មន្ត្រីកម្ពុជាបានជំទាស់នឹងរបាយការណ៍របស់រដ្ឋាភិបាលថៃដែលថា ជនជាតិថៃ ១៩ នាក់ត្រូវបានគេជួយសង្គ្រោះពីប្រតិបត្តិការឆបោកកាលពីថ្ងៃសៅរ៍សប្តាហ៍មុន នៅខេត្តឧត្តរមានជ័យ។
លោក ជា ពិសិដ្ឋ នាយករដ្ឋបាលខេត្តឧត្តរមានជ័យ បាននិយាយថា៖ «តាមព័ត៌មានដែលបានរាយការណ៍មកខ្ញុំ មានមនុស្សតែ ១១ នាក់ប៉ុណ្ណោះដែលបានជួយសង្គ្រោះ»។ លោកបាននិយាយថា មនុស្សចំនួន ៧ នាក់ត្រូវបានគេយកចេញពីសណ្ឋាគារឡាលីន ហើយលោកមិនដឹងថា៤ នាក់ផ្សេងទៀតត្រូវបានជួយសង្គ្រោះពីកន្លែងណានោះទេ។ ទាំង១១នាក់ គឺជាជនជាតិថៃ ដោយមាន៩នាក់ចូលតាមច្រកអូរស្មាច់ និង២នាក់ទៀតចូលតាមច្រកប៉ោយប៉ែត។
លោកបន្តថា មន្ត្រីអន្តោប្រវេសន៍បានបញ្ជូនជនជាតិថៃទាំងនោះទៅកាន់អធិការដ្ឋាននគរបាលក្រុង ដើម្បីសាកសួរ។
លោក ពិសិដ្ឋ បានប្រាប់ខេមបូចាថា រដ្ឋបាលសាលាខេត្តបានទទួលរបាយការណ៍ពីជនរងគ្រោះចំនួន ១១នាក់ ដែលត្រូវបានជួយសង្គ្រោះកាលពីថ្ងៃអាទិត្យ ហើយថា នគរបាលខេត្តកំពុងធ្វើការលើករណីនេះ និងអនុវត្តទៅតាមច្បាប់។ លោកថា ជនជាតិថៃទាំងនោះបានមកដល់ប្រទេសកម្ពុជាប្រហែលនៅថ្ងៃសុក្រ ដោយគ្មានលិខិតឆ្លងដែន ហើយក៏បានសុំអន្តរាគមន៍ពីអាជ្ញាធរកាលពីថ្ងៃសៅរ៍។
ការអត្ថាធិប្បាយរបស់លោក ពិសិដ្ឋ ផ្ទុយនឹងសេចក្តីថ្លែងការណ៍របស់ក្រុមការងារស៊ូរ៉ាណារីរបស់ប្រទេសថៃ ដែលថា មន្ត្រីកម្ពុជាប្រមាណ ៣០នាក់ បានជួយសង្គ្រោះជនជាតិថៃ ១៩នាក់ កាលពីថ្ងៃសៅរ៍ ពីក្នុងកាស៊ីណូមួយក្បែរច្រកព្រំដែនអូរស្មាច់ ដូចដែលបានរាយការណ៍ដោយកាសែតបាងកកប៉ុស្តិ៍។
យោងតាមអត្ថបទនេះ មានបុគ្គលិកប្រហែល ៥០នាក់កំពុងធ្វើការនៅប្រតិបត្តិការឆបោក ប៉ុន្តែប្រតិបត្តិករជនជាតិតៃវ៉ាន់បានចាកចេញជាមួយបុគ្គលិកចិន ឥណ្ឌា ឡាវ និងវៀតណាម មុនការចុះបង្ក្រាប។ មន្ត្រីថៃបានទទួលទូរសព្ទពីជនរងគ្រោះម្នាក់កាលពីថ្ងៃទី១៤ មីនា ហើយក៏ចាប់ផ្តើមជួយសង្គ្រោះតែម្តង។ បុគ្គលិកដែលត្រូវបានសង្គ្រោះបាននិយាយថា ភាគច្រើននៃជនជាតិថៃបានចូលមកកម្ពុជាតាមច្រកប៉ោយប៉ែត។
