សមាគមសម្ព័ន្ធអ្នកសារព័ត៌មានកម្ពុជា

ជនជាតិដើមភាគតិចពូនងខេត្តមណ្ឌលគិរីប្ដឹងអាជ្ញាធរមូលដ្ឋានពាក់ព័ន្ធនឹងការមិនទប់ស្កាត់បទល្មើសព្រៃឈើ

ដើមស្មាច់ដែលត្រូវជនល្មើសកាប់ទន្រ្ទានទុកចោលនៅព្រៃសហគមន៍នៅភូមិពូត្រែង ឃុំដាក់ដាំ ស្រុកអូររាំង ខេត្តមណ្ឌលគិរី។ រូបថតនៅថ្ងៃទី១៦ ខែកុម្ភៈ ឆ្នាំ២០២២។ រូបភាពផ្ដល់ឱ្យ
ដើមស្មាច់ដែលត្រូវជនល្មើសកាប់ទន្រ្ទានទុកចោលនៅព្រៃសហគមន៍នៅភូមិពូត្រែង ឃុំដាក់ដាំ ស្រុកអូររាំង ខេត្តមណ្ឌលគិរី។ រូបថតនៅថ្ងៃទី១៦ ខែកុម្ភៈ ឆ្នាំ២០២២។ រូបភាពផ្ដល់ឱ្យ

តំណាងសហគមន៍ព្រៃឈើដែលជាជនដើមភាគតិចពូនងចំនួន៤នាក់នៅខេត្តមណ្ឌលគិរីដាក់​ពាក្យ​ប្ដឹងអាជ្ញាធរមូលដ្ឋានទៅកាន់តំណាងអយ្យការសាលាដំបូងខេត្ត ដោយចោទប្រកាន់​ពួកគេថា​មិនបានទប់ស្កាត់បទល្មើសព្រៃឈើឱ្យទាន់ពេលវេលា។

យោងតាមពាក្យបណ្ដឹងដែលខេមបូចាទទួលបាន បង្ហាញថា នៅថ្ងៃទី២៤ ខែវិច្ឆិកា ឆ្នាំ២០២២  ប្រជាសហគមន៍ព្រៃឈើនៅភូមិពូត្រែង ឃុំដាក់ដាំ ស្រុកអូររាំង ដាក់ពាក្យប្ដឹង​បរិហារលើ​មន្រ្តី​មូលដ្ឋាននិងឈ្មួញដីធ្លីសរុបចំនួន៤នាក់ដែលមិនយកចិត្តទុកដាក់ និងពុំទប់ស្កាត់​បទល្មើស​កាប់​រានឈូសឆាយដីព្រៃទាន់ពេល​ដែលមានទំហំ២០ហិកតាស្ថិតនៅត្រង់ចំណុចយោគយ៉ាវ និងយោគគង់គ្លែ ក្នុងភូមិពូត្រែងនៃឃុំដាក់ដាំ។

យោងតាមពាក្យបណ្ដឹងនេះ កាលពីថ្ងៃទី១២ ខែតុលា ឆ្នាំ២០២២ ប្រជាសហគមន៍​បានចុះ​ល្បាតព្រៃ ដោយសង្កេតឃើញថាតំបន់ព្រៃឈើនោះ​ត្រូវបានជនល្មើសកាប់រានអស់ជាច្រើន​សន្ធឹកព្រមទាំងហ៊ុមព័ទ្ធ ដើម្បីធ្វើជាកម្មសិទ្ធិ។ ពាក្យបណ្ដឹងក៏ស្នើឱ្យដកហូតដីព្រៃនេះ​ប្រគល់ជូនប្រជាសហគមន៍ឱ្យគ្រប់គ្រងជំនួសវិញ។

ដើមបណ្ដឹងបានចោទប្រកាន់អាជ្ញាធរមូលដ្ឋានថា គ្មានទំនួលខុសត្រូវក្នុងការការពារព្រៃ​សហគមន៍ ដោយលើកឡើងថាពួកគេបានគេចវេះនៅពេលចុះ​ល្បាតព្រៃជាមួយ​ប្រជាសហគមន៍ ដោយការបកត្រឡប់ក្រោយវិញអំឡុងពេលធ្វើដំណើរតាមផ្លូវទៅកាន់តំបន់​ព្រៃឈើ។

