សមាគមសម្ព័ន្ធអ្នកសារព័ត៌មានកម្ពុជា

ពលរដ្ឋសហគមន៍បឹងតាមោកចូលឆ្លើយបំភ្លឺនៅតុលាការក្រុងភ្នំពេញពាក់ព័ន្ធបទញុះញង់

ស្រ្តីចំណាស់ម្នាក់លើកដៃសំពះដង្ហោយរកយុត្តិធម៌ និងកិច្ចអន្តរាគមន៍ ពីអាជ្ញាធរពាក់ព័ន្ធនានានៅមុខសាលាដំបូងរាជធានីភ្នំពេញ។ រូបថតថ្ងៃទី២ ខែសីហា ឆ្នាំ២០២២។ ខេមបូចា/ សុវណ្ណ ស្រីពេជ្រ
ស្រ្តីចំណាស់ម្នាក់លើកដៃសំពះដង្ហោយរកយុត្តិធម៌ និងកិច្ចអន្តរាគមន៍ ពីអាជ្ញាធរពាក់ព័ន្ធនានានៅមុខសាលាដំបូងរាជធានីភ្នំពេញ។ រូបថតថ្ងៃទី២ ខែសីហា ឆ្នាំ២០២២។ ខេមបូចា/ សុវណ្ណ ស្រីពេជ្រ

ពលរដ្ឋ២នាក់ក្នុងចំណោម៧នាក់ដែលរស់នៅជាប់បឹងតាមោកមកបំភ្លឺ​នៅ​សាលាដំបូងរាជធានីភ្នំពេញតាមដីកាកោះពីបទរារាំង ញុះញង់ បង្កើតសកម្មភាព​អនាធិបតេយ្យ​តាមដងផ្លូវសាធារណៈ ខណៈពួកគេតវ៉ាឱ្យមានការដោះស្រាយបញ្ហាដីធ្លី។ បើតាមពលរដ្ឋអះអាងថា ដើមបណ្ដឹងជាប្រធានសន្តិសុខខណ្ឌព្រែកព្នៅ។

នៅព្រឹកថ្ងៃអង្គារ ខែសីហា នេះ​ពលរដ្ឋប្រមាណ៣០នាក់ បានមកតាមដានការបង្ហាញខ្លួន​របស់ពលរដ្ឋរងបណ្ដឹងនៅសាលាដំបូងរាជធានីភ្នំពេញចំនួន២នាក់ ដោយមានពលរដ្ឋ​ម្នាក់​ចូលបំភ្លឺពេលព្រឹក និងម្នាក់ទៀតវេនថ្ងៃ។

បើតាមដីកាកោះហៅរបស់តុលាការ លោក  មាស  សម្បូរ ជាដើមបណ្តឹងបានប្តឹងពលរដ្ឋ​៧នាក់ពីបទរារាំង ញុះញង់ បង្កើតសកម្មភាពអនាធិបតេយ្យ តាមដងផ្លូវសាធារណៈ ប្រព្រឹត្ត​នៅផ្លូវលេខ១៥២ ភូមិសំរោងត្បូង សង្កាត់សំរោង ខណ្ឌព្រែកព្នៅ កាលពីថ្ងៃទី២៨ ខែកុម្ភៈ ឆ្នាំ២០២២ និងថ្ងៃទី៣ ខែឧសភា  ឆ្នាំ២០២២។

តាមប្រភពដដែល តុលាការតម្រូវឱ្យសមីខ្លួនចូលបំភ្លឺនៅតុលាការតាមកាលកំណត់រៀងៗខ្លួន  ដោយចាប់ផ្តើមពីថ្ងៃទី២ ខែសីហានេះទៅ និងអ្នកខ្លះត្រូវបំភ្លឺនៅថ្ងៃទី៣ ទី៤ និងទី៩ ខែ​សីហា​នេះ។

