សមាគមសម្ព័ន្ធអ្នកសារព័ត៌មានកម្ពុជា

រដ្ឋាភិបាលកម្ពុជាសន្យាថា ទីក្រុងនឹងមានទឹកស្អាតប្រើប្រាស់​១០០​ភាគរយនៅត្រឹមឆ្នាំ២០២៥

អាជ្ញាធរខណ្ឌព្រែកព្នៅ និងសង្កាត់គោករកា ចុះចែកទឹកដល់ប្រជាពលរដ្ឋ ដែលជួបប្រទះការខ្វះខាតទឹកច្រើនថ្ងៃនៅក្នុងបុរីពិភពថ្មីឈូកវ៉ា១ ភូមិភ្លូផ្អែម សង្កាត់គោករកា ខណ្ឌព្រែកព្នៅ រាជធានីភ្នំពេញ កាលពីថ្ងៃទី២៦ ខែមិនា ឆ្នាំ២០២៣ (ខេមបូចា/ ឃី សុវុឌ្ឍី)
អាជ្ញាធរខណ្ឌព្រែកព្នៅ និងសង្កាត់គោករកា ចុះចែកទឹកដល់ប្រជាពលរដ្ឋ ដែលជួបប្រទះការខ្វះខាតទឹកច្រើនថ្ងៃនៅក្នុងបុរីពិភពថ្មីឈូកវ៉ា១ ភូមិភ្លូផ្អែម សង្កាត់គោករកា ខណ្ឌព្រែកព្នៅ រាជធានីភ្នំពេញ កាលពីថ្ងៃទី២៦ ខែមិនា ឆ្នាំ២០២៣ (ខេមបូចា/ ឃី សុវុឌ្ឍី)

លោកនាយករដ្ឋមន្ត្រី ហ៊ុន សែន បានសន្យាថា ១០០ភាគរយនៃប្រជាពលរដ្ឋ ដែលរស់នៅ​តាម​ក្រុង និងទីប្រជុំជននានានៅក្នុង​ប្រទេសកម្ពុជានឹងមានទឹកស្អាតប្រើប្រាស់នៅត្រឹម​ឆ្នាំ​២០២៥។

នៅ​ក្នុង​​ពិធី​សម្ពោធដាក់​ឱ្យ​ប្រើ​​រោងចក្រ​ប្រព្រឹត្តិកម្ម​ទឹក​ស្អាតបាក់ខែង​កាលពី​ថ្ងៃ​ចន្ទ លោក ហ៊ុន សែន បាន​ថ្លែង​ថា រោងចក្រ​នេះ​ គឺជា​ជំហាន​ដំបូង​ក្នុង​ការ​ដោះស្រាយ​បញ្ហា​ផ្គត់ផ្គង់​ទឹក​ក្នុង​ប្រទេស។ រោងចក្រទីពីរគ្រោងនឹងបើកដំណើរការនៅឆ្នាំ២០២៤ ហើយរដ្ឋាភិបាល​កំពុង​ស្វែងរកជំនួយហិរញ្ញវត្ថុបន្ថែមទៀត ដើម្បីសាង​សង់រោងចក្រប្រព្រឹត្តិកម្មទឹកស្អាត​ច្រើន​ទៀត​។

លោក ហ៊ុន សែន បាន​មាន​ប្រសាសន៍ថា៖ «សម្រាប់​ប្រទេស​ដែល​មាន​សង្គ្រាម ​គឺ​មាន​តែ​ការ​បំផ្លិច​បំផ្លាញ​ ប៉ុន្តែ​ឥឡូវ ​សមិទ្ធផល​នៅ​ទីនេះ​អាច​និយាយ​បាន​ថា ​ជា​សមិទ្ធផល​ដ៏​អស្ចារ្យ​ដូច​ឯកឧត្តម ចម ប្រសិទ្ធ បាន​ប្រាប់​ខ្ញុំ​អីចឹង​​។ វា[រោងចក្រប្រព្រឹត្តិកម្មទឹកស្អាត] គឺជាសមិទ្ធិផល​ប្រវត្តិសាស្ត្រដែលមិនធ្លាប់មានពីមុនមក ហើយ[កម្ពុជា]មិនមានការផ្គត់ផ្គង់ទឹកស្អាត [បែបនេះ]​អស់រយៈពេលជាង១០០ឆ្នាំមកហើយ»