ដើមបណ្ដឹង លោក ទឺយ ធិ ជាជនជាតិដើមភាគតិចពូនង និងជាលេខាធិការសហគមន៍​ព្រៃឈើ​នៅភូមិពូត្រែង ថ្លែងថា ក្នុងរយៈពេលជាង២ខែចុងក្រោយនេះ អាជ្ញាធរមូលដ្ឋាន​ពុំបានចូលរួម​ចុះល្បាតព្រៃដល់កន្លែងកាប់ឆ្ការដោយផ្ទាល់ឡើយ ហើយការប្ដឹងនេះ​ដើម្បី​ជំរុញ​ឱ្យពួកគេ​យក​ចិត្តទុកដាក់ក្នុងការការពារព្រៃឈើ។

លោក ទឺយ ធិ និយាយថា៖ «សហគមន៍ទៅជាមួយប៉ុស្ដិ៍ មន្រ្តីក្រុមប្រឹក្សា ថាចុះទៅមើល​កន្លែង​គេធ្វើផ្ទះ គេកាប់ព្រៃហ្នឹង។ គេកាប់ជើងក្រោម(ដើមឈើ) ចឹងគាត់ទៅត្រឹមផ្ទះ​សហគមន៍​ថត​រូបភាពអីហ្នឹង ដឹងគាត់គេចទៅណា?។ គាត់ថាទៅមុនៗពួកខ្ញុំទៅមុន ងាកមកក្រោយ​អត់​ឃើញ​​បាត់ឈឹង។…ទៅជាមួយសហគមន៍ គាត់ចេញពីភូមិមែន គ្រាន់តែផុតភូមិបកមក​ក្រោយ»

លោក ធិ ឱ្យដឹងថា ដីព្រៃសហគមន៍នេះរងនូវការកាប់ទន្រ្ទានអស់រយៈពេល២ឆ្នាំ​រួចមក​ហើយ។ ក្នុងនោះប្រភេទដើមឈើដែលត្រូវកាប់បំផ្លាញច្រើនជាងគេគឺ ដើមគគីរ បេង និង​នាងនួន។ លោកបន្តថា សហគមន៍លោកធ្លាប់ចាប់ជនសង្ស័យបានចំនួន២លើក និង​ឱ្យ​ធ្វើ​កិច្ចសន្យាបញ្ឈប់សកម្មភាពនេះបន្តទៀត។

លោក ធិ បន្តថា ពលរដ្ឋជនជាតិដើមភាគតិចព្នងជាង១០០គ្រួសារ​បានអាស្រ័យផលលើដីព្រៃ​សហគមន៍នោះ ដែលបានជួយប្រយោជន៍ដល់ពួកគេយ៉ាងសម្បូរបែបរាប់ទាំង ត្រពាំង ផ្សិត និងថ្នាំបុរាណផ្សេងៗ។

លោក ទឺយ ច្រែន ប្រធានសហគមន៍ព្រៃឈើនិងមន្រ្តីឧទ្យានុរក្សអង្គុយលើកំណាត់ឈើ ដែលជនល្មើសកាប់ទុកចោល នៅភូមិពូត្រែង ឃុំដាក់ដាំ ស្រុកអូររាំង ខេត្តមណ្ឌលគិរី។ រូបថតនៅថ្ងៃទី១៦ ខែកុម្ភៈ ឆ្នាំ២០២២។ រូបភាពផ្ដល់ឱ្យ

ដើមបណ្ដឹងម្នាក់ទៀត ​លោក ព្យាន ច្រេន ជាអនុប្រធានសហគមន៌ព្រៃឈើនៅភូមិពូត្រែង  មាន​ប្រសាសន៍ថា ដីព្រៃចំនួន៥ហិកតាក្នុងចំណោម២០ហិកតាត្រូវបានជនល្មើសកាប់​ទន្រ្ទាន។ លោកបន្ថែមថា អស់រយៈពេល២០ថ្ងៃដែលដាក់ពាក្យប្ដឹងប៉ុន្តែលោកពុំទាន់​ទទួល​បានការកោះហៅពីតំណាងអយ្យាការដើម្បីសួរនាំលើករណីនេះនៅឡើយទេ។

