សមាគមសម្ព័ន្ធអ្នកសារព័ត៌មានកម្ពុជា

សៀវភៅដែលដាក់ឱ្យអានដោយមិនគិតថ្លៃនៅសួនមុខវត្តបទុមមាន​​ការចាប់អារម្មណ៍ច្រើន ខណៈពេលខ្លះក៏ត្រូវសន្តិសុខសួន​ដេញ

សៀវភៅចម្រុះដែលដាក់ឱ្យអាននៅសួនមុខវត្តបទុមវតី រាជធានីភ្នំពេញ។ រូបថតនៅថ្ងៃទី១៨ ខែកុម្ភៈ ឆ្នាំ២០២៣។ ខេមបូចា/ រ៉ាន់ ស្រីដែត
សៀវភៅចម្រុះដែលដាក់ឱ្យអាននៅសួនមុខវត្តបទុមវតី រាជធានីភ្នំពេញ។ រូបថតនៅថ្ងៃទី១៨ ខែកុម្ភៈ ឆ្នាំ២០២៣។ ខេមបូចា/ រ៉ាន់ ស្រីដែត

នាពេលរសៀលថ្ងៃជ្រេរាងត្រជាក់បន្តិចមានមនុស្សម្នាកំពុងតែអង្គុយអានសៀវភៅដែល​ដាក់​នៅ​សួន​វត្តបទុមវតីដោយមានសៀវភៅតំរៀបជាជួរមានរបៀបរៀបរយ ​យុវតីម្នាក់​មាន​សក់ខ្មៅ​​ទឹករលក និងបង់កក្រមា ដោយទឹកមុខញញឹមញញែម គឺកញ្ញា ឆែម ស្រីគា អាយុ​២០ឆ្នាំ បាន​រៀបរាប់ប្រាប់ថា ពេលទំនេរពីការសិក្សា​ និងធ្វើការ គាត់​បាន​​ឆ្លៀតពេលរៀងរាល់​ចុង​សប្តាហ៍​ដាក់​តាំង​សៀវភៅ ប៉ុន្តែក៏មានការដេញមិនឱ្យ​ដាក់ពីសន្តិសុខសួនពីរបីដងផង​ដែរ។

រាល់សៀវភៅទាំងអស់គឺដាក់អានដោយឥតគិតថ្លៃរឺហៅថាសួនអំណានភ្នំពេញដែលភាគច្រើនគេស្គាល់តាមរយៈទំព័រហ្វេសប៊ុកឈ្មោះខ្លឹមសារនៅសួនសាធារណៈវត្តបទុមវតីក្បែររូប​សំណាក់​ហង្ស ដោយក្តីស្រឡាញ់ និងមានឆន្ទៈ​​​​​​​​​​​​​​​​​​​​លើកស្ទួយការអាននៅកម្ពុជា និងជាការ​ចែករំលែកដល់អ្នកគ្មានលទ្ធភាពទិញសៀវភៅដើម្បីអាន។​  

កញ្ញាបន្តថា ការដាក់សៀវភៅតាមសួននេះ កញ្ញាដាក់៣ឆ្នាំហើយកាលរៀននៅថ្នាក់​វិទ្យាល័យនៅខេត្តប៉ៃលិន ហើយបានបន្តមកដាក់តាមសួននៅភ្នំពេញ​ខណៈពេល​ដែលកញ្ញា​ឡើងមករៀនមហាវិទ្យាល័យនៅភ្នំពេញ ហើយការ​​ដាក់តាំងនៅ​ភ្នំពេញដំបូងធ្វើនៅថ្ងៃទី១០ ខែសីហា ឆ្នាំ២០២២​ ដែល​មានសៀវភៅ​មិនដល់៩០ក្បាល​ផង។​

