សមាគមសម្ព័ន្ធអ្នកសារព័ត៌មានកម្ពុជា

ចិននឹងផ្ដល់ជំនួយសម្រាប់ការផ្គត់ផ្គង់ទឹកស្អាតនៅជនបទ និងវិស័យកសិកម្ម អំឡុងដំណើរទស្សនកិច្ចរបស់លោក វ៉ាង យី

ឧបនាយករដ្ឋមន្ត្រី ស៊ុន ចាន់ថុល អនុប្រធានទី១នៃក្រុមប្រឹក្សាអភិវឌ្ឍន៍កម្ពុជា (រូបឈរទីពីរពីខាងស្ដាំដៃ) និងលោក វ៉ាង យី រដ្ឋមន្ត្រីការបរទេសចិន (រូបឈរទីពីរពីខាងឆ្វេងដៃ) ធ្វើជាសាក្សីពិធីចុះហត្ថលេខាលើកិច្ចព្រមព្រៀង នៅរាជធានីភ្នំពេញ នាថ្ងៃទី២២ ខែមេសា ឆ្នាំ២០២៤។ (រូបភាពពីទំព័រហ្វេសប៊ុករបស់ CDC)
ឧបនាយករដ្ឋមន្ត្រី ស៊ុន ចាន់ថុល អនុប្រធានទី១នៃក្រុមប្រឹក្សាអភិវឌ្ឍន៍កម្ពុជា (រូបឈរទីពីរពីខាងស្ដាំដៃ) និងលោក វ៉ាង យី រដ្ឋមន្ត្រីការបរទេសចិន (រូបឈរទីពីរពីខាងឆ្វេងដៃ) ធ្វើជាសាក្សីពិធីចុះហត្ថលេខាលើកិច្ចព្រមព្រៀង នៅរាជធានីភ្នំពេញ នាថ្ងៃទី២២ ខែមេសា ឆ្នាំ២០២៤។ (រូបភាពពីទំព័រហ្វេសប៊ុករបស់ CDC)

ប្រទេសចិន​នឹង​ផ្ដល់ជំនួយដល់​ការអភិវឌ្ឍ​ដំណាក់កាលទីពីរ​នៃ​គម្រោង​ផ្គត់ផ្គង់ទឹក​ស្អាត​​នៅជន​បទ​និង​ផែនការ​មេ​វិស័យកសិកម្ម​របស់​ប្រទេស​កម្ពុជា នៅក្រោយ​ការចុះ​ហត្ថលេខា​​លើ​កិច្ច​ព្រមព្រៀង​​ក្នុងអំឡុង​ដំណើរទស្សនកិច្ច​បីថ្ងៃរបស់​រដ្ឋមន្ត្រី​ការបរទេស​ចិន​ លោក វ៉ាង យី ។

កិច្ចព្រមព្រៀង​ដែល​បានចុះហត្ថលេខា រួមមាន ជំនួយឥតសំណងរបស់ចិន​សម្រាប់​ដំណាក់កាលទីពីរ​នៃគម្រោង​ផ្គត់ផ្គង់ទឹក​ស្អាត​នៅតំបន់ជនបទ ការប្រគល់​ផែនការមេ​សម្រាប់ការអភិវឌ្ឍ​វិស័យកសិកម្ម​កម្ពុជា និង​កិច្ចព្រមព្រៀងរួមស្ដីពី​ពិធីសារសម្រាប់​​លក្ខខណ្ឌ​តម្រូវ​ផ្នែក​ផលិតកម្ម​និងអនាម័យ​សម្រាប់​ផលិតផល​ចំណី​សុនខពាក់​កណ្ដាល​​​សម្រេច​ដែលធ្វើពី​ស្បែក​គោ​សម្រាប់ការនាំចេញ​ទៅ​កាន់ប្រទេសចិន។