លោក​ ច្រេន និយាយថា៖ «[ហេតុអ្វីប្ដឹងតែមន្រ្តីមូលដ្ឋាន]អភិបាលស្រុកអភិបាលខេត្ត​ខ្ញុំអត់​ដឹង​ដែរ។ យើងឃើញតែមេភូមិមេឃុំនៅផ្ទះ យើងហៅគាត់ទៅ គាត់ចុះល្បាតអី គាត់អត់ទៅ។ ទៅ​ពាក់កណ្ដាលផ្លូវគាត់បកត្រឡប់ទៅក្រោយវិញ»។

លោក ក្រាង ផ្លោះ កសិករមួយរូបនៅឃុំដាក់ដាំ ដែលមានដីចម្ការនៅក្បែរតំបន់ព្រៃឈើនោះ និយាយថា លោកធ្លាប់ឃើញជនល្មើសជាង១០នាក់ប្រើពូថៅលួចកាប់ឈើ។ អ្នកលួច​កាប់​ឈើទាំងនោះ មានទាំងអ្នកភូមិ និងអ្នកមកពីចម្ងាយ។ លោកបន្តថា ជនល្មើសបាន​សាង​សង់រោងផ្ទះចំនួន២ខ្នងនៅតំបន់ព្រៃសហគមន៍នោះដើម្បីចាំយាមនិងលក់ឈើឱ្យឈ្មួញ។

លោក ផ្លោះ និយាយថា៖ «គេកាប់ត្រាយផ្លូវ អត់ឱ្យពួកខ្ញុំដើរកជ័រ[ច្បក់]អី។ គេមិនឱ្យកាប់​កន្លែង​ព្រៃត្រណម វាកាប់អស់រលីង។ គេកាប់[ឈើ]ផ្ដួលរលំចោល ទុកចោល ទុកធ្វើស្អីទេ យើងមិនដឹងផង។ ថ្ងៃមុនពួកខ្ញុំឃាត់អាអិច(គ្រឿងចក្រ)គេបាន។​…តែឥឡូវពួកខ្ញុំ​ឃាត់មិន​បានទេ ខ្លាចគេមានអាវុធមានអីទៅ ខ្លាចគេបាញ់។

លោកបន្ថែមថា៖ «នៅព្រៃអាចរកជ័រច្បោះបាន កាប់ចុងផ្ដៅអីនៅកន្លែងណុង រកជ័រ រកបេង កាប់ចុងផ្ដៅយកធ្វើម្ហូប»។

សហគមន៍ព្រៃឈើនេះមានឈ្មោះដើមថា «ច្យារកាប់កេះកាប់ចង់លុង» ស្ថិតនៅភូមិពូត្រែង ឃុំដាក់​ដាំ ស្រុកអូររាំង ខេត្តមណ្ឌលគិរី ដោយមានការទទួលស្គាល់ពី​រដ្ឋបាលថ្នាក់ក្រោម​ជាតិ។

កាលពីថ្ងៃទី២៩ ខែមីនា ឆ្នាំ២០២២ ក្រុមអង្គការសង្គមស៊ីវិល និងសហគមន៍ការពារព្រៃឈើ បានដាក់ញត្តិដោយស្នើឱ្យ​ក្រសួង​បរិស្ថាន​និង​ក្រសួង​កសិកម្មប្ដេជ្ញាចិត្តក្នុងការការពារព្រៃឈើ​និងយកចិត្តទុកដាក់​លើការ​ទប់ស្កាត់​បទ​ល្មើស​ធនធានធម្មជាតិ។

