ក្រសួងសុខាភិបាលបានចេញរបាយការណ៍មួយដោយបង្ហាញថា មានករណីឆ្លងវីរុសបំប្លែងថ្មីដែលតា (Delta) ជិត ១.០០០ករណី ត្រូវបានរកឃើញនៅទូទាំងប្រទេសកម្ពុជាចាប់តាំងពីចុងខែមីនាកន្លងមក។
របាយការណ៍ដែលត្រូវបានចុះផ្សាយដោយក្រសួងសុខាភិបាលបង្ហាញថា គិតត្រឹមថ្ងៃទី២២ ខែសីហា កម្ពុជាបានរកឃើញករណីឆ្លងវីរុសបំប្លែងថ្មីដែលតា សរុបចំនួន៩៩៩ករណី ដែលក្នុងនោះស្រ្តីមានចំនួន ៤៩០នាក់ ចាប់តាំងពីថ្ងៃទី៣១ ខែមីនាមក។ ហើយគ្រប់ខេត្តមានករណីឆ្លងវីរុសប្រភេទនេះ លើកលែងតែខេត្តកែប និងក្រចេះ។
ករណីឆ្លងវីរុសបំប្លែងថ្មីដែលតាត្រូវបានរកឃើញភាគច្រើននៅក្រុងភ្នំពេញ ដែលឃើញមានការឆ្លងចំនួន ២៣៨ករណី។ ខេត្តឧត្តរមានជ័យឆ្លងចំនួន ១៧៦ករណី បន្ទាយមានជ័យឆ្លងចំនួន ១៤៦ករណី និងសៀមរាបឆ្លងវីរុសនេះចំនួន ១៣៨ករណី។
លោក រឿន សុទ្ធី អនុប្រធានមន្ទីរសុខាភិបាលខេត្តបន្ទាយមានជ័យ បានបានប្រាប់ខេមបូចាថា ករណីឆ្លងសរុប១៤៦ករណី ប៉ុន្តែមិនមែនរាប់បញ្ជូលគ្រប់ករណីឆ្លងវីរុសប្រភេទដែលតានោះទេ គឺផ្តោតលើតែចំនួនសំណាក ដែលត្រូវបានបញ្ជូនទៅវិទ្យាស្ថានប៉ាស្ទើក្នុងក្រុងភ្នំពេញ ដើម្បីធ្វើតេស្តរកវីរុសប្រភេទថ្មីនេះតែប៉ុណ្ណោះ។
យុវជនចំនួនជាង ៦០០នាក់ ដែលកំពុងទទួលការព្យាបាលការញៀនថ្នាំនៅមជ្ឈមណ្ឌល«ជីវិតថ្មី» ភ្នំបាក់ ក្នុងក្រុងសេរីសោភ័ណ ខេត្តបន្ទាយមានជ័យ បានធ្វើតេស្តវិជ្ជមានជំងឺកូវីដ១៩ ចាប់តាំងពីថ្ងៃទី១៦ ខែសីហាមក ហើយមនុស្ស១០ទៀតត្រូវបានធ្វើតេស្តវិជ្ជមានកាលពីថ្ងៃទី២២ ខែសីហា។ នៅក្នុងចំណោមសំណាកចំនួន ២០ពីមជ្ឈមណ្ឌលខាងលើនេះ ដែលត្រូវបានបញ្ជូនទៅធ្វើតេស្តនៅវិទ្យាស្ថានប៉ាស្ទើ គ្រប់ករណីទាំងអស់គឺមានផ្ទុកវីរុសបំប្លែងថ្មីដែលតា។
លោកបានថ្លែងថា៖ «នេះជាករណីឆ្លងវីរុសប្រភេទដែលតាជាចង្កោម» ដោយលោកបន្ថែមថា មិនមែនគ្រប់សំណាកទាំងអស់អាចត្រូវបានធ្វើតេស្តរកវីរុសប្រភេទថ្មីនោះទេ ដោយសារតែធ្វើឲ្យខាតពេលវេលា និងសម្ភារ។ លោកបានប្រាប់ ខេមបូចា ថាមនុស្សសរុបចំនួន ១៦.៨៩១នាក់ ត្រូវបានធ្វើតេស្តវិជ្ជមានជំងឺកូវីដ១៩ ក្នុងខេត្តបន្ទាយមានជ័យ ចាប់តាំងពីព្រឹត្តិការណ៍ថ្ងៃ២០ កុម្ភៈមក ដោយមានករណីជាសះស្បើយចំនួន ១២.៦៧៩ និងករណីស្លាប់ចំនួន ១៣០។
លោកបានឲ្យដឹងថា៖ «មិនមានអ្នកស្លាប់ដោយសារជំងឺវីរុសដែលតា នៅខេត្តបន្ទាយមានជ័យនោះទេ»។