រោងចក្រប្រព្រឹត្តិកម្មទឹកស្អាតបាក់ខែង ចំណាយថវិកាសាងសង់អស់២៤៧លានដុល្លារ​។ ក្រៅ​ពី​ថវិកា​របស់​រដ្ឋាភិបាល​កម្ពុជា សហភាពអឺរ៉ុប​បានផ្តល់អំណោយចំនួន១៥លានដុល្លារ។ ទីភ្នាក់ងារបារាំងសម្រាប់ការអភិវឌ្ឍន៍ (AFD) និងធនា​គារ​វិនិយោគអឺរ៉ុបបានផ្តល់ ប្រាក់កម្ចី​ដល់​កម្ពុជាសម្រាប់​ចំណែក​ដែលនៅសល់​។

រោងចក្រប្រព្រឹត្តិកម្មទឹកស្អាតទី២ នឹងត្រូវចំណាយថវិកាប្រមាណ៣៨១លានដុល្លារអាមេរិក ចំណែកថ្លៃចំណាយ​លើ​គម្រោង​សាងសង់​​រោងចក្រទី៣ កំពុងស្ថិតក្នុងការចរចានៅឡើយ។

ការសម្ពោធដាក់ឱ្យ​ប្រើ​រោងចក្រប្រព្រឹត្តិកម្ម​ទឹកស្អាតថ្មីនេះ ធ្វើឡើង បន្ទាប់ពីមានការខ្វះខាត​ទឹក​ជា​ច្រើន​ឆ្នាំ ជាពិសេសនៅតំបន់ជាយក្រុង និងតាម​បុរីនានាក្នុងរាជធានីភ្នំពេញអំឡុង​រដូវប្រាំង។

របាយ​ការណ៍​របស់​រដ្ឋាករ​ទឹក​ស្វយ័ត​ក្រុង​ភ្នំពេញ​បញ្ជាក់​ថា ​មាន​ការ​ខ្វះខាត​ទឹក​ស្អាត​ក្នុង​ទីក្រុង​ចាប់​ពី​ឆ្នាំ​២០១៦​ដល់​ឆ្នាំ​២០២៣។ តម្រូវការទឹកបានកើនឡើងដល់ជាង ៨៩០ ០០០​ម៉ែត្រ​គូប​ក្នុងមួយថ្ងៃក្នុងឆ្នាំ២០២៣ ខណៈដែលសមត្ថភាពផលិតទឹកស្អាតរបស់រដ្ឋាករទឹក​មានត្រឹមតែ ៦៥០ ០០០ម៉ែត្រគូបក្នុងមួយថ្ងៃ។

របាយការណ៍ដដែលបញ្ជាក់ថា នៅឆ្នាំ២០២៤ ប្រជាពលរដ្ឋរាជធានីភ្នំពេញ និងក្រុងតាខ្មៅ នឹងមានទឹកប្រើប្រាស់គ្រប់គ្រាន់ ព្រោះរដ្ឋាករទឹកស្វយ័តក្រុងភ្នំពេញ នឹងអាចផលិតទឹកស្អាត​បាន​ជាង១លានម៉ែត្រគូបក្នុងមួយថ្ងៃ។

ទាហាន​ម្នាក់​បើក​ម៉ូតូ​ឆ្លង​កាត់មុខ​រោងចក្រ​ប្រព្រឹត្តិ​កម្ម​ទឹក​ស្អាត​បាក់ខែង នៅ​​ជាយ​រាជធានី​ភ្នំពេញ ដែលសម្ភោធដាក់ឱ្យប្រើប្រាស់កាល​ពី​ថ្ងៃ​ទី​១៩ ខែ​មិថុនា ឆ្នាំ​២០២៣។ (ខេមបូចា​/​ ព្រីង សំរាំង)

លោក ឡុង ណារ៉ូ ប្រធាន​រដ្ឋាករ​ទឹក​ស្វយ័ត​ក្រុង​ភ្នំពេញ មិន​អាច​ទាក់​ទង​សុំ​ការ​បំ​ភ្លឺ​​បាន​ទេ។

លោក ហ៊ុន សែន មានប្រសាសន៍ថា ទោះបីជាកម្ពុជាកំពុងអភិវឌ្ឍប្រព័ន្ធទឹកនិងអគ្គិសនីឱ្យ​កាន់​តែទូលំទូលាយក៏ដោយ ក៏ការប្រើប្រាស់នៅ​ក្នុង​ប្រទេសកម្ពុជា​នៅតែបន្តកើនឡើង ខណៈ​ដែលចំនួនប្រជាជនកើនឡើង។