លោក វ៉ាង យី ដែលបានមកដល់កម្ពុជា​កាលពីថ្ងៃអាទិត្យ បាន​ជួបពិភាក្សា​ទ្វេភាគី​ជាមួយ​​លោក​នាយករដ្ឋមន្ត្រី ហ៊ុន ម៉ាណែត និង​លោក សុខ ចិន្ដាសោភា ឧបនាយករដ្ឋ​មន្ត្រី ​​និង​ជារដ្ឋមន្ត្រី​ការបរទេស ​និង​សហប្រតិបត្តិការអន្តរជាតិ។ ក្រៅពី​នេះ ទាំង​លោក វ៉ាង យី និង​ឧបនាយក​រដ្ឋមន្ត្រី ស៊ុន ចាន់ថុល ក៏បានធ្វើជាសហប្រធាន​នៃ​កិច្ច​​ប្រជុំ​លើក​ទី៧​របស់​គណៈកម្មាធិការ​សម្រប​សម្រួល​អន្តររដ្ឋាភិបាល​កម្ពុជា-ចិនផង​ដែរ។ ​

នៅមុននោះ​ លោកត្រូវបានអនុញ្ញាត​ឱ្យ​ចូលគាល់សម្ដែងការគួរសម​ជាមួយ​ព្រះមហាក្សត្រ​ ព្រះ​បាទ នរោត្តម សីហមុនី ។ បន្ទាប់មក លោកបាន​ជួយ​ជាមួយ​ប្រធានព្រឹទ្ធសភា លោក ហ៊ុន សែន

លោក ហ៊ុន សែន បានសរសេរ​នៅលើ​ទំព័រហ្វេសប៊ុក​របស់​លោកថា លោក វ៉ាង យី បានប្រាប់​លោក​ ហ៊ុន សែន ពីសកម្មភាពនានានៃដំណើរទស្សនកិច្ចរបស់លោក​នៅ កម្ពុជា ជាពិសេស លទ្ធផល​ល្អដែលសម្រេចបានក្នុងអំឡុង​កិច្ច​ប្រជុំ​គណៈកម្មាធិការ​អន្តររដ្ឋាភិបាល។ លោក​ក៏​បាន​និយាយ​ផង​ដែរថា ប្រជាជាតិទាំងពីរ​បាន​ឈានដល់​ដំណាក់កាល​ថ្មី​មួយ​ទៀត​ហើយ។

លោក ហ៊ុន សែន បាននិយាយថា លោក វ៉ាង យី បានកោតសរសើរ​រូបលោក​ចំពោះ​ទស្សន​វិស័យ​វែងឆ្ងាយ​របស់លោក និង​ចំពោះ​ការផ្ទេរ​អំណាច​ដោយរលូន​ពី​ជំនាន់ចាស់​ទៅជំនាន់ថ្មី ។

នៅក្នុងសេចក្ដីថ្លែងការណ៍រួមមួយ ដែលបាន​ផ្សាយ​ដោយ​ក្រសួងព័ត៌មាន ភាគីចិន​បាន​គូស​បញ្ជាក់​សាជាថ្មី​​នូវ​ការគាំទ្ររបស់​ខ្លួន​ចំពោះ​ជម្រើស​របស់​កម្ពុជា​លើ​មាគ៌ា​អភិវឌ្ឍន៍​ដែល​ស្របនឹង​លក្ខខណ្ឌជាតិ ។

សេចក្ដីថ្លែងការណ៍បានសរសេរ​ថា ភាគីចិន​គាំទ្រ​កិច្ច​ប្រឹង​ប្រែងរបស់​កម្ពុជា​ក្នុងការ​ការពារ​អធិបតេយ្យ​ជាតិ សន្តិសុខ និង​ផលប្រយោជន៍អភិវឌ្ឍន៍​ ព្រមទាំង​ប្រឆាំងដាច់ខាតចំពោះ​ការជ្រៀតជ្រែកពីផ្នែក​ខាងក្រៅ​​ក្នុង​កិច្ចការផ្ទៃក្នុង​របស់​កម្ពុជា ។

សេចក្តីថ្លែងការណ៍បន្តថា៖ «ភាគីកម្ពុជាបាន​បញ្ជាក់ឡើងវិញពីការប្ដេជ្ញាចិត្តរបស់ខ្លួន​ចំពោះ​​គោល​នយោបាយ​ចិនតែមួយ និង​ទទួលស្គាល់ថាសាធារណរដ្ឋប្រជាមានិតចិន​គឺជា​រដ្ឋាភិបាលស្របច្បាប់តែមួយគត់​តំណាង​ឱ្យ​ប្រទេសចិនទាំងមូល ហើយតៃវ៉ាន់ គឺជា​ផ្នែក​ដែលមិនអាចកាត់ផ្ដាច់បានពីទឹកដីរបស់​ប្រទេស​ចិន»

