សមាគមសម្ព័ន្ធអ្នកសារព័ត៌មានកម្ពុជា

កម្ពុជានឹងបញ្ជូនពលករទៅម៉ាឡេស៊ីជាថ្មី ទោះបីនៅមានការខ្វះខាតយន្ដការដោះស្រាយការរំលោភបំពាន

ពលករខ្មែរបម្រើការតាមផ្ទះដែលរងការរំលោភបំពានពីថៅកែម៉ាឡេស៊ី បានមកដល់អាកាសយានដ្ឋានរន្តរជាតិភ្នំពេញ បន្ទាប់ពីមានការជួយសង្គ្រោះឲ្យត្រឡប់មកកម្ពជាវិញដោយស្ថានទូតខ្មែរប្រចាំប្រទេសម៉ាឡេស៊ី។ ថ្ងៃទី២ ខែកុម្ភៈ ឆ្នាំ២០១២។ ខេមបូចា/បញ្ញា ឆព័ណ្ណ
ពលករខ្មែរបម្រើការតាមផ្ទះដែលរងការរំលោភបំពានពីថៅកែម៉ាឡេស៊ី បានមកដល់អាកាសយានដ្ឋានរន្តរជាតិភ្នំពេញ បន្ទាប់ពីមានការជួយសង្គ្រោះឲ្យត្រឡប់មកកម្ពជាវិញដោយស្ថានទូតខ្មែរប្រចាំប្រទេសម៉ាឡេស៊ី។ ថ្ងៃទី២ ខែកុម្ភៈ ឆ្នាំ២០១២។ ខេមបូចា/បញ្ញា ឆព័ណ្ណ

កាល​ពី​ថ្ងៃ​ព្រហស្បតិ៍​ លោក​នាយក​រដ្ឋ​មន្ត្រី ហ៊ុន សែន បាន​ប្រកាស​ថារដ្ឋាភិបាល​កម្ពុជា​នឹង​ចាប់​ផ្ដើម​អនុវត្ត​ជា​ថ្មី​នូវអនុសារណៈ​យោគ​យល់គ្នា​​ (MoU) ជាមួយរដ្ឋាភិបាល​ម៉ាឡេស៊ី​ឡើង​វិញ ដើម្បី​បញ្ជូន​ពល​ករ​ខ្មែរ​ទៅ​ធ្វើ​ការ​តាម​ផ្ទះ​នៅ​ទី​នោះ​។

ប្រទេស​ទាំង​ពីរ​បាន​ឈាន​ដល់​កិច្ច​ព្រម​ព្រៀង​នេះ​​ក្នុង​ជំនួប​ទ្វេភាគី​ក្នុង​ទី​ក្រុង​ភ្នំពេញ​រវាង​លោកនាយក​រដ្ឋ​មន្ត្រី ហ៊ុន សែន និង​នាយក​រដ្ឋ​មន្ត្រី​ម៉ាឡេស៊ី លោក Ismail Sabri Yaakob។ ​ការ​សម្រេច​ចិត្ត​នេះ​ធ្វើ​ឡើង​ទាំង​ដែល​សង្គម​ស៊ីវិល​នៅ​បន្ត​បង្ហាញ​ក្ដី​កង្វល់​របស់​ខ្លួន​អំពី​ការ​បន្ត​រំលោភ​បំពាន​លើ​ស្រ្តី​ធ្វើ​ការ​តាម​ផ្ទះ​ក្នុង​ប្រទេស​ម៉ាឡេស៊ី​។​

លោកនាយក​រដ្ឋ​មន្ត្រី ហ៊ុន សែន មាន​ប្រសាសន៍​ក្នុង​សន្និសីទសារព័ត៌មាន​ថា៖ «អំបាញ់មិញ ខ្ញុំជាមួយឯកឧត្តមនាយករដ្ឋមន្រ្តី​[Ismail Sabri Yaakob]បានពិភាក្សគ្នាអំពីទាក់ទងនឹងពលករធ្វើការងារតាមផ្ទះ ហើយដែលឯកឧត្តមនាយករដ្ឋមន្រ្តីបាននិយាយយ៉ាងច្បាស់ជាមួយខ្ញុំអំពីការកែសម្រួល MOUនោះ ហើយធានាថានឹងមិនមានការរំលោភបំពានណាមួយនោះទេ»