សារព័ត៌មានថៃបានរាយការណ៍ថា បុគ្គលិកដែលមិនបានបំពេញតាមចំនួនកំណត់ទឹកប្រាក់ប្រចាំថ្ងៃនៅប្រតិបត្តិការឆបោកត្រូវបានបង្ខំឱ្យ «រត់ឡើងចុះពីលើអគារ» ឬត្រូវបានឆក់ដោយខ្សែភ្លើង។
នៅពេលអ្នកសារព័ត៌មានខេមបូចា សួរអំពីភាពខុសគ្នាក្នុងរបាយការណ៍របស់រដ្ឋាភិបាលទាំងពីរនោះ លោក ពិសិដ្ឋ បាននិយាយថា លោកមិនមានព័ត៌មានទាក់ទងនឹងករណីជនរងគ្រោះដែលត្រូវបានសង្គ្រោះចំនួន ១៩ នាក់នោះទេ។ ស្ថានទូតថៃប្រចាំនៅកម្ពុជា ក៏មិនបានឆ្លើយតបនឹងអ៊ីមែល ឬការហៅតាមទូរសព្ទជាច្រើនលើកដែរ។
លោក ពិសិដ្ឋ បានបង្វែរសំណួរបន្ថែមទៅអភិបាលរងខេត្ត លោក អ៊ុន សុភ័ក្រ និងមន្ទីរព័ត៌មានខេត្ត។ លោក អ៊ុន សុភ័ក្ត្រ បានបដិសេធធ្វើអត្ថាធិប្បាយ។
លោក ផល លីម ប្រធានមន្ទីរព័ត៌មានខេត្តឧត្តរមានជ័យ បាននិយាយថា អាជ្ញាធរព្រំដែនមិនបានស្នើឲ្យមន្ទីររបស់លោកចូលរួមប្រជុំទាក់ទងនឹងករណីនេះទេ ដូច្នេះហើយទើបលោកមិនអាចផ្តល់ព័ត៌មានបន្ថែមបានទេ។ លោកបានបន្តថា មន្ត្រីព្រំដែនអូរស្មាច់បានជួបជាមួយអាជ្ញាធរថៃ ប៉ុន្តែមិនបានបញ្ជាក់ថាពេលណាទេ។
មានស្ត្រីម្នាក់ដែលលើកទូរសព្ទនៅសណ្ឋាគារឡាលីន កាលពីថ្ងៃអង្គារ បាននិយាយថា ប៉ូលិសបានជួយសង្គ្រោះមនុស្ស ៧ នាក់ពីសណ្ឋាគារ ប៉ុន្តែបដិសេធមិនផ្តល់ព័ត៌មានបន្ថែមទេ។
លោក ប៉ែន កុសល អភិបាលខេត្តឧត្តរមានជ័យ បានប្រាប់ ខេមបូចានៅថ្ងៃអង្គារថា «យើងបានជួយសង្គ្រោះមនុស្ស ១១នាក់» ប៉ុន្តែលោកបដិសេធផ្តល់ព័ត៌មានលម្អិតទេ។
លោក ហួត សុធី ស្នងការនគរបាលខេត្តឧត្តរមានជ័យ បាននិយាយថា អាជ្ញាធរថៃបានទាក់ទងកាស៊ីណូអូរស្មាច់មួយដែលមានអាជ្ញាបណ្ណកាលពីថ្ងៃសៅរ៍ ពាក់ព័ន្ធនឹងពាក្យបណ្តឹង ទោះបីជាលោកអះអាងថាមិនដឹងថាកាស៊ីណូណាមួយក៏ដោយ។ អូរស្មាច់មានកាស៊ីណូចំនួនពីរដោយ រមណីយដ្ឋានអូរស្មាច់ គ្រប់គ្រងដោយក្រុមហ៊ុន L.Y.P Group របស់ឧកញ៉ា លី យ៉ុងផាត់ និង រ៉ូយ៉ាល់ ហ៊ីល រីសត ដែលជាកម្មសិទ្ធិរបស់ឧកញ៉ា លឹម ហេង។ តាមលោក សុធី អាជ្ញាធរថៃបានជួបជាមួយម្ចាស់កាស៊ីណូ ហើយបុគ្គលិកកាស៊ីណូបានទាក់ទងទៅប៉ូលិសព្រំដែនកម្ពុជាអំពីពាក្យបណ្តឹងនោះ។
