ខណៈពេលដែលប្រទេសចិនបើកព្រំដែនរបស់ខ្លួនឡើងវិញ ដោយដកចេញនូវលក្ខខណ្ឌធ្វើចត្តាឡីស័ក និងការធ្វើតេស្តសម្រាប់អ្នកដំណើរត្រឡប់មកវិញ រដ្ឋាភិបាលកម្ពុជាបាន និយាយថា ខ្លួនត្រៀមជាស្រេចក្នុងការស្វាគមន៍ភ្ញៀវទេសចរ និងវិនិយោគិនចិនមកវិញ ខណៈអង្គការសិទ្ធិមនុស្សបានទទូចឱ្យរដ្ឋាភិបាលធ្វើការងារបន្ថែមទៀត ដើម្បីទប់ស្កាត់ឧក្រិដ្ឋកម្មឆ្លងដែន។
នៅក្នុងសេចក្តីប្រកាសព័ត៌មានដែលបានចេញផ្សាយកាលពីថ្ងៃទី៥ ខែមករា ក្រសួងទេសចរណ៍បានអះអាងថា កម្ពុជាត្រៀមខ្លួនជាស្រេច ដើម្បីស្វាគមន៍ភ្ញៀវទេសចរចិនរាប់លាននាក់ បន្ទាប់ពីទីក្រុងប៉េកាំងថ្មីៗនេះបាន ដកបំរាមលើការរឹតត្បិតកូវីដ ១៩។
ក្រសួងបានអះអាងថា៖ «កម្ពុជាមានសេចក្តីរីករាយទទួលស្វាគមន៍ទេសចរចិនមកទស្សនាកម្ពុជា ដោយឥតលក្ខខណ្ឌផ្នែកសុខាភិបាល។ សូមអំពាវនាវឲ្យគ្រប់ភាគីពាក់ព័ន្ធបន្តជំរុញការបង្កើតព្រឹត្តិការណ៍ទេសចរណ៍ទាំងក្នុងប្រទេសកម្ពុជា និងចិន និងដើម្បីផ្តល់សេវាកម្មកាន់តែប្រសើរ និងបដិសណ្ឋារកិច្ចប្រកបដោយភាពកក់ក្តៅដល់ទេសចរចិន»។
ជំងឺរាតត្បាតបានជះឥទ្ធិពលដល់ឧស្សាហកម្មទេសចរណ៍របស់កម្ពុជា ប៉ុន្តែចំពោះភ្ញៀវចិន ដែលគោលនយោបាយទប់ស្កាត់ជំងឺ កូវីដ-១៩ ដ៏តឹងរ៉ឹងរបស់រដ្ឋាភិបាលបានធ្វើឱ្យការធ្វើ ដំណើរពិបាកយ៉ាងខ្លាំង។ ក្នុងឆ្នាំ២០១៩ កម្ពុជាទទួលបានទេសចរចិនចំនួន ២,៣ លាននាក់ ដែលរកចំណូលបានប្រហែល១,៨ពាន់លានដុល្លារ។ ទោះបីជាយ៉ាងណាក្នុងចំណោមភ្ញៀវទេសចរអន្តរជាតិ១,៩លាននាក់ដែលបានមកនៅចន្លោះខែមករាដល់ខែវិច្ឆិកាឆ្នាំ២០២២ ទេសចរចិនដីគោកមានចំនួនត្រឹមតែ៩០ ៦៤៨នាក់ប៉ុណ្ណោះ។
លោក ធួន ស៊ីណាន ប្រធានទីភ្នាក់ងារទេសចរណ៍ក្នុងស្រុក Pacific Asia Travel Association Cambodia Chapter បាននិយាយថា ការបើកដំណើរការឡើងវិញរបស់ប្រទេសចិន គឺជាសញ្ញាវិជ្ជមានសម្រាប់សេដ្ឋកិច្ចសកល ជាពិសេសវិស័យទេសចរណ៍។
