សមាគមសម្ព័ន្ធអ្នកសារព័ត៌មានកម្ពុជា

ពលរដ្ឋមកពីពីរស្រុកក្នុងខេត្ដត្បូងឃ្មុំបានដាក់ញត្ដិទៅអាជ្ញាធរពាក់ព័ន្ធ​ឱ្យជួយដោះស្រាយជម្លោះដីធ្លីដ៏រ៉ាំរ៉ៃ

ពលរដ្ឋពីរស្រុកក្នុងខេត្ដត្បូងឃ្មុំនាំគ្នាលើកបដានៅមុខសាលាខេត្តត្បូងឃ្មុំដើម្បីឱ្យជួយអន្ដរគមន៍លើជម្លោះដីធ្លីនិងស្នើឱ្យអាជ្ញាធរជួយចេញបណ្ណកម្មសិទ្ធិឱ្យពួកគាត់។ រូបថតនៅថ្ងៃទី១៩ ខែតុលា ឆ្នាំ២០២២។ រូបភាពផ្ដល់ឱ្យ
ពលរដ្ឋពីរស្រុកក្នុងខេត្ដត្បូងឃ្មុំនាំគ្នាលើកបដានៅមុខសាលាខេត្តត្បូងឃ្មុំដើម្បីឱ្យជួយអន្ដរគមន៍លើជម្លោះដីធ្លីនិងស្នើឱ្យអាជ្ញាធរជួយចេញបណ្ណកម្មសិទ្ធិឱ្យពួកគាត់។ រូបថតនៅថ្ងៃទី១៩ ខែតុលា ឆ្នាំ២០២២។ រូបភាពផ្ដល់ឱ្យ

ពលរដ្ឋជាង២០០នាក់មកពីស្រុកមេមត់និងស្រុកតំបែរ ខេត្ដត្បូងឃ្មុំ បាននាំគ្នាទៅដាក់ញត្ដិ​នៅសាលាខេត្តត្បូងឃ្មុំនិងដាក់ពាក្យបណ្តឹងទៅសាលាឧទ្ធរណ៍ដើម្បីឱ្យជួយអន្ដរាគមន៍ពី​ជម្លោះដីធ្លីដែលអូស​បន្លាយអស់រយៈពេលជាច្រើនឆ្នាំជាហេតុធ្វើឱ្យជីវភាពពួកគាត់កាន់តែ​លំបាកខ្លាំងទៅៗ។

យោងតាមញត្ដិមួយដែលខេមបូចាទទួលបានពីថ្ងៃទី១៩ ខែតុលា ឆ្នាំ២០២២ បានបញ្ជាក់​ថា មាន​ពលរដ្ឋមកពីស្រុកមេមត់ចំនួន១០០គ្រួសារ​មកពីឃុំចំនួន២ គឺឃុំទន្លូងនិងឃុំជាំក្រវៀន បានដាក់ទៅអភិបាលខេត្តត្បូងឃ្មុំ លោក ជាម ច័ន្ទសោភណ្ឌ ដើម្បីឱ្យលោកជួយ​អន្ដរាគមន៍​ចេញបណ្ណកម្មសិទ្ធិស្របច្បាប់លើដីលំនៅឋាននិងដីស្រែចម្ការទំហំ៣៧៦,៩ហិកតា។

យោងតាម សជណ របស់ទីស្ដីការគណៈរដ្ឋមន្រ្ដីចុះថ្ងៃទី០៥ ខែកញ្ញា ឆ្នាំ២០១៦ ស្ដីពីការកាត់​ឆ្វៀលដីទំហំ ១ ៩៦៩ហិកតាជូនពលរដ្ឋ។ ពលរដ្ឋអះអាងថា ទោះបីជាកន្លងមក​មានការចុះ​វែង​​​កំណត់​អត្ដសញ្ញាណ​ម្ចាស់ដីជាច្រើនលើកច្រើនសារទៅហើយ ប៉ុន្ដែមិនបានផលអ្វីសោះ​ឡើយ​​រហូត​មក​ដល់ពេលនេះ។

ក្នុងញត្ដិដដែលបានបន្ថែមថា ពួកគាត់បាននាំគ្នាទៅសាកសួរមេឃុំជាំក្រវៀនម្ដងរួចមកហើយ​អំពីបញ្ហាប្លង់កម្មសិទ្ធិពួកគាត់ ប៉ុន្ដែក៏គ្មានបានចម្លើយណាមួយនោះទេ។​បន្ទាប់មក​ពួកគាត់​នាំ​គ្នា​ទៅជួបនិងមេឃុំទន្លូងម្ដង បែរជាមេឃុំទន្លូងថាដីរបស់ពួកគាត់ជាប់​ពាក្យបណ្ដឹង​ពីឈ្មោះ តោង សំអាត (យាយហ៊ុម) ដែលជាឈ្មោះពួកគាត់មិនស្គាល់។

លោក ប៊ឹង ថន មេឃុំទន្លូង នៅថ្ងៃទី២៨ ខែសីហា ឆ្នាំ២០២២ បានហៅប្រជាពលរដ្ឋឱ្យ​ប្រជុំ​និងបានប្រាប់ពលរដ្ឋឱ្យប្រគល់ដីមួយចំនួនទៅឱ្យឈ្មោះ តោង សំអាត ជាថ្នូរនិងការ​ដោះ​ដូរនិងដកពាក្យបណ្ដឹងទើបអាចចេញប្លង់កម្មសិទ្ធិបាន ប៉ុន្ដែពួកគាត់​មិនព្រមប្រគល់តាម​សំណើរ​ដោយពួកគាត់អះអាងថាដីនេះរដ្ឋបានកាត់ឆ្វៀលឱ្យពួកគាត់។