អនុសារណៈយោគយល់​គ្នា​រវាង​ប្រទេស​ទាំង​ពីរ​ក្នុង​ការ​ជ្រើស​រើស​ពល​ករ​បម្រើ​ការ​តាម​ផ្ទះ​នៅ​ប្រទេស​ម៉ាឡេស៊ី​បាន​ផុត​សុពល​ភាព​កាល​ពី​ឆ្នាំ​២០២០​។​

កាល​ពី​ឆ្នាំ​២០១១ រដ្ឋា​ភិបាល​កម្ពុជា​បាន​ហាម​ឃាត់​ភ្នាក់​ងារ​ជ្រើស​រើស​ពល​ករ​ពី​ការ​បញ្ជូន​អ្នក​ធ្វើ​ការ​តាម​ផ្ទះ​ទៅ​កាន់​ប្រទេស​ម៉ាឡេស៊ី ដោយ​សារ​តែ​ពេល​នោះ​មាន​សេចក្ដី​រាយ​ការពី​ករណី​រំលោភ​បំពាន​រាង​កាយ និង​ផ្លូវ​ចិត្ត​ជា​ច្រើន​។ បន្ទាប់​ពី​មាន​បម្រាម​នេះ​អស់​រយៈពេល​ប្រាំ​ឆ្នាំ រដ្ឋាភិបាល​កម្ពុជា​ក៏​សម្រេច​បញ្ជូល​ពលករ​ធ្វើ​ការ​តាម​ផ្ទះ​ទៅ​ប្រទេស​ម៉ាឡេស៊ី​ជា​ថ្មី​ក្នុង​ឆ្នាំ​២០១៧​។

អ្នកនាំពាក្យ​ក្រ​សួង​ការងារ លោក ហេង សួរ មាន​ប្រសាសន៍​ថា គិត​តាំង​ពី​ពេល​នោះ​មក ពល​ករ​បម្រើ​ការ​តាម​ផ្ទះ​ចំនួន​ ១៧៥​​នាក់​ត្រូវ​បាន​ញ្ជូន​ទៅ​កាន់​ប្រទេស​ម៉ាឡេស៊ី​។

លោក ឲ្យ​ដឹង​ទៀត​ថា៖ «ការ​ងារ​ភាគ​ច្រើននៅ​ប្រទេស​ម៉ាឡេស៊ី គឺ​ជា​អ្នក​បម្រើ​ការងារតាម​ផ្ទះ ហើយ​ការងារ​ប្រភេទនេះ​មិន​សូវ​មាន​ការ​ពេញ​និយម​សម្រាប់​ប្រ​ជា​ពល​រដ្ឋ​កម្ពុជា​ដូច​ពេល​មុន​ទេ»។​

អ្នក​នាំពាក្យ​រូប​នេះ​ឲ្យ​ដឹង​ទៀត​ថា​ ទោះ​បី​ជា​យន្ត​ការ​ការពារ​សិទ្ធិ​ពល​ករ​នៅ​ក្នុង​ប្រទេស​ម៉ាឡេស៊ី​មាន​ភាព​ល្អ​ប្រសើរ​ជាង​មុន​ តែ​ចំនួន​ពល​ករ​ខ្មែរ​ចង់​ទៅ​ធ្វើ​ការ​នៅ​ម៉ាឡេស៊ី​មាន​ចំនួន​តិច ដោយសារតែ​កត្តា​រួម​ផ្សំ​មួយ​ចំនួន។ លោក​ឲ្យ​ដឹង​ថា កម្ពុជា​ពេល​នេះ​មាន​វិស័យ​ឧស្សាហកម្ម​មួយ​រឹង​មាំ ហើយ​ប្រាក់ឈ្នួល​ក្នុង​ស្រុក​ក៏​ល្អ​ប្រសើរ ខណៈ​ប្រាក់​ឈ្នួល​នៅ​ប្រទេស​ជិត​ខាង​ដូច​ជា​ថៃ ក៏​មាន​ការ​កើន​ឡើង​។​

លោក ឲ្យ​ដឹង​ទៀត​ថា ក្រ​សួង​ការងារ​កម្ពុជា​នឹង​ធ្វើ​ការ​ជា​មួយ​អាជ្ញាធរ​ម៉ាឡេស៊ី​ដោយ​ផ្អែក​លើ​យន្តការ​អនុសារណៈយោគយល់​គ្នា​ដែល​មាន​ស្រាប់​កាល​ពី​ឆ្នាំ​២០១៧ និងកែសម្រួលផ្នែកខ្លះដើម្បី​ការពារ​សិទ្ធិ និង​ផល​ប្រយោជន៍​របស់​ពលករ​បម្រើ​ការ​តាម​ផ្ទះ​។​

