កូនៗស្រ្តីដែលបាត់បង់ជីវិតក្រោយសម្រាលកូននៅមន្ទីរពេទ្យបង្អែកខេត្តបាត់ដំបងអះអាងថាម្តាយរបស់ខ្លួនស្លាប់ដោយការធ្វេសប្រហែស និងការមិនយកចិត្តទុកដាក់របស់មន្ទីរពេទ្យទើបម្តាយរបស់ខ្លួនបានស្លាប់យ៉ាងអាណោចអាធ័មចោលប្តី កូន និងចៅៗ មិនមែនមកពីជំងឺធ្ងន់ធ្ងររបស់គាត់នោះទេ។
កូនស្រ្តីរងគ្រោះ៖ «ហេតុអីអ្នកទុកឱ្យម្តាយខ្ញុំឈឺដល់ស្លាប់ ហេតុអីអ្នកមិនយកចិត្តទុកដាក់ អ្នកអាក្រក់ណាស់ អ្នកធ្វើឱ្យក្មេង៦នាក់កំព្រាម្តាយ ម្តាយខ្ញុំមិនទាន់ទាំងឃើញមុខកូនច្បាស់ផង ហេតុអីអ្នកអាក្រក់ដល់ថ្នាក់នេះ អ្នកសងម្តាយខ្ញុំវិញមក ប្អូនប្រុសខ្ញុំដែលទើបនឹងកើតវាត្រូវការម្តាយមើលថែ»។
នេះជាសំណេរទួញសោករបស់កូនរបស់ស្រ្តីដែលបានស្លាប់ក្រោយសម្រាលកូននៅមន្ទីរពេទ្យ បង្អែកខេត្តបាត់ដំបងដែលផុសលើគណនីយហ្វេសប៊ុករបស់ខ្លួនឈ្មោះ Zey Leak ll រៀបរាប់យ៉ាងវែងអន្លាយចាប់តាំងពីម្តាយរបស់ខ្លួនចូលសម្រាកពេទ្យរហូតដល់គាត់បាត់បង់ជីវិត។
អ្នកស្រី ថុង គឹមហេង វ័យ២២ឆ្នាំជាកូនទី៣ក្នុងចំណោមកូន៦នាក់របស់សពស្រ្តីឈ្មោះ ចាន់ ស្រីនុច អាយុ៤៤ឆ្នាំ ដែលបានបាត់បង់ជីវិតក្រោយសម្រាលកូននោះនិយាយថា ម្តាយរបស់នាងមិនមែនស្លាប់ដោយសារជំងឺធ្ងន់ធ្ងរដូចការអះអាងរបស់មន្ទីរពេទ្យនោះឡើយ គឺគាត់ស្លាប់ដោយសារតែការធ្វេសប្រហែសរបស់មន្ទីរពេទ្យ។
ទឹកមុខស្រពោនរលីងរលោកទឹកភ្នែកកំពុងបញ្ចុកទឹកដោះគោប្អូនប្រុសដែលទើបអាយុជាង១០ថ្ងៃ ដែលម្តាយបានស្លាប់ចោលនោះបណ្តើរ គឹមហេង បាននិយាយបន្ថែមថា៖ «ម្តាយរបស់ខ្ញុំស្លាប់ដោយសារការធ្វេសប្រហែសរបស់មន្ទីរពេទ្យ ម្តាយខ្ញុំបង្កើតកូនហើយភ្លាម សុខភាពគាត់ធម្មតា មិនមែនស្លាប់ដោយសារជំងឺធ្ងន់ធ្ងររបស់គាត់ទេ»។
គឹមហេង និយាយបែបនេះក្រោយពីមន្ទីរពេទ្យបង្អែកខេត្តបាត់ដំបងបានចេញលិខិតចូលរួមមរណទុក្ខមួយច្បាប់កាលពីថ្ងៃទី៩ ខែឧសភា ឆ្នាំ២០២៤។ ខ្លឹមសារលិខិតនោះមន្ទីរពេទ្យបានសម្តែងនៅក្តីក្តុកក្តួល រន្ធត់ចិត្ត និងសោកស្តាយជាពន់ពេកចំពោះមរណភាពរបស់អ្នកស្រី ចាន់ ស្រីនុច មានទីលំនៅភូមិដាំស្ពៃ សង្កាត់ស្លាកែត ក្រុងបាត់ដំបង ដែលបានទទួលមរណភាពនៅម៉ោង១២និង៣០នាទីថ្ងៃទី៣០ខែមេសាឆ្នាំ២០២៤នៅមន្ទីរពេទ្យបង្អែកខេត្តបាត់ដំបង។
លិខិតរបស់មន្ទីរពេទ្យខាងលើបញ្ជាក់ថា លោកស្រី ចាន់ ស្រីនុច បានចូលសម្រាកពេទ្យបង្អែកខេត្តបាត់ដំបង កាលពីថ្ងៃទី២២ ខែមេសា ឆ្នាំ២០២៤ វេលាម៉ោង៣និង៤០នាទីរសៀល ដោយមូលហេតុឈឺក្បាល និងថប់ដង្ហើម ហើមជើងទាំងសងខាង និងមានផ្ទៃពោះ៨ខែ (ស្រ្តីបានសម្រាលកូនប្រុសទម្ងន់២,៩គីឡូ ក្រាម)។គ្រូពេទ្យបានពិនិត្យឃើញថាស្រ្តីខាងលើស្ថិតក្នុងសភាពខ្សោយថ្លើមចុងក្រោយ ជំងឺទឹកនោមផ្អើមធ្ងន់ធ្ងរ ខ្សោយតម្រង់នោមចុងក្រោយ និងមានផ្ទៃពោះចំនួន៧ដង(កូនមួយរលូត)។
