ក្រុមកីឡាករ កីឡាការិនីហាប់គីដូកម្ពុជា បានរួមគ្នាបង្កើតប្រវត្តិសាស្រ្តដ៏ត្រចះត្រចង់ដែលគ្រប់គ្នាស្ទើរតែមិនចង់ជឿ គឺការដណ្តើមបានមេដាយសរុបចំនួន៤០ ពីការប្រកួតកីឡាហាប់គីដូជ្រើសរើសជើងឯកពិភពលោក (World I.H.F Hapkido Championship 2024) នៅប្រទេសថៃ ហើយពួកគេបាននាំយកមេដាយដ៏មានតម្លៃទាំងនេះ មកដល់មាតុប្រទេសវិញ កាលពីថ្ងៃទី៦ ខែសីហា។
បើទោះបីជាក្រុមកីឡាហាប់គីដូកម្ពុជា ទើបទទួលបានឱកាសចេញទៅប្រកួតនៅលើឆាកអន្តរជាតិ ជាលើកដំបូង ក្រោយរង់ចាំអស់រយៈពេលជាង៥០ឆ្នាំ ធ្វើឱ្យពួកគេមានការបារម្ភទៅលើបែបបទ និងបទបញ្ជានៃការប្រកួត ប៉ុន្តែជាលទ្ធផលក្រុមនេះ បានបង្កើតឱ្យមានការភ្ញាក់ផ្អើលខ្លាំង ដោយបានឈ្នះមេដាយសរុប៤០ ក្នុងនោះមានមេដាយមាស១២ ប្រាក់១៣ និងសំរឹទ្ធ១៥។
តាមរយៈការប្រកួត World I.H.F Hapkido Championship 2024 ដោយបានចាប់ផ្តើមពីថ្ងៃទី២ និងបានបញ្ចប់កាលពីថ្ងៃទី៤ ខែសីហា គឺក្រុមអត្តពលិកទាំង១៩នាក់ (ស្រី៨នាក់) បានឈ្នះមេដាយគ្រប់ៗគ្នាសរុបចំនួន៤០ ដើម្បីឈរនៅលេខ២ បន្ទាប់ពីម្ចាស់ផ្ទះថៃ ខណៈការប្រកួតនេះ មានអត្តពលិកចូលរួម៦៤៩នាក់ មកពី១២ប្រទេស រួមមានសហរដ្ឋអាមេរិក ប្រេស៊ីល អូស្រ្តាលី អាល្លឺម៉ង់ អ៊ីរ៉ង់ ឥណ្ឌា កូឡុំប៊ី កម្ពុជា មីយ៉ាន់ម៉ា ឡាវ នេប៉ាល់ និងម្ចាស់ផ្ទះថៃ ដែលមានក្រុមអត្តពលិកច្រើនជាងគេ។
ក្រុមអត្តពលិកហាប់គីដូកម្ពុជា ភាគច្រើនឈ្នះបានមេដាយចន្លោះពី២ដល់៤គ្រឿង និងមានកីឡាករវ័យក្មេងម្នាក់ ឈ្នះមេដាយ៥តែម្នាក់ឯង។ ជាមួយលទ្ធផលដ៏ល្អនេះ បានធ្វើឱ្យគ្រប់គ្នា មានការភ្ញាក់ផ្អើល និងបានអបអរសាទរយ៉ាងក្លៀវក្លា នៅពេលក្រុមហាប់គីដី បាននាំយកមេដាយទាំង៤០ និងពានកិត្តិយស មកដល់ពហុកីឡដ្ឋានជាតិអូឡាំពិក កាលពីល្ងាចថ្ងៃអង្គារ។
លោក គង់់ ចាន់ធីណា គ្រូបង្វឹកសហព័ន្ធខ្មែរកីឡាហាប់គីដូ បាននិយាយថា៖ «មុនការប្រកួត យើងសង្ឃឹមក្នុងចិត្តថា ឱ្យតែបានមេដាយមាស២ ឬ៣ គឺយើងគ្រាន់បើហើយ ព្រោះនេះជាលើកដំបូង ដែលយើងបានប្រកួតលើឆាកអន្តរជាតិ ប៉ុន្តែលទ្ធផលជាក់ស្តែងក្នុងពេលប្រកួត យើងដណ្តើមបានមេដាយរហូតដល់៤០»។