លោក សុធី បាននិយាយថា៖ «ថៃបាននិយាយថាមនុស្ស ១៩ នាក់ត្រូវបានជួយសង្គ្រោះ ប៉ុន្តែខ្ញុំបានដឹងថាមានមនុស្សតែ ៧ នាក់ប៉ុណ្ណោះ»។ លោកបានបន្តថា៖ «ខ្ញុំមិនប្រាកដថាតើគេបូកដោយរបៀបណានោះទេ»។ លោកបានបញ្ជាក់ថា ជនជាតិថៃ ៧ នាក់ប្រហែលជាត្រូវបានបញ្ជូនទៅប្រទេសថៃវិញ។
លោក សុធី បានជំទាស់នឹងរបាយការណ៍ដែលថា មានមន្ត្រីខ្មែរ៣០នាក់បានចុះបង្ក្រាបទីតាំងឆបោក។ លោកបានប្រាប់ខេមបូចាទាំងសើចថា នៅពេលអាជ្ញាធរថៃបានចូលមកដល់ព្រំដែនកាលពីថ្ងៃសៅរ៍ ប៉ូលិសនិងមន្ត្រីកម្ពុជាបានជួបជុំគ្នា ដើម្បីសង្កេតមើលអ្វីដែលកំពុងកើតឡើង ហើយ «គ្រាន់តែអង្គុយផឹកកាហ្វេនៅជិតច្រកព្រំដែនប៉ុណ្ណោះ»។
លោកថា មាន «វាការយល់ច្រឡំ» ហើយមន្ត្រីកម្ពុជាមិនត្រូវបានអាជ្ញាធរថៃជូនដំណឹងជាមុនទេ។
លោកអះអាងថា មិនដឹងថាជនរងគ្រោះត្រូវបានគេជួយសង្គ្រោះពីណាទេ ព្រោះអាជ្ញាធរថៃមិនបានផ្តល់ព័ត៌មានដល់មន្ត្រីកម្ពុជាឡើយ។
លោក ឡុង សាគុន្ធ ស្នងការរងនគរបាលខេត្តទទួលបន្ទុកអន្តោប្រវេសន៍បាននិយាយថា៖ «រឿងនេះមិនបានកើតឡើងទេ ហើយខ្ញុំក៏មិនដឹងអំពីរឿងនេះដែរ»។
លោកបាននិយាយទថា៖ «ខ្ញុំនៅទីនេះ [នៅខេត្ត] ហើយរឿងហ្នឹងមិនបានកើតឡើងទេ»។
លោក សុខ វាសនា អគ្គនាយកនៃអគ្គនាយកដ្ឋានអន្តោប្រវេសន៍បានថ្លែងថា លោកមិនបានដឹងពីការជួយសង្គ្រោះជនជាតិថៃ ១៩ នាក់នោះទេ។
លោក ហម សុខហួយ អធិការរងក្រុងទទួលបន្ទុកអន្តោប្រវេសន៍បាននិយាយថា លោកចាំបាច់ត្រូវមានការណែនាំពីស្នងការនគរបាលក្រុងសិន មុននឹងធ្វើអត្ថាធិប្បាយ។ អធិការក្រុងសំរោង លោក ហម ភិរុណ បានបដិសេធធ្វើអត្ថាធិប្បាយ។