លិខិតមន្ទីរពេទ្យបន្ថែមថានៅចំពោះមុខបែបនេះ ក្រុមការងារបានខិតខំព្យាបាលដោយឱសថ និងមធ្យោបាយបច្ចេកទេសវិទ្យាសាស្រ្ត ដោយកិច្ចខិតខំប្រឹងប្រែងសង្គ្រោះជីវិតតែអកុសលស្រ្តីជាអ្នកជំងឺបានទទួលមរណៈភាពនៅបន្ទប់សង្គ្រោះបន្ទាន់ជំងឺទូទៅនៃមន្ទីរពេទ្យបង្អែកខេត្តបាត់ដំបងដោយរោគវិនិច្ឆ័យ ការពុលថ្លើមខ្លាំងខ្លា ដោយបណ្តាលឱ្យពុលដល់ខួរក្បាល និងជំងឺខ្សោយថ្លើមរួមនិងខ្សោយតម្រងនោមចុងក្រោយ។
អ្នកស្រី ថុង គឹមហេង បាននិយាយថា គាត់និងបងប្អូនព្រមទាំងឪពុករបស់នាង មិនអាចទទួលយកការចេញ លិខិតរបស់មន្ទីរពេទ្យបង្អែកបាត់ដំបងខាងលើដែលថាម្តាយរបស់នាងស្លាប់ដោយសារជំងឺធ្ងន់ធ្ងរនោះឡើយ គឺគាត់ស្លាប់ដោយសារតែការធ្វេសប្រហែសរបស់មន្ទីរពេទ្យ ។
អ្នកស្រី គឹមហេង បានបន្ថែមថា៖ «បើសិនជាម្តាយខ្ញុំធ្ងន់ធ្ងរ ហេតុអ្វីគ្រូពេទ្យមិនសង្គ្រោះពីដំបូងមក សង្គ្រោះអ្វីនៅដង្ហើមចុងក្រោយរបស់គាត់ សង្រ្គោះទាន់ពេល រឺអត់ មិនទាន់ទេ! រយៈពេលពីរថ្ងៃអ្នកជម្ងឺ លែងដឹងខ្លួនហើយ ដល់ដង្ហើមចុងក្រោយហើយទើបមកសង្គ្រោះតើបានប្រយោជន៍អ្វីដល់អ្នកជម្ងឺ វាគ្មានបានប្រយោជន៍អីទាល់តែសោះ! ម្តាយខ្ញុំអស់កម្លាំងរលីងហើយនោះ!»។
អ្នកស្រី គឹមហេង និយាយថានៅថ្ងៃទី៨ ខែឧសភា ក្រោយពីគាត់ធ្វើបុណ្យ៧ថ្ងៃម្តាយរបស់គាត់រួចឃើញមានគ្រូពេទ្យប្រុសម្នាក់មកសួរនាំដោយគាត់ប្រាប់ថាមកសាកសួរព័ត៌មានដើម្បីយកទៅចែករំលែកជូនបងប្អូនប្រជាពលរដ្ឋក្រោយៗទៀតនៅពេលខ្លួនមានវ័យចាស់ និងមានជំងឺជាប់ខ្លួនកុំយកកូនហើយគ្រូពេទ្យនោះបញ្ជាក់ថា គាត់មកមិនមែនមកទទួលខុសត្រូវនោះទេ។
ស្រ្តីខាងលើបន្ថែមថាក្រោយពីគ្រូពេទ្យនោះចេញទៅអ្នកស្រីបានបង្ហោះរឿងរ៉ាវនៅពេលដែលម្តាយគាត់ទៅសម្រាកព្យាបាលរហូតដល់ស្លាប់នៅលើគ្រែពេទ្យយ៉ាងលម្អិតលើបណ្តាញសង្គមក៏មានការចាប់អារម្មណ៍យ៉ាងខ្លាំងនិងមានអ្នកស៊ែតៗគ្នាយ៉ាងច្រើន។
អ្នកស្រី គឹមហេង បន្ថែមថា៖ «ក្រោយពេលបង្ហោះនៅថ្ងៃបន្ទាប់ឃើញលោកគ្រូពេទ្យនោះមកម្តងទៀត ដោយបានស្នើសុំឱ្យគាត់លុបខ្លឹមសារដែលសរសេរលើបណ្តាញសង្គមចេញ ប៉ុន្តែខ្ញុំអត់បានលុបទេ ខ្ញុំដាក់ជាPrivate បន្ទាប់មកគាត់ប្រាប់ឱ្យខ្ញុំស្នើសុំអ្វីជាផលប្រយោជន៍គ្រួសារបើចង់ទៅទទួលសេវាពេទ្យនោះទៀត ពេលនោះខ្ញុំស្នើសុំប្រើសេវាពេទ្យសម្រាប់សមាជិកគ្រួសាររបស់ខ្ញុំទាំងអស់លើសេវាណាក៏ដោយ គឺមិនមានការបង់ប្រាក់នោះទេ គាត់យល់ព្រម!»។