លោកបាននិយាយថា៖ «ខ្ញុំជឿជាក់ថា ផ្អែកលើទំនាក់ទំនងរវាងប្រទេសទាំងពីរ ប្រទេសចិននឹងជួយជំរុញចំនួនភ្ញៀវទេសចរចិនមកកម្ពុជា»។
លោក ស៊ីណាន បាននិយាយថា លោករំពឹងថា ការវិលត្រឡប់មកវិញនៃទេសចរចិននឹងផ្តល់អត្ថប្រយោជន៍ដ៏ធំធេងដល់សេដ្ឋកិច្ច។
លោកបាននិយាយថា៖ «ជនជាតិចិនចំណាយប្រាក់ច្រើន បើធៀបនឹងភ្ញៀវទេសចរបរទេសផ្សេងទៀត ហើយជនជាតិចិនប្រើប្រាស់គ្រប់សេវាកម្មទាំងក្នុងស្រុក និងបរទេស» ដោយបន្ថែមថា ភ្ញៀវទេសចរមកពីប្រទេសផ្សេងតែងតែនាំមគ្គុទ្ទេសក៍ផ្ទាល់របស់ខ្លួន។
មន្ត្រីក្រសួងទេសចរណ៍បាននិយាយថា ប្រទេសកម្ពុជាបានដាក់ចេញនូវកម្មវិធីមួយចំនួន ដើម្បីទាក់ទាញទេសចរចិន ដែលជាផ្នែកនៃយុទ្ធសាស្ត្រ «China Ready» យូរអង្វែងរបស់ខ្លួន។ កម្មវិធីទាំងនេះរួមមានការបង្កើនជំនាញភាសាចិនក្នុងចំណោមមគ្គុទ្ទេសក៍ទេសចរណ៍ ការគាំទ្រហេដ្ឋារចនាសម្ព័ន្ធទេសចរណ៍ និងការកែលម្អគុណភាពសេវាកម្មទេសចរណ៍។
លោក តាំង សុជាតិគ្រឹស្នា ប្រធានមន្ទីរទេសចរណ៍ខេត្តព្រះសីហនុមានប្រសាសន៍ថា ខណៈពេលនៅមិនទាន់មានសញ្ញានៃការកើនឡើងនៃវិស័យទេសចរណ៍នោះ លោកជឿជាក់ថា ការវិលត្រឡប់មកវិញនឹងចាប់ផ្តើមជាបណ្តើរៗចាប់ពីខែក្រោយ។
លោកបានមានប្រសាសន៍ថា៖ «ក្រសួងកំពុងចរចា ដើម្បីភ្ជាប់ជើងហោះហើរឡើងវិញ ប៉ុន្តែខ្ញុំមិនគិតថា នឹងមានលំហូរចូលច្រើនដូចកាលពីប៉ុន្មានឆ្នាំមុននោះទេ»។
លោក គ្រឹស្នា បានមានប្រសាសន៍ថា មុនពេលផ្ទុះជំងឺកូវីដ-១៩ ក្រុមហ៊ុនអាកាសចរណ៍ចិន ចំនួន១២បានហោះត្រង់មកកាន់ខេត្តព្រះសីហនុ ដោយក្នុងមួយថ្ងៃមានជើងហោះហើរចំនួន៣៥មកដល់ពីទីក្រុងចំនួន២៦នៃប្រទេសចិន។ ប៉ុន្តែខណៈដែលក្រុមហ៊ុនទេសចរណ៍ត្រៀមខ្លួនយ៉ាងអន្ទះសារសម្រាប់ការវិលត្រឡប់របស់ភ្ញៀវទេសចរ អ្នកសង្កេតការណ៍សង្គមបានទទូចឱ្យរដ្ឋាភិបាលដាក់វិធានការឱ្យកាន់តែប្រសើរជាងមុន ដើម្បីទប់ស្កាត់ការកើនឡើងនៃបទឧក្រិដ្ឋ។