យ៉ាងណាក្ដីពលរដ្ឋ១០០គ្រួសារបានស្នើទៅអភិបាលខេត្ដត្បូងឃ្មុំថា៖ «យើងខ្ញុំទាំងអស់គ្នា​១០០គ្រួសារស្នើសុំលោកអភិបាលខេត្ដមេត្ដាជួយអន្ដរាគមន៍និង ដោះស្រាយជូន​យើងខ្ញុំ​ទាំងអស់គ្នាដោយស្នើសុំចេញបណ្ណកម្មសិទ្ធិស្របច្បាប់លើដីធ្លីរបស់ពួកយើងខ្ញុំ»

បើតាមលោក ផុន សុផល អាយុ៣២ឆ្នាំរស់នៅភូមិជាំក្រវៀន ឃុំជាំក្រវៀន ស្រុកមេមត់ ខេត្ដ​ត្បូងឃ្មុំ និងតំណាងសហគមន៍ជាំក្រវៀន ថ្លែងប្រាប់ខេមបូចាថា ការដាក់​ញត្ដិទៅ​សាលាខេត្ត​ព្រឹកថ្ងៃទី១៩ ខែតុលា នេះគ្រាន់តែចង់ឱ្យអាជ្ញាធរចេញប្លង់រឹង​ស្របច្បាប់​ត្រឹមត្រូវមួយ​ក្រោយពី​មានអនុក្រឹត្យពីលោកនាយករដ្ឋមន្ដ្រីដែលបានចេញថាកាត់ឆ្វៀលដី​អាស្រ័យផលឱ្យ​ពលរដ្ឋ​កាន់​កាប់ស្របច្បាប់ ប៉ុន្ដែបែរជាសុរិយោដីមិនបានធ្វើ​ឬក៏កាត់ដី​នោះ​ឱ្យពលរដ្ឋ ទើបពួកគេនាំ​គ្នា​មកសាលាខេត្ដត្បូងឃ្មុំ។

លោក សុផល បន្ដថា៖ «ពួកខ្ញុំដាក់នេះចង់ឱ្យអភិបាលខេត្ដគាត់ជួយអន្ដរាគម៍​ពីដីចេញ​អនុក្រឹត្យ​យូរហើយបង ប៉ុន្ដែអត់មានឃើញខាងសុរិយោដីណាចុះកាត់ប្លង់រឹងឱ្យពួកខ្ញុំទេ ព្រោះថាអត់ប្លង់រឹងពួកខ្ញុំពិបាកណាស់»។

លោកបានឱ្យដឹងថា ការដែលអាជ្ញាធរមិនព្រមចេញប្លង់រឹងឱ្យពលរដ្ឋវា​បានបង្កផល​លំបាក​ជាច្រើនដូចជាខ្លាចគេរឹបអូសយកដីហ្នឹងវិញពេលពួកលោកកំពុងអាស្រ័យផល ពេលដែល​ត្រូវការដើមទន់រកស៊ីជាពិសេសខ្ចីពីធនាគារឬក៏អង្គការក៏គេមិនឱ្យ ដូច្នេះវាធ្វើឱ្យពួកលោកជួប​បញ្ហាប្រឈមជីវភាពជាច្រើនអំពីការមិនមានប្លង់រឹងហ្នឹង។

លោកបានបញ្ជាក់ថា៖ «ពេលបានប្លង់រឹងយើងអត់ដើមទុនរកស៊ីយើងអាចទៅខ្ចីគេបានពេល​អត់ប្លង់ចឹង ពួកខ្ញុំពិបាកច្រើនបង ទៅខ្ចីអ្នកណាក៏គេមិនឱ្យដែរ»

តំណាងសហគមន៍រូបនេះក៏បានលើកឡើងទៀតថា មុននឹងមកដាក់ញត្ដិនៅសាលាខេត្ដនេះ​ពួកលោកធ្លាប់បានដាក់ទៅសាលាស្រុកមេមត់ម្ដងរួចមកហើយកាលពីថ្ងៃទី២៧ ខែកញ្ញា ឆ្នាំ២០២២ ដើម្បីឱ្យរដ្ឋបាលស្រុកជួយអន្ដរាគមន៍ចេញបណ្ណកម្មសិទ្ធិស្របច្បាប់បែរជា​មិន​ព្រម​ទទួលយកញត្ដិពួកលោក ហើយថែមទាំងចោទថាមានអ្នកនៅពីក្រោយខ្នងពួកលោក​ទៅ​វិញ។

លោកបន្តទៀតថា តាមការប្រាប់របស់មេឃុំទន្លូងកាលពីថ្ងៃទី២៨ ខែសីហា ឆ្នាំ២០២២ ថា​មាន​ដើមបណ្ដឹងឈ្មោះ  តោង សំអាត (យាយ ហ៊ុម)  បានដាក់ពាក្យបណ្ដឹង​និងមិនឱ្យមានការ​ចេញ​​ប្លង់រឹង ទាល់តែពលរដ្ឋព្រមកាត់ដីឬក៏ឱ្យជាលុយ១០ម៉ឺនរៀលក្នុង១ហិកតាទើបអាចចេញ​ប្លង់​បាន ប៉ុន្ដែតាំងពីដើមមកពួកលោកមិនដែលបានឃើញក៏ដូចជាស្គាល់បុគ្គល​ឈ្មោះ តោង សំអាត ហ្នឹងនោះទេ ទើបតែថ្មីៗនេះបែរជាលេចចេញនូវបុគ្គលហ្នឹងទៅវិញ។

លោកបន្ថែមថា៖ «ពួកខ្ញុំមិនដែលបានជួបឈ្មោះ តោង សំអាត ហ្នឹងទេ តាំងពីមុនមក ទើបតែ​ថ្មីៗ​នេះបែរជាមេឃុំទន្លូងបា្រប់ថាឈ្មោះ តោង សំអាត បានដាក់ពាក្យបណ្ដឹង​និងមិនឱ្យ​ចេញ​ប្លង់រឹងឱ្យពួកខ្ញុំទៅវិញ»

ពលរដ្ឋពីរស្រុកក្នុងខេត្ដត្បូងឃ្មុំនាំគ្នាលើបដានៅមុខសាលាខេត្តដើម្បីឱ្យជួយអន្ដរគមន៍លើ​ជម្លោះដីធ្លីរបស់ពួកគាត់។ រូបថតនៅថ្ងៃទី១៩ ខែតុលា ឆ្នាំ២០២២។ រូបភាពផ្ដល់ឱ្យ