លោក​នាយក​រដ្ឋមន្ត្រី ហ៊ុន សែន (ខាង​ស្ដាំ) និង​លោក​នាយក​រដ្ឋ​មន្ត្រី ម៉ាឡេស៊ី Ismail Sabri Yaakob ចូល​រួមកិច្ច​ប្រជុំ​នៅ​វិមាន​សន្តិភាព​ក្នុង​រាជធានី​ភ្នំពេញ ថ្ងៃទី​២៤ ខែកុម្ភៈ ឆ្នាំ​២០២២។ កុក គី/ រូបភាព​ផ្ដល់​ឲ្យ​​
លោក​នាយក​រដ្ឋមន្ត្រី ហ៊ុន សែន (ខាង​ស្ដាំ) និង​លោក​នាយក​រដ្ឋ​មន្ត្រី ម៉ាឡេស៊ី Ismail Sabri Yaakob ចូល​រួមកិច្ច​ប្រជុំ​នៅ​វិមាន​សន្តិភាព​ក្នុង​រាជធានី​ភ្នំពេញ ថ្ងៃទី​២៤ ខែកុម្ភៈ ឆ្នាំ​២០២២។ កុក គី/ រូបភាព​ផ្ដល់​ឲ្យ​​

លោក ឌី ថេហូយ៉ា មន្ត្រី​គម្រោង​កម្មវិធីរបស់​អង្គការ​សង់ត្រាល់ បង្ហាញ​ក្ដី​បារម្ភ​ថា​រដ្ឋាភិបាល​ម៉ាឡេស៊ីមិន​បាន​ចាត់​វិធានការ​ឲ្យ​បាន​ហ្មត់​ចត់​ដើម្បី​ធ្វើ​ឲ្យ​លក្ខខណ្ឌ​ការងារ​របស់​ពល​ករ​បម្រើការ​​តាមផ្ទះ​​របស់​កម្ពុជា បាន​ល្អ​ប្រសើរ​នៅ​ឡើង​ក្នុង​ប្រទេស​ម៉ាឡេស៊ី​។​

លោក លើក​​ឡើង​ថា​ ជាក់ស្ដែង​នៅ​មិន​ទាន់​មាន​យន្តការ​ច្បាស់​លាស់​​ដើម្បី​ធានា និងការពារ​ពលករ​ធ្វើ​ការ​តាម​ផ្ទះ​នៅឡើយ ហើយ​រដ្ឋាភិបាល​ម៉ាឡេស៊ី​ទៀត​សោត ក៏​បរាជ័យ​ក្នុង​ការ​ដោះស្រាយ​បញ្ហា​រំលោភ​បំពាន​ដែល​ធ្លាប់​កើត​មាន​កន្លង​មក​ផង​ដែរ។​

លោក​បន្ត​ថា ទោះបី​ជា​រដ្ឋាភិបាល​ប្រទេស​ទាំងពីរ​បាន​ធានាការ​ថា​ខ្លួន​នឹង​ការ​ពារ​ពល​ករ​ធ្វើ​ការ​តាម​ផ្ទះ​របស់​កម្ពុជា​ក្ដី សង្គម​ស៊ីវិល​នៅ​មិន​ទាន់​មាន​ជំនឿ​ចិត្ត​លើ​រឿង​នេះ​នៅ​ឡើង​។​​

លោក​បន្ត​ថា៖ «​យើង​មិន​ទាន់​ជឿ​នៅ​ឡើយ​ទេ ពីព្រោះ​យើង​មិន​ទាន់​ឃើញ​វិធានការ​ថ្មី ក្រៅ​ពី​វិធានការ​ចាស់​ដែល​មាន​ស្រាប់​»។​​

លោក ឲ្យ​ដឹង​ទៀត​ថា ពល​ករ​ខ្មែរ​ដែល​ធ្វើ​ការ​តាម​ផ្ទះ​នៅ​ប្រទេស​ម៉ាឡេស៊ីរស់​នៅ​ជាមួយ​ម្ចាស់​ផ្ទះ ហើយ​ក៏គ្មាន​វិធី​ដើម្បី​អង្កេត​លើ​លក្ខខណ្ឌ​ការងារ​ដែរ ទោះបី​ជា​តាម​ច្បាប់​ពួកគេ​ត្រូ​វ​ធ្វើ​ការ​តែ​ប្រាំបី​ម៉ោង​ក្នុង​មួយ​ថ្ងៃ ហើយ​លិខិត​ឆ្លង​ដែន​របស់​អ្នក​ទាំង​នោះ​ត្រូវ​បាន​ម្ចាស់​ផ្ទះ​ដក​ហូត​ទុក ឬ​ក៏​មិ​ន​ដឹង​ថា​ពួកគេ​អាច​ទាក់ទង​មក​អ្នក​ផ្ទះ​នៅ​កម្ពុជា​បាន​ដែរ​ឬ​អត់​។​

