សមាគមសម្ព័ន្ធអ្នកសារព័ត៌មានកម្ពុជា

សាលាដំបូងខេត្តបាត់ដំបងផ្តន្ទាទោសសកម្មជនបក្សភ្លើងទៀនម្នាក់ដាក់ពន្ធនាគារប្រាំមួយខែ

លោក ឡី សុខុន សកម្មជនគណបក្សភ្លើងទៀនដែលផេកអគ្គនាយកដ្ឋានពន្ធនាគារនៃក្រសួងមហាផ្ទៃ ផ្សព្វផ្សាយកាលពីថ្ងៃទី៣០ ខែកក្កដា ឆ្នាំ២០២២។ រូបភាពពីផេកអគ្គនាយកដ្ឋានពន្ធនាគារនៃក្រសួងមហាផ្ទៃ
លោក ឡី សុខុន សកម្មជនគណបក្សភ្លើងទៀនដែលផេកអគ្គនាយកដ្ឋានពន្ធនាគារនៃក្រសួងមហាផ្ទៃ ផ្សព្វផ្សាយកាលពីថ្ងៃទី៣០ ខែកក្កដា ឆ្នាំ២០២២។ រូបភាពពីផេកអគ្គនាយកដ្ឋានពន្ធនាគារនៃក្រសួងមហាផ្ទៃ

សាលាដំបូងខេត្តបាត់ដំបងកាលពីថ្ងៃព្រហស្បតិ៍បានសម្រេចផ្តន្ទាទោសលោក ឡី សុខុន សកម្មជនគណបក្ស​ភ្លើងទៀនខេត្តបាត់ដំបង ដាក់ពន្ធនាគារ៦ខែ​ពាក់ព័ន្ធនឹងបទចោទរំលោភ​លើលំនៅឋាន ខណៈមេធាវីនិងសង្គមស៊ីវិលថាជារឿង​អយុត្តិធម៌សម្រាប់គាត់។

ចៅក្រមសាលាដំបូងខេត្តបាត់ដំបង អ្នកស្រី ហៃ ណៃហេង បានប្រកាសសាលក្រម​ផ្តន្ទាទោស​លោក ឡី សុខុន សមាជិកក្រុមការងារគណបក្សភ្លើងទៀន​ខេត្តបាត់ដំបង​ទទួល​បន្ទុកនៅស្រុកឯកភ្នំ កាលពីថ្ងៃទី១៧ ខែវិច្ឆិកា ឆ្នាំ២០២២ ឱ្យជាប់ពន្ធនាគារ​៦ខែ​គិតពីថ្ងៃ​ចាប់ខ្លួនពាក់ព័ន្ធនឹងបទល្មើសរំលោភ​លើលំនៅឋាន​ បន្ទាប់ពីសាលាដំបូង​ខេត្ត​បាត់ដំបង​បានបើកសវនាការជំនុំជម្រះនិងសួរដេញដោលលើលោក ឡី សុខុន នៅថ្ងៃទី៣ ខែវិច្ឆិកា។

ជុំវិញការកាត់ក្តីនេះលោក សំ សុគង់ មេធាវីការពារក្តីលោក ឡី សុខុន បានសម្តែងការខកចិត្ត​ដោយលោកចាត់ទុកថា វាជារឿងអយុត្តិធម៌សម្រាប់កូនក្តីរបស់លោកព្រោះបើពិនិត្យមើល​ទិដ្ឋភាពច្បាប់លើបទល្មើសរំលោភលំនៅឋានលុះត្រាតែកូនក្តីរបស់លោកចូលក្នុងលំនៅឋានគេហើយប្រើហិង្សានិងកលល្បិចប៉ុន្តែបើពិនិត្យមើលអង្គហេតុ កូនក្តីរបស់លោកនៅក្រៅរបងផ្ទះ​និងក្រៅលំនៅឋានដែរ។

លោក សំ សុគង់ បានចាត់ទុកថា រឿងនេះពាក់ព័ន្ធហ្នឹងរឿងនយោបាយ ​គឺពេលនោះចំពេល​ដែលបោះឆ្នោតក្រុមប្រឹក្សាឃុំសង្កាត់​ កូនក្តីរបស់លោកបានទៅពិនិត្យមើលក្រែង​មាន​ការ​សូកប៉ាន់​ក្នុងរឿងបោះឆ្នោត ហើយវាប៉ះទៅហ្នឹងអាជ្ញាធរនិងប៉ះអ្នកនៅជុំវិញហ្នឹង ក៏មាន​ការ​ចោទ​ប្រកាន់កូនក្តីលោក។