អ្នកស្រីបន្ថែមថា៖ «ក្រោយមកគ្រូពេទ្យនោះឃើញខ្ញុំលប់ខ្លឹមសារដាក់ Private only me ហើយគាត់ ប្រាប់ថាពេលថ្ងៃរឺពេលរសៀលនឹងមានគេចុះមក គាត់ចេញទៅមិនដល់៥នាទីផង ស្រាប់តែឃើញ វត្តមានប្រធានមន្ទីរពេទ្យបង្អែកខេត្តចុះមកដល់ផ្ទះខ្ញុំតែម្តង»។
អ្នកស្រី គឹមហេង បន្តថា លោក កាក់ សិលា ប្រធានមន្ទីរពេទ្យបង្អែកខេត្តបាត់ដំបងបានសំពះរូបថតម្តាយរបស់គាត់ រួចជជែកគ្នាមួយសន្ទុះ គាត់បានដកកញ្ចប់ថវិការ៤លានរៀលជារបស់មន្ទីរពេទ្យ និង១០០ដុល្លារ លោកថាជាលុយផ្ទាល់ខ្លួនរបស់លោក ប្រគល់ឱ្យគាត់រួមទាំងបងប្អូននៅជុំគ្នា។
ដោយអ្នកស្រីបន្ថែមថា៖ «លោកប្រធានមន្ទីរពេទ្យបញ្ជាក់ថានេះជាលុយទឹកចិត្តពីមន្ទីរពេទ្យមិនមែន ជាលុយសំណងអ្វីនោះទេកុំមានការយល់ច្រឡំថាជាលុយសំណងជីវិតអ្វីនោះ»។
ស្រ្តីខាងលើបន្ថែមថា ខណៈពេលនោះបងស្រីរបស់គាត់បានស្នើសុំលោកប្រធានមន្ទីរពេទ្យធ្វើការទទួលកំហុសនិងធ្វើការសុំទោសជាសាធារណៈនូវកំហុសមួយនេះដែលធ្វើឱ្យម្តាយរបស់គាត់ស្លាប់ពេលនោះ លោកគ្រូកាក់សិលាប្រធានមន្ទីរពេទ្យបានយល់ព្រម ប៉ុន្តែមានគ្រូពេទ្យម្នាក់ដែលមកសាកសួរព័ត៌មានពីដំបូងបាននិយាយកាត់ថាមិនបាច់ផុសអីទេ សូមចប់ត្រឹមហ្នឹង! ប៉ុន្តែបងស្រីរបស់ខ្លួនមិនព្រម ក្រុមគ្រូពេទ្យនោះក៏ចាកចេញទៅ។
អ្នកស្រី ថុង គឹមហួយ អាយុ២៤ឆ្នាំដែលជាបងស្រីរបស់ ថុង គឹមងួន បានបន្ថែមថា ខណៈពេលដែលគ្រូពេទ្យចាកចេញទៅ ពេលនោះខ្លួននិងប្អូនស្រីបានពិភាក្សាជាមួយឪពុកដោយឯកភាពគ្នាថា មិនព្រមចប់ត្រឹមហ្នឹងនោះទេហើយក៏មិនទៅទទួលសេវាពេទ្យនោះទៀតដែរ គឺត្រូវតែឱ្យប្រធានមន្ទីរពេទ្យសុំទោសនិងទទួលកំហុសជាសាធារណៈ។
ពេលនោះគាត់ក៏បានឱ្យប្អូនប្រុសជិះម៉ូតូទៅតាមរថយន្តរបស់ លោកគ្រូពេទ្យនោះរហូតដល់ស្តុបបាណន់ក្រុងបាត់ដំបងដែលមានចម្ងាយ៣ទៅ៤គីឡូម៉ែត្រពីផ្ទះរបស់គាត់ ដោយប្អូនប្រុសបានប្រាប់គ្រូពេទ្យនោះថា បងនិងឪពុករបស់គាត់ស្នើសុំឱ្យលោកគ្រូពេទ្យត្រូវតែសុំទោស និងទទួលកំហុសជាសាធារណៈ។ អ្នកស្រីបន្ថែមថា ពេលនោះលោកប្រធានមន្ទីរពេទ្យសន្យាថា នឹងធ្វើលិខិតសុំទោសជាសាធារណៈនៅម៉ោង៥ល្ងាចថ្ងៃទី៩ឧសភា។
អ្នកស្រី ថុង គឹមហួយ បាននិយាយបន្ថែមថា៖ «តែជាក់ស្តែងមិនឃើញមានសារសុំទោសពីមន្ទីរពេទ្យបង្អែកខេត្តបាត់ដំបងនោះទេរហូតដល់ម៉ោង១០កន្លះយប់មិត្តភ័ក្រ្តរបស់ខ្លួនបានផ្ញើលិខិតចូលរួមមរណៈទុក្ខដែលចេញដោយមន្ទីរពេទ្យខាងលើឱ្យមើល ខ្ញុំអានទៅខ្ញុំក្តៅចិត្តជាខ្លាំងដែលមន្ទីរពេទ្យថា ម្តាយខ្ញុំស្លាប់ដោយសារជំងឺធ្ងន់ធ្ងរ តែជាក់ស្តែងមិនមែនអញ្ចឹងទេ គឺគាត់ទុកចោលអ្នកជំងឺ ទៅហៅបួនដប់ដងមិនឃើញគាត់មកផង!»។
