ចំនួនពលករខ្មែរត្រឡប់ពីប្រទេសថៃបន្តកើនឡើង

ពលករខ្មែរដើរចូលក្នុងមណ្ឌលធ្វើចត្តាឡីស័កក្នុងស្រុកភ្នំស្រុក ខេត្តបន្ទាយមានជ័យ ថ្ងៃទី១៦ ខែសីហា ឆ្នាំ២០២១។ រូបភាពផ្ដល់ឲ្យ
ពលករខ្មែរដើរចូលក្នុងមណ្ឌលធ្វើចត្តាឡីស័កក្នុងស្រុកភ្នំស្រុក ខេត្តបន្ទាយមានជ័យ ថ្ងៃទី១៦ ខែសីហា ឆ្នាំ២០២១។ រូបភាពផ្ដល់ឲ្យ

ពលករខ្មែរជា​ច្រើន​នាក់​បន្ត​ធ្វើ​ដំណើរ​ត្រឡប់​ពី​ប្រទេស​ថៃ​​ចូលទឹក​ដី​កម្ពុជា​វិញ បន្ទាប់​ពី​កម្ពុជាបាន​បើកច្រកព្រំដែន​​ឡើង​វិញ ដោយគ្រាន់​តែនៅថ្ងៃអាទិត្យ​កន្លង​ទៅ​មាន​ពល​ករ​រហូត​ដល់​ជាង​ ១៤០០​នាក់​បាន​មក​ដល់​ខេត្ត​បន្ទាយ​មាន​ជ័យ​។

លោក សេក សុខុម ប្រធានមន្ទីរព័ត៌មាន​ខេត្ត​មន្ទាយ​មាន​ជ័យ​បាន​ប្រាប់​ខេមបូចា នៅថ្ងៃចន្ទ​ថា ព​លករ​ខ្មែរ​ជា​ច្រើន​ដែល​ត្រឡប់​មក​ស្រុក​វិញ​នេះ​ដោយសារតែ​កន្លែង​ការងារ​បាន​ផ្អាក​ដំណើរ​ការ និង​ខ្លះទៀត​គេច​ចេញពី​ការ​ផ្ទុះ​រាល​ដាល​ខ្លាំង​នៃជំងឺ​កូវីដ-១៩ នៅ​ក្នុង​ប្រទេស​ថៃ​។​

លោកមាន​ប្រសាសន៍ថា៖ «ពលករ​ខ្មែរ​ដែល​ត្រឡប់​មកពី​ប្រទេស​ថៃ​មាន​ចំនួន​កើន​ឡើង​ពី​មួយ​ថ្ងៃទៅ​មួយ​ថ្ងៃ​តាំងពី​មាន​ការ​បើក​ព្រំ​ដែន​ឡើង​វិញ»។

លោក ឲ្យ​ដឹង​ទៀត​ថា បើសិន​ចំនួន​នេះ​នៅ​តែ​បន្ត​កើន​ឡើង អាជ្ញាធរ​ខេត្ត​អាច​នឹង​មាន​ការ​ពិបាក​ក្នុង​ការ​ផ្ទត់​ផ្គង់​ស្បៀង​អាហារ និង​សម្ភារៈ​ផ្សេង​ៗ​ឲ្យ​បាន​គ្រប់​គ្រាន់​។​

ពលករត្រឡប់​មកពី​ប្រទេស​ថៃត្រូវ​ធ្វើ​តេស្ត​រក​កូវីដ-១៩ ហើយ​អ្នក​ដែល​តេស្ត​អវិជ្ជមាន​នឹង​ត្រូវ​ដាក់​ឲ្យ​ធ្វើ​ចត្តាឡីស័ក​ចំនួន​២១ថ្ងៃ ចំនួន​នេះ​កើន​ឡើងពី​ ១៤ថ្ងៃ ដោយ​ចាប់​ពី​ពេល​មាន​វត្តមាន​វីរុសបំប្លែង​ថ្មីដែលតា(Delta) ដែល​មាន​សម្ថភាព​ចម្លង​ខ្លាំង​។ បើ​សិន​ជា​ចំនួន​នៃ ពល​ករ​វិល​ត្រឡប់​មក​វិញ​នៅ​តែ​បន្ត​កើន​ឡើងនៅ​ខេត្ត​ជាប់ព្រំ​ដែន រដ្ឋាភិបាល​បានរៀប​ចំ​ឲ្យ​ពួកគេទៅ​ធ្វើ​ចត្តាឡីស័ក​នៅ​ស្រុកកំណើត​ បន្ទាប់ពី​បានធ្វើ​ចត្តាឡីស័ក​មួយ​សប្ដាហ៍​នៅព្រំដែន​រួច​។​