តាមរយៈការប្រកួតនេះ លោក គង់ ចាន់ធីណា មើលឃើញថា ក្រុមកីឡាហាប់គីដូកម្ពុជា មានសមត្ថភាពប្រកួតប្រជែងខ្ពស់មិនចាញ់គេទេ។ បើទោះបីជាក្រុមនេះ ទើបទទួលបានឱកាសចូលរួមប្រកួត នៅលើឆាកអន្តរជាតិ លើកដំបូង ប៉ុន្តែ លោក ចាន់ធីណា ថា ក្រុមកម្ពុជា ធ្វើបានល្អ នៅលើវិញ្ញាសាលោតកម្ពស់ និងលោតចម្ងាយ ហើយអ្វីដែលធ្វើឱ្យបរទេសភ្ញាក់ផ្អើលនោះ គឺសមត្ថភាពប្រកួតរបស់ក្រុមកីឡាករ កីឡាការិនីក្មេងៗរបស់កម្ពុជា។
លោកបានបញ្ជាក់ថា៖ «ប្រទេសជាច្រើន មានការស្ងើចសរសើរពីកម្ពុជាយើង ដែលមានក្មេងតូចៗចូលរួមច្រើន ហើយលក្ខណៈបច្ចេកទេសប្រកួត គឺពួកគាត់ធ្វើបានក្នុងលទ្ធផលល្អ ហើយអ្វីដែលកាន់តែពិសេសនោះ គឺកីឡាករវ័យ១២ឆ្នាំរបស់យើងម្នាក់ បានឈ្នះមេដាយ៥តែម្នាក់ឯង និងទទួលបានពានសរសើរជាកីឡាករឆ្នើម និងមានក្រមសីលធម៌ល្អ»។
ការលើកឡើងបែបនេះរបស់លោក គង់ ចាន់ធីណា គឺសំដៅទៅលើកីឡាករវ័យក្មេង សុខុន សីហនុត ដែលដណ្តើមបានមេដាយមាស៤ និងសំរឹទ្ធ១ ពីការប្រកួតទាំង៥វិញ្ញាសារបស់ខ្លួន ចំណែក សីហនុត ក៏មានការភ្ញាក់ផ្អើលចំពោះខ្លួនឯង ដែលធ្វើបានយ៉ាងល្អបំផុត ទោះទើបចូលហ្វឹកហាត់កីឡាហាប់គីដូបាន២ឆ្នាំ។
សីហនុត ដែលឈ្នះបានមេដាយមាសលើវិញ្ញាសាលោតចម្ងាយ លោតកម្ពស់ ប្រយុទ្ធ និងស្នៀតការពារខ្លួន (ស្រី១ ប្រុស១) និងបានមេដាយសំរឹទ្ធលើវិញ្ញាសាស្នៀតការពារខ្លួន (ប្រុស២នាក់) បាននិយាយថា៖ «ខ្ញុំមិនសង្ឃឹមថា ខ្លួនឯងទទួលបានមេដាយច្រើនដល់ថ្នាក់ហ្នឹងទេ ប៉ុន្តែខ្ញុំបានប្រឹងប្រែងហ្វឹកហាត់ខ្លាំង និងតាំងចិត្តថា គេមិនខ្លាំងជាងយើងទេ គឺមានតែយើងខ្លាំងជាងគេ»។
ជាមួយគ្នានេះ សុខុន សីហនុត ដែលទើបហាត់បានខ្សែក្រវាត់ក្រហមនោះ បានរំឭកទៅដល់ការប្រកួតវិញ្ញាសាប្រយុទ្ធ ដែលរូបគេបានយកឈ្នះកីឡាករថៃចំនួន២នាក់ ជាពិសេសបានយកឈ្នះកីឡាករខ្សែក្រវាត់ខ្មៅ៣ដាន់របស់ម្ចាស់ផ្ទះ នៅវគ្គផ្តាច់ព្រ័ត្រ ដើម្បីឈ្នះបានមេដាយមាស។
កីឡាករវ័យ១២ឆ្នាំរូបនេះ បានបញ្ជាក់ថា៖ «ខ្ញុំបានវ៉ៃឈ្នះកីឡាករខ្សែក្រវាត់ខ្មៅរបស់ថៃ ព្រោះគាត់តូចជាងខ្ញុំបន្តិច ដល់អ៊ីចឹងខ្ញុំមានប្រៀបវាយគាត់ចូលច្រើន ហើយការឈ្នះមេដាយចំនួន៥លើកនេះ ធ្វើឱ្យខ្ញុំកាន់តែមានទឹកចិត្តហ្វឹកហាត់។ បើមានការប្រកួតក្រោយៗទៀត ខ្ញុំរំពឹងថា ខ្ញុំនឹងដណ្តើមបានមេដាយច្រើនជាងនេះទៀត»។