ក្នុងញត្តិនោះ បានឱ្យដឹងថា រយៈពេលពីរទសវត្សរ៍ចុងក្រោយនេះ ស្ថានភាព​គម្រប​ព្រៃឈើ​នៅកម្ពុជាបានបន្តធ្លាក់ចុះយ៉ាងឆាប់រហ័សពីចំនួន៦១,១៥% នៅឆ្នាំ២០០២ មកត្រឹម​៤៦,៨៦% គិតត្រឹមឆ្នាំ២០១៨។ និន្នាការនៃការធ្លាក់ចុះគម្រប​ព្រៃឈើនេះ ជាសញ្ញាមួយ​បង្ហាញថា កម្ពុជា​ទំនងមិនអាចអនុវត្តនៅទិសដៅក្នុងការបង្កើតគម្របព្រៃឈើឡើងវិញឱ្យបាន​៦០% នៃផ្ទៃដី​សរុប​របស់ប្រទេសកម្ពុជាត្រឹមឆ្នាំ២០២៩បានឡើយ។​

កន្លងមកប្រទេសកម្ពុជា ធ្លាប់បរាជ័យក្នុងការលុបបំបាត់នៅភាពក្រីក្រ​របស់ប្រជាពលរដ្ឋ និង​ការធានានិរន្តរភាពបរិស្ថាននិងការថែរក្សា​ឱ្យបាននៅគម្របព្រៃឈើ​៦០%ត្រឹម​ឆ្នាំ២០១៥​ផង​ដែរ​។

អាជ្ញាធរមូលដ្ឋានបានបដិសេធចំពោះការចោទប្រកាន់នេះទាំងស្រុង ដោយពួកគេលើកឡើង​ថា ព្រៃឈើសហគមន៍ទំហំ២០ហិកតានោះពុំមានរងការខូចខាតអ្វីឡើយ។

លោក ជ័យ ចាន់ដារ៉ា មន្រ្តីប៉ូលិសនៅប៉ុស្ដិ៍រដ្ឋបាលឃុំដាក់ដាំ ជាជនសង្ស័យមួយរូប​នៃបណ្ដឹង​របស់ប្រជាសហគមន៍ ថ្លែងថា នៅពេលដែលលោកទៅចូលរួមល្បាតព្រៃជាមួយសហគមន៍ មិន​ធ្លាប់ឃើញមានជនណាម្នាក់កាប់បំផ្លាញព្រៃឈើម្ដងឡើយ។

លោក ចាន់ដារ៉ា ថ្លែងថា៖ «[ប្រជាសហគមន៍]ហៅទៅល្បាតប៉ុន្តែមិនដែលឃើញទេ ធ្លាប់ទៅ​ជាមួយ​គ្នា២ទៅ៣ដងប៉ុន្តែមិនដែលឃើញអ្នកកាប់ព្រៃទេ។ ល្បាតព្រៃ​ទាល់គាត់​(សហគមន៍)​សំណើ បានខ្ញុំទៅ អត់ទៀងទេ ជូនកាលគាត់ស្នើសុំបានចុះទៅ គាត់ឃើញ[កាប់ព្រៃ]​គាត់ស្នើ​ទៅ។

ដោយឡែកចំពោះការចោទប្រកាន់ថាបកត្រឡប់ក្រោយពេលធ្វើដំណើរតាមផ្លូវនៅពេលចុះល្បាត លោក ចាន់ដារ៉ា បញ្ជាក់ថា៖ «ផ្លូវពិបាកពេក ខ្ញុំឈរចាំគាត់ខាងលើ ខ្ញុំថាអត់បានទៅទេ ផ្លូវវាពិបាកជិះ ម៉ូតូខ្ញុំអាសង់(Honda Dream) គាត់ម៉ូតូអាប្រយុទ្ធ(ម៉ូតូកែច្នៃ) យើងយក​អាសង់​០៦​ ទៅរុកដីភក់អត់កើតទ។ យើងអង្គុយចាំគាត់ខាងលើ ឱ្យគាត់ចុះក្រោមទៅ»

មន្រ្តីនគរបាលនៃឃុំដាក់ដាំរូបនេះ បញ្ជាក់ថា ដើមឈើរលំទុកក្នុងព្រៃ ដែលប្រជាសហគមន៍​អះអាងថាត្រូវបានគេលួចកាប់នោះ គឺជាដើមឈើដែលត្រូវបានកាប់ទុកចោលយូរមកហើយ។