ចំណែកឯមេឃុំទន្លូង លោក ប៊ឹង ថន បានឱ្យខេមបូចាដឹងថា លោក​កំពុងតែសម្របសម្រួល​ដើម្បីបញ្ចប់បញ្ហាទាំងអស់នៅក្នុងអាណត្ដិរបស់លោក ដោយថាការដែលបញ្ហាទាំងអស់នេះ​មិនទាន់ចប់ដោយសារមានមេខ្យល់៣នាក់ទៅ៤នាក់ជាអ្នកនៅពីក្រោយខ្នងទើបបញ្ហានេះចេះតែ​មិនចប់ លោកខំដោះស្រាយតែពួកមេខ្យល់ខំបង្ករឿង។

លោកលើកឡើងថា៖ «ខ្ញុំនិយាយឱ្យចំតែម្ដង អាពួកមេខ្យល់គឺពួកអាប្រឆាំងហ្មង ពិបាក​និយាយ​គ្នា​​ណាស់ ខ្ញុំខំសម្របសម្រួល ពួកវាដើរប្រមូលប្រជាពលរដ្ឋឡើងតវ៉ា​ដល់ណា​ដល់ណីវិញ និយាយរួមពិបាកនិយាយគ្នាណាស់»

មេឃុំបន្ដពន្យល់ទៀតថា មូលហេតុដែលប្លង់មិនទាន់ចេញបានដោយសារតែឈ្មោះ តោង សំអាត បានប្ដឹងជំទាស់នឹងអនុក្រឹត្យរបស់រដ្ឋាភិបាលទើបមិនអាចចេញបាន ពីព្រោះដីនៅ​ក្នុងអនុក្រឹត្យទំហំជិត២ ០០០ហិកតាហ្នឹងមានដីរបស់ តោង សំអាត ជិត៤០០ហិកតា​នៅ​ក្នុង​ហ្នឹង ប៉ុន្ដែលោកថាដើម្បីឱ្យបញ្ចប់បញ្ហាអស់ហ្នឹង​គឺខាងដើមបណ្ដឹង​សុំកាត់៣ភាគរយឬ​២ភាគរយ​​នៃទំហំដីជិត៤០០ហិកតា ប៉ុន្ដែពលរដ្ឋមិនព្រម រហូតដល់មានការឡើងដាក់ញត្ដិ​ទៅសាលាស្រុកនិងសាលាខេត្តដូច្នេះ។

មេឃុំរូបនេះបន្ដថា៖ «ពលរដ្ឋខ្លះគាត់ព្រមឱ្យ១០ម៉ឺនរៀលក្នុង១ហិកតាទៅឱ្យ តោង ​សំអាត អ្នកខ្លះគាត់មិនព្រម ខ្ញុំថាបើពលរដ្ឋទាំងអស់គាត់ព្រមឱ្យ១០ម៉ឺនរៀលក្នុង១ហិកតា ខ្ញុំអាច​និយាយ​នឹង តោង  សំអាត ប្រហែលគាត់ដកពាក្យបណ្ដឹង ចឹងអាចចេញប្លង់រឹង​បានគ្រប់គ្នា​ហើយ យ៉ាងណាខ្ញុំនឹងដោះស្រាយបញ្ហាអស់ហ្នឹងឱ្យចប់ក្នុងអាណត្ដិរបស់ខ្ញុំ»

យ៉ាងណាក៏ដោយលោកក៏បានជម្រុញឱ្យភាគីទាំង២សម្របសម្រួលគ្នាដើម្បីបញ្ចប់បញ្ហាទាំងអស់ កុំនៅតែបន្ដ វាមិនបានផ្ដល់ផលចំណេញអ្វីនោះទេ ហើយលោកសង្ឃឹមថា ពលរដ្ឋនឹង​ព្រមទទួលសំណើររបស់លោកក្នុងការបញ្ចប់រឿងជម្លោះដីធ្លីនេះ។

ជុំវិញរឿងខាងលើនេះ លោក ស្រេង លី អភិបាលស្រុកមេមត់ បានឆ្លើយតប​ថា លោកមិន​បាន​ហាមឃាត់ពលរដ្ឋមិនឱ្យដាក់ញត្ដិទាមទារអ្វីផ្សេងនោះទេ ប៉ុន្ដែការដែល​ពលរដ្ឋមក គ្រាន់​តែ​លោក​ចង់ឱ្យមានតំណាងច្បាស់លាស់ប៉ុណ្ណោះទើបលោកទទួលញត្ដិ ហើយមក​ដល់ពេល​នេះ​លោកថាលោកមិនបានដឹងពីការចង់បានរបស់ពលរដ្ឋដែលមក​សាលាស្រុកទេ។

លោកបន្តថា៖ «ខ្ញុំអត់មានឆ្លើយតបអីផង ហើយបំណងដែលមកក៏ខ្ញុំអត់ដឹងមកធ្វើអី​ឬ​មានបំណងអីដែរ ពេលឃើញគេមកទាំងហ្វូងចឹង ខ្ញុំក៏ចេញមកសួរថា មកមានការ​អី​ហើយ​អ្នកណាជាតំណាង ពួកគាត់ឆ្លើយថាអត់មានតំណាងឬក៏អ្នកណានាំមកទេ ខ្ញុំក៏​ថាចុះ​បើ​អត់មានអ្នករៀបចំម៉េចបានមកគ្នាច្រើនជាង១០០នាក់ហើយ វាមិនដែល​នឹកឃើញ​សុខៗ​នាំគ្នាមកទេ ហើយខ្ញុំសួរនាំមិនមែនដើម្បីទៅរករឿងអ្នកដែលនាំមកដែរ គ្រាន់តែ​ចង់ដឹង​ថាពួកគាត់មានតំណាងអត់ដើម្បីធ្វើការជជែកនិងដោះស្រាយគ្នា បើអត់​ទេសុំ​អញ្ជើញ​ទៅវិញចុះ»

