ពិន្ទុសន្ទស្សន៍អំពើពុករលួយនៅកម្ពុជាសម្រាប់ឆ្នាំ២០២២ បានល្អប្រសើរជាងឆ្នាំកន្លងទៅបន្តិច នេះបើតាមសេចក្ដីប្រកាសព័ត៌មានរបស់អង្គការតម្លាភាពកម្ពុជា ប៉ុន្តែថាកម្ពុជានៅតែស្ថិតក្នុងប្រទេសដែលមានអំពើពុករលួយខ្លាំងក្នុងសកលលោកដដែល។
កម្ពុជាបានពិន្ទុ២៤លើ១០០ ក្នុងតារាងសន្ទស្សន៍អំពើពុករលួយ(CPI) ដែលនេះមានន័យថាកម្ពុជាបានពិន្ទុល្អប្រសើរជាងឆ្នាំកន្លងទៅបន្តិច ដែលកាលនោះបានត្រឹម២៣លើ១០០។ ទោះយ៉ាងណាផ្អែកតាមពិន្ទុកនេះ កម្ពុជានៅតែស្ថិតក្នុងប្រទេសដែលមានអំពើពុករលួយខ្លាំងប្រចាំអាស៊ីប៉ាស៊ីហ្វិក គឺនៅកម្រិតទាបជាងគេទីបី ដោយមានតែមីយ៉ាន់ម៉ា លេខរៀងទី១៥៧ និងកូរ៉េខាងជើងនៅលេខរៀងទី១៧១ នៅក្រោមកម្ពុជា។ កម្ពុជាឈរនៅលេខរៀងទី១៥០ លើប្រទេស និងដែនដីសរុប១៨០នៅទូទាំងពិភពលោកសម្រាប់សន្ទស្សន៍ឆ្នាំ២០២២ តែបើធៀបទៅនឹងឆ្នាំកន្លងទៅកម្ពុជាបានឈរនៅលេខរៀងទី១៥៧។ យ៉ាងណា កម្ពុជាក៏បានបង្ហាញពីភាពល្អប្រសើររបស់ខ្លួននារយៈពេលប្រាំឆ្នាំកន្លងមកនេះ ដោយងើបពីពិន្ទុ២០នៅឆ្នាំ២០១៨ មកដល់២៤សម្រាប់ឆ្នាំ២០២២។
លោក ប៉ិច ពិសី នាយកប្រតិបត្តិអង្គការតម្លាភាពកម្ពុជា មានប្រសាសន៍ថាអំពើពុករលួយជាប្រព័ន្ធនៅតែកើតមានដែលនេះជាបញ្ហាធ្វើឱ្យប្រជាធិបតេយ្យរេចរឹល។ លោកកត់សម្គាល់ឃើញថាកម្ពុជាបានរឹតត្បិតលើសិទ្ធិជាមូលដ្ឋានមួយចំនួន ដូចជាធ្វើឱ្យបាត់បង់នូវសេរីភាពនៃការបញ្ចេញមតិ និងអំពើពុករលួយក្នុងប្រព័ន្ធយុត្តិធម៌។
លោកលើកឡើងថា៖ «បើសិនជាយើងមើលលើវិស័យសេដ្ឋកិច្ច យើងគឺល្អប្រសើរ ប៉ុន្តែបើយើងមើលលើដំណើរការប្រជាធិបតេយ្យ នីតិរដ្ឋ និងការរំលោភអំណាច គឺនៅតែជាបញ្ហា»។ លោកបន្ថែមថា៖ «ខ្ញុំសង្កត់ធ្ងន់លើអំពើពុករលួយជាប្រព័ន្ធដែលមានទ្រង់ទ្រាយធំ ជាពិសេសគឺការជំពាក់ជំពិនគ្នាជាបណ្ដាញរវាងអ្នកមានអំណាច និងអ្នករកស៊ី ដែលបានបំពានអំណាចដើម្បីប្រយោជន៍ផ្ទាល់ខ្លួន»។
