នាយករដ្ឋមន្រ្តី ហ៊ុន សែន បានបញ្ជាឱ្យរដ្ឋមន្រ្តីក្រសួងព័ត៌មានលុបអាជ្ញាបណ្ណស្ថាប័នសារព័ត៌មាន VOD បន្ទាប់ពីស្ថាប័ននេះបានចេញផ្សាយអត្ថបទមួយថា លោក ហ៊ុន ម៉ាណែត បានចុះហត្ថលេខាលើជំនួយទៅប្រទេសទួកគីជំនួស នាយករដ្ឋមន្ត្រី ហ៊ុន សែន ។ មុននឹងបញ្ជាឱ្យបិទ លោក ហ៊ុន សែន បានដាក់ឱសានវាទ ៧២ម៉ោង ប៉ុន្តែបង្រួមមកនៅត្រឹម២៤ម៉ោងវិញ ក្រោយពីលោកមិនទទួលយកពាក្យសូមអធ្យាស្រ័យ និងសូមអភ័យទោស ។
ការបិទស្ថាប័នព័ត៌មានឯករាជ្យមួយនេះបានធ្វើឱ្យមជ្ឈដ្ឋានជាតិនិងអន្តរជាតិសម្ដែងក្ដីបារម្ភយ៉ាងខ្លាំងអំពីការរឹតត្បិតសេរីភាពសារព័ត៌មាន សិទ្ធិបញ្ចេញមតិ និងការធ្លាក់ចុះនូវលទ្ធិប្រជាធិបតេយ្យនៅកម្ពុជា ខណៈការបោះឆ្នោតជ្រើសតាំងតំណាងរាស្ត្រ នីតិកាលទី៧ កាន់តែខិតជិតចូលមកដល់ ។ ទន្ទឹមនឹងនេះដែរ ការលុបអាជ្ញាបណ្ណនៃស្ថាប័នសារព័ត៌មាន វីអូឌី បាននាំមកនូវភាពសោកសៅក៏ដូចជាបណ្ដាលឱ្យបុគ្គលិកនិងអ្នករាយការណ៍ព័ត៌មានរាប់សិបនាក់បាត់បង់ការងារនិងបាត់ឱកាសបំពេញវិជ្ជាជីវៈជាអ្នកសារព័ត៌មានឯករាជ្យរបស់ខ្លួន ។