លោក ទឺយ ធិ និងអាជ្ញាធរមូលដ្ឋានថតរូបជាមួយគ្នានៅផ្ទះសហគមន៍ ជាទីដែលលោក ធិ ចោទប្រកាន់ថាអាជ្ញាធរមកត្រឹមនេះក៏បកក្រោយវិញ។ រូបថតនៅថ្ងៃទី ១៦ ខែកម្ភៈ ឆ្នាំ២០២២។ រូបភាពផ្ដល់ឱ្យ

លោក ប្លង់ សេង មេភូមិពូត្រែង ឃុំដាក់ដាំ មានប្រសាសន៍ថា លោកពុំទាន់ទទួលដំណឹងថា​ លោកត្រូវបានប្ដឹងដោយប្រជាសហគមន៍ឡើយ។ ក្នុងមួយខែលោកនិង​ប្រជាសហគមន៍​តែង​ចុះសង្កេតមើលព្រៃឈើនៅតំបន់នោះ យ៉ាងហោចណាស់ម្ដង ឬពីរដងតាមការ​ស្នើសុំ​ពី​សហគមន៍។ ក្នុងករណីលោកជាប់រវល់ ក៏ចាត់ឱ្យជំនួយការភូមិចុះល្បាតជំនួសផងដែរ។

លោក សេង លើកឡើងថា៖ «អត់សុខចិត្តទេ ខ្ញុំប្ដឹងបកវិញហើយ។ មើលព្រៃអត់បាន​ខូចខាត​អីផង ២០ហិកតាហ្នឹង ព្រៃនៅតែព្រៃ ដីនៅតែដី»

លោក សេង ហួរ មេប៉ុស្ដិ៍រដ្ឋបាលឃុំដាក់ដាំ ស្រុកអូររាំង យល់ថាប្រជាសហគមន៍​ទំនង​បំភ្លៃការពិតជុំវិញការកាប់ទន្ទ្រានដីព្រៃនៅតំបន់នោះ ដោយលោកសង្កេតឃើញថា ព្រៃ​សហគមន៍​នោះ មានតែអ្នកភូមិជនជាតិដើមភាគតិចមួយចំនួនតូចកាប់ឆ្ការ​ដើម្បីធ្វើ​ចម្ការ​សម្រាប់​ជីវភាព គ្រួសារប៉ុណ្ណោះ ហើយពួកគេទាំងនោះ ជារឿយៗផ្លាស់ប្ដូរដីចម្ការពីមួយតំបន់​ទៅមួយតំបន់ផ្សេងទៀត។ យ៉ាងណា នៅចុងសប្ដាហ៍នេះរូបលោកនឹងចុះទៅពិនិត្យមើល​ទីតាំងព្រៃ​នោះដោយផ្ទាល់។

លោក ហួរ និយាយថា៖ «បងប្អូន(ជនជាតិដើមភាគតិច)គាត់មួយគ្រួសារ​កាប់ទៅបាន​១ហិកតា គាត់ដាំស្រូវ ប្រជាពលរដ្ឋ(ជនជាតិដើមភាគតិច)ណុង ដាំអត់មានដូចយើងធ្វើស្រែទេ​ បើមួយ​ឆ្នាំ​ពីរឆ្នាំ​មិនកើតទៀត គាត់ទុកព្រៃណុងដុះវិញ គាត់ទៅកាប់ឯនោះ កន្លះហិកតាអីទៀត វាបន្ត​ចឹង»។