លោកអភិបាលស្រុកបានបញ្ជាក់ថា ការដែលលោកមិនទទួលញត្ដិកន្លងមកព្រោះចង់ឱ្យ​ពលរដ្ឋមានតំណាងដើម្បីដោះស្រាយគ្នា លោកមិនមានចេតនាណាមួយក្នុងការគេចវេះ​ពីប្រជាពលរដ្ឋឡើយ។

លោកបន្ដថា៖ «ឱ្យតែពួកគាត់មានតំណាងត្រឹមត្រូវឬក៏ចាត់គ្នា៥នាក់ដែលមានសិទ្ធិក្នុងការ​សម្រេច​ណាមួយ គឺខ្ញុំចាំទទួលនិងដោះស្រាយជូនពួកគាត់»

លោក ហុក ពេជ្រហោះ អ្នកនាំពាក្យសាលាខេត្ដត្បូងឃ្មុំ បានប្រាប់ខេមបូចានៅព្រឹក​ថ្ងៃ​ព្រហស្បតិ៍​នេះថា លោកបានឱ្យខាងទីចាត់ការអន្ដរវិស័យចុះទៅពិនិត្យ​និងប្រមូលព័ត៌មាន​ពីប្រជាពលរដ្ឋតាំងពីថ្ងៃពុធភ្លាមៗមកម្ល៉េះនិងប្រមូលសំណូមពររបស់ពលរដ្ឋដើម្បី​យកមកដោះស្រាយជូនពួកគាត់។

អ្នកនាំពាក្យរូបនេះបន្ដថា៖ «ខ្ញុំឱ្យខាងទីចាត់ការអន្ដរវិស័យគាត់ចុះទៅប្រមូលសំណូមពរ និងសិក្សាបន្ថែមលើបញ្ហាដែលពលរដ្ឋបានដាក់មករដ្ឋបាលខេត្តម្សិលមិញនេះ បន្ទាប់ពីសិក្សាហើយយើងនឹងដឹងថាត្រូវដោះស្រាយយ៉ាងម៉េច តែពេលនេះយើងចុះសិក្សាសិនបង»

ខេមបូចាមិនអាចសុំការបំភ្លឺពីឈ្មោះ តោង សំអាត ដែលជាដើមបណ្ដឹងដែលប្ដឹងជំទាស់នឹង​អនុក្រឹត្យបាននោះទេ ពាក់ព័ន្ធនិងបញ្ហាខាងលើ។

តំណាងសហគមន៍មកពីស្រុកមេមត់ខេត្ដត្បូងឃ្មុំដើរចូលដាក់ញត្ដិនៅសាលាខេត្តដើម្បី​ឱ្យជួយអន្ដរាគមន៍ចេញប្លង់រឹងជូនពួកគាត់។ រូបថតនៅថ្ងៃទី១៩ ខែតុលា ឆ្នាំ២០២២។ រូបភាពផ្ដល់ឱ្យ

លោក គឹម  ពិសិដ្ឋ មន្ដ្រីសម្របសម្រួលសហគមន៍​នៃសមាគមសម្ព័ន្ធ​កសិករកម្ពុជា​ប្រចាំ​ខេត្តត្បូងឃ្មុំ បានលើកឡើងថា រឿងដាក់ញត្ដិមកសាលាខេត្តដោយសារតែពីមុនពួកគាត់​បានដាក់ទៅសាលាស្រុកម្ដងហើយ ប៉ុន្ដែបែរជាអាជ្ញាធរស្រុកច្រានចោល ហើយថែមទាំង​ចោទ​ពលរដ្ឋថាមានអ្នកនៅពីក្រោយខ្នងទៀត ទើបពួកគាត់សម្រេចចិត្តដាក់ញត្ដិ​មកខេត្ដ​ដើម្បីឱ្យរដ្ឋបាលខេត្ដជួយអន្ដរាគមន៍លើបញ្ហាបណ្ណកម្មសិទ្ធិស្របច្បាប់ដែលអូសបន្លាយអស់​រយៈពេលយ៉ាងយូរ ជាពិសេសក៏មានការគំរាមកំហែងទៅលើដីធ្លីរបស់ពួកគាត់​ដូចជាឱ្យ​ពួក​គាត់ចែកជាភាគរយទៅបុគ្គលទី៣និងបញ្ហាផ្សេងទៀតដែលធ្វើឱ្យពួកគាត់មានក្ដីបារម្ភ​ច្រើន។

លោក ពិសិដ្ឋ បន្ដថា៖ «ខ្ញុំគិតថារាល់អាជ្ញាធរថ្នាក់ខេត្តគួរតែចុះទៅពង្រឹង​ក៏ដូចជាផ្សព្វផ្សាយ​និងពិគ្រោះយោបល់ម្ដងនិងប្រជាពលរដ្ឋ ដើម្បីឱ្យពួកគាត់អាចមានដំណោះស្រាយ»

មន្ដ្រីសម្របសម្រួលរូបនេះបន្ថែមថា ដើម្បីបញ្ចប់បញ្ហានេះ  អាជ្ញាធរគួរតែបើក​វេទិកា​សាធារណៈ​មួយ សម្រាប់ឱ្យពលរដ្ឋសួរដេញដោលទើបជាវិធីសាស្ដ្រល្អ បើមិនអ៊ីចឹងទេ គឺមិនអាចបញ្ចប់បញ្ហាបាននោះទេ។