កញ្ញា ស្រីគា លើកឡើងថា៖ «គិតមកដល់ឥឡូវនេះសៀវភៅដែលដាក់ឱ្យអានមាន​ជិត​ ១​០០០ក្បាលហើយ គឺជាប្រភេទសៀវភៅអភិវឌ្ឍន៍ខ្លួន លើកទឹកចិត្ត ប្រលោមលោក​ សៀវភៅ​រឿង​និទានកុមារ​ ហើយភាគច្រើនបាន​មកពីការបរិចា្ចគរបស់អ្នកនិពន្ធ​ និងមិត្តអ្នកអាន​ហើយ​ការ​​ដាក់សៀវភៅនេះ​ធ្វើឡើង​រាល់ចុង​សប្តាហ៍វេលាម៉ោង៥-៧ល្ងាច សម្រាប់មិត្តអ្នកអានណា​មានបំណងចង់ខ្ចីសៀវភៅគាត់​អាចខ្ចីយកទៅ​អាន​បាន»

កញ្ញាបានប្រាប់បន្តថា ទន្ទឹមនឹងនេះក៏មានផលលំបាកដែលប្រឈមសម្រាប់គាត់ដែរ គឺមាន​ការរារាំងពីអាជ្ញាធរពីរលើកមកហើយ លើកទីមួយកញ្ញាដាក់សៀវភៅនៅក្បែរ​សួន​នាគបាញ់​ទឹក​​មានការ​រារាំង​ក្រោមហេតុផលខូចសណ្តាប់ធ្នាប់សួនសារធារណៈ នាងទទួល​ស្គាល់ថា​ទីកន្លែងនោះមានមនុស្សដើរច្រើនពេលខ្លះវាអាចដែរ។

កញ្ញា ស្រីគា បន្តទៀតថា ក្រោយមកនៅសប្តាហ៍បន្ទាប់មកទៀត​នាងរើទៅដាក់តាំងនៅក្បែរ​រូបសំណាក់ហង្សវិញម្តងព្រោះទីនេះមិនសូវមានមនុស្សទើសផ្លូវគេដើរទៀតនោះទេ ហើយវា​ក៏មិនប៉ះពាល់សណ្តាប់ធ្នាប់នោះទេ​ប៉ុន្តែខាងអាជ្ញាធរ​ក៏រារាំងជា​លើក​ទីពីរដោយមិនប្រាប់​ហេតុ​ផលគឺតម្រូវឱ្យរើ ដំបូងមានអ្នកថែសណ្តាប់ធ្នាប់សួនពីរនាក់មកមើលបន្ទាប់មកក៏មានសន្តិសុខ​ពីរនាក់ទៀតមកប្រាប់ឱ្យរើចេញ កញ្ញាសួររកហេតុផលគាត់ថាគ្មានចម្លើយ​ទេ ប៉ុន្តែ​មេឱ្យរើត្រូវ​តែ​រើ។

កញ្ញាឱ្យដឹងថា៖ «បើមិនរើចេញទេខាងគាត់លើកដាក់កង់បីទៅហើយខ្ញុំក៏ព្រមរើទាំងឆ្ងល់​ក្នុង​ចិត្ត​ហេតុអីឱ្យរើចេញដោយមិនប្រាប់ហេតុផលអ៊ីចឹង»

មុនពេលដាក់តាំងសៀវភៅខ្ញុំក៏ធ្លាប់បានទាក់ទងទៅខាងអង្គការសង្គមស៊ីវិលដូចជា អង្គការ លីកាដូ គាត់ថាដូចជាមិនមានអ្វីប៉ះពាល់នោះទេ ព្រោះគ្រាន់តែជាការដាក់​សៀវភៅអាន​ដោយ​ឥតគិតថ្លៃប៉ុណ្ណោះ។

ទោះជាយ៉ាងណាក៏ដោយកញ្ញានៅតែបន្តធ្វើដើម្បីប្រយោជន៍រួមហើយពិតជាសប្បាយចិត្ត​ណាស់ដែលបានរួមចំណែក និងមានការគាំទ្រពីបងប្អូនមិត្តអ្នកអាន ជាពិសេសយុវជនក្មេងៗ​អាណាព្យាបាល ហើយនាងគិតថាថ្នាក់ដឹកនាំដែលលោកបានខិតខំប្រឹង​ប្រែងដើម្បីលើកស្ទួយ​ការ​អានក៏សប្បាយចិត្តដែរព្រោះប្រទេសខ្លាំងបានមកពីមានអ្នកអានច្រើន។