លោក សុខុម ឲ្យ​ដឹង​ទៀត​ថា មណ្ឌល​ធ្វើ​ចត្តាឡីស័ក​មាន​ចំនួន​២០​ក្នុង​ខេត្ត​បន្ទាយ​មានជ័យ ហើយ​ម្ហូប​អាហារ​សម្រាប់​ផ្គត់​​ផ្គង់​បាន​ពី​ជំនួយ​របស់​រដ្ឋាភិបាល ឧកញ៉ា និង​សម្បុរសជន​ផ្សេងៗ។​

លោក រឿន សុធី អនុប្រធានមន្ទីរ​សុខាភិបាល​ខេត្ត​បន្ទាយ​មាន​ជ័យ​មាន​ប្រសាសន៍ថា ​​នៅ​ថ្ងៃទី​១៣ ខែសីហា មាន​ពល​ករ​ចំនួន​៨៤០​នាក់​បាន​ត្រឡប់​មកពីប្រទេស​ថៃ ក្នុង​នោះ​មាន ​១២៨​នាក់​តេស្ត​វិជ្ជមាន​កូវីដ-១៩។ នៅ​ថ្ងៃទី​១៤ ខែសីហា លោក​ថាមាន​ពល​ករ​ចំនួន​ ១១៤៦​នាក់​បាន​ត្រឡប់​មក​វិញ និង​មាន​ចំនួន​ ១២៤​នាក់​តេស្ត​វិជ្ជមាន​កូវីដ-១៩ និង​នៅ​ថ្ងៃទី​១៥ ខែសីហា មាន​ពល​ករ​ត្រឡប់​មក​វិញ​ចំនួន​ ១៤៧២​នាក់ ក្នុង​នោះ​តេស្ត​វិជ្ជមាន​កូវីដ-១៩ ចំនួន ​២៦៣​ករណី​។​

លោក​ឲ្យ​ដឹងថា​ជាសរុប​មាន​អ្នក​វិជ្ជមានកូវីដ-១៩ ចំនួន​ ១៤៤៤៣​ករណី​គិត​តាំងពី​ផ្ទុះព្រឹត្តិការណ៍​២០ កុម្ភៈ និង​មាន​ ១១៤៨៣​នាក់​បាន​ជា​សះស្បើយ និង​ ១១៦​នាក់​បាន​ស្លាប់​។​

បើ​តាម លោក សុធី គិត​តាំងពី​ព្រំ​ដែន​បាន​បើក​ជា​ថ្មី ករណី​ឆ្លងភាគច្រើន ជា​វីរុសកូវីដ-១៩ បំប្លែង​ថ្មីដែលតា។​

អ្នកស្រី រ៉េន ស្រីណា វ័យ​២៩ឆ្នាំ ជា​ពល​ករ​ទើប​ត្រឡប់​ពី​ប្រទេស​ថៃ​កាល​ដើម​ខែ​នេះ និង​បាន​បោះ​តង់​នៅ​តាម​ព្រំ​ដែន​រង់ចាំ​ការ​បើក​ព្រំ​ដែន​ឡើង​វិញនោះ បាន​ឲ្យ​ដឹង​ថាអ្នកស្រី​តេស្ត​វិជ្ជមាន​កូវីដ-១៩ ហើយ​ត្រូវ​បាន​បញ្ជូន​ទៅ​ព្យាបាល​ជាមួយ​កូន​ស្រី​អាយុ​បី​ខែ​នៅ​កន្លែង​ព្យាបាល​ក្នុង​ខេត្ត​បន្ទាយ​មានជ័យ​។

