កម្ពុជាបានដាក់លិខិតផ្លូវការទៅកាន់តុលាការយុត្តិធម៌អន្តរជាតិ (ICJ) ហើយនៅថ្ងៃនេះ ដើម្បីស្វែងរកដំណោះស្រាយជម្លោះព្រំដែនជាមួយភាគីថៃនៅតំបន់ប្រសាទបុរាណមួយចំនួន និងតំបន់មុំបី ទោះបើប្រទេសទាំងពីរកំពុងបន្តជជែកគ្នាតាមរយៈគណៈកម្មការព្រំដែនចម្រុះនៅភ្នំពេញក៏ដោយ។
ការបញ្ជូនលិខិតផ្លូវការទៅតុលាការយុត្តិធម៌អន្តរជាតិរួមបញ្ចូលប្រាសាទតាមាន់ធំ ប្រាសាទតាមាន់តូច ប្រាសាទតាក្របី និងតំបន់មុំបី។
លោកនាយករដ្ឋមន្ត្រីហ៊ុន ម៉ាណែត សរសេរលើទំព័រហ្វេសប៊ុករបស់លោកថា៖ «កម្ពុជាត្រូវការតែយុត្តិធម៌ ភាពត្រឹមត្រូវ និងច្បាស់លាស់មួយ ក្នុងការកំណត់ខ្សែព្រំដែនជាមួយប្រទេសជិតខាង ដើម្បីកុំឲ្យកូនចៅជំនាន់ក្រោយនៅបន្តមានបញ្ហាមិនចេះចប់ជាមួយគ្នា»។
ការដាក់ពាក្យបណ្ដឹងនេះកើតឡើងចំពេលដែល គណៈកម្មការព្រំដែនចម្រុះ (JBC) កម្ពុជាថៃកំពុងជួបប្រជុំនៅទីក្រុងភ្នំពេញនៅចុងសប្ដាហ៍នេះ ក្រោយពីមានការប៉ះទង្គិចនៅព្រំដែនដែលបណ្ដាលឲ្យទាហានកម្ពុជាម្នាក់ពលី ហើយស្ថានភាពនៅតាមព្រំដែននៅតែមានសភាពតានតឹង។
យ៉ាងណា លោកនាយករដ្ឋមន្ត្រី ហ៊ុន ម៉ាណែត បានបញ្ជាក់ថាតំបន់ជម្លោះមិនបានដាក់ចូលក្នុងរបៀបវារៈកិច្ចពិភាក្សានៃកិច្ចប្រជុំគណៈកម្មការព្រំដែនចម្រុះទេ ដោយថាបញ្ហាទាំងនោះបានដាក់ទៅកាន់តុលាការយុត្តិធម៌អន្តរជាតិហើយ។ លោកសង្កត់ធ្ងន់ថា គណៈកម្មការព្រំដែនចម្រុះក៏នឹងមិនពិភាក្សាបញ្ហាតានតឹងនៃការបិទបើកច្រកព្រំដែន ពីព្រោះភាគីថៃបិទដោយឯកតោភាគី ។
ការបញ្ជូនលិខិតផ្លូវការទៅកាន់តុលាការយុត្តិធម៌អន្តរជាតិនេះកើតមានចំពេលដែលស្ថានភាពនៅព្រំដែនមានភាពតានតឹង ក្រោយពីមានការប៉ះទង្គិចគ្នានៅជិតតំបន់ជម្លោះ និងបានបណ្ដាលឲ្យទាហានកម្ពុជាម្នាក់ពលី។ ទោះបីប្រទេសទាំងពីរបានជំរុញឲ្យមានដំណោះស្រាយតាមផ្លូវការទូត ក៏ប្រទេសថៃបានកាត់បន្ថយម៉ោងចេញចូលតាមច្រកព្រំដែនមួយចំនួនដែរកាលពីថ្ងៃសៅរ៍សប្តាហ៍មុន។
អ្វីដែលគួរឲ្យកត់សម្គាល់ ការដាក់លិខិតទៅតុលាការយុត្តិធម៌អន្តរជាតិនេះធ្វើឡើងចំខួប៦៣ឆ្នាំដែលកម្ពុជាបានឈ្នះក្ដីសំណុំរឿងប្រាសាទព្រះវិហារ និងតំបន់ជុំវិញប្រាសាទព្រះវិហារជាមួយថៃកាលពីឆ្នាំ១៩៦២។ លោកនាយករដ្ឋមន្ត្រីបានលើកឡើងថាកម្ពុជាជ្រើសរើសយកវិធីនេះ គឺបង្ហាញថាកម្ពុជាតាំងចិត្តស្វែងរកការដោះស្រាយជម្លោះដោយសន្ដិវិធី និងផ្អែកទៅតាមច្បាប់អន្តរជាតិ។
លោកបន្ថែមថា៖ «សូមបងប្អូនជនរួមជាតិទាំងអស់ ផ្ដល់ការទុកចិត្តមកលើរាជរដ្ឋាភិបាល ក្នុងការខិតខំប្រឹងប្រែងធ្វើកិច្ចការងារនេះប្រកបដោយឆន្ទៈនិងការទទួលខុសត្រូវខ្ពស់ ដើម្បីការពារបូរណភាពទឹកដី និងឧត្តមប្រយោជន៍របស់ជាតិនិងប្រជាជនកម្ពុជា»។
ប្រែសម្រួលពីអត្ថបទភាសាអង់គ្លេស៖ Cambodia Files Border Case with ICJ Amid JBC Meeting in Phnom Penh