សេចក្ដីថ្លែងការណ៍បានបន្ថែមថា៖ «កម្ពុជាប្រឆាំងរាល់ការប៉ុនប៉ង​ប្រើប្រាស់​បញ្ហា​នានា​របស់តៃវ៉ាន់​ដើម្បីជ្រៀតជ្រែក​កិច្ចការផ្ទៃក្នុងរបស់ប្រទេសចិន [និង]ប្រឆាំងគ្រប់ទម្រង់​នៃឯករាជ្យភាពរបស់​តៃវ៉ាន់»

ភាគីទាំងពីរក៏បានឯកភាពគ្នា​ក្នុងការ​ពង្រឹង​កិច្ចសហប្រតិបត្តិការ​លើ​វិស័យ​ការពារជាតិ បន្ត​ធ្វើ​សមយុទ្ធ​និង​ការហ្វឹកហ្វឺនរួមគ្នា ជំរុញ​កិច្ច​សហប្រតិបត្តិការលើ​វិស័យនានា​ជាអាទិ៍​សេវាសុខាភិបាល​​​​ និងភស្តុភារកម្ម ការបណ្ដុះបណ្ដាលបុគ្គលិក និងការ​បោស​សម្អាតមីន ព្រមទាំងរួមគ្នា​ប្រយុទ្ធប្រឆាំងនឹង​ឧក្រិដ្ឋកម្មឆ្លងដែន ដូចជា ល្បែង​ស៊ីសង​តាមប្រព័ន្ធអ៊ីនធឺណែត ការក្លែងបន្លំ​តាម​ទូរគមនាគមន៍ និងការជួញដូរគ្រឿងញៀន ។

សេចក្ដីថ្លែងការណ៍រួមដដែលបាន​សរសេរថា៖ «ភាគីកម្ពុជា​និងចិន​នឹង​បន្ស៊ីគំនិតផ្ដួច​ផ្ដើម​​​ខ្សែក្រវាត់​និងផ្លូវ និងយុទ្ធសាស្ត្របញ្ចកោណដំណាក់កាលទី១ ឱ្យកាន់តែស៊ីជម្រៅ ពន្លឿន​ការបង្កើត​ផែនការសហប្រតិបត្តិការ​សម្រាប់ច្រករបៀង​ឧស្សាហកម្ម​និង​បច្ចេកវិទ្យា​»។​

ការរៀបផែនការគោល​និង​ការរៀបចំ​ផ្លូវដែក​កម្ពុជា-ចិន​នឹងត្រូវជំរុញ​រួមជាមួយនឹង​ការ​ផ្ដល់​​មជ្ឈមណ្ឌលធ្វើ​​និទស្សន៍កសិកម្ម​ចិន និង​គម្រោងប្រមូលផល​ដើមដៃ​ដទៃទៀត​នៃ​ច្រករបៀង​មច្ឆានិងអង្ករ។​

សេចក្ដីថ្លែងការណ៍ក៏បានលើកឡើង​ផងដែរថា កិច្ច​សហប្រតិបត្តិការ​ភាពជាដៃគូ​យុទ្ធសាស្ត្រ​​គ្រប់ជ្រុងជ្រោយកម្ពុជា​-ចិន​ នឹង​ត្រូវ​ធ្វើ​ឱ្យ​កាន់តែស៊ីជម្រៅថែមទៀត។​

លើសពីនេះ ការនាំចេញ​ផលិតផល​កសិកម្ម​កម្ពុជាទៅកាន់ប្រទេសចិន នឹង​ត្រូវជំរុញ​បន្ថែមទៀត​ រីឯ​វិនិយោគទុន​ចិន​ក៏នឹងត្រូវពង្រីកផងដែរ​នៅក្នុង​ប្រទេស​កម្ពុជា។

