សមាគមសម្ព័ន្ធអ្នកសារព័ត៌មានកម្ពុជា

កម្មកររោងចក្រឃែនធើរេននាំគ្នាទៅយាមនៅរោងចក្រកុំឱ្យមានការដឹកជញ្ជូនសម្ភារៈចេញ

ក្រុមកម្មករហូបបាយថ្ងៃត្រង់ ខណៈអ្នកខ្លះបានលើករូបថតនាយករដ្ឋមន្ត្រីនិងភរិយារបស់គាត់នៅក្នុងបរិវេណរោងចក្រកាត់ដេរសំលៀកបំពាក់ឃែនធើរេន អឹបភែរឹល(ខេមបូឌា)។ រូបថតនៅថ្ងៃទី០៩ ខែឧសភា ឆ្នាំ២០២២។ ខេមបូចា/វ៉ា សុភានុត
ក្រុមកម្មករហូបបាយថ្ងៃត្រង់ ខណៈអ្នកខ្លះបានលើករូបថតនាយករដ្ឋមន្ត្រីនិងភរិយារបស់គាត់នៅក្នុងបរិវេណរោងចក្រកាត់ដេរសំលៀកបំពាក់ឃែនធើរេន អឹបភែរឹល(ខេមបូឌា)។ រូបថតនៅថ្ងៃទី០៩ ខែឧសភា ឆ្នាំ២០២២។ ខេមបូចា/វ៉ា សុភានុត

ក្រុមកម្មកររោងចក្រកាត់ដេរសំលៀកបំពាក់ ឃែនធើរេន អឹបភែរឹល(ខេមបូឌា) ប្រមូលគ្នា​ទៅយាមទាំងពេលយប់និងពេលថ្ងៃក្នុងបរិវេណរោងចក្រចាប់ពីថ្ងៃអង្គារនេះកុំឱ្យមានការដឹកជញ្ជូនសម្ភារៈចេញពី​រោង​ចក្រ​ស្ងាត់ៗ បន្ទាប់ពីរោងចក្របានបិទទ្វាកាលពីថ្ងៃចន្ទ។

អ្នកស្រី សុខ ម៉ាលី អាយុ៤០ឆ្នាំ ជាមេសហជីពដើម្បីសិទ្ធិការងារ​ និងតំណាងកម្មករ​នៅ​រោង​ចក្រកាត់ដេរ​សំលៀកបំពាក់ ឃែនធើរេន អឹបភែរឹល(ខេមបូឌា) មានប្រសាសន៍ថា ព្រឹកថ្ងៃ​ចន្ទ ថៅកែរោងចក្របានបិទទ្វារមិនឱ្យកម្មករចូលធ្វើការ នាំឱ្យពួកគេធ្វើការបិទផ្លូវ​ប្រហែល១​ម៉ោង​ដើម្បីតវ៉ា រហូតទាល់តែអាជ្ញាធរចុះអន្តរាគមន៍ឱ្យបើកទ្វាររោងចក្រវិញ ទើបក្រុមកម្មករ​អាចទៅ​អង្គុយនៅបរិវេណខាងក្នុងរោងចក្រ។

បើតាមតំណាងកម្មកររូបនេះ ឱ្យដឹងថា នៅព្រឹកថ្ងៃចន្ទក៏មានការចរចាគ្នារវាងភាគីកម្មករ​ជា​មួយ​អាជ្ញាធរប៉ុន្តែនៅពុំទាន់មានដំណោះស្រាយណាមួយឡើយ និងរងចាំការ​ចរចាបន្ត​នៅថ្ងៃ​ព្រហស្បតិ៍។

អ្នកស្រីនិយាយថា៖ «ដល់ម៉ោងចេញសិន គេមិនឱ្យអង្គុយរហូតទេ ផុតម៉ោងគេបិទទ្វារហើយ ប៉ុន្តែពួកខ្ញុំ មានតែនៅយាមមុខរោងចក្រ ព្រោះខ្លាចគេដឹកម៉ាស៊ីន យប់នេះមានបងប្អូន​នៅ​យាមមុខរោងចក្រ»។