លោក អ៊ុក ប៊ុនអ៊ុយ នាយប៉ុស្តិ៍នគរបាលសង្កាត់អូរស្មាច់ បាននិយាយថា លោកមិនដឹងអំពីជនរងគ្រោះដែលបានជួយសង្គ្រោះទាំង១៩នាក់នោះទេ ហើយលោកក៏មិនបានដឹងអំពីមនុស្សដែលត្រូវគេបានជួយសង្គ្រោះពីសណ្ឋាគារឡាលីនដែរ។ លោកបន្តថា ក្នុងអំឡុងពេលស៊ើបអង្កេតកន្លងមកនៅកាស៊ីណូទាំងពីរនៅក្នុងក្រុង អាជ្ញាធរមូលដ្ឋានដូចជា ប៊ុន អ៊ុយ មិនត្រូវបានគេអនុញ្ញាតឱ្យចូលឡើយ ។
នេះមិនមែនជាលើកទីមួយទេ ដែលអាជ្ញាធរកម្ពុជា បានជំទាស់នឹងរបាយការណ៍របស់អាជ្ញាធរប្រទេសផ្សេងទៀត ពាក់ព័ន្ធនឹងការសង្គ្រោះក្នុងទីតាំងឆបោក។ កាលពីខែធ្នូ អាជ្ញាធរថៃបានរាយការណ៍ថា មានជនជាតិថៃ ៩ នាក់បានបង្កអគ្គិសភ័យនៅក្នុងកាស៊ីណូ ពូលី (PuLi) ក្នុងក្រុងប៉ោយប៉ែត ដើម្បីគេចចេញពីប្រតិបត្តិការឆបោកដោយហិង្សា បន្ទាប់ពីចាញ់បោកបញ្ឆោតឲ្យចូលប្រទេសកម្ពុជាដោយការសន្យាមិនពិតអំពីការទទួលបានការងារនៅកាស៊ីណូ។
អាជ្ញាធរកម្ពុជាបានជំទាស់នឹងរបាយការណ៍នេះ ដោយអះអាងថា ជនជាតិថៃមិនមែនជាជនរងគ្រោះនៃការជួញដូរមនុស្ស មិនធ្លាប់ទទួលរងអំពើហិង្សាពីសំណាក់ថៅកែទេ ហើយពួកគេបានដុតបន្ទប់ក្នុងអគារដោយសារតែឈ្លោះទាស់ទែងគ្នា។
កាលពីខែសីហា ស្ថានទូតឥណ្ឌូនេស៊ីនៅភ្នំពេញបានប្រកាសថា ពលរដ្ឋឥណ្ឌូនេស៊ី ៤១ នាក់ត្រូវបានធ្វើមាតុភូមិនិវត្តន៍ ក្រោយពីសង្គ្រោះពីប្រតិបត្តិការឆបោកតាមអនឡាញ ប៉ុន្តែមន្ត្រីប៉ូលិសកម្ពុជាបានអះអាងថា ពួកគេមិនមែនជាជនរងគ្រោះទេ។
កន្លងមក ជនបរទេសត្រូវបានគេជួញដូរទៅអូរស្មាច់ ក្នុងទីតាំងអគាររបស់លោក លី យ៉ុងផាត់។ យោងតាមរបាយការណ៍ពីកាសែត New York Times នៅក្នុងខែសីហា បុគ្គលិកបានរាយការណ៍ថា «ពួកគេត្រូវបានបង្ខាំង និងជួយសង្គ្រោះជាយថាហេតុ» ពីទីតាំងទាំងនេះ។ បុរសជនជាតិហ្វីលីពីនម្នាក់បានរាយការណ៍ថា ខ្លួនត្រូវគេបោកបញ្ឆោតឱ្យទៅតំបន់នេះជាមួយនឹងការសន្យាមិនពិតនៃការទទួលបានការងារផ្នែកសេវាអតិថិជន តែផ្ទុយទៅវិញ ខ្លួនត្រូវជាប់ឃុំនៅក្នុងទីតាំងឆបោកក្នុងអគារមួយ ដែលមន្ត្រីមូលដ្ឋានបានបង្ហាញថាជាកម្មសិទ្ធិរបស់លោក លី យ៉ុងផាត់។ នៅទីនោះ បុរសជនជាតិហ្វីលីពីនបាននិយាយថា ខ្លួនត្រូវបុរសប្រាំនាក់ទាត់ធាក់ ដាល់ និងវាយនឹងដំបង និងបំពង់ទីប នៅពេលដែលខ្លួនព្យាយាមរត់ចេញ។
