រដ្ឋមន្ត្រីការបរទេសកូរ៉េខាងត្បូង លោក Cho Hyun ដែលកំពុងបំពេញទស្សនកិច្ចនៅកម្ពុជាពីថ្ងៃទី៩ ដល់ថ្ងៃទី១១ ខែវិច្ឆិកា មានគោលបំណងពង្រឹងទំនាក់ទំនងទ្វេភាគី និងបង្កើតក្រុមការងាររួមគ្នាជាមួយកម្ពុជា ដើម្បីប្រយុទ្ធប្រឆាំងឧក្រិដ្ឋកម្មទាក់ទងនឹងការឆបោកតាមអនឡាញ។
យោងតាមការបង្ហោះលើទំព័រហ្វេសប៊ុកផ្លូវការរបស់លោកនាយករដ្ឋមន្ត្រី ហ៊ុន ម៉ាណែត កាលពីថ្ងៃទី១០ ខែវិច្ឆិកា មេដឹកនាំទាំងពីរបានពិភាក្សាគ្នាដើម្បីពង្រឹងកិច្ចសហប្រតិបត្តិការទ្វេភាគី។ លោក Cho ក៏បានជួបជាមួយរដ្ឋមន្ត្រីក្រសួងមហាផ្ទៃ លោក ស សុខា ផងដែរ។
ក្រសួងព័ត៌មានបានលើកឡើងនៅថ្ងៃទី១០ ខែវិច្ឆិកាថា លោក ឆៃ ស៊ីណារិទ្ធ ទេសរដ្ឋមន្ត្រីទទួលបន្ទុកបេសកកម្មពិសេស និងជាប្រធានលេខាធិការដ្ឋានគណៈកម្មការចំពោះកិច្ចប្រយុទ្ធប្រឆាំងនឹងការឆបោកតាមប្រព័ន្ធបច្ចេកវិទ្យា បានជួបជាមួយលោក Yoo Jae-Seong អគ្គស្នងការរងនៃទីភ្នាក់ងារប៉ូលិសជាតិកូរ៉េ។
ក្នុងជំនួបនោះ លោក ឆៃ ស៊ីណារិទ្ធ បានប្រាប់លោក Yoo ថា រាជរដ្ឋាភិបាលកម្ពុជាប្តេជ្ញាចិត្តប្រយុទ្ធប្រឆាំងឧក្រិដ្ឋកម្មតាមប្រព័ន្ធអ៊ីនធឺណិត ដោយសង្កត់ធ្ងន់លើសារៈសំខាន់នៃការពង្រីកការស្រាវជ្រាវ ដើម្បីកំណត់អត្តសញ្ញាណមេខ្លោង និងបណ្តាញនៅពីក្រោយប្រតិបត្តិការទាំងនោះ រួមទាំងប្រព័ន្ធហិរញ្ញវត្ថុរបស់ពួកគេផងដែរ។ លោកបានកត់សម្គាល់ថា ការសម្រេចបាននូវគោលដៅនេះទាមទារ «កិច្ចសហប្រតិបត្តិការល្អ ជិតស្និទ្ធនិងប្រកបដោយភាពជឿជាក់ជាមួយបណ្តាភាគី និងដៃគូពាក់ព័ន្ធ»។
លោកក៏បានស្វាគមន៍ចំពោះគំនិតផ្តួចផ្តើមចុះហត្ថលេខាលើអនុស្សរណៈនៃការយោគយល់គ្នា (MoU) ស្តីពីការបង្កើត«ក្រុមការងាររួមកម្ពុជា-កូរ៉េ» ដើម្បីប្រយុទ្ធប្រឆាំងឧក្រិដ្ឋកម្មដែលពាក់ព័ន្ធនឹងពលរដ្ឋកូរ៉េនៅកម្ពុជា។
ការចុះហត្ថលេខានេះធ្វើឡើង បន្ទាប់ពីកិច្ចព្រមព្រៀងរវាងប្រធានាធិបតីកូរ៉េខាងត្បូង លោក Lee Jae-myung និងលោក ហ៊ុន ម៉ាណែត នៅខាងក្រៅកិច្ចប្រជុំកំពូលអាស៊ានក្នុងទីក្រុងកូឡាឡាំពួ កាលពីខែមុន ដើម្បីបង្កើត ក្រុមការងារចំពោះកិច្ចចម្រុះកម្ពុជា-កូរ៉េ ដើម្បីស៊ើបអង្កេត និងបញ្ចប់អំពើឆបោកតាមប្រព័ន្ធអ៊ីនធឺណិត ដែលពាក់ព័ន្ធនឹងជនជាតិកូរ៉េនៅក្នុងប្រទេសកម្ពុជា។
ក្រុមការងារនេះ ត្រូវបានប្រកាសបង្កើតឡើងភ្លាមៗ បន្ទាប់ពីការស្លាប់របស់និស្សិតកូរ៉េខាងត្បូងអាយុ២២ឆ្នាំម្នាក់ នៅក្នុងខេត្តកំពត ដែលត្រូវបានចោទប្រកាន់ថា ត្រូវបានក្រុមឧក្រិដ្ឋជនចិនធ្វើទារុណកម្មរហូតដល់ស្លាប់។