អ្នកស្រី ម៉ាលី បានឱ្យដឹងកាលពីថ្ងៃអង្គារនេះថា កម្មកររោងចក្រចាប់ផ្តើមមកដេកយាមនៅ​យប់ថ្ងៃអង្គារនេះទៅ ពីព្រោះពួកគាត់បារម្ភក្រែងម្ចាស់រោងដឹកសម្ភារៈពីរោងចក្រដោយស្ងាត់ៗ ដោយសារតែកម្មករមិនទាន់បានទទួលសំណងពីថៅរោងចក្រជនជាតិម៉ាឡេស៊ីកាត់ចិននៅឡើយទេ។

អ្នកស្រី ណុប បូផាន អាយុ៣៩ឆ្នាំ ដែលធ្វើការរោងចក្រនេះអស់រយៈពេល២២ឆ្នាំ បាន​និយាយថា អ្នកស្រីនឹងនៅដេកយាមពីមុខរោងចក្រ ដោយមិនកំណត់ថារយៈពេលប៉ុន្មាន​ថ្ងៃឡើយ លុះត្រាតែមានដំណោះស្រាយ។

អ្នកស្រី បូផាន បន្តថា ក្នុងករណីរោងចក្របិទទ្វារសូមឱ្យទូទាត់ប្រាក់តាមច្បាប់ការងារ​ឱ្យបាន​ឆាប់ ដើម្បីងាយស្រួលឱ្យអ្នកស្រីស្វែងរកការងារថ្មី។

អ្នកស្រី បូផាន បន្ថែមថា៖«រកការងារធ្វើប៉ុន្តែចាំឱ្យចប់នៅនេះសិន ខ្ញុំអត់ទាន់ដឹងថាបានលុយ​នេះមកយកធ្វើអីដែរ ដោយសារអត់ដឹងថាលុយនេះបានប៉ុណ្ណា ហើយក៏អត់ដឹងថាបាននៅក្នុង​ពេលណាចឹង អត់ទាន់គិតសំខាន់គិតតែបច្ចុប្បន្នឥលូវនេះទេ អត់ដឹងថាបានប៉ុន្មានទេ»។

ក្រុមកម្មករអង្គុយហូបបាយពេលល្ងាចនៅខាងមុខរោងចក្រកាត់ដេរ​សំលៀកបំពាក់​ឃែនធើរេន អឹបភែរឹល(ខេមបូឌា) ក្នុងខណ្ឌពោធិ៍សែនជ័យ រាជធានីភ្នំពេញ។ រូបថត​នៅថ្ងៃទី០៩ ខែឧសភា ឆ្នាំ២០២២។ ខេមបូចា/វ៉ា សុភានុត

អ្នកស្រី ព្រួន សុផល អាយុ ៦២​ ឆ្នាំ ជាកម្មករផ្នែកតុកាត់ ដែលធ្វើការអស់រយៈពេល២១ឆ្នាំ និយាយថា បន្ទាប់ពីឈប់សម្រាកពីការងារនៅរោងចក្រនេះ អ្នកស្រីនឹងមិនរកការងារ​ធ្វើទៀត​ឡើយ ហើយសម្រេចចិត្តប្រកបរបរលក់ឥវ៉ាន់ចាបហួយជំនួសវិញ នៅពេលទទួលបានប្រាក់​សំណងដែលរោងចក្រផ្ដល់ឱ្យ។

អ្នកស្រី ឱ្យដឹងថា៖«លក់ដូរអីមុខផ្ទះចិញ្ចឹមជីវិតខ្លួនឯងទៀតព្រោះអីខ្ញុំអត់មានកូនទេ»។