បន្ទាប់ពីបញ្ចប់ការចូលបំភ្លឺនៅតុលាការរួច អ្នកស្រី ប្រាក់ សុភា ជាពលរដ្ឋមួយរូប​ក្នុងចំណោម​ចុងចោទ៧នាក់​ បានថ្លែងថា អ្នកស្រីក៏ដូចជាពលរដ្ឋផ្សេងទៀតទទួលរងនូវ​ភាព​អយុត្តិធម៌​ដោយសារតែរងបណ្ដឹងពីអាជ្ញាធរក្នុងមូលដ្ឋានខ្លួន ព្រោះពួកគេមិនបាន​ប្រព្រឹត្ត​នូវ​ទោសកំហុសដូចការចោទរបស់អាជ្ញាធរឡើយ។ ពួកគាត់គ្រាន់តែការទាមទារឱ្យមានដំណោះ​ស្រាយសមរម្យសម្រាប់បញ្ហាដីធ្លីនៅបឹងតាមោកតែប៉ុណ្ណោះ។

អ្នកស្រីបន្ថែមថា អ្នកស្រីមានការឈឺចាប់ និងទទួលរងនូវអយុត្តិធម៌បំផុត ខណៈដែលពលរដ្ឋ​ទាមទារ​សិទ្ធិលំនៅដ្ឋានបែរជារងបណ្ដឹងពីអាជ្ញាធរទៅវិញ ដូច្នេះអ្នកស្រីបដិសេធ​មិនទទួល​បទញុះញង់ និងស្នើសុំយុត្តិធម៌សម្រាប់អ្នកជាប់បណ្ដឹងទាំង៧នាក់។

អ្នកស្រី សុភា ថ្លែងថា៖ «វាអយុត្តិធម៌សម្រាប់ពួកខ្ញុំដែលជាតំណាងពលរដ្ឋ២៥០គ្រួសារ គ្រាន់​តែ​ទាមទារប្លង់កម្មសិទ្ធិអភិវឌ្ឍន៍នឹងកន្លែងសោះ ហេតុអ្វីប្ដឹងពួកខ្ញុំ៧នាក់។ ពួកខ្ញុំអត់បាន​ប្រព្រឹត្ត​បទល្មើសអីទាំងអស់ពួកខ្ញុំជាពលរដ្ឋស្លូតត្រង់ធ្វើដើម្បីសហគមន៍ ហើយខ្ញុំ​សូម​លើក​លែងបទចោទ»។

អ្នកស្រីបន្តថា៖ «ខ្ញុំមិនបានរារាំងការអភិវឌ្ឍទេ សម្ដេចអភិវឌ្ឍន៍ចុះកណ្ដាលបឹង តែសូមកុំឱ្យ​មន្រ្តីក្រោមសម្ដេចអភិវឌ្ឍន៍ជម្រកពួកខ្ញុំ ព្រោះអភិវឌ្ឍន៍លើលំនៅដ្ឋាន​ពួកខ្ញុំស្មើនឹងអភិវឌ្ឍន៍​លើទឹកភ្នែកខ្ញុំ។ ការអភិវឌ្ឍមានតែការឈឺចាប់ឱ្យពលរដ្ឋ ចឹងតើអភិវឌ្ឍន៍មានន័យអី?»

អ្នកស្រីបន្ថែមទៀតថា ពលរដ្ឋដែលមកទាមទារមិនឱ្យឈូសឆាយផ្ទះពួកគេ គឺរស់នៅ​តំបន់​បឹងតាមោកតាំងពីឆ្នាំ១៩៩០ ប៉ុន្តែគ្មានសៀវភៅស្នាក់នៅ គ្មានប្លង់កម្មសិទ្ធិមានតែ​អត្តសញ្ញាណ​បណ្ណ​សម្រាប់បោះឆ្នោតបក្សប្រជាជនតែប៉ុណ្ណោះ។

អ្នកស្រី ប្រាក់ សុភា ពលរដ្ឋរងបណ្ដឹងអាជ្ញាធរខណ្ឌព្រែកព្នៅ បង្ហាញភស្តុតាង​មកអ្នកសារព័ត៌មាននៅមុខសាលាដំបូងរាជធានីភ្នំពេញ។ រូបថតថ្ងៃទី២ ខែសីហា ឆ្នាំ២០២២។ ខេមបូចា/ សុវណ្ណ ស្រីពេជ្រ

ពលរដ្ឋមួយរូបទៀត គឺអ្នកស្រី ខេន សាអយ អាយុ ៣៧ឆ្នាំ ប្រាប់ឱ្យដឹងថា ពលរដ្ឋដែលរង​បណ្ដឹងទាំងអយុត្តិធម៌ មិនបានទៅរារាំងអាជ្ញាធរ ឬបិទផ្លូវសាធារណៈឡើយ គ្រាន់តែដើរ​តាមចិញ្ចើមផ្លូវធ្វើការទាមទារតែប៉ុណ្ណោះ។