លោក​បន្ថែម​ថា៖ «​សំណួរ​នៅ​ត្រង់​ថា តើ​ពលករ​កម្ពុជា និង​ពលករ​ប្រទេស​ផ្សេង​ទៀត​ដែល​រង​ការ​រំលោភ​បំពាន និង​ធ្វើ​ទារុណកម្ម​​នៅ​ក្នុង​ផ្ទះ[ម្ចាស់​ផ្ទះ​] នោះ​បាន​ទទួល​យុត្តិ​ធម៌​ហើយ​ឬ​នៅ?​»។​​​

លោក​លើក​ឡើង​ថា​ករណី​កន្លង​មក​ដែល​ម្ចាស់​ផ្ទះ​ធ្វើ​បាប​ស្រ្តី​បម្រើ​ការ​តាម​ផ្ទះ​ រដ្ឋាភិបាល​ទាំង​ពីរ​មិន​ទាន់​រក​យុត្តិ​ធម៌​ឲ្យ​ពួកគេ និង​ដាក់ទោស​ម្ចាស់​ផ្ទះ​នៅ​ឡើយ​។​

ស្រ្តីវ័យ ២៩ឆ្នាំ​ម្នាក់​ឈ្មោះ ចន្នី ដែល​បាន​ត្រឡប់​ពីម៉ាឡេស៊ី​មក​កម្ពុជា​វិញ​កាលពីខែ​មករា ឆ្នាំ​មុន បាន​ឲ្យ​ដឹង​ថាអ្នកស្រី មិន​បាន​ទទួល​ប្រាក់ខែ​អស់រយៈពេល​ប្រាំបួនឆ្នាំ​ ពេល​ធ្វើ​ការ​ជា​អ្នកបម្រើ​តាម​ផ្ទះ​នៅ​ប្រទេស​ម៉ាឡេស៊ី​។​​​

អ្នកស្រី បានទៅ​ធ្វើ​ការ​​នៅ​ម៉ាឡេស៊ី​ក្នុង​ឆ្នាំ​២០១២ ក្នុង​នាម​ជា​អ្នក​បម្រើ​តាម​ផ្ទះ ដោយ​មា​ន​កិច្ច​សន្យា​ការងារ​ថា​បាន​ទទួល​ប្រាក់ខែ​ ២៥០​ដុល្លារ​ក្នុង​មួយ​ខែ ប៉ុន្តែ​ថៅ​កែ ឬ​ម្ចាស់​ផ្ទះ​មិនបាន​បើក​ប្រាក់ខែឲ្យ​ទេ​ ដោយ​បាន​សន្យាថា​នឹង​បើក​ឲ្យ​សរុប​ពេល​អ្នកស្រី​ឡប់​មក​ស្រុក​វិញ​។ រហូត​ដល់​ប្រាំ​បួន​ឆ្នាំក្រោយ អ្នកស្រី​បាន​វិល​ត្រឡប់​មក​ស្រុក​កំណើត​វិញ​ក្នុង​ខេត្ត​ព្រះ​វិហារ ដោយ​មិន​បាន​ទទួល​ប្រាក់ខែ​អ្វី​ទាំង​អស់​។​​

អ្នកស្រី​ឲ្យ​ដឹង​ថា៖ «ស្ថានទូត[ខ្មែរ]​បាន​ជួយ​អន្តរាគមន៍»។ កាលពី​ខែ​សីហា ឆ្នាំ​មុន​ អ្នកស្រី​បាន​រត់​ចេញ​ពី​ផ្ទះថៅកែ និង​បាន​​ដាក់​ពាក្យ​បណ្ដឹងទៅ​កាន់​នគរបាល​ម៉ាឡេស៊ី និង​ចុង​ក្រោយ​អ្នកស្រី​ត្រូវ​បាន​នាំ​ទៅ​កាន់​ស្ថានទូត​​ខ្មែរ​នៅទី​នោះ​។​