ចំណែកអ្នកស្រី ធីម  ណារិន មន្ដ្រីសម្របសម្រួលនៃអង្គការអាដហុកប្រចាំខេត្តត្បូងឃ្មុំ បាន​មើល​ឃើញថា  ប្រជាពលរដ្ឋអ្វីដែលពួកគាត់ឡើងតវ៉ាឬក៏ដាក់ញត្ដិស្នើសុំ​កិច្ចអន្ដរាគមន៍​វាជា​ផលប្រយោជន៍និងកើតចេញពីផលលំបាកនៃកត្ដាជីវភាព និងជា​ភាពចាំបាច់ក្នុង​ការ​ទាមទារ​ប្លង់រឹងដើម្បីបានជាម្ចាស់កម្មសិទ្ធិ ជាពិសេសក្នុងនាមជាអាជ្ញាធរគួរតែគិតគូរ​ពីបញ្ហា​លំបាក​និង​កត្ដាប្រឈមផ្សេងៗរបស់ប្រជាពលរដ្ឋដែលនៅក្នុងមូលដ្ឋាន ជាជាងការ​គេចវេះ​និងមិនហ៊ាន​ប្រឈមជាមួយប្រជាពរដ្ឋរបស់ខ្លួន។

អ្នកស្រីបន្ដថា៖ «ខ្ញុំនិយាយថាអាជ្ញាធរពាក់ព័ន្ធគួរចុះត្រួតពិនិត្យឱ្យដល់ទីកន្លែង​និងពិនិត្យ​ទៅលើឯកសារកាន់កាប់របស់គាត់់ឱ្យបានត្រឹមត្រូវ ពីព្រោះឯកសារយើងដឹងហើយថា​ដើម្បីឱ្យ​បានជាក់លាក់ថាពួកគាត់កាន់កាប់ស្របច្បាប់ឬមិនស្របច្បាប់ទាល់តែយើងទៅដល់ទីកន្លែង ហើយយើងមានសាក្សីជាភស្ដុតាងក្នុងការកំណត់ច្បាស់លាស់»

យ៉ាងណាមិញអ្នកស្រីថា អាជ្ញាធរគួរតែពន្លឿនការចេញប្លង់រឹងឱ្យពលរដ្ឋឱ្យបានឆាប់ ដើម្បី​ឱ្យ​ពលរដ្ឋអាចយកទៅប្រើប្រាស់សម្រាប់ប្រកបមុខរបរប្រចាំថ្ងៃពួកគាត់បាន បើមិនអ៊ីចឹងទេ​ពលរដ្ឋ​​នឹងជួបបញ្ហាប្រឈមច្រើនថែមទៀត។

គួរបញ្ជាក់ដែរថា ដំបូងឡើយដីដែលកំពុងមានជម្លោះរឿងការទាមទារប្លង់រឹងគឺជាដីដែល​ក្រុមហ៊ុន ម៉ែន សារុន ជាអ្នកកាន់កាប់ជាង១ ០០០ហិកតាក្រោយមកប្រជាពលរដ្ឋនាំគ្នា​កាប់ឆ្ការ​និងអាស្រ័យផល រហូតមានជម្លោះនឹងគ្នាហើយមកដល់ខែសីហា ឆ្នាំ២០១៦ រដ្ឋមន្ត្រីក្រសួងរៀបចំដែនដី លោក ជា សុផារ៉ា បានសរសេរនៅលើគេហទំព័រ ហ្វេសប៊ុក (Facebook) របស់លោក​ដោយបញ្ជាក់​ថា លោកនាយករដ្ឋមន្ត្រីសម្រេចប្រគល់ដីជិត២ពាន់​ហិកតា (១ ៩៦០) ដែលជាដីពាក់ព័ន្ធ​ក្រុមហ៊ុន ម៉ែន សារុន ឱ្យទៅពលរដ្ឋ ៦៤៣គ្រួសារ នៅឃុំជាំក្រវៀន ឃុំទន្លូង ឃុំចាន់មូល ឃុំរូង ឃុំត្រមូង និងឃុំជាំក្រោម ទម្រង់ដី​សម្បទាន​សង្គមកិច្ច។ ប៉ុន្តែមកទល់ពេលនេះ​ពលរដ្ឋនៅ​មិនទាន់ទទួលបានប្លង់កម្មសិទ្ធិ​ដីទាំងនោះ​ជាផ្លូវការនៅឡើយ។

អ្នកបើកបរម្នាក់បររ៉ឺម៉កឆ្លងកាត់សាលាខេត្តត្បូងឃ្មុំ ខណៈពលរដ្ឋពីរនាក់កំពង់ថតរូប​អនុស្សាវរីយ៍នៅមុខសាលាខេត្ត។ រូបថតនៅថ្ងៃទី២៦ ខែកុម្ភៈ ឆ្នាំ២០២២។ ខេមបូចា/ ឃី សុវុឌ្ឍី

ដោយឡែកករណីដីធ្លីមួយទៀត ពលរដ្ឋមកពីឃុំត្រពាំងព្រីង ស្រុកតំបែរ ខេត្ដត្បូង ឯណោះ​វិញបាននាំគ្នា​ដាក់​ពាក្យ​បណ្ដឹងទៅសាលាឧទ្ធរណ៍ដើម្បីស្នើសុំពន្លឿននីតិវិធីនិងស្នើសុំឱ្យភាគី​ខាង​ក្រុមហ៊ុន​ចិនបង្ហាញភស្ដុតាងលើសំណុំរឿងលេខ០៨ ចុះថ្ងៃទី២៧ ខែតុលា ឆ្នាំ២០២០ ស្ដី​អំពីរក្សា​ការពារ។

នៅក្នុងពាក្យបណ្ដឹងដែលពលរដ្ឋបានដាក់ទៅសាលាឧទ្ធរណ៍ខេត្ដត្បូងឃ្មុំកាលពីព្រឹកថ្ងៃទី១៩ខែតុលា ឆ្នាំ២០២២​នេះថា ពួកគាត់មិនអាចទទួលយកបាននូវការបង្ហាញ​សំអាងហេតុរបស់​ភាគី​ក្រុមហ៊ុនចិន និងមិនទាន់បានដាក់បង្ហាញឱ្យមានភាពជាក់លាក់​នូវភស្ដុតាង​ដែល​ក្រុមហ៊ុន​​តែងតែអះអាងថាបានទិញដីពីពួកគាត់នោះនៅឡើយទេ។