អ្នកស្រី សាអយ អះអាងថា អ្នកស្រីសង្ឃឹមថាយុត្តិធម៌នឹងមានសម្រាប់ប្រជាជនស្លូតត្រង់ ព្រោះនៅពេលដែលពលរដ្ឋបានទៅដាក់ញត្តិនៅរដ្ឋសភា រដ្ឋសភាបានបោះត្រាទទួល​ដោះស្រាយឱ្យពលរដ្ឋសហគមន៍​ ខណៈខុទ្ទកាល័យនាយករដ្ឋមន្រ្តី​មិនបានដោះស្រាយ​ឱ្យឡើយ។

អ្នកស្រីបន្ថែមថា អ្វីដែលពលរដ្ឋស្នើសុំ គឺប្លង់កម្មសិទ្ធិដីធ្លី សុំសៀវភៅស្នាក់នៅ ការអភិវឌ្ឍ​នៅ​នឹងកន្លែង និងមិនយល់ព្រមការដោះដូរដីទៅកន្លែងផ្សេងគ្មានការអភិវឌ្ឍឡើយ ដោយរំពឹង​ថា​អាជ្ញាធរនឹងមិនដាក់បន្ទុកលើពលរដ្ឋ។

អ្នកស្រីថ្លែងថា៖ «ឱ្យខ្ញុំទៅនៅព្រៃខ្ញុំម៉េចទៅ បើផ្ទះខ្ញុំនៅតាំងពីឆ្នាំ៩០នោះ។ ខ្ញុំមានសង្ឃឹម​ព្រោះគាត់[រដ្ឋសភា]បានបោះត្រាទទួលញត្តិពួកខ្ញុំ និងចរចាជាមួយក្រុង កន្លះខែទៀត​ទៅជួបគាត់ផ្ទាល់»។

ខេមបូចា មិនអាចទាក់ទង លោក មាស សម្បូរ ប្រធានសន្តិសុខខណ្ឌព្រែកព្នៅ ដើម្បីបំភ្លឺជុំវិញបញ្ហាខាងលើ នៅរសៀលថ្ងៃនេះបានទេ។ ដោយឡែក លោក សុខ សម្បត្តិ អភិបាលខណ្ឌព្រែកព្នៅ ក៍មិនអាចទាក់ទងសុំការអត្ថាធិប្បាយបានដែរ។

ចំណែកលោកសុខ ខេមា អតីតអភិបាលរងខណ្ឌព្រែកព្នៅ ដែលទើបប្ដូរតំណែងទៅ​ជាអភិបាលខណ្ឌដូនពេញបានប្រាប់ថា​ លោកមិនបានដឹង​ច្បាស់​ជុំវិញករណីនេះឡើយ ដោយឱ្យសាកសួរទៅអភិបាលខណ្ឌជំនួសវិញ។

លោក ខេមា បញ្ជាក់ថា៖ «អានេះខ្ញុំមិនបាននេះផង កាលពីមុនអភិបាលគេអ្នកចាត់ចែង ទាល់តែសួរបងសម្បត្តិអភិបាលខណ្ឌ»។

ចំណែកលោក ស៊ឹម សុផង់  នាយករដ្ឋបាលខណ្ឌព្រែកព្នៅគ្រាន់តែ​ប្រាប់យ៉ាងខ្លីថា រវល់ប្រជុំ។

ពលរដ្ឋរស់នៅជាប់បឹងតាមោកប្រមាណ៣០នាក់ អង្គុយរងចាំការចូលបំភ្លឺតាម​ដីកាកោះនៅសាលាដំបូងរាជធានីភ្នំពេញ។ រូបថតថ្ងៃទី២ ខែសីហា ឆ្នាំ២០២២។ ខេមបូចា/ សុវណ្ណ ស្រីពេជ្រ

លោក អំ សំអាត នាយកចាត់ការទូទៅនៃអង្គការ លីកាដូ មានប្រសាសន៍ថា លោកមានការ​ខកចិត្តដែលអាជ្ញាធរក្នុងមូលដ្ឋានយកប្រព័ន្ធតុលាការមកប្ដឹងប្រជាជនដែលមានបញ្ហាដីធ្លីនៅបឹងតាមោកជាច្រើននាក់។ លោកស្នើឱ្យអាជ្ញាធរពិនិត្យឡើងវិញ ចំពោះភាពមិនប្រក្រតីនេះ។