អ្នកស្រី​បន្ថែម​ថា៖ «សាច់​ញាតិ​ខ្ញុំគិត​ថា​ខ្ញុំ​បាត់​ខ្លួន»។ អ្នកស្រី​ថា​ ក្រុមគ្រួសារគិតដូចច្នេះព្រោះ​ពួកគាត់​​មិន​ដែល​បាន​ដឹង​ដំណឹង ​ និង​មិន​ដែល​បាន​ទទួល​ប្រាក់ពី​អ្នក​ស្រី​។​

ចន្នី ​ឲ្យ​ដឹង​ទៀត​ថា ដើម​ឡើយ​អ្នក​ស្រី​ត្រូវ​ជ្រើស​រើស​ឲ្យ​ធ្វើ​ជា​អ្នក​បម្រើ​ការ​តាម​ផ្ទះ ប៉ុន្តែ​ពេល​ទៅ​ដល់​ម៉ាឡេស៊ី អ្នកស្រី​ត្រូវ​ថៅកែ​ប្រើ​ឲ្យ​ធ្វើ​ជា​អ្នកធ្វើ​ការ​ក្នុង​ហាង​បន្ថែម​ទៀត​។​

ក្នុង​រយៈពេល​ប្រាំបួន​ឆ្នាំ​ អ្នកស្រី​មិន​អាចស្វែង​រក​ជំនួយ​បាន​ទេ​។ អ្នកស្រី​ថា៖ «​ខ្ញុំ​មិន​ស្គាល់​អ្នកណាទេ​ ហើយរបស់​របរ​ខ្ញុំ​[លិខិត​ឆ្លងដែន ឯកសារ​ផ្សេងៗ​] ត្រូវ​ថៅកែ​ដក​ហូត»។​

អ្នកស្រី​​បាន​អំពាវ​នាវ​ដល់​​ប្រ​ជា​ពល​រដ្ឋ​កម្ពុជា​ត្រូវ​គិត​ឲ្យ​បាន​ច្បាស់​លាស់​មុន​សម្រេច​ចិត្ត​ទៅ​ធ្វើ​ជា​ពលករ​បម្រើ​ការ​តាម​ផ្ទះ​នៅ​ម៉ាឡេស៊ី​។​

អតីត​អនុប្រធាន​គណបក្ស​សង្គ្រោះ​ជាតិ ដែល​ត្រូវ​រំលាយ លោកស្រី មូ សុខហួរ ប្រាប់​ខេមបូចា តាម​អ៊ីម៉ែល​ថា រដ្ឋាភិបាល​ទាំង​ពីរ​បរាជ័យ​ក្នុង​ការ​ការពារ​សិទ្ធិ​ពល​ករ និង​បាន​កត់​សម្គាល់​ថា អនុសារណៈយោគយល់គ្នា​ត្រូវ​តែ​ធ្វើ​ឡើង​ដោយ​មាន​តម្លាភាព និង​ធានា​ការគាំពារ​ពេញ​លេញ​ដល់​ពលករ ដោយ​ផ្អែក​តាមអនុសញ្ញា​របស់​អង្គការ​អន្តរជាតិខាង​ការងារ​។

លោកស្រី​បន្ថែម​ថា៖ «ក្នុង​​ប្រទេសទាំងពីរ ប្រព័ន្ធមិនត្រឹមត្រូវ ពុករលួយ មិន​អំណោយ​ផល​ដល់​កម្មករ​ទេ…​ការ​រំលោភ​បំពាន​នឹង​នៅ​តែ​អាច​បន្ត​កើត​មាន ខ្ញុំ​បារម្ភ​លើ​រឿង​នេះ»។

លោក អាន ប៊ុនហាក់ ប្រធាន​​សមាគមទីភ្នាក់ងារហត្ថពលកម្មកម្ពុជា​(MAC) មាន​ប្រសាសន៍​ថា សមាគម​គាំទ្រ​ទៅនឹង​ការ​លើក​ឡើង​របស់​លោកនាយក​រដ្ឋ​មន្ត្រី ហ៊ុន សែន ដែល​បាន​អំពាវ​នាវ​ឲ្យ​មាន​ការ​កែសម្រួល​អនុសារណយោគយល់​គ្នា ដើម្បី​ធ្វើ​ឲ្យ​កាន់​តែ​ប្រសើរ​នូវ​វិធានការ​គាំពារ​ផ្នែក​ច្បាប់​ដល់​ពលករ​កម្ពុជា​ក្នុង​ប្រទេស​ម៉ាឡេស៊ី​។​