លោក ឌាវ គឹមប៊ូ បុគ្គលិករដ្ឋបាលនៃរោងចក្រឃែនធើរេន អឹបភែរឹល(ខេមបូឌា) បាន​ប្រាប់សារព័ត៌មានខេមបូចាថា លោកបានឈប់ធ្វើការតាំងពីដើមខែឧសភាមក។

លោក ខេន លូ អគ្គលេខាធិការ​នៃសមាគម​រោងចក្រកាត់ដេរនៅកម្ពុជា ហៅកាត់ថា (GMAC) មានប្រសាសន៍ថា រាល់ការបិទរោងចក្រ ថៅកែពុំដែលជូនដំណឹងដល់ខាងសមាគមឡើយ។

លោក លូ បានផ្ដល់យោបល់ថា ក្នុងករណីរោងចក្របិទ អាជ្ញាធរអាចរឹបអូសទ្រព្យសម្បត្តិ​យកទៅលក់ ដើម្បីបើកប្រាក់ឱ្យទៅក្រុមកម្មករ។

លោក លូ ថ្លែងថា៖«យកទ្រព្យសម្បត្តិក្រុមហ៊ុនទៅលក់បានលុយប៉ុន្មានបើកឱ្យកម្មករទៅ គ្រប់ រឺអត់គ្រប់រឿងផ្សេងទៀត»។

លោក ហែម ដារិទ្ធិ អភិបាលខណ្ឌពោធិ៍សែនជ័យ មានប្រសាសន៍ថា អាជ្ញាធរបាននឹង​កំពុង​ដោះស្រាយលើវិវាទការងារមួយនេះ ព្រមទាំងមិនអនុញ្ញាតឱ្យមានការដឹកសម្ភារៈ​ចេញពី​រោងចក្រឡើយ។

លោកបានលើកឡើងថា៖ «ដំណោះស្រាយយើងបានពិភាក្សាគ្នាហើយ សំណើរសុំធ្វើ​យ៉ាង​ម៉េចកុំឱ្យម្ចាស់ដីចាក់សោរ និងបើកទ្វាដើម្បីឱ្យកម្មករចូលទៅរោងចក្រ​ជួយមើលការ​ដឹកឥវ៉ាន់​ចេញផង។ យើងមិនឱ្យដឹកឥវ៉ាន់ចេញទេ ទុកឱ្យគាត់ចរចាគ្នារកដំណោះស្រាយ អ្វីដែល​បាន​គោរពក្នុងការចរចា។

សារព័ត៌មានខេមបូចាពុំអាចទាក់ទងលោក​ ហេង សួរ​ អ្នកនាំពាក្យ​ក្រសួង​ការងារ​ និងបណ្តុះ​បណ្តាល​វិជ្ជាជីវៈ​ បានទេ ដោយខលពុំមានអ្នកលើកទូរសព្ទ។

កាលពីថ្ងៃទី១៩ ខែមេសា ឆ្នាំ២០២២ កម្មកររោងចក្រកាត់ដេរសំលៀកបំពាក់ ឃែនធើរេន អឹបភែរឹល(ខេមបូឌា) បានធ្វើការបិទផ្លូវ បន្ទាប់ពីពួកគេត្រលប់មកពីពិធីបុណ្យចូលឆ្នាំខ្មែរវិញ ហើយមិនឃើញសម្ភារៈមួយចំនួនក្នុងរោងចក្រ។រោងចក្រនេះមានកម្មករសរុបចំនួនជាង​១ពាន់នាក់ ប៉ុន្តែបច្ចុប្បន្ននៅសល់ជាង​៣០០នាក់ប៉ុណ្ណោះក្នុងនោះប្រមាណ២០០នាក់ជា​កម្មករដែលធ្វើការច្រើនឆ្នាំ៕

619 views

ព័ត៌មានទាក់ទង

ព័ត៌មានថ្មីៗ

អត្ថបទពេញនិយម