លោកបន្តថា៖ «អំពើពុករលួយប្រភេទនេះ គឺយើងឃើញថាមិនទាន់មានការប្រែប្រួលជាវិជ្ជមានច្រើនទេ ហើយវាក៏ជាបញ្ហាចម្បងរាំងស្ទះដល់ការអភិវឌ្ឍនៅកម្ពុជា»។
សន្ទស្សន៍អំពើពុករលួយនេះធ្វើឡើងដោយផ្អែកលើទិន្ន័យបានពីស្ថាប័នអន្តរជាតិចំនួនប្រាំបី រួមទាំងធនាគារពិភពលោកផងដែរ។
បណ្ដាប្រទេសនៅតំបន់អាស៊ាន ប្រទេសមីយ៉ាន់ម៉ាក្រោយមានព្រឹត្តិការណ៍រដ្ឋប្រហារយោធា ពិន្ទុក្នុងសន្ទស្សន៍បានធ្លាក់ចុះពី២៨ មក២៣ធៀបនឹងឆ្នាំកន្លងទៅ ដែលធ្វើឱ្យប្រទេសនេះក្លាយជាប្រទេសមានអំពើពុករលួយខ្លាំងជាងគេនៅតំបន់អាស៊ាន។
ទន្ទឹមនឹងនេះប្រទេសសិង្ហបុរី ជាប់ក្នុងប្រទេសលំដាប់ខ្ពស់ទាំងប្រាំដែលមានអំពើពុករលួយតិចតួចលើពិភពលោក។
សម្រាប់ប្រទេសឥណ្ឌូណេស៊ីធ្លាក់ពិន្ទុពី៣៨មក៣៤ ហើយប្រទេសម៉ាឡេស៊ីធ្លាក់ពិន្ទុពី៤៨ មក៤៧។ ដោយឡែកប្រទេសថៃវិញបានពិន្ទុល្អប្រសើរដែរដោយឡើងពី៣៥ទៅ៣៦ និងឡាវឡើងពី៣០ទៅ៣១ ហើយប្រទេសហ្វីលីពីនវិញនៅរក្សាពិន្ទុដដែលគឺ៣៣។
អ្នកនាំពាក្យក្រសួងយុត្តិធម៌លោក ជិន ម៉ាលីន មានប្រសាសន៍ថាគ្មានទេអំពើពុករលួយក្នុងប្រព័ន្ធយុត្តិធម៌ ដោយលោកថារដ្ឋមន្ត្រីក្រសួងយុត្តិធម៌មានគោលនយោបាយច្បាស់លាស់ប្រឆាំងនឹងអំពើពុករលួយ ដោយរួមទាំងបានធ្វើកិច្ចសហការជាមួយអង្គភាពប្រឆាំងអំពើពុករលួយផងដែរ។
លោក ម៉ាលីន ឱ្យដឹងថា៖ «យើងបានអនុវត្ត[គោលនយោបាយ]ជាបន្តបន្ទាប់លើមន្ត្រីយុត្តិធម៌ដែលបានប្រព្រឹត្តអំពើពុករលួយ ពួកគេនឹងត្រូវទទួលខុសត្រូវចំពោះមុខច្បាប់ និងទោសទណ្ឌ»។ លោកបន្ថែមថា៖ «យើងមានយន្តការសម្រាប់ប្រឆាំងអំពើពុករលួយ បើសិនជាមានភស្តុតាងច្បាស់លាស់បង្ហាញថាមន្ត្រីប្រព្រឹត្តអំពើពុករលួយ[សាធារណជន] អាចរាយការណ៍ ហើយស្ថាប័នទទួលខុសត្រូវនឹងចាត់វិធានការ»។
ប្រធានអង្គភាពប្រឆាំងអំពើពុករលួយ លោក ឱម យ៉ិនទៀង បដិសេធធ្វើអត្ថាធិប្បាយលើរឿងនេះ៕
ប្រែសម្រួលពីអត្ថបទភាសាអង់គ្លេស៖ Cambodia Perceived as Highly Corrupt, Despite Incremental Improvement