ចំណែកកីឡាការិនីវ័យក្មេងជាបងប្អូនបង្កើត រិទ្ធ ដាយអ៊ែណា និង រិទ្ធ ច័ន្ទធើរីហ្សា ក៏បានបង្ហាញពីមោទនភាព ដែលអ្នកទាំង២ ដណ្តើមបានមេដាយមាស ពីការប្រកួតជើងឯកពិភពលោកលើកនេះ ក្នុងនោះ ដាយអ៊ែណា ជាបងស្រី បានឈ្នះមេដាយមាស១ និង ច័ន្ទធើរីហ្សា ឈ្នះបានមេដាយមាស២ ហើយអ្នកទាំង២នេះ បានប្រកួត៣វិញ្ញាសាដូចគ្នា។
លោក ឃីម ណារិទ្ធ ជាប្រតិភូរង និងជាឪពុករបស់អ្នកទាំង២នេះ បាននិយាយថា៖ «ខ្ញុំបានប្រាប់កូនខ្ញុំថា ការប្រកួតនេះ យើងមិនរំពឹងបានមេដាយមាសអ្វីទេ គឺទៅមើលគេ ថាតើនៅខាងក្រៅមានការរៀបចំបែបម៉េច ដើម្បីយើងរៀនពីគេ ប៉ុន្តែជាប្រវត្តិសាស្រ្ត យើងធ្វើបានល្អ ហើយបានមេដាយមាសច្រើន។ ខ្ញុំមានអារម្មណ៍ថា កូនខ្ញុំ និងអត្តពលិករបស់យើងផ្សេងទៀត ធ្វើបានល្អជាងអត្តពលិកមកពីបណ្តាប្រទេសនានា»។
តែទោះបីជាយ៉ាណា ការទៅចូលរួមការប្រកួត World I.H.F Hapkido Championship 2024 នៅប្រទេសថៃនេះ សហព័ន្ធខ្មែរកីឡាហាប់គីដូ មិនទទួលបានលិខិតឧទ្ទេសនាមជាផ្លូវការពីក្រសួងអប់រំ យុវជន និងកីឡានោះទេ ហេតុនេះការប្រឹងប្រែងដោយចំណាយទាំងកម្លាំងកាយចិត្ត ពេលវេលា និងថវិកាផ្ទាល់ខ្លួន ដើម្បីរួមគ្នាជ្រោងទង់ជាតិកម្ពុជា តាមរយៈការឈ្នះមេដាយសរុប៤០ នៅលើឆាកអន្តរជាតិរបស់ក្រុមហាប់គីដូ នឹងមិនទទួលបានប្រាក់រង្វាន់ពីក្រសួងអប់រំ ដូចប្រភេទកីឡាផ្សេងៗនោះទេ។
យ៉ាងណាក៏ដោយលោក គួច ហុងជៀក អនុប្រធានសហព័ន្ធខ្មែរកីឡាហាប់គីដូ បានទទួលស្គាល់ថា ផ្នែករដ្ឋបាលរបស់សហព័ន្ធ នៅមានកម្រិត និងមានធនធានតិច ធ្វើឱ្យការទំនាក់ទំនង និងការបំពេញបែបបទមួយចំនួននៅមិនទាន់បានល្អ និងយឺតយ៉ាវខ្លះ ដែលសុំឱ្យក្រសួងអប់រំ យុវជន និងកីឡា ក៏ដូចជានាយកដ្ឋានអប់រំកីឡា មានការអធ្យាស្រ័យផង។ ប៉ុន្តែលោកអះអាងថា សហព័ន្ធនឹងប្រឹងប្រែងពង្រឹងផ្នែករដ្ឋបាលឡើងវិញ ដើម្បីធ្វើការងារជាមួយខាងក្រសួងអប់រំ ឱ្យបានជិតស្និទ្ធ ព្រោះការព្យាយាមរបស់កីឡាហាប់គីដូមកដល់ពេលនេះ គឺដើម្បីមុខមាត់ជាតិ។