ក្រោយពីមន្ទីរពេទ្យបង្អែកចេញលិខិតចូលរួមមរណៈទុកខាងលើ កូនស្រីស្រ្តីរងគ្រោះអះអាង លោក ប្រធានមន្ទីរពេទ្យបង្អែកមិនបានគោរពតាមពាក្យសន្យាថា នឹងចេញលិខិតសុំទោសជាសារធារណៈនោះទេ។ អ្នកស្រី ថុង គឹមហេង បានសរសេរខ្លឹមសារថ្មីបន្ថែមទៀតលើគណនីហ្វេសប៊ុករបស់ខ្លួនឈ្មោះ Zey Leak ll ឆ្លើយតបនឹងលិខិតរបស់មន្ទីរពេទ្យ។
ខ្លឹមសារដែលសរសេរនោះអ្នកស្រី គឹមហេង បានបញ្ជាក់ថា៖ «លោកប្រធានខុសសន្យាមុនទេ គ្រាន់តែសុំទោសនឹងទទួលកំហុស អត់ធ្ងន់ទេលោកគ្រូ តែនេះលោកគ្រូកុហកស្រស់ៗ ខ្ញុំខ្ពើមពាក្យខិតខំនឹងណាស់ អេកូបើខ្ញុំមិនសុំទេ អស់លោកមានគំនិតនឹកឃើញអេកូអោយម្តាយខ្ញុំទេ សុំហើយនៅមិនចង់អេកូឱ្យទៀត»។
សំណេររបស់អ្នកស្រី គឹមហេង បន្ថែមថា គាត់នៅមើលម្តាយម្នាក់ឯងលោកគ្រូពេទ្យមិនមានទឹកចិត្តជួយលើម្តាយរបស់គាត់ទៅបន្ទប់អេកូនោះទេដោយគ្រាន់តែប្រាប់ថាឱ្យរកបងប្អូនលើកម្តាយគាត់ដាក់លើរទេះរុញបានហើយ ចាំយកគាត់ទៅមើលអេកូ។
អ្នកស្រីសរសេរថា៖ «ខិតខំព្យាបាលដោយឱសថចង់តែសើច ឱ្យថ្នាំម្តាយខ្ញុំលេបមិនបើកឯកសារនឹងមែន ឈឺហុចថ្នាំលេប ឈឺចាក់ថ្នាំ ទាំងដែលមិនមកពិនិត្យដោយយកចិត្តទុកដាក់លើម្តាយខ្ញុំ ទុកម្តាយខ្ញុំចោលមិនព្យាបាលរហូតដល់ស្លាប់»។
អ្នកស្រីបានរៀបរាប់ថា ក្នុងកំឡុងពេលសម្រាកព្យាបាលតាំងពីថ្ងៃទី២២ដល់ថ្ងៃទី២៧ ខែមេសា ឆ្នាំ២០២៤ គ្រូពេទ្យតេស្តជាតិស្ករម្តាយរបស់គាត់ចុះខ្លាំងរហូតដល់ខាងលោកគ្រូហាមម្តាយរបស់គាត់មិនឱ្យចាក់ថ្នាំទឹកនោមផ្អែមទៀតដោយខ្លាចជាតិស្ករចុះកាន់តែខ្លាំង ហើយវាស់ឈាមក៍ស្ថិតក្នុងកម្រិតធម្មតា។
អ្នកស្រីបន្ថែមថា៖ «ប្អូនខ្ញុំកើតមកបានតែ2គីឡូ2ខាំ អស់លោកដាក់២គីឡូ៩ខាំ ពេលកើតហើយអស់ លោកមិនដែលបានមកតេស្តជាតិស្កឱ្យម្តាយខ្ញុំសូម្បីតែម្តង វាស់ឈាមប៉ុន្មានក៏អស់លោកមិនប្រាប់»។
អ្នកស្រី គឹមហេង បានបន្ថែមថា៖ «មួយទៀត គ្រប់ជំងឺចេញមកម្តាយខ្ញុំសុទ្ធសឹងតែធ្ងន់ធ្ងរ ចុះហេតុអីបានមិនសង្គ្រោះតាំងពីគាត់ចុកពោះដំបូង មិចបានទុកម្តាយខ្ញុំដល់លែងដឹងខ្លួនទើបបញ្ចូនម្តាយខ្ញុំទៅសង្គ្រោះបន្ទាន់ រុញម្តាយខ្ញុំដាក់សាលនេះសាលនោះទៅវិញទៅមក? ផុសលិខិតមកឆ្កុយ មិនមានខ្លឹមសារ សរសេរនេះមែនទេ ប្រធានមន្ទីពេទ្យសីលធម៌ខ្សោយដូចគ្នាទើបកូនចៅធ្វើតាម»។