លោក សំ សុគង់៖ «នៅពេលដែលកូនក្តីរបស់ខ្ញុំត្រូវបានដោះលែងឱ្យមាន​សេរីភាពវិញ​ខ្ញុំនឹងពិភាក្សាជាមួយកូនក្តីខ្ញុំពិនិត្យមើលសិទ្ធិក្នុងការប្តឹងឧទ្ធរណ៍ចំពោះការសម្រេច​ផ្តន្ទាទោសនេះ»

លោក ឡី សុខុន ត្រូវបានសមត្ថកិច្ចចាប់ឃាត់ខ្លួននៅថ្ងៃទី៨ ខែមិថុនា ឆ្នាំ២០២២ ពីបទរំលោភ​លើលំនៅឋាន ពាក់ព័ន្ធនឹងលោកបានចុះទៅថតរូបមន្រ្តី​គណបក្សប្រជាជន​កំពុង​អង្គុយកត់ឈ្មោះប្រជាពលរដ្ឋទៅបោះឆ្នោតក្រុមប្រឹក្សាឃុំសង្កាត់ដែលប្រព្រឹត្តនៅភូមិ​កំពង់សំបួរ ឃុំសំរោង ស្រុកឯកភ្នំ ខេត្តបាត់ដំបង កាលពីថ្ងៃទី៥ ខែមិថុនា ឆ្នាំ២០២២។ គិត​មកទល់ពេលនេះលោកត្រូវបានឃុំខ្លួនអស់រយៈពេលជាង៥ខែមកហើយ។ តាមការ​ប្រកាស​សាលក្រមខាងលើលោក ឡី សុខុន នឹងត្រូវដោះលែងឱ្យមានសេរីភាពនៅថ្ងៃទី៨ ខែធ្នូ ឆ្នាំ២០២២ ខាងមុខ។

អ្នកស្រី លីន លីដា អាយុ២៩ឆ្នាំ ជាភរិយារបស់លោក ឡី សុខុន បានឱ្យដឹងថា វាជារឿង​អយុត្តិធម៌សម្រាប់ប្តីរបស់គាត់ព្រោះដើម​បណ្តឹងបានដកពាក្យបណ្តឹង​តាំងពីថ្ងៃចាប់ខ្លួន តែ​ព្រះរាជអាជ្ញានៅតែធ្វើការស៊ើបសួរ​ប្រើ​រយៈ​ពេលយូររហូតដល់ជាង៥ខែ ទើបសម្រេច​កាត់​ទោស។

អ្នកស្រី លីដា ថ្លែងថា៖ «វាប៉ះពាល់ជីវភាពគ្រួសារខ្ញុំខ្លាំងមែនទែនហើយម្តាយបងសុខុន​ធ្លាក់​ខ្លួន​​ឈឺទៀត សេដ្ឋកិច្ចគ្រួសារត្រូវយ៉ាប់យ៉ឺន​ហើយសុខភាពបង​(ប្តីគាត់)ជាប់​ពន្ធនាគារ​សុខភាព​​មិនសូវល្អ វាប៉ះពាល់ច្រើនដែរ»

 អ្នកស្រី លីដា បន្ថែមថា​ អ្នកស្រីក៏សប្បាយចិត្តដែរខណៈ​ដែលទទួលដំណឹងថាប្តីរបស់គាត់​នឹងត្រូវ​ដោះលែងនៅដើមខែធ្នូខាងមុខនេះ ហើយម្តាយក្មេករបស់អ្នកស្រីក៏សប្បាយចិត្ត​ដែរ​ខណៈ​គាត់​កំពុងធ្លាក់ខ្លួនឈឺបន្ទាប់ពីកូនរបស់គាត់ត្រូវបានឃុំខ្លួន។

ខេមបូចា មិនអាចទំនាក់ទំនងលោកស្រី ជា ច័ន្ទរស្មី អ្នកនាំពាក្យសាលាដំបូង​ខេត្ត​បាត់ដំបង​ដើម្បីបំភ្លឺបន្ថែមបានឡើយ។

កាលពីថ្ងៃទី២៤ ខែសីហា ឆ្នាំ២០២២ លោកស្រីចៅក្រម​ជំនុំជម្រះ ហៃ ណៃហេង បាន​សម្រេច​បង្វែរសំណុំរឿងធ្វើការស៊ើបសួរ​បន្ថែម​លើដើមបណ្តឹងនិងសាក្សីម្តងហើយ។