ប្រព័ន្ធផ្សព្វផ្សាយក្នុងស្រុកបានរាយការណ៍កាលពីខែតុលាថា មានបុរសជនជាតិវៀតណាមម្នាក់បានលោតពីលើអគារផ្ទះល្វែងក្នុងបរិវេណរមណីយដ្ឋានអូរស្មាច់ ហើយក្រោយមកបានស្លាប់។ ក្នុងឆ្នាំ២០២០ សារព័ត៌មានក្នុងស្រុកផ្សេងទៀតបានរាយការណ៍ថា មានស្ត្រីជនជាតិចិនម្នាក់បានលោតសម្លាប់ខ្លួនពីជាន់ទី ២ នៃសណ្ឋាគារក្នុងបរិវេណតែមួយ។ សារព័ត៌មានក្នុងស្រុកបានរាយការណ៍កាលពីឆ្នាំ ២០១៨ ជនជាតិចិនពីរនាក់ និងស្ត្រីខ្មែរម្នាក់ត្រូវចាប់ខ្លួនពីបទលួចទូរសព្ទដៃចំនួន ១៤៣ គ្រឿងពីក្រុមហ៊ុនអនឡាញមួយ ដែលប្រតិបត្តិការនៅក្នុងរមណីយដ្ឋានអូរស្មាច់។
ការចុះបង្ក្រាបថ្មីៗនៅខេត្តព្រះសីហនុ៖ «គ្រាន់តែជាការសម្តែងឲ្យមើល?»
ការសង្គ្រោះជនរងគ្រោះនៅខេត្តឧត្តរមានជ័យបានធ្វើឡើង បន្ទាប់ពីការចុះបង្ក្រាបទ្រង់ទ្រាយធំចំនួនពីរដែលបានធ្វើឡើងដោយរដ្ឋាភិបាលកម្ពុជានៅខេត្តព្រះសីហនុកាលពីដើមខែនេះ។
អគ្គនាយកដ្ឋានអន្តោប្រវេសន៍កម្ពុជាបានបញ្ជាក់ក្នុងហ្វេសប៊ុកថា៖ «គោលដៅនៃប្រតិបត្តិការបង្រ្កាប គឺដើម្បីលុបបំបាត់ទីតាំងឆបោកតាមអនឡាញទាំងអស់ក្នុងខេត្តព្រះសីហនុ»។
នាយកដ្ឋានបានរាយការណ៍ថាបានរកឃើញជនបរទេសចំនួន១៧២ នាក់ក្នុងអំឡុងពេលចុះបង្ក្រាបនៅអតីតកាស៊ីណូប៉ារាដាយ អាយឡែន កាលពីថ្ងៃទី ៩ ខែមីនា។ មនុស្សដែលបានរកឃើញរួមមានជនជាតិវៀតណាមចំនួន១០៩ នាក់ ជនជាតិថៃចំនួន ៥៤ នាក់ ជនជាតិតៃវ៉ាន់ ៨ នាក់ និងជនជាតិចិនម្នាក់ដែលត្រូវបានបញ្ជូនទៅនាយកដ្ឋានអន្តោប្រវេសន៍ដើម្បីបណ្តេញចេញ។ ជនជាតិវៀតណាមទាំងនោះត្រូវបានបណ្តេញចេញកាលពីថ្ងៃទី១១ មីនា។ លើសពីនេះ អាជ្ញាធរបានបង្ហាញអត្តសញ្ញាណអ្នកគ្រប់គ្រងជនជាតិតៃវ៉ាន់៤នាក់ និងអ្នកគ្រប់គ្រងជនជាតិចិនម្នាក់ ដែលត្រូវបានបញ្ជូនទៅតុលាការខេត្ត។