អ្នកស្រី​បន្ត​ថា៖ «​ខ្ញុំ​បាន​មកព្យាបាល​ចំនួន​ប្រាំពី​ថ្ងៃ​ហើយ​ និង​ពេល​នេះ​បាន​ធូរ​ស្បើយ​គ្រាន់​បើ​ហើយ ចំណែក​កូនស្រី​របស់​ខ្ញុំ​មិន​បាន​ឆ្លង​នោះទេ នាង​មាន​សុខភាព​ធម្មតា​»។ អ្នកស្រី ​បន្ថែម​ថា៖ «ក្រុម​របស់​ខ្ញុំ​[ពលករ​] មាន​គ្នា​ចំនួន​២៣​នាក់ រួម​ទាំង​កូន​តូច​ពីរ​នាក់​ផង ដែល​ក្នុង​នោះ​មាន​បី​នាក់​មាន​វិជ្ជមានកូវីដ-១៩»។​​

អ្នកស្រី​ឲ្យ​ដឹង​ទៀត​ថា ពួក​អ្នកស្រី​បាន​ទទួល​បាយ​បី​ពេល​ក្នុង​មួយ​ថ្ងៃ និង​មាន​ហូប​គ្រប់​គ្រាន់ ប៉ុន្តែ​ថា​បញ្ហា​អនាម័យ និង​បន្ទប់​ទឹក​នៅ​ខ្វះ​ខាត​ដោយ​សារ​តែ​មាន​មនុស្ស​ច្រើន​នៅ​ក្នុង​មណ្ឌល​។​

លោក ឌី រ៉ាដូ អភិបាល​រង​ និង​ជា​អ្នក​នាំពាក្យ​ខេត្ត​ឧត្តរមានជ័យ​​ មាន​ប្រសាសន៍​ថា ក្នុង​ខេត្ត​លោក​មាន​អ្នក​វិជ្ជមាន​កូវីដ-១៩ ចំនួន​ ៥៥០០​ករណី អ្នក​ជាសះស្បើយ​មាន​ចំនួន ​២៣០០​នាក់ និង​មាន​អ្នក​ស្លាប់​ចំនួន​ប្រាំបួន​នាក់​។ គិត​មក​ដល់ពេល​នេះ លោក​ថាមាន​អ្នក​វិជ្ជមាន​វីរុស​បំប្លែង​ថ្មី​ចំនួន ​១០០​ករណី ដែល​អ្នក​ទាំង​នោះ​រកឃើញ​ក្នុង​ចំណោម​ពល​រដ្ឋ​ក្នុង​សហគមន៍ និង​ពល​ករ​ត្រឡប់ពី​ប្រទេស​ថៃ​។​

លោកបន្ថែមថា៖ «គិត​មក​ដល់ពេល​នេះ ច្រក​ទ្វារព្រំ​ដែន​បាន​បើក​ចំនួន​បួន​ថ្ងៃ​ហើយ ប៉ុន្តែ​នៅ​ថ្ងៃទី​មួយ និង​ទី​ពីរ​មិន​សូវមាន​ពលករ​ឆ្លង​កាត់​ច្រើន​ទេ មានប្រហែល​៧០​ ទៅ​ ៨០​នាក់ ប៉ុន្តែ​កាលពី​ម្សិល​មិញ​ចំនួន​ពល​ករ​ត្រឡប់​មក​វិញ​បាន​ឡើង​ដល់​ជាង​៦០០​នាក់​»។​

លោក​បញ្ជាក់​ថា អាជ្ញាធរ​ខេត្ត​បាន​រៀប​ចំ​ធ្វើ​មណ្ឌលចត្តាឡីស័ក និង​បាន​រៀបចំ​ស្បៀង​អាហារ​ សម្ភារសម្អាត​ខ្លួន​ និង​សម្ភារសម្រាប់​គេង ក៏​ដូច​ជា​បាន​រៀប​ចំ​ឲ្យ​មាន​ការ​ដឹក​ជញ្ជូន​អ្នក​ទាំង​នោះ​​ទៅធ្វើ​ចត្តាឡីស័ក​នៅ​ស្រុក​កំណើត និង​នៅ​មណ្ឌល​ចត្តាឡីស័ក​តាមខេត្តផ្សេងៗ​។​

លោក សឿម ប៊ុនរិទ្ធិ អ្នក​នាំពាក្យ​សាលាខេត្ត​បាត់​ដំបង មានប្រសាសន៍​ថាចំនួន​ពល​ករ​ត្រឡប់​មក​វិញ​មាន​ចំនួន​កើន​ឡើង​ច្រើន តែ​លោក​ថា​លោក​កំពុង​ជាប់​រវល់​មិន​អាច​ផ្ដល់​ទិន្ន័យ​បាន​ទេ​។​