លោកបានថ្លែងថា៖ «ទោះបីជាយើងមានការខិតខំ និងជឿជាក់លើខ្លួនឯង ប៉ុន្តែអ្វីៗជាទីសង្ឃឹម គឺថ្នាក់ជាតិ ព្រោះអ្វីដែលពួកយើងខំប្រឹងធ្វើ មិនមែនសម្រាប់តែពួកយើងខ្ញុំជាកីឡាករ កីឡាការិនី គ្រូបង្វឹក និងថ្នាក់ដឹកនាំសហព័ន្ធទេ ប៉ុន្តែយើងសង្ឃឹមថា យើងនឹងនាំកិត្តិយស និងលើកទង់ជាតិរបស់យើងទៅអន្តរជាតិ ហើយពេលនេះយើងធ្វើបានហើយ ដោយក្រុមអត្តពលិកយើងបាននាំយកមេដាយដ៏ប្រសើរជូនជាតិ»។
ជាមួយគ្នានេះ ហុងជៀក បានប្តេជ្ញាចិត្តខ្ពស់ ក្នុងការជម្នះការពិបាកជាបន្តទៀត ដើម្បីរុញឱ្យសហព័ន្ធខ្មែរកីឡាហាប់គីដូ ក្លាយជាសហព័ន្ធមួយ ដែលនឹងអាចទទួលបានកញ្ចប់ថវិកាប្រចាំឆ្នាំពីក្រសួងអប់រំ ដូចសហព័ន្ធកីឡាជាតិចំនួន៤៨ទៀត។ លោកបានចាត់ទុកការបង្ហោះសារអបអរសាទរពីសំណាក់លោកនាយករដ្ឋមន្រ្តី ហ៊ុន ម៉ាណែត ចំពោះការឈ្នះមេដាយចំនួន៤០របស់ក្រុមហាប់គីដូ កាលពីថ្ងៃអង្គារ ជាសញ្ញាដ៏ល្អមួយ ដែលនឹងជួយឱ្យប្រជនជនកម្ពុជា ស្គាល់កីឡាហាប់គីដូកាន់តែច្រើន ហើយក្រសួងអប់រំ ក៏នឹងមើលឃើញពីការប្រឹងប្រែងរបស់ក្រុមហាប់គីដូ។
លោកបញ្ជាក់ថា៖ «យើងមានឆន្ទៈយ៉ាងមោះមុត ចូលរួមកម្មវិធីជាតិ និងអន្តរជាតិផ្សេងៗទៀត ហើយយើងសង្ឃឹមថា ក្រសួងនឹងមើលឃើញពីការព្យាយាមរបស់យើង បន្ទាប់ពីយើងទទួលបានផ្លែផ្កាជាមេដាយយ៉ាងច្រើននេះ ដោយមានការផ្សព្វផ្សាយយ៉ាងទូលំទូលាយ ពិសេសយើងបានទទួលសារអបអរសាទរពីសម្តេចមហាបវរធិបតី អ៊ីចឹងសារនេះបានធ្វើឱ្យប្រជាជនយើងបានមើលឃើញច្រើនហើយ ហេតុនេះមិនថា (យើងនឹងទទួលបានការឧបត្ថម្ភពីក្រសួង)យូរ ឬឆាប់ទេ ប៉ុន្តែពន្លឺបានដុះហើយ»។
ជុំវិញការមិនទាន់ទទួលបានការគាំទ្រពីក្រសួងអប់រំនេះដែរ លោក គង់ ចាន់ធីណា បានបញ្ជាក់ថា៖ «សហព័ន្ធខ្មែរកីឡាហាប់គីដូ បានតស៊ូអស់រយៈពេលជាច្រើនឆ្នាំហើយ អ៊ីចឹងការមិនទាន់ទទួលបានការឧបត្ថម្ភពីក្រសួងអប់រំ វាមិនប៉ះពាល់ដល់អារម្មណ៍កីឡាករ កីឡាការិនីយើងទេ ប៉ុន្តែបើមានការជួយឧបត្ថម្ភ និងគាំទ្រខ្លះ វានឹងធ្វើឱ្យការអភិវឌ្ឍវិស័យកីឡាហាប់គីដូ មានដំណើរការលឿនជាងហ្នឹងបន្តិច»។
ចំណែកកីឡាករ ធៀង សុចិត្រា ដែលបានចូលហាត់កីឡាហាប់គីដូ តាំងពីឆ្នាំ២០០៧មកនោះ ក៏មិនបានបង្ហាញអារម្មណ៍ឈឺចាប់ ឬបាក់ទឹកចិត្ត ទោះមិនមានតម្រុយ ក្នុងការទទួលបានប្រាក់រង្វាន់ពីក្រសួងអប់រំ ចំពោះការឈ្នះមេដាយមាស១ នាការចេញទៅប្រកួតកីឡាហាប់គីដូជើងឯកពិភពលោក លើកដំបូងនេះ។
