង្ក្រាបជនល្មើសពាក់ព័ន្ធនឹងអំពើជួយដូរមនុស្ស និងសង្គ្រោះបានជនរងគ្រោះកន្លងមក យ៉ាងហោចណាស់១៧សញ្ជាតិ ក្នុងនោះភាគច្រើនជាជនជាតិចិន និងទី២គឺជនជាតិវៀតណាម។
លោកស្រី ជូ ប៊ុនអេង រដ្ឋលេខាធិការក្រសួងមហាផ្ទៃ និងជាអនុប្រធានគណៈកម្មាធិការជាតិប្រឆាំងការជួញដូរមនុស្ស បានលើកឡើងនៅក្នុងសិក្ខាសាលាស្តីពី«ការយល់ដឹងពីការប៉ះទង្គិចផ្លូវចិត្តដល់កុមាររងគ្រោះដោយការរំលោភបំពាន និងកេងប្រវ័ញ្ចផ្លូវភេទតាមប្រព័ន្ធអនឡាញ» នៅថ្ងៃទី១១ ខែមីនា ឆ្នាំ២០២៥ ថា ការបង្ក្រាបនោះ យ៉ាងហោចណាស់មាន១៧សញ្ជាតិ ដែលមានចម្រុះជាតិសាសន៍ ប៉ុន្តែសួរថា តើនរណាជាមេខ្លោង គ្មាននរណាហ៊ានប្រាប់ថានរណាជាមេខ្លោង ហើយយើងក៏មិនដឹងថា នរណាជាមេខ្លោងដែរ ហើយបើសិនសមត្ថកិច្ចបង្ក្រាបបានមេខ្លោង គឺល្អហើយ ប៉ុន្តែខណៈនោះ លោកស្រីក៏មិនបានបង្ហាញពីតួលេខនៃជនល្មើសដែលបង្ក្រាប និងជនរងគ្រោះដែលសង្គ្រោះបាននោះដែរ។
លោកស្រី ប៊ុនអេង ថ្លែងថា៖ «បទល្មើសឃើញផ្ទាល់នឹងភ្នែក ដែលហៅថាបទល្មើសជាក់ស្តែង ហ្នឹងយើងចាប់ យើងឃាត់ខ្លួន រឺយើងសង្គ្រោះយក ដែលហៅថាយកជនរងគ្រោះមកកំណត់អត្តសញ្ញាណ រឺមួយផ្តល់សេវា»។ លោកស្រីបន្តថា៖ «ប៉ុន្តែសួរថា តើប៉ុន្មាននាក់ទៀតដែលគេមិនបានឆ្លើយការពិតប្រាប់យើងដែលនៅក្នុងនោះ ជាជនល្មើស រឺជនរងគ្រោះ ប៉ុន្តែបើយើងដាក់ទោសគេ តើដាក់ដោយរបៀបណា បើគ្មានភស្តុតាង ហើយបើគិតថាគាត់ជាជនរងគ្រោះ តើច្បាស់ទេគាត់ជាជនរងគ្រោះ នេះជារឿងស្មុគស្មាញនៅក្នុងបទល្មើសបែបនេះ»។
លោកស្រីបន្ថែមទៀតថា កុំមើលតែកម្ពុជា ឃើញទេប៉ុន្មានថ្ងៃនេះ នៅប្រទេសថៃ ឬតាមព្រំដែនថៃ-ភូមា ការបង្ក្រាបអ្នកប្រព្រឹត្តអំពើជួញដូរមនុស្សបានរាប់ពាន់នាក់ ហើយលោកស្រីបានប្រៀបធៀបការបង្ក្រាបអំពើជួញដូរមនុស្សនេះ ហាក់ដូចជាសំបុកអង្ក្រងអ៊ីចឹង នៅពេលកកូរកកាយ តើអង្ក្រងប៉ុន្មានដែលរត់រួច ហើយទៅពួនផ្តុំនៅកន្លែងផ្សេងទៀត។
ក្នុងពេលថ្មីៗនេះ នគរបាលជាតិកម្ពុជាបានឆ្មក់ចូលឆែកឆេរពីរទីតាំងក្នុងក្រុងប៉ោយប៉ែត ខេត្តបន្ទាយមានជ័យ និងបានរកឃើញជនបរទេសចំនួន ២៣០ នាក់ ក្នុងនោះមានស្ត្រី ៦៨ នាក់ ដែលជាប់ពាក់ព័ន្ធនឹងប្រតិបត្តិការឆបោកតាមអនឡាញ។
ការបង្រ្កាបរយៈពេលពីរថ្ងៃគឺថ្ងៃទី២២ និង២៣ ខែកុម្ភៈ ឆ្នាំ២០២៥ បានធ្វើឡើងបន្ទាប់ពីការស៊ើបអង្កេតអស់រយៈពេលជាង៣ខែ និងបានរកឃើញជនបរទេសដែលក្នុងនោះ ១២៣នាក់ជាជនជាតិថៃ។ ពួកគេត្រូវបាននាំខ្លួនទៅសាកសួរ។
ប៉ូលិសបាននិយាយកាលពីថ្ងៃចន្ទថា៖ «ជនបរទេសទាំងនោះកំពុងសំងំលាក់ខ្លួនលួចលាក់ធ្វើប្រតិបត្តិការអនឡាញខុសច្បាប់ ដោយមានមេក្លោងជាជនជាតិចិន» ប៉ូលិសបន្តថា អ្នកបោកប្រាស់ត្រូវបានគេចោទប្រកាន់ថារស់នៅ «រស់នៅធម្មតា» និង«ស្ម័គ្រចិត្ត» ទទួលយកការងារខុសច្បាប់។
ប៉ូលិសបានលើកឡើងទៀតថា នគរបាលជាតិកម្ពុជានឹងស្នើសុំកិច្ចសហការជាមួយនគរបាលថៃ ដើម្បីបន្តនីតិវិធីច្បាប់ពាក់ព័ន្ធនឹងជនជាតិថៃ ក៏ដូចជាការចាប់ខ្លួនជនសង្ស័យផ្សេងទៀត៕