ទាក់ទងបញ្ហាខាងលើនេះខេមបូចា មិនអាចទំនាក់ទំនងលោក កាក់ សិលា ប្រធានមន្ទីរពេទ្យបង្អែកខេត្តបាត់ដំបង ដើម្បីសុំបំភ្លឺបាននោះទេដោយបានព្យាយាមទំនាក់ទំនងតាមលេខទូរសព្ទរបស់លោក ហៅចូលជាប់រវល់រហូតនៅថ្ងៃទី៩ និង១០ ខែឧសភា និងផ្តល់សំនួរតាមបណ្តាញតេឡេក្រាមព្រមទាំងហៅចូលផងមិនឃើញមានការឆ្លើយតប។
ទោះបីយ៉ាងណាលោក ហៀប ធឹង ប្រធានរដ្ឋបាលមន្ទីរពេទ្យបង្អែកខេត្តបាត់ដំបង បានថ្លែងកាលពីថ្ងៃទី១០ ខែឧសភាថា មន្ទីរពេទ្យបានបកស្រាយរួចរាល់ហើយ បើសិនគិតតាមបច្ចេកទេសជំងឺរបស់ស្រ្តីខាងលើ ថ្លើម តម្រងនោម គាត់ធ្ងន់ធ្ងរដល់ដំណាក់កាលចុងក្រោយហើយ។
លោក ហៀប ធឹង ថ្លែងថា៖ «គាត់ចោទប្រកាន់ថាហៅគ្រូពេទ្យឱ្យមកមើល យើងវាយឺតយ៉ាវតិចតួចហ្នឹង ណា ជួនកាលគាត់ជាប់ជម្ងឺច្រើនជាប់រវល់ វាយឺតយ៉ាវតិចតួច»។លោកបន្តថា៖ «ស្អែកនឹងមានធ្វើការសាកសួរគាត់(គ្រូពេទ្យ)ពីព័ត៌មាន បើចោទប្រកាន់តែម្នាក់វាមិនមែនជារឿងមួយពិតទេ យើងយកព័ត៌មានពីខាងនោះ រួចសួរខាងនេះទៀតដើម្បីឱ្យវាជាក់លាក់»។
លោកបានបន្ថែមថា ករណីស្លាប់របស់មាតានិងទារកនៅក្នុងមន្ទីរពេទ្យបង្អែកខេត្តមិនសូវមានច្រើនទេលុះត្រាករណីធ្ងន់ធ្ងរទើមានស្លាប់ព្រោះក្រសួងសុខាភិបាលកំពុងយកចិត្តទុកដាក់លើសុខភាពមាតានិងទារក ហើយក្រុមគ្រូពេទ្យក៏មានការប្រុងប្រយ័ត្នដែរមិនបណ្តែតបណ្តោយដែលនាំឱ្យប៉ះពាល់កិត្តិយសមន្ទីរពេទ្យនោះទេ។
ខេមបូចា មិនអាចទំនាក់ទំនងលោក វឿង ប៊ុនរ៉េត ប្រធានមន្ទីរសុខាភិបាលនៃរដ្ឋបាលខេត្តបាត់ដំបង បាននោះទេ កាលពីថ្ងៃសុក្រដោយទូរស័ព្ទរបស់លោកហៅចូលច្រើនសារគ្មានអ្នកទទួលនិងផ្តល់សំនួរតាមតេឡេក្រាមមិនមានការចូលមើលនិងឆ្លើយតប។
លោក សឿម ប៊ុនរិទ្ធ អភិបាលរងខេត្តនិងជាអ្នកនាំពាក្យរដ្ឋបាលខេត្តបាត់ដំបងបានឆ្លើយតបសំនួរតាមតេឡេក្រាមថា៖ «ករណីនេះ គឺ ឯកឧត្តម សុខ លូ អភិបាលនៃគណៈអភិបាលខេត្តបាត់ដំបងលោកបានមានវិធានការបន្ទាន់តាំងពី ពីរថ្ងៃមុនមក ហើយបានបង្កើត ក្រុមការងាររបស់រដ្ឋបាលខេត្តដើម្បីចុះស្រាវជ្រាវអង្កេតលើករណីនេះដែលក្នុងនោះបានប្រគល់ភារកិច្ចជូនឯកឧត្តម ទីន សារ៉ាវុធ អភិបាលរងនៃគណៈអភិបាលខេត្តបាត់ដំបង ធ្វើការងារនេះនឹងរាយការណ៍លទ្ធផលជូនឯកឧត្តមអភិបាលខេត្ត»។
ជុំវិញសំនួរសួរថាតើមកទល់ពេលនេះតើទទួលបានលទ្ធផលយ៉ាងណាដែរ?បើសិនជារកឃើញថាគ្រូពេទ្យមានកំហុសវិជ្ជាជីវះរឺទ្វេសប្រហែសជាដើម តើខេត្តនិងមានចំណាត់ការបន្តបែបណា? លោក សឿម ប៊ុនរិទ្ធ អ្នកនាំពាក្យខេត្ត បានចូលមើលតែមិនទាន់ឃើញមានការឆ្លើយតបយ៉ាងណានៅឡើយទេ។