សកម្មភាពអ្នកអានសៀវភៅនៅសួនវត្តបទុមវតីក្បែររូបសំណាក់ហង្ស រាជធានីភ្នំពេញ។ រូបថតនៅថ្ងៃទី១៨ ខែកុម្ភៈ ឆ្នាំ២០២៣។ ខេមបូចា/ រ៉ាន់ ស្រីដែត

កញ្ញា ដាំ សុស្រីនាង សមាជិកសមាគមបណ្តាញយុវជនកម្ពុជា(CYN) លើឡើងថា មិនមែន​មានយុវជនគ្រប់គ្នាសុទ្ធតែមានគំនិតលះបង់ពេលវេលាផ្ទាល់ខ្លួនចុងសប្តាហ៍មកដាក់សៀវភៅឱ្យអានដោយឥតគិតថ្លៃបែបនេះទេ ហើយវាក៏ជាគំរូមួយល្អមែនទែនសម្រាប់យុវជន​ដើម្បី​បណ្តុះ​វប្បធម៌នៃការអាន។ ការអានវាជួយឱ្យបណ្តុះគំនិត និងស្មារតីដល់​ប្រជាជន​ខ្មែរ​ងាកមក​ចាប់អារម្មណ៍ការអានកាន់តែច្រើនសម្បូរធនធានមនុស្សនៅកម្ពុជា។

ស្រីនាង លើកឡើងថា៖ «ខ្ញុំយល់ថាការដាក់សៀវភៅឱ្យអាននៅតាមសួនសាធារណៈ​នេះវា​មិន​មានអ្វី​ជាការប៉ះពាល់និងខូចខាតអ្វីដល់សណ្តាប់ធ្នាប់សួនដូចខាងបងប្រជាការពារ​លើក​ឡើងនោះទេព្រោះមិនមានអ្វីដែលធ្វើឱ្យរំខានដល់អ្នកដទៃឡើយពួកគាត់មកអាននៅទីនេះដោយរក្សា​ភាពស្ងៀមស្ងាត់ និងមិនមានការចោលសំរាមដែលធ្វើឱ្យខូច​សណ្តាប់ធ្នាប់​ដូចការ​លើកឡើង​នោះទេ»។ កញ្ញាបន្តថា៖ «ខ្ញុំសូមសំណូមពរដល់អជ្ញាធរឱ្យគាត់ជួយសម្រួល កុំមក​ដេញចេញ​ឱ្យរើចេញ​បែបហ្នឹងអីវាមិនសមរម្យទេ»

ស្រីនាង បន្ថែមថា នាងស្គាល់សួនអំណានភ្នំពេញតាមរយៈបណ្តាញសង្គមហ្វេសប៊ុក ដល់​ពេល​ឃើញព័ត៌មាន​គេដេញលើកទី១និងលើកទី២ គួរឱ្យសោកស្តាយ​មែនទែន​នៅពេល​ដែល​សកម្មភាពល្អៗ​បែប​នេះ​ត្រូបានហាមខាត់ពីអាជ្ញាធរ។ នាងធ្លាប់ស្គាល់អំណានតាមសួន​បែប​នេះពីមុនដែរ​ ហើយ​ឥឡូវឃើញមាននៅរាជធានីភ្នំពេញតាមសួនអ៊ីចឹង​ពិតជាសប្បាយចិត្ត​វា​ក៏មានបរិយាកាសល្អម្យ៉ាងស្រឡះមុខស្រឡះមាត់បានទាំងអានសៀវភៅនិងមកហាត់ប្រាណផង។

ព្រះសង្ឃព្រះនាម ប្រុស ធារ៉ា ជានិស្សិតផ្នែកច្បាប់មានសង្ឃដីកាថា ជាលើកទី២ហើយ​ដែល​បានមកអានសៀវភៅនៅទីនេះកាលពីលើកទីមួយមកចំពេលគេឱ្យរើចេញថាខូចសណ្តាប់​ធ្នាប់សួនប៉ុន្តែដូចមិនសមហេតុផលសោះការដាក់សៀវភៅឱ្យអាននេះគួរតែជារឿងគួរតែលើកតម្កើងទៅវិញទេជាជាងការរារាំង។