ខេមបូចាបាននិយាយជាមួយអាជីវករ និងអ្នករត់កង់បី ដែលធ្វើការនៅខាងក្រៅអតីតកាស៊ីណូ ប៉ារាដាយ អាយឡែន កាលពីថ្ងៃទី១១ ខែមីនា។ អ្នកស្រុកបានរាយការណ៍ថា មានការភ្ញាក់ផ្អើលនៅពេលឮសំឡេងសារ៉ែន ខណៈដែលរថយន្តកងរាជអាវុធហត្ថ និងប៉ូលិសបានឡោមព័ទ្ធជុំវិញបរិវេណនេះ ហើយមន្ត្រីបានមកដល់ដោយកាន់កាំភ្លើងជ្រោងច្រាង។
អ្នកលក់កាហ្វេម្នាក់ដែលសុំមិនបញ្ចេញឈ្មោះដើម្បីជៀសវាងមានបញ្ហានៅថ្ងៃអនាគត បាននិយាយថា៖ «សមត្ថកិច្ចកាន់កាំភ្លើងគ្រប់ដៃ។ តើអ្នកណាមិនខ្លាច?» ។ អ្នកស្រីបានបន្ថែមថា៖ «នេះជាលើកដំបូងក្នុងជីវិតរបស់ខ្ញុំដែលឃើញរឿងបែបនេះ។ ដូចនៅក្នុងរឿងកុនអ៊ីចឹង នៅពេលដែលពួកគេស្ទុះចេញពីឡាន ដោយមានកាំភ្លើងគ្រប់ដៃ។ ពួកគេបានគំរាមថា បើ [អគារ] មិនបើកទ្វារទេនោះនឹងបាញ់តែម្តង»។
អ្នកស្រីបានបន្តថា កម្លាំងសមត្ថកិច្ចបានព្រមានអ្នកឈរមើលកុំឲ្យថតរូប ឬវីដេអូ បើមិនដូច្នេះទេពួកគេនឹងមានបញ្ហា។
ស្ត្រីម្នាក់ទៀតដែលលក់អាហារនៅទីនោះដែរបាននិយាយទាំងលាន់មាត់ថា៖ «គេមានកាន់កាំភ្លើងគ្រប់ដៃ។ មានមន្ត្រីម្នាក់បានសួរខ្ញុំថា ខ្លាចឬអត់។ ខ្ញុំបានប្រាប់គាត់ថា នេះជាលើកទីមួយរហើយដែលបានឃើញរឿងបែបនេះ»។
អ្នកបើកបរកង់បីម្នាក់ ដែលរត់កង់បីនៅតំបន់នោះ បានប្រាប់ ខេមបូចាថា ទីតាំងឆបោកនៅអតីតកាស៊ីណូ ប៉ារាដាយ អាយឡែន បានដំណើរការអស់រយៈពេលប្រាំមួយឆ្នាំមកហើយ ហើយជាកម្មសិទ្ធិរបស់មន្ត្រីយោធាដ៏មានឥទ្ធិពលម្នាក់។
លោកបានបន្តថា៖ «ទោះជាវាជាកម្មសិទ្ធិរបស់បុគ្គលមានអំណាចក៏ដោយ ក៏ពួកគេបានចុះបង្ក្រាបដែរ។ ប៉ុន្តែការចុះបង្ក្រាបនេះ គឺគ្រាន់តែជាការសម្តែងឲ្យយើងឃើញប៉ុណ្ណោះ។ វាជាអ្វីដែល [រដ្ឋាភិបាល] ចង់ឲ្យយើងឃើញ»។
តាមអគ្គនាយកដ្ឋានអន្តោប្រវេសន៍ ការចុះបង្ក្រាបមួយទៀតត្រូវបានធ្វើឡើងកាលពីថ្ងៃទី១០ ខែមីនា នៅទីតាំងមិនបញ្ចេញឈ្មោះក្នុងខេត្តព្រះសីហនុ ដែលសមត្ថកិច្ចបានរកឃើញជនជាតិខ្មែរចំនួន ២៧៩ នាក់។ ជនជាតិមីយ៉ាន់ម៉ាម្នាក់ និងជនជាតិចិន ២៧នាក់ក៏ត្រូវបានរកឃើញដែរ ហើយត្រូវបានបញ្ជូនទៅនាយកដ្ឋានអន្តោប្រវេសន៍ដើម្បីបណ្តេញចេញ។