ដោយពលរដ្ឋបានស្នើសុំចំនួន៣ចំណុច៖ ទី១​ស្នើសុំពន្លឿននីតិវិធីជំនុំជម្រះលើសំណុំរឿង ទី២ ស្នើសុំឱ្យខាងក្រុមហ៊ុន ហាមិនីវិន អ៊ិនវេសមិន បង្ហាញភស្ដុតាង​នៃកិច្ចសន្យា​ទិញលក់​របស់​ក្រុមហ៊ុនជាមួយភាគី និងទី៣ ស្នើសុំឱ្យមានការធ្វើកោសល្យវិច្ឆ័យលើភស្ដុតាង រួមមាន​កិច្ច​សន្យា​ទិញលក់និងស្នាមមេដៃនៃភាគីលក់និងទិញ។

ក្នុងពាក្យបណ្ដឹងដដែលបន្ដថា៖ «យើងខ្ញុំទាំងអស់គ្នាជាសហកូនបំណុលនៃបណ្ដឹងខាងលើ បាននិងកំពុងរងចាំដំណោះស្រាយតាមយន្ដការតុលាការជាយូរមកហើយ ធ្វើឱ្យមានការ​អូសបន្លាយនិងខាតបង់នូវប្រយោជន៍និងប៉ះពាល់នៃការរស់នៅប្រចាំថ្ងៃរបស់ពួកយើងខ្ញុំទាំងអស់គ្នា ដោយក្រុមហ៊ុននៅតែបន្ដសកម្មភាពនៅលើអចលនៈវត្ថុដែលកំពុង​ស្ថិតនៅ​ក្នុងការ​រក្សាការពារនៅឡើយ យើងខ្ញុំមិនអាចទទួលយកបានទេ»។​

លោក សែម សាង អាយុ៤១ឆ្នាំ រស់ភូមិស្រែប្រាំង ឃុំត្រពាំងព្រីង ស្រុកតំបែរ និងជាតំណាង​ប្រជាសហគមន៍ស្រែប្រាំង បានលើកឡើងថា ការដាក់ពាក្យបណ្ដឹងទៅសាលាឧទ្ធរណ៍​ព្រឹក​ថ្ងៃពុធ ដោយលោកចង់ស្នើឱ្យតុលាការពិនិត្យនិងធ្វើកោសល្យវិច្ឆ័យ​ស្នាមមេដៃ​របស់​ប្រជាពលរដ្ឋដែលក្រុមហ៊ុន ហាមិនីវិន អ៊ិនវេសមិន បានអះអាងថាពួកលោកបានលក់ដីទៅ​ឱ្យក្រុមហ៊ុនអស់ហើយទាំងពលរដ្ឋខ្លះមិនដឹងខ្លួនថាលក់និងផ្ដិតមេដៃរឿងអ្វីតាំងពីពេលណានោះទេ។

លោកបន្តថា កាលពីឆ្នាំ២០១១ពលរដ្ឋបានផ្ដិតតែផ្ដិតលើក្រដាសសទេ មិនបានផ្ដិតលើ​ឯកសារមានអក្សរឬក៏និយាយពីការទិញលក់ណាមួយដែរដូចការលើកឡើងរបស់ភាគី​ក្រុមហ៊ុន ដូច្នេះវាមិនត្រឹមត្រូវទៅតាមផ្លូវច្បាប់។

លោក សាង បន្ដថា៖ «២០១៦ស្រាប់តែខាងក្រុមហ៊ុនបានយកក្រដាសមកឱ្យពួកខ្ញុំមើល​ហើយ​​មាន​បងប្អូនខ្លះគាត់យកទុក ប៉ុន្ដែក្រដាសហ្នឹងបែរជាវាខុសពីក្រដាសពួកខ្ញុំផ្ដិតមុនថា​ពួក​ខ្ញុំ​​បាន​​លក់​ដី​ទៅឱ្យ​ក្រុមហ៊ុន ក្រោយមកខ្ញុំក៏ទៅសួរលោកមេភូមិ​និងសាក្សីគាត់ថា​បើគាត់​មិនធ្វើ​​អ៊ីចឹងបាន​នរណាឱ្យលុយគាត់»

លោកបន្ដថា លោកសង្ឃឹមថាតុលាការខេត្ដត្បូងឃ្មុំនិងធ្វើកោសល្យវិច្ឆ័យលើស្នាមមេដៃហ្នឹង និងអាចស្វែងរកការពិតឃើញរួចហើយអាចលុបចោលលើប្លង់ដីរបស់ក្រុមហ៊ុននិងប្រគល់ដីឱ្យប្រជាពលរដ្ឋអាស្រ័យផលឡើងវិញ ពីព្រោះប្រជាពលរដ្ឋទាំងអស់រស់ពឹងផ្អែក​លើដី​ទាំងអស់​ហ្នឹង បើគ្មានដីនោះទេវាពួកគាត់ពិបាករស់ខ្លាំងណាស់។

តំណាងរូបនេះបន្ដថា៖ «បើសាលាឧទ្ធរណ៍មិនរកភាពយុត្ដិធម៌ហើយហ្នឹងពិនិត្យលើ​កោសល្យវិច្ឆ័យ​ឱ្យបានជាក់លាក់ទេ ខ្ញុំគិតថាមិនទាន់មានភាពយុត្ដិធម៌នោះទេ ព្រោះ​ដោយ​សារតែយើងដាក់ទៅហើយគាត់មិនពិនិត្យ អាហ្នឹងវាអាចនឹងគ្មានភាពយុត្ដិធម៌​សម្រាប់យើង ហើយយើងនឹងទៅពន្លឿនកិច្ចការនេះទៅថ្នាក់ជាតិថែមទៀត»

ខេមបូចាមិនអាចសុំការអធិប្បាយពីលោក  មុំ សា​ប៊ុន មេឃុំត្រពាំងព្រីងបានទេ ប៉ុន្ដែកន្លង​មក​លោកធ្លាប់បានសន្យាកាលពីបោះឆ្នោតឃុំសង្កាត់និងបានប្រាប់អ្នកសារព័ត៌មានខេមបូចាថា លោកនឹងបញ្ចប់បញ្ហារឿងដីធ្លីទាំងអស់នៅក្នុងអាណត្ដិលោក ប៉ុន្ដែជាក់ស្ដែង​បញ្ហា​ទំនាស់ដីធ្លី​នៅក្នុងឃុំរបស់លោកនៅតែបន្ដកើតមានដដែល។