ព្រះអង្គ ធារ៉ា បន្តថា នេះជារឿងមួយល្អសម្រាប់សង្គមវាសបញ្ជាក់ថាយុវជនសម័យនេះ​មាន​ទស្សនៈវិស័យវែងឆ្ងាយដែលមានគំនិតលើកស្ទួយការអាននៅសួនសារធារណៈបែបនេះ។ណាមួយជាការបង្ហាញពីគំរូមួយដ៏ល្អ ប៉ុន្តែព្រះអង្គចូលរួមខកចិត្តនៅពេលដែលអាជ្ញាធរឱ្យ​រើសៀវភៅចេញមិនឱ្យដាក់នៅសួនបែបនេះ។ ប្រទេសមួយខ្លាំងមានការអភិវឌ្ឍន៍​ និងសម្បូរ​ធនធាន​មនុស្សគឺមកពីមានអ្នកអានច្រើន។

ព្រះអង្គ ធារ៉ា លើកឡើងថា៖ «ប៉ុន្តែអាត្មាសោកស្តាយដែលមានការរារាំង​ពីអាជ្ញាធរកន្លង​មក យ៉ាងណាក៍ត្រេកអរដោយសារឥឡូវឃើញថាមានភាពល្អប្រសើរឡើងវិញ»

កញ្ញា យុន សៀវហ័ន ជាសិស្ស និងបុគ្គលិក´ធ្វើការឯកជន´´´មួយកន្លែង យល់ឃើញថា នេះជា​ការ​គាំទ្រការអាន និងចែករំលែកសៀវភៅអានដោយឥតគិតថ្លៃ​សម្រាប់អ្នកគ្មានលទ្ធភាពទិញ​មកអានដូចជានាងផ្ទាល់ព្រោះសៀវភៅមួយចំនួនដែលខ្ញុំចង់អាននោះវាមានតម្លៃថ្លៃ។

សៀវហ័ន ឱ្យដឹងថា៖ «ខ្ញុំកាន់តែសប្បាយចិត្ត និងសង្ឃឹមថាអំណានបែបនេះ​និងមាននៅគ្រប់​ខេត្តទាំងអស់នៅកម្ពុជា និងសំណូមពរឱ្យមានការគាំទ្រពីគ្រប់ភាគីពាក់ព័ន្ធ​យកចិត្តទុកដាក់​ដើម្បី​ការអាននៅកម្ពុជាជាពិសេសសម្រាប់មនុស្សជំនាន់ក្រោយ និងសង្គមជាតិ»

សកម្មភាពព្រះសង្ឃ យុវតី និងកុមារកំពុងអានសៀវភៅនៅសួនមុខវត្តបទុមវតី  រាជធានីភ្នំពេញ។ រូបថតនៅថ្ងៃទី១៨ ខែកុម្ភៈ ឆ្នាំ២០២៣។ ខេមបូចា/ រ៉ាន់ ស្រីដែត

អ្នកស្រី អ៊ុក ចំរើន អាយុ៤០ឆ្នាំ លើកឡើងថា ជាលើកទីមួយហើយដែលបាននាំកូនមក​លេង​នៅសួន​គេដាក់សៀវភៅឱ្យអានបែបនេះ កូនខ្ញុំឃើញសៀវភៅច្រើន​មើលទៅគាត់​សប្បាយ​ចិត្ត​ដោយសារភាគច្រើនក្មេងគាត់លេងទូរសព្ទច្រើនដល់ពេលមានគេឯងអានទៅគាត់អាន​ដែរ។

អ្នកស្រីបញ្ជាក់ថា៖ «ខ្ញុំចង់ឱ្យសួនផ្សេងៗមានសៀវភៅដាក់បែបនេះឱ្យកាន់តែច្រើន វាជារឿង​សំខាន់ និងមានប្រយោជន៍មួយសម្រាប់ប្រជាជន។​ ខ្ញុំគិតថាវាមិនជាប៉ះពាល់សណ្តាប់ធ្នាប់​សួន​ទេតែជាសកម្មភាពល្អព្រោះការអានបង្ហាញពីភាពចង់ចេះដឹងដើម្បីមានការគិតបែបទូលំ​ទូលាយ​កុំតែថ្ងៃនេះខ្ញុំមករាងល្ងាចទេកុំអីខ្ញុំអានជាមួយកូនបាត់ហើយ»