លោក ឡឹង សុផុន មន្ត្រី​គម្រោង​របស់​អង្គការ​សង់ត្រាល់​ប្រចាំ​នៅ​ប្រទេស​ថៃ មាន​ប្រសាសន៍​ថា ចំនួន​ទំនង​ជា​នឹងនៅ​បន្ត​កើន​ឡើង​ទៀត​។

លោក​និយាយថា៖ «ចំនួន​ករណី​ឆ្លង​កូវីដ-១៩ នៅ​តែ​កើនឡើង ដូច​នេះ​ហើយ​ជា​ហេតុ​ផល​ពល​ករ​ខ្មែរ​ភាគ​ច្រើនសម្រេច​ត្រឡប់​មក​ស្រុក​កំណើត​វិញ»។​

ក្នុង​​រោងចក្រ​មួយ​នៅ​ស្រុក​ណងយ៉ៃ ខេត្ត​ឈុនបុរី រោង​ចក្រ​កែច្នៃ​សាច់មាត់​GFN មាន​ពល​ករ​ខ្មែរ​ជាង​១ ០០០​នាក់​បាន​តេស្ត​វិជ្ជមាន​កូវីដ-១៩​។

លោក សុផុន បន្ត​ថា៖ «ពល​ករ​ខ្មែរ​ធ្វើ​ការ​នៅ​រោង​ចក្រ​GFN ចំនួន​បី​នាក់​បាន​ស្លាប់​ដោយ​សារ​កូវីដ-១៩ និង​ជា​ច្រើន​នាក់​ទៀត​ត្រូវ​បញ្ជូន​ទៅ​សង្គ្រោះ​បន្ទាន់»។ លោក​បន្ថែម​ថា៖ «​ពល​ករ​ខ្មែរ​ផ្សេង​ទៀត​បាន​ស្លាប់​នៅ​ខេត្ត​ឆាក់ឆឹង​សៅ ប្រទេសថៃ ពេល​ដែល​គាត់កំពុង​ធ្វើ​ចត្តាឡីស័ក​នៅ​ក្នុង​បន្ទប់​ជួល​»។​

បើ​តាម​លោក សុផុន ពល​ករ​ខ្មែរ​នៅ​រោង​ចក្រ​GFN ជាង​ ២០០០​នាក់​កំពុង​រៀប​ចំឯកសារ​វិល​ត្រឡប់​មក​កម្ពុជា​វិញ​។​

លោក​លើក​ឡើង​ទៀតថា ស្ថានភាព​កូវីដ-១៩ នៅ​ថៃ​ធ្វើ​ឲ្យ​ម្ចាស់​រោងចក្រ​មិន​អាច​ផ្ដល់​ការ​ថែទាំ​ដល់​កម្មករ​បាន​ត្រឹម​ត្រូវ និង​មិន​បាន​រាយការណ៍​ទៅ​កាន់​មន្ត្រី​សុខាភិបាល​ថៃ​ឲ្យ​បាន​ទាន់ពេល​។​

លោក​បញ្ជាក់ថា៖ «​ពល​ករ​ខ្មែរ​ភាគ​ច្រើន​ចង់​ត្រឡប់​មកកម្ពុជា​វិញ​ ពីព្រោះ​[កន្លែងធ្វើ​ការ​របស់​ពួកគេ​]មិនមានភាពកក់ក្តៅ[អ្នក​ផ្សេងទៀត​]ពេល​ពួកគាត់​តេស្ត​វិជ្ជមាន​កូវីដ-១៩ ហើយ​ពួកគាត់​មិន​អាច​ស្វែង​រក​សេវាព្យាបាល​បាន​»។​

លោក​ថា​រដ្ឋាភិបាល​កម្ពុជា​គួរ​តែធ្វើការ​ជាមួយ​រដ្ឋាភិបាល​ថៃ ដើម្បី​ជួយ​បញ្ជូន​ពល​ករ​ខ្មែរ​ឲ្យ​មក​ដល់ព្រំដែន​វិញ ជាជាង​ទុក​ឲ្យ​ពួកគេ​ពឹង​លើមេខ្យល់​មិន​ស្មោះត្រង់​ទាំងនោះ​។​​