លោក ស៊ាវ ងីឆាន់ អ្នកនាំពាក្យតំណាងអយ្យការសាលាដំបូងខេត្តមណ្ឌលគិរី មានប្រសាសន៍​ថា តំណាងអយ្យាការនឹងកោះហៅដើមបណ្ដឹងដើម្បីសួរនាំករណីនេះនៅដើមខែក្រោយ។ ចំណែក​ការចោទប្រកាន់ពីបទអ្វី​គឺផ្អែកលើការស៊ើបអង្កេតជាមុនសិនថា​តើជនសង្ស័យ​អាច​ស្ថិតក្រោមបទចោទណាខ្លះ។ លោក ងីឆាន់ បន្តថា ក្នុងសំណុំរឿងដែលលោកកាន់នៅ​ខេត្តមណ្ឌលគិរី មានតែមួយករណីនេះប៉ុណ្ណោះ​ដែលប្រជាសហគមន៍ប្ដឹងអាជ្ញាធរមូលដ្ឋាន​ពាក់ព័ន្ធ​នឹងការមិនទប់ស្កាត់បទល្មើសព្រៃឈើ។

លោក ងីឆាន់ មានប្រសាសន៍ថា៖ «គេកោះដើមបណ្ដឹងឱ្យចូលមកបំភ្លឺ​លើពាក្យបណ្ដឹង​របស់​គាត់សិន សម្រាប់ភាគីពាក់ព័ន្ធគេកោះដែរបន្តបន្ទាប់គ្នា។ តែអ្នកដែលត្រូវចូលមុនគេ​គឺដើម​បណ្ដឹង។…កោះហៅដូចជាដើមខែក្រោយតែខ្ញុំអត់ចាំ[ថ្ងៃណា]ទេ។… បទចោទនៅពេលដែល​យើង​រកឃើញទើបអាចសន្និដ្ឋានបាន»

លោក គ្រើង តុលា មន្រ្តីអង្កេតនៃសមាគមអាដហុកប្រចាំខេត្តមណ្ឌលគិរី ផ្ដល់យោបល់ថា អាជ្ញាធរ​ពាក់ព័ន្ធនិងប្រជាសហគមន៍ គួរចុះទៅល្បាតព្រៃរួមគ្នាដើម្បីឱ្យដឹងច្បាស់ថា​តើមានការ​កាប់​ទន្រ្ទានព្រៃនិងហ៊ុមព័ទ្ធដីដូចការលើកឡើងដែរឬទេ?។

លោក តុលា បន្ថែមថា៖ «ដើម្បីបញ្ចប់នៅការខ្វែងគំនិតគ្នាហ្នឹង គឺអាជ្ញាធរមូលដ្ឋានជាសាមី គាត់គួរតែចុះផ្ទាល់ជាមួយសហគមន៍…សហការជាមួយមន្រ្តីជំនាញ​ចុះជាមួយគ្នា»។  

យោងតាមច្បាប់ស្ដីពីព្រៃឈើ មាត្រា១០០ ឱ្យដឹងថា សកម្មភាពទាំងឡាយណា​ដែល​ធ្វើ​ឡើង​ដោយមន្រ្តីអាជ្ញាធរដែនដី មន្រ្តីនគរបាល មន្រ្តីនៃកងយោធពលខេមរភូមិន្ទ ឬ​មន្រ្តី​អាជ្ញាធរ​ផ្សេង​ទៀត ដើម្បីធ្វើអន្តរាគមន៍ផ្ដល់ការអនុញ្ញាតដោយផ្ទាល់ ឬដោយប្រយោល​ជួយដល់​អាជីវកម្មព្រៃឈើ និងធ្វើសកម្មភាពគ្រប់យ៉ាងផ្ទុយនឹងបទបញ្ញត្តិនៃច្បាប់នេះ ឬធ្វើការ​គំរាម​កំហែងដល់មន្រ្តីរដ្ឋបាលព្រៃឈើ ឬរាំងស្ទះដល់ការបំពេញភារកិច្ច និងកិច្ចប្រតិបត្តិការ​របស់​មន្រ្តី​រដ្ឋបាលព្រៃឈើ ត្រូវចាត់ទុកជាបទល្មើសដែលត្រូវផ្ដន្ទាទោសជាប់ពន្ធនាគារពី១ឆ្នាំ ទៅ៥ឆ្នាំ និងត្រូវផ្ដន្ទាទោសពិន័យជាប្រាក់ចំនួនពី១០លានរៀល ទៅ ១០០លានរៀល៕

609 views

ព័ត៌មានទាក់ទង

ព័ត៌មានថ្មីៗ

អត្ថបទពេញនិយម