សហគមន៍ជនជាតិដើមភាគតិចជងនាតំបន់អារ៉ែង នៃស្រុកថ្មបាំង ខេត្តកោះកុង កំពុងតស៊ូរក្សាការពារដីកេរដូនតារបស់ពួកគាត់ ពីការដាក់បញ្ចូលក្នុងគម្រោងរេដបូកនៃតំបន់ជួរភ្នំក្រវាញខាងត្បូង ។ ការអនុវត្តការអភិរក្ស ដែលដឹកនាំដោយក្រសួងបរិស្ថាន និងក្រុមអភិរក្សនៃអង្គការសម្ព័ន្ធមិត្តសត្វព្រៃ (Wildlife Alliance) នាំមកនូវការចាប់ខ្លួន ការរឹតបន្តឹងការចូលទៅប្រកបការងារលើដីស្រែចម្ការវិលជុំ និងបង្កឱ្យមានការភ័យខ្លាចកាន់តែខ្លាំងឡើងៗ ក្នុងចំណោមប្រជាពលរដ្ឋដែលការរស់នៅរបស់ពួកគាត់ពឹងផ្អែកទាំងស្រុងតែលើដីស្រែចម្ការ ។
ទោះបីជាមានការសន្យាអំពីកំណែទម្រង់ក៏ដោយ ក៏ជនជាតិដើមភាគតិចនៅតែប្រឈមនឹងការគំរាមកំហែងខាងផ្លូវច្បាប់ និងបញ្ហាសេដ្ឋកិច្ច ខណៈគម្រោងនេះបង្កើតឥណទានកាបូនសម្រាប់ទីផ្សារអន្តរជាតិ ។ វីដេអូឯកសារនេះបង្ហាញអំពីតម្លៃនៃជីវិតមនុស្ស និងទីផ្សារកាបូន ព្រមទាំងការតស៊ូរវាងការការពារព្រៃឈើ និងការគោរពសិទ្ធិជនជាតិដើមភាគតិច ៕