លោកស្រីវេជ្ជបណ្ឌិត ឱ វណ្ណឌីន អ្នកនាំពាក្យក្រសួងសុខាភិបាលបានឆ្លើយតបយ៉ាងខ្លីនាព្រឹកថ្ងៃទី១៣ ខែឧសភា ថា គាត់ជាប់រវល់ និងបន្តថាគេមានការកែទម្រង់ហើយ។
លោកស្រីវេជ្ជបណ្ឌិត ឱ វណ្ណឌីន ថ្លែង៖ «សុំទោសក្មួយខ្ញុំជាប់តិច មីងអត់អាចធ្វើអីបានទេ គេមានការកែទម្រង់ហើយក្មួយ គេកែទម្រង់ហើយ!»។
ក្រៅពីករណីស្រ្តីខាងលើ ក៏មានគ្រូបង្រៀនម្នាក់បានស្លាប់ជាមួយកូនក្នុងផ្ទៃក្នុងមន្ទីរពេទ្យ បង្អែកខេត្តបាត់ដំបងនេះផងដែរ នេះបើតាមគណនីហ្វេសប៊ុកមួយឈ្មោះ Dalin Voeun បានបង្ហោះកាលពីថ្ងៃទី១១ ខែឧសភា ឆ្នាំ២០២៤។
គណនីយហ្វេសប៊ុកនេះបញ្ជាក់ថា រូបគាត់ជាបងជីដូនមួយគ្រូបង្រៀនថ្នាក់មត្តេយ្យនៅ សាលាបឋមសិក្សាស្វាយធំ ដែលស្លាប់ទាំងម្តាយទាំងកូនក្នុងពោះនៅមន្ទីរពេទ្យបង្អែកខេត្តបាត់ដំបង(អតីតមន្ទីរពេទ្យធំ)។
ស្រ្តីដែលជាម្ចាស់គណនីយហ្វេសប៊ុក Dalin Voeun បានសរសេរបន្ថែមថា៖ «ធ្វើការធ្វេសប្រហែស យកជីវិតគេមកលែងសើច ដឹងទេថាគេឈឺចាប់ប៉ុណ្ណា ពេទ្យអើយពេទ្យ យកបេះដូងមកធ្វើការផង អាយុជីវិតគេណា សូមប្អូនស្រីនិងកូនទៅឱ្យបានសុខ ជាតិក្រោយកុំឱ្យអាយុខ្លីចឹងទៀត»។
គណនីហ្វេសប៊ុកមួយទៀតឈ្មោះ Veoun Phally ក៏បានសរសេរបន្ថែមទាក់ទង និងការស្លាប់របស់អ្នកគ្រូបង្រៀនសាលាមតេយ្យទាំងកូនក្នុងផ្ទៃខាងលើនាថ្ងៃទី១១ ខែឧសភា ឆ្នាំ២០២៤ ដែលមានខ្លឹមសារថា៖ «មិនសង្គ្រោះមនុស្សសិនទេ តាំងពីម៉ោង៤ភ្លឺស្នើសុំវះ ពេទ្យថាចាំបំពេញបែបបទសិន រហូតដល់ម៉ោង៨ព្រឹក បែបបទបំពេញមិនចេះហើយ ចុងក្រោយស្លាប់ទាំងម្តាយនិងកូនក្នុងពោះ ពេទ្យធំបាត់ដំបង សូមប្អូនបានទៅកាន់ទីឋានស្ងប់សុខ»។
បើតាមអ្នកស្រី មុត ចាន់ថង អនុប្រធានផ្នែកបន្តពូជ សុខភាពមាតា ទារក កុមារ និងអាហាររូបត្ថម្ភនៃមន្ទីរសុខាភិបាលខេត្តបាត់ដំបងបានឱ្យដឹងថា តាមការអង្កេតបែបវិទ្យាសាស្រ្តរបស់ក្រសួងសុខាភិបាលនៅឆ្នាំ២០២៣ ស្ថានភាពមរណភាពមាតា និងទារក គឺមានការថយចុះ និងសុខភាពមាតា និងទារកមានភាពល្អប្រសើរ។
លោកស្រីបានលើកឡើងខណៈដែលចូលកម្មវិធីវិទ្យុខេត្តមួយក្នុងថ្ងៃទិវាជាតិសុខភាពមាតានិងទារកថ្ងៃទី២១ ខែកុម្ភៈ ឆ្នាំ២០២៤ បន្ថែមឱ្យដឹងថា៖ «ចំនួនមរណភាពមាតានៅកម្ពុជាដែលមានអត្រាស្លាប់ខ្ទង់៤០០នាក់ជាយូរឆ្នាំមកហើយ ធ្លាក់មកនៅត្រឹម១៥៤នាក់លើ១សែនកំណើតរស់»។
អ្នកស្រីបន្ថែមថា៖ «ដោយឡែកសម្រាប់ទារក និងកុមារក៏មានការថយចុះច្រើនដែរពីមុនខ្ទង់មរណភាព១០ធ្លាក់មកត្រឹម៨ទារកលើ១០០០កំណើតរស់»។