លោក បន្ថែម​ថា៖ «អង្គការ​ពាក់​ព័ន្ធ​គួរ​ជួយ​ផ្ដល់​ជា​អនុសាសន៍​ យន្តការ​ការពារផ្សេងៗ ដាក់​ក្នុង​អនុសារណៈយោគយល់គ្នា​ដែល​នឹង​ត្រូវកែសម្រួល​ថ្មី​នេះ និង​រួម​គ្នា​ជាមួយ​រដ្ឋាភិបាល ហើយ​សមាគម​យើង​ក៏​ជួយ​ការពារ​សិទ្ធិ​របស់​ពលករ​ដែរ»។​

លោក​ឲ្យ​ដឹង​ដែរថា តាំង​ពី​មាន​ការ​លើក​បម្រាម​​មក មាន​ពលករ​ខ្មែ​រ​ទៅ​ធ្វើ​ការ​តាម​ផ្ទះ​នៅ​ម៉ាឡេស៊ី​ស្រប​ច្បាប់​ប្រហែល​ ១០០​នាក់​។ យ៉ាងណា​លោក​ថា បច្ចុប្បន្ន​នេះ តាម​ការ​ប៉ាន់​ស្មាន មាន​ពល​ករ​ខ្មែរ​ធ្វើ​ការ​នៅ​ម៉ាឡេស៊ី​ប្រហែល​ ៥០ ០០០​នាក់ (ភាគ​ច្រើ​ធ្វើការ​តាម​ផ្ទះ) ហើយ​ភាគ​ច្រើន​នៃ​អ្នក​ទាំង​នោះ​ជា​ពលករ​ខុស​ច្បាប់។​​

ក្រៅ​តែ​ពី​ពិភាក្សា​គ្នា​លើ​បញ្ហា​ពលករ​បម្រើ​ការ​តាម​ផ្ទះ មេដឹក​នាំ​ទាំងពីរ​ក៏​បាន​ជជែក​ពី​ពាណិជ្ជកម្ម​ទ្វេភាគី និង​ការ​ជំរុញ​វិនិយោគ​ដើម្បី​កំណើន​សេដ្ឋកិច្ច​ផង​ដែរ។ ក្រៅពី​នេះ ភាគី​ទាំង​ពីរ​ក៏បាន​ផ្លាស់​ប្តូរ​មតិយោបល់​គ្នា​លើ​បញ្ហាមួយ​ចំនួន​ ដូច​ជាភាព​តាននឹង​នៅ​សមុទ្រ​ចិន​ខាង​ត្បូង បញ្ហា​ជនភៀស​ខ្លួន​រ៉ូហ៊ីន​យ៉ា និង​បញ្ហា​មីយ៉ាន់​ម៉ា ជា​ដើម​។​​

លោក​នាយក​រដ្ឋ​មន្ត្រី​ម៉ាឡេស៊ី Ismail Sabri Yaakob ថ្លែង​ក្នុង​សន្និសីទ​នោះ​ដែរថា​៖ «ខ្ញុំ និងលោកនាយករដ្ឋមន្ត្រីបានផ្លាស់ប្តូរទស្សនពាក់ព័ន្ធស្ថានការណ៍នៅមីយ៉ាន់ម៉ា។ ម៉ាទ្បេស៊ីនឹងបន្តគាំទ្រការខិតខំរបស់កម្ពុជាក្នុងនាមជាប្រធានអាស៊ាន ក៏ដូចជាប្រសិតពិសេសរបស់អាស៊ានស្តីពីកិច្ចការមីយ៉ាន់ម៉ាដើម្បីដោះស្រាយស្ថានការណ៏នៅមីយ៉ាន់ម៉ា»។

លោក​នាយក​រដ្ឋ​មន្ត្រី​ម៉ាឡេស៊ី ក៏​បាន​លើក​ពី​ចំណុច​ឯកភាព​គ្នា​​ទាំង​ប្រាំចំណុច សម្រាប់​ដោះ​ស្រាយ​បញ្ហា​នៅ​មីយ៉ាន់ម៉ា។ លោក​ថ្លែងថា៖ «យើងចង់ឃើញមីយ៉ាន់ម៉ាត្រទ្បប់ទៅប្រក្រតីភាពវិញ»

ប្រែសម្រួលពីអត្ថបទភាសាអង់គ្លេស៖ Cambodia to resume sending domestic workers to Malaysia despite lack of action on abuse complaints

1,987 views

ព័ត៌មានថ្មីៗ

អត្ថបទពេញនិយម