ឧបនាយករដ្ឋមន្ត្រីនិងជារដ្ឋមន្ត្រីការបរទេស​និង​សហប្រតិបត្តិការអន្តរជាតិ លោក សុខ ចិន្ដាសោភា ចាប់ដៃជាមួយ​រដ្ឋមន្ត្រីការបរទេស​ចិន លោក វ៉ាង យី ក្នុងអំឡុង​កិច្ច​ប្រជុំ​ទ្វេភាគី​មួយ​នៅ​រាជធានីភ្នំពេញ នាថ្ងៃទី២១ ខែមេសា ឆ្នាំ២០២៤។ (រូបភាពពីក្រសួងការបរទេស​និង​សហប្រតិបត្តិការអន្តរជាតិ)

ស្របពេលជាមួយគ្នានេះដែរ រដ្ឋមន្ត្រី​ការបរទេស លោក សុខ ចិន្ដាសោភា បាន​និយាយ​ថា លោក​មានជំនួបប្រជុំ​ដ៏ផ្លែផ្កាមួយជាមួយ​លោក វ៉ាង យី ដោយក្នុងជំនួប​នោះ ភាគីទាំងពីរ​បានទទួលស្គាល់ពីសារសំខាន់​នៃ​ការផ្លាស់ប្ដូរ​និងការប្រាស្រ័យ​ទាក់​ទង​គ្នា​ជាញឹកញាប់​និង​សកម្ម រវាង​មេដឹកនាំនៃប្រទេសទាំងពីរ។ នេះបង្ហាញពី​ទំនុកចិត្តផ្នែក​នយោបាយ​ដ៏ខ្លាំងក្លា និង​មិត្តភាពដែកថែប​រវាង​ប្រទេសទាំងពីរ និងសហប្រតិបត្តិការ​នៅក្នុង​វិស័យ​ហេដ្ឋា​រចនា​សម្ព័ន្ធ ថាមពល សេដ្ឋកិច្ច និង​ពាណិជ្ជកម្ម ។

លោក ស៊ុន ចាន់ថុល ដែល​ជា​អនុប្រធានទី១នៃ​ក្រុមប្រឹក្សាអភិវឌ្ឍន៍កម្ពុជា​ផងដែរ​នោះ មិនអាចទាក់ទង​សុំ​ការអត្ថាធិប្បាយ​បានទេ ដោយសារ​លោក​ជាប់រវល់​ប្រជុំ ចំណែក​ឯ​អ្នកពាក្យ​ក្រសួងកសិកម្ម រុក្ខាប្រមាញ់ និងនេសាទ លោក ឃឹម ហ្វីណង់ បាន​និយាយ​ថា លោក​មិនទាន់​ទទួលបាន​ព័ត៌មានលម្អិត​ពីកិច្ច​ប្រជុំនៅឡើយទេ។

លោក ជុំ សុន្ទរី អ្នកនាំពាក្យក្រសួងការបរទេស បានពន្យល់ថា កិច្ច​សហប្រតិបត្តិការ​ត្បូង​ពេជ្រ​​ដែល​បង្កើតឡើង​ដោយ​អតីត​នាយករដ្ឋមន្ត្រី លោក ហ៊ុន សែន និង​ប្រធានាធិបតីចិន លោក ស៊ី ជិនភីង គឺជាផែនទីចង្អុលផ្លូវ​មួយសម្រាប់​ការ​កសាង​វាសនា​រួមគ្នា​សម្រាប់​ប្រជាជន​នៃប្រទេសទាំងពីរ។

លោក សុន្ទរី បានប្រាប់ ខេមបូចា ថា ច្រក​របៀង​មច្ឆា និងអង្ករ​ និង​ច្រករបៀង​ឧស្សាហកម្ម ​និង​បច្ចេកវិទ្យា​ គឺជាក្របខ័ណ្ឌដ៏សំខាន់​ដែលប្រទេសទាំងពីរបាន​ព្រមព្រៀងគ្នា ដើម្បី​បង្កើន​វិស័យ​ពាណិជ្ជកម្ម​ វិនិយោគ និងការនាំចេញ ។

លោកបានបដិសេធមិនផ្ដល់​អត្ថាធិប្បាយជុំវិញ​យុទ្ធសាស្ត្រ​ដែល​កម្ពុជានឹង​អនុវត្ត​ដើម្បី​លើក​កម្ពស់​ការប្រយុទ្ធប្រឆាំងនឹងឧក្រិដ្ឋ​កម្ម​ឆ្លងដែនទេ ។