លោកបន្ដថា៖ «បើសិនអាណត្តិខ្ញុំជាប់ជាមេឃុំដដែលបញ្ហាទំនាស់ទាំងប៉ុន្មាន​គឺថាមិន​ហ៊ានអួតនិងមុខគាត់[ពលរដ្ឋ]ទេ ប៉ុន្ដែគំនិតផ្ដួចផ្ដើមថានឹងដោះស្រាយ​ឱ្យចប់រឿង​ទាំងអស់​កុំឱ្យមានបញ្ហា ដើម្បីស្ថិរភាពក្នុងការរស់នៅរបស់ពួកគាត់ សំខាន់គឺជីវភាពរបស់ពួកគាត់»

រីឯលោក ទុំ សោភណ្ឌ អ្នកនាំពាក្យសាលាឧទ្ធរណ៍ខេត្ដត្បូងឃ្មុំ បានលើកឡើងថា លោក​ទើប​តែ​ទទួលបានពាក្យបណ្ដឹងពីប្រជាពលរដ្ឋដែលបានដាក់ព្រឹកមិញនេះ ដូច្នេះមិនទាន់អាចឆ្លើយ​នឹងសំណួររបស់អ្នកសារព័ត៌មានបានទេ ដោយលោកថាសុំពិនិត្យពាក្យបណ្ដឹងសិន។

លោក សោភណ្ឌ បន្ដថា៖ «ខ្ញុំទើបបានទទួលដោយសារក្មេងៗទើបបញ្ជូនមក ដោយសារ​ព្រឹកមិញប្រជាពលរដ្ឋគាត់ដាក់ចុងម៉ោងពេក​  អ៊ីចឹងពាក្យបណ្ដឹងទើបមកដល់ខ្ញុំ ទើបដល់ដៃ​ខ្ញុំមុនហ្នឹងបន្ដិច។ ខ្ញុំមិនទាន់ឆ្លើយបានទេ ខ្ញុំពិនិត្យនិងស្រាវជ្រាវពាក់ព័ន្ធនិងសំណុំរឿងសិន ចាំមើលម៉េចៗសុំជម្រាបជូនបងតាមក្រោយ»

ឡានមួយគ្រឿងបើកឆ្លងកាត់មុខសាលាឧទ្ធរណ៍ថ្នាក់តំបន់ស្ថិតនៅខេត្តត្បូងឃ្មុំ។ រូបថតនៅថ្ងៃទី២៦ ខែកុម្ភៈ ឆ្នាំ២០២២។ ខេមបូចា/ ឃី សុវុឌ្ឍី

លោក គឹម  ពិសិដ្ឋ មន្ដ្រីសម្របសម្រួលសហគមន៍​នៃសមាគមសម្ព័ន្ធកសិករ​កម្ពុជា​ប្រចាំ​ខេត្ត​ត្បូងឃ្មុំ បានលើកឡើងថា ​ពេលដែលប្រជាពលរដ្ឋស្នើសុំឱ្យមានការបើកបង្ហាញ​ភស្ដុតាង​ចឹង ខាងភាគីក្រុមហ៊ុនចិនគួរតែបញ្ចេញភស្ដុតាងជាក់លាក់ ពីព្រោះកន្លងមក​ឯកសារយោង​ជា​សាធារណៈអីឬក៏ក្នុងតុលាការនោះ គឺខាងក្រុមហ៊ុនមិនដែលបង្ហាញ​តាម​ការ​ស្នើសុំរបស់​ពលរដ្ឋ​ឡើយ លោកថាដោយសារការមិនបង្ហាញនេះ​ហើយទើប​ធ្វើ​ឱ្យពលរដ្ឋពួកគាត់​មិនអស់​រឿងថាពួកគាត់បានលក់ដីនិងមានស្នាមមេដៃទាំងពលរដ្ឋខ្លះមិនដឹងខ្លួនផង។

មន្ដ្រីសហគមន៍រូបនេះបន្ដថា៖ «ការផ្ដិតមេដៃទៀតសោតក៏មិនដឹងផ្ដិតរឿងអីដែរ អ៊ីចឹង​ហើយ​បានជាគាត់ស្នើសុំឱ្យតុលាការហ្នឹងធ្វើកោសល្យវិច្ឆ័យទៅលើស្នាមមេដៃនីមួយៗបើសិនជាមាននៅក្នុងកិច្ចសន្យាទិញលក់ហ្នឹង បើសិនជាមានទិញពីក្រុមហ៊ុនខ្មែរ​តើទិញក្រុមហ៊ុនមួយណា​បង្ហាញឈ្មោះមក»

យោងតាមឯកសារ​មួយ​ចងក្រង​ដោយ​សម្ព័ន្ធ​សហគមន៍​កសិករ​កម្ពុជា បាន​និយាយ​ថា ប្រជាពលរដ្ឋ​ក្នុង​សហគមន៍​ស្រែប្រាំង បាន​ចូល​មកកាន់​កាប់ដី​នៅ​តំបន់​នេះ​នៅ​ឆ្នាំ២០០២។ សហគមន៍​នេះមាន២៥០គ្រួសារ និង​កាន់កាប់​ដី​ទំហំ៧៨០ហិ​កតា។

ដី​ព្រៃលិចទឹក​របស់​សហគមន៍​ស្រែប្រាំង និង​សហគមន៍​បុស្ស​ស្នោ ​ទំហំ៥៨០ហិ​កតា ផ្តើម​មាន​ជម្លោះ​ជាមួយ​ក្រុមហ៊ុន​ចិន ហា​មិនីវិន អ៊ិ​នវេ​សមេន ចាប់តាំងពី​ឆ្នាំ២០១៤មក និង​ដី​ទំហំ​២០០ហិ​កតា​ទៀត មាន​ជម្លោះ​ជាមួយ​ឧកញ៉ា ម៉ែ​ន ចាន់​ធឿន។