ក្រសួងព័ត៌មានកម្ពុជាបានឱ្យដឹងថា អគ្គស្នងការស្តីទី Yoo បានថ្លែងអំណរគុណដល់អាជ្ញាធរកម្ពុជា ចំពោះកិច្ចខិតខំប្រឹងប្រែងទាន់ពេលវេលាក្នុងការអនុវត្តកិច្ចព្រមព្រៀងដែលធ្វើឡើងដោយថ្នាក់ដឹកនាំរបស់ពួកគេ ដែលឈានទៅដល់ការចុះហត្ថលេខាលើអនុស្សរណៈនៃការយោគយល់គ្នា ស្តីពីការបង្កើតក្រុមការងាររួមកម្ពុជា-កូរ៉េ។
លោកបាននិយាយថា៖ «ក្រុមការងារចម្រុះនេះនឹងក្លាយជានិម្មិតរូបនៃសាមគ្គីភាព និងកិច្ចសហប្រតិបត្តិការរវាងកម្ពុជា-កូរ៉េ ហើយវាក៏ជាការព្រមានយ៉ាងម៉ឺងម៉ាត់ចំពោះក្រុមឧក្រិដ្ឋជន»។
យោងតាមអ្នកនាំពាក្យក្រសួងការបរទេសកូរ៉េខាងត្បូង លោក Lee Jae-woong បានឱ្យដឹងនៅថ្ងៃទី៦ ខែវិច្ឆិកាថា កម្លាំងប្រតិបត្តិការនេះ នឹងជួយជនជាតិកូរ៉េដោះស្រាយបញ្ហាទាក់ទងនឹងឧក្រិដ្ឋកម្មឆបោកនៅកម្ពុជាយ៉ាងសំខាន់។
ទន្ទឹមនឹងនេះ នៅក្នុងការបង្ហោះលើហ្វេសប៊ុករបស់ខ្លួន លោក ហ៊ុន ម៉ាណែត បានឱ្យដឹងថា ប្រទេសទាំងពីរបានព្រមព្រៀងគ្នាពង្រឹងកិច្ចសហប្រតិបត្តិការក្នុងវិស័យសេដ្ឋកិច្ច វិនិយោគ ពាណិជ្ជកម្ម ការពារជាតិ សន្តិសុខ ឧស្សាហកម្ម និងទេសចរណ៍ ហើយកម្ពុជានឹងធានាសុវត្ថិភាព និងសុខុមាលភាពរបស់ពលរដ្ឋកូរ៉េដែលកំពុងរស់នៅ និងធ្វើការនៅក្នុងប្រទេសកម្ពុជា។
រដ្ឋាភិបាលកូរ៉េខាងត្បូងប៉ាន់ប្រមាណថា ប្រជាជនរបស់ខ្លួនប្រមាណ ១ ០០០ នាក់ មានទំនាក់ទំនងជាមួយសកម្មភាពឆបោកដែលបានរៀបចំឡើងនៅក្នុងប្រទេសកម្ពុជា។ ប្រតិបត្តិការជាច្រើនក្នុងចំណោមប្រតិបត្តិការទាំងនេះ ត្រូវបានគេជឿថាមានមូលដ្ឋាននៅក្នុងទីតាំងដែលគ្រប់គ្រងដោយបណ្តាញជនជាតិចិន ដែលជាផ្នែកមួយនៃប្រព័ន្ធឧក្រិដ្ឋកម្មក្នុងតំបន់ដ៏ធំ ដែលត្រូវបានគេរាយការណ៍ថា បានជួញដូរមនុស្សប្រមាណ ១៥០ ០០០ នាក់ មកពីប្រទេសជាច្រើន។
រដ្ឋាភិបាលកូរ៉េខាងត្បូងបានទទួលបានសេចក្តីរាយការណ៍ចំនួន ៣៨៦ ករណី ពាក់ព័ន្ធនឹងការចាប់ជំរិត ឬឃុំឃាំងពលរដ្ឋរបស់ខ្លួននៅក្នុងប្រទេសកម្ពុជា នេះបើយោងតាមរដ្ឋមន្ត្រី Cho ដោយដកស្រង់តួលេខពីកំណត់ត្រារបស់ពួកគេកាលពីខែកញ្ញា។ កាលពីថ្ងៃទី១៨ ខែតុលា អាជ្ញាធរកម្ពុជាបានបណ្តេញជនជាតិកូរ៉េខាងត្បូងចំនួន ៦៤ នាក់ ដែលត្រូវបានចោទប្រកាន់ពីបទជាប់ពាក់ព័ន្ធនឹងប្រតិបត្តិការឆបោកតាមប្រព័ន្ធអ៊ីនធឺណិត។ ការធ្វើមាតុភូមិនិវត្តន៍នេះធ្វើឡើងបន្ទាប់ពីការបញ្ជូនក្រុមឆ្លើយតបរបស់កូរ៉េខាងត្បូង ដើម្បីជួយពលរដ្ឋរបស់ខ្លួនដែលជាប់នៅក្នុងទីតាំងឆបោកនានាក្នុងប្រទេសកម្ពុជា។ ក្នុងចំណោមអ្នកដែលត្រូវបានបញ្ជូនត្រឡប់ទៅវិញទាំងនោះ មាន៥៩នាក់ត្រូវបានឃុំខ្លួន បន្ទាប់ពីការបង្ក្រាបរបស់សមត្ថកិច្ចកម្ពុជា ខណៈដែលអ្នកផ្សេងទៀតត្រូវបានជួយសង្គ្រោះបន្ទាប់ពីស្វែងរកជំនួយ៕
ប្រែសម្រួលពីអត្ថបទភាសាអង់គ្លេស៖ Cambodia and South Korea Sign MoU on Online Scam Joint Task Force