លោក ហ៊ុន សែន បាន​មាន​ប្រសាសន៍​ថា៖ «ខ្ញុំ​អាច​និយាយ​បាន​ថា អតុល្យភាព​នៃ​តម្រូវ​ការ​ទឹក​ស្អាត​នៅ​តែ​កើត​មាន ហេតុ​ដូច្នេះ​ហើយ​បាន​ជា​យើង​ត្រូវ​បន្ត​ការ​សាង​សង់ ​ដើម្បី​បំពេញ​តម្រូវ​ការ»

លោក ហ៊ុន សែន បាន​មាន​ប្រសាសន៍ថា រដ្ឋាភិបាលបានចាត់ទុកគោលនយោ​បាយ​ទឹក​សម្រាប់​​ពលរដ្ឋ​ក្រីក្រ ដែល​ក្នុងនោះ អ្នកដែលប្រើប្រាស់ទឹករហូតដល់ ៧ម៉ែត្រគូបនឹងត្រូវគិត​ថ្លៃតែ៤០០រៀលប៉ុណ្ណោះក្នុងមួយម៉ែត្រគូប។ អ្នក​ដែល​ប្រើ​ពី៨ទៅ១៥​ម៉ែត្រ​គូបនឹង​ត្រូវ​គិត​ថ្លៃ​ខ្ពស់​ជាងនេះ​ គឺ​៧២០​រៀល​ក្នុង​មួយ​ម៉ែត្រ​គូប។

លោក​បន្ត​ថា ប្រសិន​បើ​កម្ពុជា​គ្មាន​សមត្ថភាព​ផ្គត់ផ្គង់​ទឹក នោះ​នឹង​មិន​មាន​អគារ​ខ្ពស់ៗ​នោះ​ទេ។

លោក ហ៊ុន សែន មានប្រសាសន៍ថា៖ «ខ្ញុំជឿជាក់ថា ដោយ​មាន​ទឹកប្រើ​ប្រាស់​នៅពេលនេះ បូក​នឹងទឹកដែលមាននៅឆ្នាំក្រោយ វានឹងដោះស្រាយបញ្ហាទឹកនៅតាម​បុរី ដែលកំពុង​បន្ត​សាង​សង់ និងកាត់បន្ថយការជីកអណ្តូង»

អ្នកស្រី សួន រ៉ាមី ប្រជាពលរដ្ឋនៅសង្កាត់សំរោងក្រោម ខណ្ឌពោធិ៍សែនជ័យ មាន​ប្រសាសន៍​ថា គ្មានទឹកស្អាតនៅតំបន់របស់អ្នកស្រី​ អំឡុង​រដូវប្រាំង ដែលនេះ​ជាបញ្ហា​ប្រឈម​សម្រាប់​គ្រួសារ​អ្នកស្រី​។ អ្នកស្រីរំពឹងថា រោងចក្រប្រព្រឹត្តិទឹក​ស្អាតបាក់ខែង នឹងជួយដោះស្រាយ​បញ្ហា​កង្វះទឹកនៅតំបន់ជាយក្រុងក្នុងរដូវប្រាំងខាងមុខ។

អ្នកស្រី​បន្ត​ថា៖​ «រដូវប្រាំង​ឆ្នាំ​ទៅ​ មុនចូល​​ឆ្នាំ​ថ្មី​ អត់​មាន​ទឹក​ទេ។ វា​ពិបាក​ណាស់​យើង​​បារម្ភ ប៉ុន្តែ​​ដោយ​មាន​​រោងចក្រ​ផលិត​ទឹក​ថ្មី ខ្ញុំ​សង្ឃឹម​ថា ​យើង​នឹង​មាន​ទឹក​គ្រប់គ្រាន់​​»

លោក សឿង សារ៉ន​ នាយកប្រតិបត្តិសមាគមធាងត្នោត (STT) មានប្រសាសន៍ថា លោកគិត​ថា រដ្ឋាភិបាលកំពុងខិតខំផ្តល់ទឹកស្អាតដល់រាជធានីភ្នំពេញ។