កីឡាករខ្សែក្រវាត់ខ្មៅ២ដាន់រូបនេះ និយាយថា៖ «ចំពោះបញ្ហានេះ ខ្ញុំក៏ដូចជាអត្តពលិកផ្សេងទៀត បានត្រៀមចិត្តទុកជាមុនរួចហើយ។ ទោះបីជាយើងមិនទទួលបានការជួយពីស្ថាប័នណាមួយ ប៉ុន្តែពួកយើងបានប្រឹងប្រែងធ្វើអស់ពីសមត្ថភាព ចេញពីទឹកចិត្តរបស់ពួកយើង ដើម្បីចង់លើកទង់ជាតិប្រទេសនៅលើឆាកអន្តរជាតិ»។
ប៉ុន្តែកំលោះវ័យ៣០ឆ្នាំ សុចិត្រា បន្ថែមថា៖ «តាមរយៈលទ្ធផលដ៏ល្អ ដែលយើងទទួលបានពេលនេះ ខ្ញុំគិតថា ក្រសួងអប់រំ ក៏ដូចថ្នាក់ដឹកនាំ នឹងមើលឃើញពីការខិតខំរបស់ពួកយើង ដែលបានប្រឹងប្រែងអស់ពីកម្លាំងកាយចិត្ត និងថវិកាផ្ទាល់ខ្លួន ដើម្បីកាន់ទង់ជាតិកម្ពុជាបង្ហាញឱ្យបរទេសបានឃើញ ហេតុនេះខ្ញុំសង្ឃឹមថា ពួកគាត់ នឹងផ្តល់នូវកញ្ចប់ថវិកាណាមួយដល់ក្រុមហាប់គីដូយើង ដើម្បីពង្រឹងការហ្វឹកហាត់ត្រៀមប្រកួតលើកមុខមាត់ជាតិជាបន្តទៀត»។
ជាមួយគ្នានេះ លោក ឃីម ណារិទ្ធ បានឱ្យដឹងថា ការប្រកួត World I.H.F Hapkido Championship ប្រចាំឆ្នាំ២០២៥ នឹងធ្វើនៅប្រទេសកូរ៉េ ដែលលោកជឿថា នឹងមានប្រទេសចូលរួមច្រើនជាងការធ្វើនៅប្រទេសថៃ ហើយវាក៏ជាឱកាសសម្រាប់ក្រុមហាប់គីដូកម្ពុជា អាចមានឱកាសបានសាងល្បងជាមួយក្រុមអត្តពលិកមកពីអឺរ៉ុប ដើម្បីទទួលបានបទពិសោធន៍ថ្មីៗបន្ថែមទៀត។
ប៉ុន្តែលោកបង្ហើបថា ការចេញទៅប្រកួតនៅកូរ៉េ អាចនឹងមានការចំណាយច្រើនជាងការចេញទៅប្រកួតនៅថៃ ហេតុនេះលោកបានដាក់ក្តីសង្ឃឹមថា រាជរដ្ឋាភិបាលកម្ពុជា ក៏ដូចជាក្រសួងអប់រំ នឹងរួមចំណែកជួយគាំទ្រដល់ក្រុមហាប់គីដូ ដើម្បីឱ្យក្រុមនេះមានការហ្វឹកហាត់ត្រៀមបានពេញលេញ ឈានទៅដណ្តើមយកមេដាយជូនជាតិកាន់តែច្រើន ព្រោះក្រុមហាប់គីដូកម្ពុជា មានសមត្ថភាពមិនចាញ់គេទេ។
លោកបញ្ជាក់ថា៖ «តាមពិតការប្រកួតនៅថៃ យើងធ្វើបានល្អហើយ គ្រាន់តែពេលខ្លះវាខុសទៅនឹងបទបញ្ជា និងវិន័យប្រកួតរបស់គេ អ៊ីចឹងបើយើងដឹងមុនថា មានការឧបត្ថម្ភពីរាជរដ្ឋាភិបាល យើងនឹងចាប់ផ្តើមហាត់ត្រៀមពីពេលនេះទៅ ដោយត្រូវពង្រឹងបន្ថែមទាំងលើសមត្ថភាព និងការងារបច្ចេកទេស ហើយខ្ញុំជឿថា យើងនឹងទទួលបានលទ្ធផលកាន់តែល្អ ព្រោះទាំងកូនខ្ញុំ និងអត្តពលិកផ្សេងៗទៀត នឹងប្រឹងប្រែងកាន់តែខ្លាំង ក្នុងការឈានទៅដណ្តើមយកមេដាយមាសជូនជាតិ នៅកូរ៉េ»៕