ជាក់ស្តែង ការហូរចូលដ៏គំហុកនៃប្រាក់ចិន និងការអភិវឌ្ឍក្នុងក្រុងព្រះសីហនុ ក៏នាំមកនូវការកើនឡើងនៃឧក្រិដ្ឋកម្មឆ្លងដែនផងដែរ ដោយមានមន្ត្រីមូលដ្ឋានធ្វើសកម្មភាពតិចតួចក្នុងការបង្រ្កាបការជួញដូរមនុស្ស និងទីតាំងឆបោកដែលដឹកនាំដោយក្រុមឧក្រិដ្ឋជនដែលមានការចាត់តាំង។
លោក ប៉ិច ពិសី នាយកប្រតិបត្តិនៃអង្គការតម្លាភាពកម្ពុជាមានប្រសាសន៍ថា ខណៈពេលដែលការវិលត្រឡប់របស់ជនជាតិចិននឹងផ្តល់ផលប្រយោជន៍សេដ្ឋកិច្ចតាមរយៈការជំរុញវិស័យទេសចរណ៍ គម្រោងសាងសង់ និងការបណ្តាក់ទុនលើវិស័យអចលនទ្រព្យ រដ្ឋាភិបាលត្រូវតែតាមដានឲ្យបានដិតដល់នូវសកម្មភាពខុសច្បាប់។
លោកបានបន្តថា៖ «យើងមើលឃើញថា [ឧក្រិដ្ឋកម្ម] ភាគច្រើនជាប់ពាក់ព័ន្ធនឹងការហូរចូលនៃជនជាតិចិន ដែលជាប់ពាក់ព័ន្ធនឹងការលេងល្បែង ការជួញដូរខុសច្បាប់ និងការឆបោក»។
លោក ពិសី បានមានប្រសាសន៍ថា រដ្ឋាភិបាលគួរតែពង្រឹងការអនុវត្តច្បាប់អន្តោប្រវេសន៍របស់ខ្លួន និងតាមដានភ្ញៀវមកដល់ឱ្យកាន់តែប្រសើរឡើង ដើម្បីធានាថាអ្នកដែលមក គឺមកសម្រាប់គោលបំណងទេសចរណ៍ឬអាជីវកម្មស្របច្បាប់។
លោកបានមានប្រសាសន៍ថា៖ «ការធ្វើបែបនេះនឹងធានាថា ពួកគេធ្វើអាជីវកម្មដោយស្របច្បាប់ដោយមិនប្រព្រឹត្តបទល្មើស ដូចជាការលាងលុយកខ្វក់ ការជួញដូរមនុស្សឬការជួញដូរគ្រឿងញៀន»។
របាយការណ៍ដែលចេញដោយអង្គការសិទ្ធិការងារសង់ត្រាល់កាលពីឆ្នាំមុនបង្ហាញថាល្បែង អនឡាញនៅខេត្តព្រះសីហនុបានបន្តកើតមាន បើទោះបីជាត្រូវបានហាមឃាត់នៅឆ្នាំ២០១៩ ក៏ដោយ ដោយផ្លាស់ប្តូរប្រតិបត្តិការរបស់ខ្លួនក្រោមគំរូអាជីវកម្មផ្សេងទៀតដូចជាតាមទីតាំងអចលនទ្រព្យ និងបច្ចេកវិទ្យាជាដើម។
ក្នុងរយៈពេលពីរឆ្នាំចុងក្រោយនេះ ជនជាតិចិនរាប់រយនាក់ និងពលករបរទេសផ្សេងទៀតដែលត្រូវបានជួញដូរ និងបង្ខំឱ្យធ្វើការជាអ្នកឆបោកឬនៅក្នុងឧស្សាហកម្មហ្គេមខុសច្បាប់ត្រូវបានរកឃើញថា ត្រូវបានចាប់បង្ខាំងនៅក្នុងទីតាំងអគារធំៗដែលដំណើរការដោយបណ្តាញឧក្រិដ្ឋជនចិន។