ពលរដ្ឋមូលដ្ឋានបានប្រាប់អ្នកយកព័ត៌មានខេមបូចាថា ការចុះបង្រ្កាបលើកទី២ បានកើតឡើងនៅភូមិ៣ ភូមិ២ ក្នុងក្រុងព្រះសីហនុ។ អ្នករត់ម៉ូតូឌុប និងកង់បីនៅខាងក្រៅសណ្ឋាគារហួងគ័ន រីសត បាននិយាយថា ការចុះបង្ក្រាបទ្រង់ទ្រាយដ៏ធំមួយបានកើតឡើងនៅទីតាំងនេះកាលពីថ្ងៃទី១០ ខែមីនា។
មានប៉ូលិស និងកងរាជអាវុធហត្ថមួយចំនួននៅតែឈរជើងនៅខាងក្នុងសណ្ឋាគារកាលពីថ្ងៃទី១១ ខែមីនា ដោយមានរថយន្តប៉ូលិសចតនៅខាងក្រៅ។ អ្នកយកព័ត៌មានខេមបូចា បាននិយាយជាមួយអ្នករត់ម៉ូតូឌុប និងអ្នករត់កង់បី៣នាក់ ដែលរត់នៅតំបន់នោះ។
យោងតាមអ្នករត់ម៉ូតូឌុប នៅថ្ងៃចុះបង្ក្រាបនោះ មានរថយន្តប៉ូលិសជាច្រើន ហើយសមត្ថកិច្ចសុទ្ធតែកាន់កាំភ្លើងគ្រប់ដៃ គឺបានមកដល់សណ្ឋាគារហួងគ័ន រីសត។ រថយន្តក្រុងក៏បានមកដល់ដែរ បន្ទាប់ពីការចុះបង្ក្រាប ហើយបានដឹកកម្មករខ្មែរភាគច្រើនទៅកាន់ស្រុកកំណើតរបស់ពួកគេវិញ។ អ្នករត់ម៉ូតូឌុបម្នាក់ដែលសុំមិនបញ្ចេញឈ្មោះ ព្រោះខ្លាចមានបញ្ហាទៅថ្ងៃមុខជាមួយសមត្ថកិច្ច បាននិយាយថា ពលករខ្មែរខ្លះបានចេញពីបរិវេណមុនមន្ត្រីមកដល់។
អ្នករត់ម៉ូតូឌុបបាននិយាយថា ប្រតិបត្តិការឆបោកបានដំណើរការជិតមួយឆ្នាំមកហើយ ហើយមានប្រតិបត្តិការឆបោកតាមអនឡាញជាច្រើនទៀតដែលនៅតែដំណើរការនៅក្នុងតំបន់នេះ។ បុគ្គលិកមកពីសណ្ឋាគារបានប្រាប់អ្នករត់ម៉ូតូឌុបថា ពួកគេមិនទាន់បានបើកប្រាក់ខែនៅឡើយទេ។ បុគ្គលិកជាច្រើនមានអាយុចន្លោះពី ១៥ ទៅ២០ ឆ្នាំ ហើយបានប្រាប់អ្នករត់ម៉ូតូឌុបថា ពួកគេបានប្រឡងវិទ្យាល័យធ្លាក់។ ពួកគេមកពីខេត្តកំពង់ស្ពឺ ព្រៃវែង ស្វាយរៀង កំពង់ចាម កំពង់ឆ្នាំង និងកំពត។
អ្នករត់ម៉ូតូឌុបម្នាក់បាននិយាយថា៖ «អ្នកដែលរស់នៅក្នុងអគារកម្រឃើញចេញមកខាងក្រៅណាស់។ មានតែបុគ្គលិកខ្មែរពីរបីនាក់ប៉ុណ្ណោះដែលឃើញចេញចូល»៕
ប្រែសម្រួលពីអត្ថបទភាសាអង់គ្លេស Cambodian Authorities Dispute Thai Government’s Account of Scam Compound Rescue in O’Smach