លោក​​និយាយ​ថា៖ «ខ្ញុំ​គិត​ថា​រដ្ឋាភិបាល​កម្ពុជា​គួរតែ​ធ្វើ​ការ​ជាមួយ​អាជ្ញាធរ​ថៃ​ដើម្បី​រក​ដំណោះស្រាយ​សម្រាប់​ការ​ធ្វើ​ដំណើរ​របស់ពួកគាត់ វា​ប្រសើរជាង​ទុក​ឲ្យ​ពួកគាត់​ត្រឡប់​មក​វិញ​​ដោយ​ខុស​ច្បាប់ និងពេល​ខ្លះ​ត្រូវ​ចាប់​ខ្លួន​»។​

លោក​ ស៊ុំ ចាន់គា មន្ត្រី​សម្របសម្រួល​របស់​សមាគម​សិទ្ធិ​មនុស្ស​អាដហុក​ប្រចាំ​ខេត្ត​បន្ទាយ​មានជ័យ មានប្រសាសន៍ថា ដោយ​សារ​តែ​ចំនួន​ពល​ករ​វិល​មក​វិញ​កើន​ឡើង​ច្រើន​ មណ្ឌល​ធ្វើ​ចត្តាឡីស័ក​កំពុង​ប្រឈម​នឹង​បញ្ហា​អនាម័យ​។

លោក​ និយាយថា៖ «មនុស្ស​រាប់​ពាន់​នាក់​ប្រើ​បន្ទប់ទឹក​រួ​មគ្នា បើ​សិនជា​មាន​ម្នាក់​ក្នុង​ចំណោមពួកគេ[ឈឺ] អ្នក​ផ្សេង​ទៀត​នឹង​ឆ្លង​វីរុស​នោះដែរ»។​

របាយការណ៍​របស់​ក្រ​សួង​សុខាភិបាល​បាន​បង្ហាញ​ថា ចាប់ពី​ថ្ងៃទី​៣១ ខែមីនា ដល់​ថ្ងៃទី​១៣ ខែសីហា ឆ្នាំ២០២១ កម្ពុជា​បាន​រក​ឃើញ​អ្នក​ផ្ទុក​វីរុស​បំប្លែង​ថ្មីដែលតា ចំនួន​៤៩៤​ករណី​ ហើយគ្រប់​ខេត្ត​ទាំង​អស់​បាន​រាការណ៍​ពី​វត្ត​មាន​វីរុស​នេះ លើក​លែង​តែ​ខេត្ត​កែប តាកែវ និង​ក្រចេះ​។​

នៅ​ថ្ងៃចន្ទ ក្រសួង​សុខាភិបាល​ឲ្យ​ដឹង​ថា​ចំនួន​អ្នក​ឆ្លង​កូវីដ-១៩ មាន​ចំនួន​៥៩៣​ករណី​ថ្មី ក្នុង​នោះ​មាន​២៣៦ករណី​ ជា​ករណី​នាំចូល នាំ​ឲ្យ​ចំនួ​ន​អ្នក​ឆ្លង​ឡើង​ដល់​ ៨៦០៤១ករណី ដែល​ក្នុង​នោះ​ករណី​នាំចូល​មាន​ ១៣១១៨ករណី គិត​តាំងពី​មាន​ការ​ផ្ទុះ​រាលដាល​កូវីដ-១៩ តាំងពីដើម​ឆ្នាំ​២០២០ មក។ ចំនួន​នៃករណី​ឆ្លង​ភាគ​ច្រើន កើត​មាន​ក្រោយ​ព្រឹត្តិការណ៍​២០ កុម្ភៈ ជា​ពេល​កម្ពុជា​ផ្ទុះ​ការ​ឆ្លង​រាល​ដាល​ក្នុង​សគមន៍។ ក្រ​សួង​ក៏​ឲ្យ​ដឹង​ដែរថា​អ្នក​ជា​សះស្បើយ​មានចំនួន​ ៨១២០២​នាក់ និង​អ្នក​ស្លាប់​មាន​ចំនួន​សរុប ​១៧០៤​នាក់​៕ (រាយការណ៍​បន្ថែម​ដោយ ជា សុខនី)

ប្រែសម្រួលពីអត្ថបទភាសាអង់គ្លេស៖ Cambodian migrant workers return from Thailand continue to raise

110 views
ព័ត៌មានថ្មីៗ »
អត្ថបទពេញនិយម »