ចាប់ពី​ពេលនោះ​មក ពលរដ្ឋ​នៅក្នុង​សហគមន៍តែង​ចូលរួម​តវ៉ានិង​ទប់ស្កាត់​ប្រឆាំង​និង​ការ​ឈូស​ឆាយដី​ពីសំណាក់​ក្រុមហ៊ុន និង​បាន​ឡើង​មក​ភ្នំពេញ​ញឹកញាប់ដើម្បី​ដាក់​ញត្តិ​ទៅ​ក្រសួង​ពាក់ព័ន្ធ​ឱ្យ​ជួយ​អន្តរាគមន៍​រក​ដំណោះស្រាយ រួមមាន ​ក្រសួង​ដែនដី ក្រសួងមហាផ្ទៃ និង​ខុទ្ទកា​ល័យ​នាយក​រដ្ឋមន្ត្រី​ ជាដើម។

របាយការណ៍​ដដែលនិយាយ​ទៀត​ថា ខណៈ​គ្មាន​កិច្ច​អន្តរាគមន៍​ពី​ថ្នាក់​ជាតិ តំណាង​សហគមន៍៣រូបដែល​មានឈ្មោះ​ក្នុង​ញត្តិ​ រួមមាន ​លោក សែម សាង លោក ហឿន ស៊ី​នាថ និង លោក សែម ចំណាន ត្រូវ​បាន​សមត្ថកិច្ច​ចាប់ខ្លួន​ជាបន្តបន្ទាប់​តាម​ដីកា​បង្គាប់​របស់​តុលាការខេត្ត​ត្បូងឃ្មុំ។

កាល​ពី​ថ្ងៃ​ទី​៣ មិថុនា ឆ្នាំ២០២០ ​ប្រធាន​ចៅក្រម​ជំនុំជម្រះ​សាលាដំបូង​ខេត្ត​ត្បូងឃ្មុំ ​លោក ​ផុន វណ្ណា​ សម្រេច​ផ្ដន្ទាទោស​តំណាង​សហគមន៍​ស្រែ​ប្រាំង​ចំនួន៨នាក់ឱ្យ​ជាប់ពន្ធនាគារម្នាក់៧ឆ្នាំ ពី​បទ​កំហែង​យក​ដោយមាន​ស្ថាន​ទម្ងន់​ទោស​ដោយសារ​ប្រើប្រាស់​អាវុធ នៅ​ភូមិ​ស្រែប្រាំង ឃុំ​ត្រពាំងព្រីង កាល​ពី​ថ្ងៃ​ទី១៨ ​កុម្ភៈ ​ឆ្នាំ​២០១៦។

តំណាង​សហគមន៍​ស្រែប្រាំង​ រំលឹក​ថា ​ក្នុង​ហេតុការណ៍​ចុះ​ទប់​ស្កាត់​បទ​ល្មើស​កាប់​ឈើ​កាលពី​ប្រមាណ ៥ឆ្នាំមុន​នោះ ​ក្រុម​ប្រជា​សហគមន៍​ប្រមាណ ៣០ ទៅ ៤០នាក់ ​គ្រាន់តែ​នាំគ្នា​​ចុះ​ទៅ​ឃាត់​ពលរដ្ឋ​មួយ​ចំនួន​តូចដែល​លួច​កាប់​ឈើ​លក់​ឱ្យ​ឈ្មួញ ដោយ​ដក​យក​ម៉ាស៊ីន​អារ​ឈើ​ចំនួន​ពីរ​គ្រឿង​ទុក​ប៉ុណ្ណោះ និង​មិន​មាន​ប្រើ​អាវុធ ឬ​កាំបិត​ទៅ​គំរាម​ក្រុម​អ្នក​កាប់​ឈើ​នោះ​ទេ។

តំណាង​សហគមន៍​អះអាង​ថា អាជ្ញាធរ ​និង​តុលាការបាន​ប្រើ​ករណី​នេះ ជា​លេស​ក្នុង​ការ​ចាប់​ខ្លួន​តំណាង​សហគមន៍ ដើម្បី​កុំ​ឱ្យ​តវ៉ា​ទាមទារ​ដីធ្លី​ជាមួយ​ក្រុមហ៊ុន​ចិន​ឈ្មោះ​ ហាមិនីវិន អ៊ិនវេសមេន (Hamenivent Investment) ដែល​ឈូស​ឆាយ​រំលោភ​យក​ដី​ព្រៃ​សហគមន៍​របស់​ពលរដ្ឋ​កំពុង​អាស្រ័យ​ផល​ទំហំ ៧៨៥ហិកតារ។ ​

តំណាង​សហគមន៍​ស្រែ​ប្រាំង៣នាក់​ដែល​ត្រូវ​បាន​ចាប់ខ្លួន​ដាក់​ពន្ធនាគារ​ក្នុង​នោះ​រួម​មាន លោក សែម សាង លោក ហឿន ស៊ីនាត និង​លោក សែម ចំណាន ប៉ុន្ដែមកដល់ពេលនេះ​ពួកគាត់ត្រូវបានតុលាការដោះឱ្យ​នៅក្រៅឃុំវិញ​ហើយ។ ក្រៅ​ពី​នេះ សមាជិក​សហគមន៍​ស្រែ​ប្រាំង​ជាង ៣០នាក់​ផ្សេង​ទៀត ត្រូវ​បាន​រង​ការ​ចោទ​ប្រកាន់​ពី​បទល្មើស​ព្រហ្មទណ្ឌ​ជា​ច្រើន​តាម​បណ្ដឹង​របស់​ក្រុមហ៊ុន​ចិន និង​អាជ្ញាធរ ដោយសារ​ព្យាយាម​ធ្វើ​សកម្មភាព​ការពារ​ដីធ្លី​សហគមន៍​របស់​ពួក​គាត់៕

99 views

ព័ត៌មានទាក់ទង

ព័ត៌មានថ្មីៗ

អត្ថបទពេញនិយម