ពេលនោះ លោក ឡី សុខុន ស្នើឱ្យលោកស្រីចៅក្រមលើកលែងទោសឱ្យរួចផុត​ពីបទចោទ​ខាងលើ ដោយហេតុថាពេលនោះបានជាខ្លួន​ដើរល្បាតនិងឃ្លាំមើលភាពមិនប្រក្រតី​ក្នុង​ពេល​បោះឆ្នោតព្រោះមានប្រជាពលរដ្ឋរាយការណ៍មកថានៅខាងមុខការិយាល័យបោះឆ្នោតវត្តកែវមានការទិញសន្លឹកឆ្នោតដូច្នេះគាត់ទៅថតរូបទុកជាភស្តុតាងទុកឱ្យ គជប ប៉ុណ្ណោះ។

លោក ឡី សុខុន បានបញ្ជាក់ក្នុងសវនាការពេលនោះថា ខ្លួនមិនបានចូលទៅក្នុងលំនៅឋាន​ឈ្មោះ សុខ លីម នោះទេ គ្រាន់តែសួរថាប្រាក់នៅនឹងដៃឈ្មោះ ឡាញ់ ជុន ជាប្រាក់អ្វី? ឈ្មោះ ឡាញ់ ជុន ឆ្លើយថា ជាប្រាក់ខ្លួនលក់ត្រី លោកក៏សុំទោសនិងថាមិនអីទេរួចក៏​ចាកចេញ។

លោក ឡាញ់ ជុន បានសរសេរក្នុងលិខិតសុំដកពាក្យបណ្តឹងកាលពីថ្ងៃទី៩ ខែមិថុនា ថា លោកខឹងនឹងលោក ឡី សុខុន ដោយសារតែគាត់ចូលទៅផ្ទះអ្នកជិតខាង​ហើយថតវីដេអូ​បង្ហោះ​លើបណ្តាញសង្គមនឹងបានសុំមើលលុយរបស់ខ្លួនដែលកាន់នៅនឹងដៃ​ ដោយលោក​យល់ថាវាប៉ះពាល់សិទ្ធិរបស់ខ្លួន។ តែនៅពេលលោក ឡី សុខុន និងគ្រួសារបានសន្យា​ធ្វើវីដេអូសុំទោសជាសាធារណៈនៅពេលបាននៅក្រៅឃុំនិងយល់ឃើញថាវាជាកំហុស តិចតួច​ហើយលោក ឡី សុខុន យល់ព្រមលុបវីដេអូនោះចេញវិញផង លោកក៏សម្រេចចិត្ត​ដកពាក្យបណ្តឹងវិញ ។

លោក អ៊ិន គង់ជិត មន្រ្តីសម្របសម្រួលអង្គការសិទ្ធិមនុសុ្ស លីកាដូ ខេត្តបាត់ដំបង​ដែលឃ្លាំ​មើលករណីនេះ បានចាត់ទុកការសម្រេចផ្តន្ទាទោសលោក ឡី សុខុន ជារឿងអយុត្តិធម៌ ​ព្រោះ​លោក ឡី សុខុន មិនបានប្រព្រឹត្តដូចការចោទប្រកាន់នោះទេ។

លោក គង់ជិត បញ្ជាក់ថា៖ «គាត់គ្រាន់តែសួរនាំដោយឃើញមានការសង្ស័យថា​មានកត់​ឈ្មោះ​​កត់អី អញ្ចឹងគាត់មិនបានប្រើកលល្បិច មិនបានប្រើហិង្សាមិនបាន​គំរាមកំហែង​ទៅ​លើ​ម្ចាស់​លំនៅឋានទេ»។ លោកបន្ថែមថា៖ «ថ្ងៃហ្នឹងម្ចាស់លំនៅឋានក៏គាត់អត់នៅដែរ អ្នកដែល​ប្តឹងហ្នឹងគឺឈ្មោះ ឡាញ់ ជុន ជាអ្នកប្តឹងទេ ហើយប្តឹងរឿងបង្ហោះហ្វេសប៊ុកនោះទេ​ហើយ​លោក ឡាញ់ ជុន ក៏បានដកពាក្យបណ្តឹងហើយដែរ»

224 views

ព័ត៌មានទាក់ទង

ព័ត៌មានថ្មីៗ

អត្ថបទពេញនិយម