អ្នកស្រី មុត ចាន់ថង បញ្ជាក់ថា ដោយឡែកខេត្តបាត់ដំបងតាមការអង្កេតវាស់ស្ទង់ ក៏មានតួលេខប្រហាក់ប្រហែលទូទាំងប្រទេសខាងលើដែរ គឺអត្រាមរណភាពមាតា និងទារកមានការធ្លាក់ចុះច្រើន។
លោកស្រីវេជ្ជបណ្ឌិត មូល វណ្ណា នាយិការអង្គការ AHEAD បានឱ្យដឹងថា អង្គការលោកស្រីបានធ្វើការទាក់ទងសុខភាពមាតា និងទារកនៅតាមមណ្ឌលសុខភាពក្នុងស្រុកគោលដៅមានស្រុកថ្មគោល ស្រុកបវេល ស្រុកភ្នំព្រឹក ស្រុកកំរៀង ស្រុកសំពៅលូន ខេត្តបាត់ដំបង និងខេត្តប៉ៃលិនផងដែរ។
អ្នកស្រីវេជ្ជបណ្ឌិតបានបញ្ជាក់ថា តាមការអង្កេតនៅតាមស្រុកគោលដៅដែលលោកស្រីធ្វើការក្រោយពីទទួលការបណ្តុះបណ្តាលនិងផ្សព្វផ្សាយឃើញថា ស្រ្តីដែលមានផ្ទៃពោះនៅតាមសហគមន៍នានាបានផ្លាស់ប្តូរឥរិយាបទមកទទួលសេវាសុខភាពនៅតាមមណ្ឌលសុខភាពតាមគោលនយោបាយជាតិ៤ដងយ៉ាងតិច និងបានមកទទួលសេវាសម្រាលបានច្រើនជាងមុន។
លោកស្រីបន្ថែមថា៖ «តំបន់គោលដៅដែលយើងធ្វើការនៅតាមមណ្ឌលសុខភាពតាមអូឌីនីមួយៗ ឃើញថាអត្រាកើនឡើងនៃស្រ្តីមកពិនិត្យផ្ទៃពោះនិងការមកពិនិត្យសុខភាពល្អមែនទែន ទាំងអ្នកមកទទួលសេវា និងអ្នកផ្តល់សេវាតាមមណ្ឌលសុខភាព គឺល្អប្រសើរច្រើនជាងមុន»។
ក្រសួងសុខាភិបាលបានបង្ហាញរបាយការណ៍ក្នុងថ្ងៃទិវាជាតិ«សុខភាពមាតាទារក និងកុមារ»នាថ្ងៃទី២១ ខែកុម្ភៈឆ្នាំ២០២៤ឱ្យដឹងថា អត្រាមរណភាពទារក កុមារ និងកុមារអាយុក្រោម៥ឆ្នាំ បានថយចុះច្រើនជាងពាក់កណ្តាលធៀបនឹងឆ្នាំ២០១៤ មកត្រឹម៨, ១២ និង១៦ ក្នុង ១ ០០០កំណើតរស់ នាឆ្នាំ២០២១-២០២២។ នេះមានន័យថាប្រទេសកម្ពុជាសម្រេចបានរួចហើយនូវគោលដៅអភិវឌ្ឍន៍ប្រកបដោយចីរភាពនៅឆ្នាំ២០៣០ ក្នុងការបញ្ចប់ការស្លាប់ដែលអាចបង្ការបានរបស់ទារក កុមារក្រោម១ឆ្នាំ និងកុមារអាយុក្រោម៥ឆ្នាំ។
ក្រសួងសុខាភិបាលបានបញ្ជាក់លើផេកផ្លូវការរបស់ក្រសួងថា បន្ថែមថាស្ត្រីមានផ្ទៃពោះស្ទើរតែទាំងអស់ទទួលបានការថែទាំផ្ទៃពោះមុនពេលសម្រាលកូន៩៩នាក់ក្នុង១០០នាក់បានរាយការណ៍បានទទួលការថែទាំពីបុគ្គលិកសុខាភិបាលដែលបានបណ្តុះបណ្តាលក្នុងកំឡុងពេលមានផ្ទៃពោះដែលអត្រានេះ ជាការកើនឡើងគួរឱ្យកត់សម្គាល់ពី៣៨%ក្នុងឆ្នាំ២០០០។ ដូចគ្នានេះដែរ ស្ទើរតែគ្រប់ការសម្រាលទាំងអស់នៅកម្ពុជា គឺដោយបុគ្គលិកសុខាភិបាលដែលបានបណ្តុះបណ្តាល ដែលបានកើនពី៣២%ក្នុងឆ្នាំ២០០០ ដល់៩៩%ក្នុងឆ្នាំ២០២១-២០២២។