លោកសំអាតបន្ថែមថា  នេះមិនមែនជារឿងចម្លែកឡើយ ព្រោះកន្លងមកពលរដ្ឋនៅបុរីកីឡា​ពលរដ្ឋនៅសហគមន៍ផ្សេងៗទៀតក៏រងការចាប់ និងឃុំខ្លួនតាមប្រព័ន្ធផ្លូវច្បាប់ដូចគ្នាដែរ ដោយសារតែបញ្ហាដីធ្លី។

លោក សំអាត ថ្លែងថា៖ «យើងមានការបារម្ភដែរទាក់ទងនឹងសហគមន៍នៅបឹងតាមោកនេះ យើងឃើញដីនៅបឹងតាមោក កន្លងមករដ្ឋាភិបាលធ្លាប់ធ្វើការកាត់ទៅ​ឱ្យក្រុមហ៊ុនឯកជន​មួយ​ចំនួន ឬក៏សាងសង់អគាររដ្ឋបាលរបស់រដ្ឋ ចឹងទេអាជ្ញាធរគួរជជែកជាមួយពលរដ្ឋ​ដើម្បី​ដោះ​ស្រាយដោយសន្តិវិធី»។

លោកអះអាងថា អាជ្ញាធរគួរចៀសវាងការប្រើប្រាស់ប្រព័ន្ធតុលាការក្នុងការប្ដឹងផ្ដល់ពលរដ្ឋ ដើម្បីឱ្យពលរដ្ឋរស់នៅដោយសុខុដុមរមនា។

បឹងកប់ស្រូវ ឬបឹងតាមោក ត្រូវបានគេស្គាល់ថាជាបឹងមួយដែលនៅសល់ចុងក្រោយ​ក្នុង​ចំណោម​បឹងរំដោះទឹកដ៏ធំៗនៅក្នុងរាជធានីភ្នំពេញ មានទំហំ៣ ២៣៩​ហិកតា គ្រប់ដណ្ដប់​ដោយ១៩ភូមិ ៥សង្កាត់ និង២ខណ្ឌ។ ភាគច្រើន ប្រជាពលរដ្ឋដែលរស់ជុំវិញបឹងនោះបាន​អាស្រ័យផលពីបឹងមានដូចជា ​ការធ្វើស្រែ រកត្រី និង​ដាំដំណាំជាដើម។

គួររម្លឹកថា នៅថ្ងៃទី​៣ ខែកុម្ភៈ ឆ្នាំ២០១៦ រដ្ឋាភិបាលបានចេញអនុក្រឹត្យស្តីពីការកំណត់ផ្ទៃបឹង ចំនួន៣២៣៩ហិកតា ដែលគ្របដណ្តប់បឹងតាមោក (បឹងកប់ស្រូវ) និងដី​ជុំវិញទុកជា​ទ្រព្យ​សម្បត្តិសាធារណៈរបស់រដ្ឋ។ ដូច្នេះយោងតាម​​ច្បាប់ភូមិបាល ដីសាធារណៈរបស់រដ្ឋ គឺមិន​អាច​ត្រូវបានគ្រប់គ្រងដោយនរណាម្នាក់នោះទេក្រៅពីរដ្ឋ​។ 

ក៏ប៉ុន្តែមកដល់បច្ចុប្បន្ននេះ  ផ្ទៃដីបឹងតាមោកជិត២ពាន់​ហិកតានៃទំហំសរុប​ជាង៣ពាន់ហិកតា​របស់​បឹងតាមោក ត្រូវបានដោះដូរ និងកាត់ឱ្យស្ថាប័នរដ្ឋ ក្រុមហ៊ុនឯកជន និងបុគ្គល​ដែលមាន​ទំនាក់​ទំនង​​ល្អ​ជាមួយរដ្ឋាភិបាលកម្ពុជាដើម្បីធ្វើការអភិវឌ្ឍតាមរយៈអនុក្រឹត្យចុះកាលពីថ្ងៃ​ទី១៧ ខែ​វិច្ឆិកា ឆ្នាំ​២០២១៕​

220 views

ព័ត៌មានទាក់ទង

ព័ត៌មានថ្មីៗ

អត្ថបទពេញនិយម