លោក ហុក​ សុទ្ធិ នាយកអង្គការស៊ីប៉ានិងជាប្រធានសមាគមបណ្ណាល័យកម្ពុជា លោកយល់​ឃើញ​ថា ការដាក់សៀវភៅឱ្យអាននេះវាជាប្រយោជន៍​មួយរួម​ជាពិសេស​សារធារណជនអាច​អានបាន និងមិនបាច់ចំណាយលុយ។ ប៉ុន្តែចំពោះអំណានតាមសួននេះក៏គួរតែ​សុំការ​អនុញ្ញាតពីសំណាក់អាជ្ញាធរនៅតំបន់នោះដែរ ព្រោះជាធម្មតាទេតាមសួនសាធារណៈមួយៗ​គឺតែងតែមានការគ្រប់គ្រងពីអាជ្ញាធរ។

លោកបន្តថា៖ «ប្រាប់គាត់ទៅថាខ្ញុំសុំដាក់សៀវភៅឱ្យគេអាន​មួយថ្ងៃរឺក៏ប៉ុន្មានថ្ងៃ​ក្នុងមួយ​សប្តាហ៍ ខ្ញុំគិតថា ជាការណ៍មួយគួរតែយើងសុំការអនុញ្ញាត​ពីអាជ្ញាធរដែនដីគេបើយើងទៅ​ដាក់ឆៅៗតែម្តងគេអាចមិនយល់មិនដឹងពីគោលបំណងយើងច្បាស់នោះ គេក៏អាចនឹង​ហាម​ខាត់​យើង​បាន»

លោក កុក រស់ ប្រធាននាយកដ្ឋានសៀវភៅ និង​​ការអាន ​លើក​ឡើងថា នេះជាចំណុចចាប់ ផ្តើមល្អមួយដែលចូលរួមចំណែកលើកស្ទួយការអាន​នៅ​កម្ពុជាពីព្រោះវប្បធម៌​នៃការអាននៅ​កម្ពុជាមិនសូវមានសំទុះឈានឡើងប៉ុន្មានទេកន្លងមក​ដល់ពេលបានការចាប់អារម្មណ៍​ពី​សំណាក់​យុវជនក្រុមនិស្សិតចូលរួមចំណែកតាមរូបភាព​ផ្សេងៗជាពិសេសធ្វើឱ្យមនុស្ស​សឹង​គ្រប់វ័យ ក្មេងៗចាប់អារម្មណ៍ច្រើន។

លោកថ្លែងថា៖ «អំណានតាមសួន រឺការដាក់សៀវភៅឱ្យអានឥតគិតថ្លៃបែបនេះក៏មានច្រើន​កន្លែងដែរហើយដូចជាខាងខេត្តបាត់ដំបង​គឺផ្ទះអំណានគន្ធី ក្រុងកំពង់ចាមគឺមានព្រះសង្ឃ​រៀបចំឡើង និង​​​រាជធានីភ្នំពេញគឺប្អូន ស្រីគា(ខ្លឹមសារ)»។ លោកបន្តទៀតថា៖ «ខ្ញុំមាន​សុទិដ្ឋិ​និយមចំពោះការដាក់សៀវភៅតាមសួនរបស់ ស្រីគា ដែលគាត់មានឆន្ទៈចែករំលែក និងដើម្បី​ឱ្យសាធារណជនមានវប្បធម៌នៃការអាននៅកម្ពុជាកាន់តែទូលំទូលាយ»

អ្នកយកព័ត៌មានខេមបូចា មិនអាចទាក់ទង លោក ម៉េត មាសភក្តី អ្នកនាំពាក្យសាលា​រាជធានីភ្នំពេញ​ សុំការឆ្លើយបំភ្លឺបាននៅឡើយទេ។

លោក កើត ឆែ អភិបាលរងរាជធានីភ្នំពេញ មានប្រសាសន៍ថា ដើម្បីកុំឱ្យមានការរារាំង​នៅតាមសួនសាធារណៈ សាមីខ្លួនគួរតែស្នើសុំទៅកាន់សាលារាជធានីភ្នំពេញ៕

469 views

ព័ត៌មានថ្មីៗ

អត្ថបទពេញនិយម