លោក​បន្តថា រដ្ឋាករទឹកស្វយ័ត និងក្រសួងពាក់ព័ន្ធ ទទួលខុសត្រូវ​ពិនិត្យមើល​រាល់​គម្រោង​សាងសង់ ដូចជា បុរី ដើម្បីដឹងថា កម្រិតនៃការផ្គត់ផ្គង់ទឹកអាចឆ្លើយតបនឹងតម្រូវការ​ប្រើ​ប្រាស់​របស់ប្រជាពលរដ្ឋ។

លោក សារ៉ន បានមានប្រសាសន៍ថា៖ «គួរតែមានការ​កំណត់ជាក់លាក់មួយ ដើម្បីចៀសវាង​ការ​បង្កើន​បរិមាណប្រើប្រាស់ ខណៈដែលសមត្ថភាពផ្គត់ផ្គង់ទឹកមានកម្រិត ដូច្នេះ[រដ្ឋាភិបាល]​គួរតែពិគ្រោះជាមួយភាគីពាក់ព័ន្ធអំពីការផ្គត់ផ្គង់ទឹក»

លោក យ៉ង គិមអេង ប្រធាន​មជ្ឈមណ្ឌល​ប្រជាពលរដ្ឋ​ដើម្បី​អភិវឌ្ឍន៍ និង​សន្តិភាពជឿថា ការ​បង្កើត​រោងចក្រ​ប្រព្រឹត្តិកម្ម​ទឹក​ស្អាតនៅ​កម្ពុជា គឺ​ជា​សមិទ្ធផល​ដែល​គួរ​ឱ្យ​ស្វាគមន៍។

លោក​បាន​បន្ត​ថា ប៉ុន្តែ​អ្វី​ដែល​សំខាន់​ ដើម្បី​​ពិចារណា​នោះ​គឺ​ថាតើ​រោងចក្រ​ប្រព្រឹត្តិកម្ម​ទឹក​ស្អាត​​​អាច​បំពេញ​តម្រូវការ​របស់​ប្រជាពលរដ្ឋ​បាន​ឬ​អត់។ រោងចក្រ​ប្រព្រឹត្តិកម្ម​ទឹកស្អាត​ប្រឈម​នឹងហានិភ័យធំនៃការខ្វះខាតទឹក ជាពិសេសនៅរដូវប្រាំង ប្រសិនបើទឹកស្រកចុះ ឬរីងស្ងួតតាមដងទន្លេមេគង្គនិងទន្លេសាប។

លោក គិមអេង មានប្រសាសន៍ថា៖ «ទន្លេមេគង្គ ឬទន្លេសាប កំពុងប្រឈមនឹងភាពរីង​ស្ងួត ហើយមិនអាចប្រើប្រាស់សម្រាប់ផលិតទឹកស្អាតបាន​ទេ ដែលនេះ គឺ​ជាបញ្ហាប្រឈមដ៏ធំ»

លោក គិមអេង បានថ្លែងថា ការខ្វះខាតទឹកនៅតាមបុរីមួយចំនួន ជាពិសេសអគារដែល​ទើបនឹង​សាងសង់ថ្មី កើតឡើងស្ទើរតែរាល់ថ្ងៃនៅក្នុងរាជធានីភ្នំពេញ និងតំបន់ជុំវិញ​មួយ​ចំនួន។ លោកបន្តថា ម្ចាស់គម្រោងបុរីទាំងអស់គួរតែសហការ​ជាមួយរដ្ឋាករទឹកស្វយ័ត ដើម្បី​ឱ្យរដ្ឋអាចពិចារណាពីលទ្ធភាពនៃការបង្កើតប្រព័ន្ធទឹកស្អាត ដើម្បីបំពេញតម្រូវការក្នុងតំបន់។

លោក គិមអេង បាន​បន្ថែម​ថា៖ «រដ្ឋាភិបាល​ត្រូវ​សិក្សា​ពី​ការ​រីកលូត​លាស់​​បុរី​នៅ​ពេល​អនាគត រួម​ទាំង​កន្លែង​ណា ​ដែល​​ត្រូវ​ការ​ទឹក និង​ភ្លើងចាំបាច់​ និង​ថា តើ​ផ្តល់​ជូន​ពួក​គាត់​តាម​របៀប​ណា​​»

ប្រែសម្រួលពីអត្ថបទភាសាអង់គ្លេស៖ Cambodian Government Promises ​Cities 100% Clean Water by 2025

270 views

ព័ត៌មានទាក់ទង

ព័ត៌មានថ្មីៗ

អត្ថបទពេញនិយម