លោកសាស្រ្តាចារ្យ ឈាង រ៉ា រដ្ឋមន្រ្តីក្រសួងសុខាភិបាលបានថ្លែងក្នុងឱកាសទិវាជាតិខាងលើបញ្ជាក់ថា ឯកឧត្តមសាស្រ្តាចារ្យរដ្ឋមន្រ្តីក្រសួងសុខាភិបាល បានមានប្រសាសន៍ថា នៅពេលដែលយើងកំពុងធ្វើដំណើរឆ្ពោះទៅប្រទេសកម្ពុជាមួយដែលមានប្រជាជនមានសុខភាពល្អប្រសើរជាងមុន សូមយើងចូលរួមទាំងអស់គ្នាជាធ្លុងមួយក្នុងការពង្រឹងបន្ថែមទៀតនូវគុណភាពសេវាសុខភាពមាតា ទារក និងកុមារ និងការសាងប្រព័ន្ធសុខាភិបាលមួយដែលរឹងមាំជាងមុន និងផ្តល់សេវាសុខភាពទៅដល់ប្រជាជនគ្រប់គ្នាដោយមិនទុកបុគ្គលណាម្នាក់ចោលឡើយ។
លោករដ្ឋមន្រ្តីបន្ថែមថា៖ «ទាំងអស់គ្នា យើងត្រូវតែបន្តកិច្ចខិតខំប្រឹងប្រែងរួមគ្នាដើម្បីកសាងអនាគតមួយដែលម្តាយ ទារក និងកុមារគ្រប់រូបនៅកម្ពុជា ទទួលបានការថែទាំសុខភាពប្រកបដោយវិជ្ជាជីវៈ ហើយដែលគាត់សមនឹងទទួលបាន»។
ងាកមកអ្នកស្រី ថុង គឹមហេង បានបាននិយាយថា ក្រោយពីម្តាយគាត់ស្លាប់ទៅបន្ទុកគ្រួសារធ្លាក់លើរូប គាត់ដែលត្រូវរ៉ាប់រងគ្រួសារនិងរ៉ាបរងការចិញ្ចឹមប្អូនប្រុសដែលទើបកើតដែលត្រូវការទឹកដោះគោបៅ ណាមួយត្រូវ ចំណាយលើការជួលផ្ទះរស់នៅក្នុងមួយខែ១៥០ដុល្លារ ទៀតខណៈដែលឪពុករបស់ខ្លួនធ្វើការបើកបររថយន្តឱ្យអង្គការមួយ។
អ្នកស្រី គឹមហេង បន្ថែមថា៖ «ឥឡូវចៅអត់មានយាយ កូនអត់មានម្តាយហើយខ្ញុំត្រូវទទួលបន្ទុកមើលថែប្អូន កាលម្តាយខ្ញុំនៅគាត់មើលថែកូនខ្ញុំ២នាក់ ខ្ញុំចេញទៅធ្វើការដើម្បីជួយរកលុយផ្គត់ផ្គង់ក្នុងផ្ទះ តែឥឡូវ ម្តាយខ្ញុំអត់នៅមិនមានអ្នកណាជួយមើលថែកូនខ្ញុំហើយ ខ្ញុំអត់អាចចេញទៅធ្វើការបាន ការចាយវាយ ក្នុងផ្ទះកាន់តែខ្វះខាតហើយត្រូវទទួលបន្ទុកចិញ្ចឹមប្អូនដោយបៅទឹកដោះគោទៀត បន្ទុកកាន់តែច្រើន ចំណាយសព្វគ្រប់បែបយ៉ាង»។
អ្នកស្រី ថុង គឹមហេង និង អ្នកស្រី ថុង គឹមហួយ ដែលជាបង បាននិយាយថា មុនដំបូងពួកគាត់សំណូមពរសុំ ត្រឹមតែចង់ឱ្យគ្រូពេទ្យទទួលស្គាល់កំហុស និងធ្វើការសុំទោសជាសាធារណៈដែលគាត់ធ្វេសប្រហែសធ្វើឱ្យម្តាយរបស់គាត់ស្លាប់ប៉ុណ្ណោះ។ ប៉ុន្តែពេលមន្ទីរពេទ្យចេញលិខិតមកមិនមែនជាការពិតនិយាយចេញមកបំភ្លើសច្រើនគាត់ គិតថា នឹងមានគម្រោងបន្តដាក់ពាក្យបណ្តឹងរឺទាមទាសំណងពីខាងមន្ទីរពេទ្យនិងសុំឱ្យក្រសួងសុខាភិបាលជួយរកយុត្តិធម៌ឱ្យគ្រួសាររបស់គាត់ផង។
អ្នកស្រី ថុង គឹមហេង បានសំណូមពរចុងក្រោយថា៖ «សំណូមពរដល់លោកគ្រូអ្នកគ្រូពេទ្យទាំងអស់ជួយសង្គ្រោះ អ្នកជំងឺមិនថាក្នុងស្ថានភាពបែបណាក៏ដោយអ្នកជំងឺដែលចូលទៅដេកពេទ្យមិនមានអ្នកណាចង់ចូលទៅដេកទេ គឺសុទ្ធតែឈឺ មិនថាជំងឺធ្ងន់ រឺស្រាលទេ នៅពេលដែលអ្នកជំងឺរៀបរាប់ពីអាការៈសូមលោកគ្រូអ្នកគ្រូពេទ្យមេត្តាយកចិត្តទុកដាក់ស្តាប់ បើឆ្ងល់ខ្លាំងសូមពិនិត្យឱ្យបានម៉ត់ចត់ កុំពិនិត្យបែបលេងសើចបែបនេះ សូមតាមដានអ្នកជំងឺឱ្យខ្លាំងបំផុត»៕