តំបន់ខ្លះក្នុងប្រទេសកម្ពុជាត្រូវបានចាត់វិធានការបិទខ្ទប់ដោយផ្នែក ដើម្បីកាត់បន្ថយការឆ្លងវីរុសបំប្លែងថ្មីនេះ។ ដោយប្រឈមមុខជាមួយនឹងករណីឆ្លងវីរុសបំប្លែងថ្មី អាជ្ញាធរក្រុងភ្នំពេញបានបិទផ្នែកខ្លះនៃផ្សារចាស់ក្នុងខណ្ឌដូនពេញ ផ្សារដេប៉ូក្នុងខណ្ឌទួលគោក ផ្សារសេរីភាព និងផ្សារឌុយមិចក្នុងខណ្ឌ៧មករា ផ្នែកខ្លះនៃផ្សារសិនជូរីផ្លាហ្សា ក្នុងខណ្ឌពោធិ៍សែនជ័យ ការដ្ឋានសំណង់មួយក្នុងខណ្ឌដង្កោ ភូមិមួយចំនួនក្នុងខណ្ឌសែនសុខ និងឬស្សីកែវ ក៏ដូចជា តំបន់មួយចំនួនក្នុងខណ្ឌព្រែកព្នៅ។
អភិបាលរងក្រុងភ្នំពេញលោក កើត ឆែ បានបដិសេធមិនឆ្លើយសំណួរថាតើវីរុសបំប្លែងថ្មីនៅពីក្រោយការស្លាប់ណាមួយក្នុងរាជធានីភ្នំពេញ ដោយបង្វែរសំណួរនេះមកកាន់អ្នកនាំពាក្យក្រសួងសុខាភិបាល លោកស្រី ឱ វណ្ណឌីន។ លោកស្រី វណ្ណឌីន បានបដិសេធមិនផ្តល់ការអត្ថាធិប្បាយ ដោយលើកឡើងថា លោកស្រីរវល់ខ្លាំង ហើយមិនអាចនិយាយជាមួយអ្នកសារព័ត៌មានបាននោះទេ។
លោក កើត ឆែ និយាយថា៖ «ខ្ញុំសូមអំពាវនាវដល់ពលរដ្ឋដែលមិនទាន់បានចាក់វ៉ាក់សាំងរួច សូមទៅចាក់វ៉ាក់សាំងទាំងអស់គ្នា»។ លោកបានស្នើឲ្យសាធារណជនគោរពសេចក្តីណែនាំរបស់ក្រសួងសុខាភិបាល ហើយមិនធ្វើដំណើរទៅកាន់កន្លែងមានមនុស្សច្រើន បើសិនជាមិនចាំបាច់។
លោក ឌី រ៉ាដូ អភិបាលរងនិងអ្នកនាំពាក្យខេត្តឧត្តរមានជ័យ បានមានប្រសាសន៍ថា ការរាតត្បាតជំងឺកូវីដ១៩ ប្រភេទដែលតាក្នុងខេត្ត ត្រូវបានបង្កឡើងដោយពលករចំណាកស្រុក វិលត្រឡប់ពីប្រទេសថៃ ហើយបានចម្លងបន្តដោយមិនដឹងខ្លួនទៅដល់បុគ្គលិកសុខាភិបាលតាមបណ្តោយព្រំដែន។
លោកបានថ្លែងថា៖ «ទោះបីជាវាបានឆ្លងទៅសហគមន៍ក៏ដោយ អាជ្ញាធរយើងបានបញ្ឈប់ការរាតត្បាតវីរុសដែលតាទាន់ពេលវេលា តែគ្រូពេទ្យត្រូវតែការពារខ្លួនឯងឲ្យបានតឹងរឹង»។
លោករ៉ាដូបានប្រាប់ ខេមបូចា ថាករណីវិជ្ជមានមួយចំនួនគឺឆ្លងពីពលករដែលត្រូវឆ្លងកាត់តាមច្រកព្រំដែនអូស្មាច់។ មានករណីឆ្លងចំនួន ៦.១១៥នៅក្នុងខេត្តមកទល់ពេលនេះ រួមមានពលករចំនួន ៥.០៤៤នាក់ ករណីជាសះស្បើយចំនួន ២.៥០០ និងករណីស្លាប់ចំនួន ១០។ លោករ៉ាដូបានបន្តថា មិនមានពលរដ្ឋណាម្នាក់បានស្លាប់ដោយសារវីរុសបំប្លែងថ្មីដែលតានោះទេ។
លោក លី សំរិទ្ធ អភិបាលរងនិងអ្នកនាំពាក្យខេត្តសៀមរាប បាននិយាយថា ប្រភពចម្បងនៃការរាតត្បាតវីរុសបំប្លែងថ្មីដែលតាគឺ បណ្តាលមកពីពលករចំណាកស្រុកវិលត្រឡប់មកស្រុកកំណើតវិញ បើទោះបីជាមានវិធានការចត្តាឡីស័កក៏ដោយ។