លោក សន ជ័យ នាយកប្រតិបត្តិនៃអង្គការសម្ព័ន្ធគណនេយ្យភាពសង្គមមានប្រសាសន៍ថា រដ្ឋាភិបាលត្រូវតែធ្វើឱ្យប្រាកដថា ច្បាប់ត្រូវបានអនុវត្តយ៉ាងតឹងរ៉ឹង។
លោកមានប្រសាសន៍ថា៖ «កន្លងមក យើងឃើញជនជាតិចិនជាច្រើនត្រូវបានសមត្ថកិច្ចបង្ក្រាបដោយសារពួកគេបង្កើត [ល្បែងស៊ីសង] ខុសច្បាប់និងជំរិតទារប្រាក់តាមប្រព័ន្ធអ៊ីនធឺណិត»។
លោក សន ជ័យ មានប្រសាសន៍ថា រដ្ឋាភិបាលត្រូវតែធានាថា ជនជាតិចិនទាំងអស់ដែលមកធ្វើអាជីវកម្មនៅកម្ពុជា គឺស្របច្បាប់ ហើយការធ្វើបែបនេះនឹងអាចបង្កើនចំណូលពន្ធបន្ថែមទៀត។
លោកបានបន្តថា៖ «នៅពេលពួកគេអនុវត្តតាមច្បាប់ និងមានការចុះបញ្ជីអាជីវកម្មរបស់ខ្លួនបានត្រឹមត្រូវ វានឹងជាអត្ថប្រយោជន៍សម្រាប់ចំណូលពន្ធរបស់ប្រទេសកម្ពុជា»។
លោក ខៀវ សុភ័គ អ្នកនាំពាក្យក្រសួងមហាផ្ទៃបាននិយាយសម្រាលការព្រួយបារម្ភដោយអះអាងថា អាជ្ញាធរបាននិងកំពុងពង្រឹងសន្តិសុខសង្គម។
លោកមានប្រសាសន៍ថា៖ «ប្រសិនបើរកឃើញថា មានការប្រព្រឹត្តបទល្មើសនោះអាជ្ញាធរនឹងចុះទៅដល់ទីតាំង។ អាជ្ញាធរបន្តល្បាតជារៀងរាល់ថ្ងៃ ហើយនឹងបន្តល្បាតបន្ថែមទៀត ដើម្បីរកអន្តោប្រវេសន៍ខុសច្បាប់»។
លោក កែវ វណ្ណថន អ្នកនាំពាក្យអគ្គនាយកដ្ឋានអន្តោប្រវេសន៍នៃក្រសួងមហាផ្ទៃបានមានប្រសាសន៍ថា អគ្គនាយកដ្ឋានបានត្រៀមធ្វើការត្រួតពិនិត្យអន្តោប្រវេសន៍ ខណៈភ្ញៀវទេសចរនិងវិនិយោគិនចិនត្រឡប់មកវិញ។
លោកបានមានប្រសាសន៍ថា៖ «[យើង] ក៏ចាត់វិធានការត្រួតពិនិត្យកន្លែងស្នាក់នៅរបស់ជនបរទេសជាប្រចាំ ដើម្បីតាមប្រមាញ់អ្នកដែលបានចូលប្រទេសដោយខុសច្បាប់ និងនិរទេសពួកគេចេញពីប្រទេសកម្ពុជា» ប៉ុន្តែលោកបានបន្ថែមថាលទ្ធភាពនៃការឆ្លងព្រំដែនខុសច្បាប់អាចធ្វើឱ្យការត្រួតពិនិត្យជួបការលំបាក។
លោកបានមានប្រសាសន៍ថា៖ «ដោយសារព្រំដែនវែង ជនល្មើសតែងតែគេចពីការត្រួតពិនិត្យរបស់អាជ្ញាធរ»៕
ប្រែសម្រួលពីអត្ថបទភាសាអង់គ្លេស ៖ Cambodia Prepares for the Return of Chinese Tourists and Visitors