ស្ថានទូតចិន​ប្រចាំរាជធានីភ្នំពេញ​មិនបានឆ្លើយតប​សំណួរ​តាមអ៊ីមែល​ពីអ្នកសារព័ត៌មាន​ឡើយ ។

លោក ពិត ករុណា អនុរដ្ឋលេខាធិការ និងជាអ្នកនាំពាក្យ​ក្រសួងអភិវឌ្ឍន៍ជនបទ បានប្រាប់​ ខេមបូចា ថា ប្រទេសចិន​បានគាំទ្រ​គម្រោង​ផ្គត់ផ្គង់ទឹក​ស្អាត​នៅ​តំបន់​ជនបទ​កាលពីពេលកន្លងមក ហើយ​គេរំពឹងថា ចិននឹងបន្តជួយ​ទៀត​នៅក្នុង​ដំណាក់​កាលទីពីរ ។

កន្លងមក ការផ្គត់ផ្គង់ទឹកស្អាត​បាន​ធ្វើឡើង​ទៅដល់​ខេត្តកំពង់ស្ពឺ កំពង់ឆ្នាំង កំពង់ធំ កណ្ដាល ត្បូងឃ្មុំ និងស្វាយរៀង តាមរយៈ​ការខួងអណ្ដូង​ ៨៤៦​អណ្ដូង និង​ការជីកស្រះសហគមន៍ចំនួន ៧៣ស្រះ ។

លើសពីនេះទៀតមានខេត្តចំនួន១០ ដូចជា ខេត្ត​សៀមរាប បន្ទាយមានជ័យ បាត់ដំបង ពោធិ៍សាត់ កំពង់ឆ្នាំង កំពង់ស្ពឺ កំពត ព្រៃវែង ស្វាយរៀង និង​កំពង់ចាម ក៏ទទួលបាន​ការផ្គត់ផ្គង់ទឹកស្អាត​ផង​ដែរ ។ ទន្ទឹមនឹងនេះ ក៏មានការខួង​អណ្ដូង​ស្នប់ចំនួន ៩៦៤អណ្តូង។

លោក ករុណា បាន​ថ្លែងថា ជំនួយចិន​គឺជាជំនួយឥតសំណង​សម្រាប់​គម្រោង​ផ្គត់​ផ្គង់​ទឹក​ស្អាត។ លោកបានបន្ថែមថា គម្រោង​ថ្មី​ដែល​បានចុះហត្ថលេខា​កាល​ពី​ថ្ងៃចន្ទ នឹង​តភ្ជាប់​​ទឹក​ស្អាត​ទៅកាន់​តំបន់ជនបទ នៅខេត្ត​សៀមរាប ប៉ៃលិន ឧត្ដរមានជ័យ ព្រះវិហារ ស្ទឹងត្រែង ក្រចេះ រតនគិរី និង​មណ្ឌលគិរី ។

នៅក្នុងជំហាននេះ អណ្ដូងចំនួន ១ ១៧៤អណ្ដូងនឹងត្រូវជីក រួមជាមួយ​នឹងការជីកស្រះ​ទឹក​សហគមន៍ចំនួន ២៤ស្រះ បូករួមទាំងសំណង់​ការពារច្រាំងស្រះ និង​បន្ទប់​បន្សុតទឹក​ចំនួន៨។ យោងតាមលោក ករុណា ថវិកា​សម្រាប់គម្រោងនេះ​គឺប្រហាក់ប្រហែល ៩៧,៥៧​លានយ័ន (ប្រាក់ចិន) ឬ(ស្មើនឹង១៣,៥លានដុល្លារអាមេរិក) ដែលក្នុងនោះ​សេវាកម្ម​បច្ចេកទេសប្រឹក្សាយោបល់​ត្រូវ​ចំណាយ​អស់៥,៩៣លានយ័ន និង​ថ្លៃសាងសង់អស់ ៩១,៦៤លាន​យ័ន៕

ប្រែសម្រួលពីអត្ថបទភាសាអង់គ្លេស៖ China To Aid Development of Rural Water Supply, Among Three Agreements Signed During Wang Yi’s Visit

783 views

ព័ត៌មានទាក់ទង

ព័ត៌មានថ្មីៗ

អត្ថបទពេញនិយម