លោកបាននិយាយថា៖ «យើងពិតជាមានការព្រួយបារម្ភពីវីរុសប្រភេទថ្មីដែលតានេះ។ សូម្បីតែជំងឺកូវីដ១៩ ធម្មតាគឺពិបាកនឹងទប់ទល់រួចទៅហើយ ហើយឥឡូវនេះ វីរុសបំប្លែងថ្មីដែលតាបានមកដល់ ហើយឆ្លងយ៉ាងឆាប់រហ័ស។ មានមនុស្សចំនួន ៦.៧៥០នាក់ បានឆ្លង [ជំងឺកូវីដ១៩] ជាសះស្បើយចំនួន ៥.២០០នាក់ និងស្លាប់ចំនួន ៧៥នាក់»។
ខេត្តសៀមរាបត្រូវបានដាក់ជាមជ្ឈមណ្ឌលព្យាបាលករណីធ្ងន់ធ្ងរមកពីខេត្តចំនួនប្រាំនៅភាគខាងជើងទន្លេសាប រួមមាន ខេត្តបន្ទាយមានជ័យ ឧត្តរមានជ័យ សៀមរាប បាត់ដំបង និងកំពង់ធំ ដោយមានគ្រែផ្ទុកអ្នកជំងឺបានចំនួន ៤០០នាក់។
លោក យ៉ង គឹមអេង នាយកប្រតិបត្តិមជ្ឈមណ្ឌលប្រជាពលរដ្ឋដើម្បីអភិវឌ្ឍន៍និងសន្តិភាព បាននិយាយថា ជាទូទៅ អាជ្ញាធរមិនអាចធ្វើតេស្តគ្រប់សំណាកជំងឺកូវីដ១៩ ដើម្បីរកវីរុសបំប្លែងថ្មីដែលតាបាននោះទេ ដោយសារតែចំនួនករណីឆ្លង ហើយត្រូវធ្វើតេស្តលើសំណាកតាមរបៀបជ្រើសយកមួយចំនួន។
លោកបានថ្លែងថា៖ «នេះជារឿងសំខាន់ យើងមានការព្រួយបារម្ភ ពីព្រោះជំងឺកូវីដ១៩ ជាក្តីកង្វល់ធំមួយសម្រាប់ប្រទេសទាំងអស់នៅលើពិភពលោកក៏ដូចជាកម្ពុជាផងដែរ»។
លោកគឹមអេង បានបន្ថែមថា ជារឿងសំខាន់ផងដែរ ដែលកម្ពុជាបានសម្រេចផ្តល់ដូសទីបីទៅដល់ប្រជាជន។
លោកបានបន្ថែមថា៖ «លើសពីនេះខ្ញុំគិតថា អាជ្ញាធរត្រូវចាត់វិធានការបន្ថែមណាមួយដើម្បីទប់ទល់នឹងការរាតត្បាតជំងឺកូវីដ១៩ …. ដើម្បីអាចបើកដំណើរការគ្រប់សេវាកម្មផ្សេងៗ [នៅក្នុងសង្គម] រួមមានសេវាកម្មសេដ្ឋកិច្ច និងសេវាកម្មដទៃទៀត។ ហើយស្របពេលដូចគ្នានេះដែរ យើងត្រូវត្រួតពិនិត្យច្រកចេញចូលតាមបណ្តោយព្រំដែនប្រទេសជិតខាង ហើយគ្រប់គ្រងឲ្យបានច្បាស់លាស់លើអ្នកដែលកំពុងធ្វើចត្តាឡីស័ក»។
កាលពីថ្ងៃចន្ទ ក្រសួងសុខាភិបាលបានកត់ត្រាករណីឆ្លងជំងឺកូវីដ១៩ថ្មីចំនួន ៤១០ ក្នុងនោះករណីនាំចូលមានចំនួន ១៣២ ដោយធ្វើឲ្យករណីឆ្លងសរុបកើនដល់ ៨៩.៦៤១ករណី ដែលរួមមានករណីនាំចូលសរុប ១៤.៣០១ករណី ចាប់តាំងពីមានការរាតត្បាតជំងឺកាលពីដើមឆ្នាំ ២០២០មក។ ភាគច្រើននៃករណីឆ្លងគឺមានចាប់តាំងពីព្រឹត្តិការណ៍ថ្ងៃ២០ កុម្ភៈមក នៅពេលមានការឆ្លងក្នុងសហគមន៍ជាបន្តបន្ទាប់នៅកម្ពុជា។ ក្រសួងសុខាភិបាលក៏បានកត់ត្រាករណីជាសះស្បើយចំនួន ៨៥.៦១៨ និងករណីស្លាប់ ១.៨០៨ផងដែរ៕
ប្រែសម្រួលពីអត្ថបទភាសាអង់គ្លេស៖ Cambodia records almost 1,000 cases of COVID-19 Delta variant
