សមាគមសម្ព័ន្ធអ្នកសារព័ត៌មានកម្ពុជា

ពលរដ្ឋដែលកំពុងទទួលការព្យាបាលនៅមន្ទីរសម្រាក «ហូប សេនធ័រ» ស្នើលោកនាយករដ្ឋមន្រ្តីបើកទីតាំងទាំង៣នោះឡើងវិញ

ប្រជាពលរដ្ឋ និងអ្នករត់ម៉ូតូកង់បី រង់ចាំនៅច្រកចូល មន្ទីរសម្រាកព្យាបាល មិត្តភាព មណ្ឌល នៃក្ដីសង្ឃឹម ក្នុងរាជធានីភ្នំពេញ។ រូបថតថ្ងៃទី៣១ ខែឧសភា ឆ្នាំ២០២៣។ ខេមបូចា/ ព្រីង សំរាំង
ប្រជាពលរដ្ឋ និងអ្នករត់ម៉ូតូកង់បី រង់ចាំនៅច្រកចូល មន្ទីរសម្រាកព្យាបាល មិត្តភាព មណ្ឌល នៃក្ដីសង្ឃឹម ក្នុងរាជធានីភ្នំពេញ។ រូបថតថ្ងៃទី៣១ ខែឧសភា ឆ្នាំ២០២៣។ ខេមបូចា/ ព្រីង សំរាំង

ប្រជាពលរដ្ឋដែលកំពុងទទួលការព្យាបាលជំងឺទូទៅ និងជំងឺរុំារ៉ៃនៅមន្ទីរសម្រាកកព្យាបាល «ហូប សេនធ័រ»​ បានទទូចស្នើសុំទៅកាន់លោកនាយករដ្ឋមន្រ្តី ហ៊ុន សែន ឱ្យជួយអន្តរាគមន៍ ដើម្បី​បើកទីតាំងព្យាបាលទាំង៣ឡើងវិញ ខណៈពួកគេត្រូវការគ្រូពេទ្យតាមដានជំងឺ និងត្រូវការ​ថ្នាំ​ចាំបាច់សម្រាប់ព្យាបាលជំងឺប្រចាំកាយជាបន្ទាន់ បន្ទាប់ពីក្រសួងសុខាភិបាល​ប្រកាសបិទ​ទីតាំង​ទាំង៣នៃមន្ទីរពេទ្យនេះកាលពីពេលថ្មីៗនេះ។

និយាយសម្លេងរដឺនតាមបែបអ្នកជនបទ អ្នកស្រី ឡេង មករា អាយុ៤១ឆ្នាំ ជាពលរដ្ឋដែល ខំស្កាត់មកពីខេត្តកំពង់ឆ្នាំដើម្បីមកព្យាបាលជំងឺនៅភ្នំពេញ​បានឱ្យដឹងថា អ្នកស្រីមាន​ការ​សោកស្ដាយជាខ្លាំងនៅពេលដែលអ្នកស្រីដឹងថា មន្ទីរពេទ្យ​ដែលធ្លាប់មកព្យាបាល​ជំងឺត្រូវ​បានបិទ។ អ្នកស្រីប្រាប់ទៀតថា ខ្លួនមកទទួលសេវាព្យាបាលនៅមន្ទីរសម្រាកព្យាបាល «ហូប សេនធ័រ» សាខាចតុមុខ​​ អស់រយៈជាច្រើនខែមកហើយ និងទទួលបានការយកចិត្តទុកដាក់​ពីក្រុមវេជ្ជបណ្ឌិតយ៉ាងផ្ចិតផ្ចង់ ការព្យាបាលប្រកបដោយវិជ្ជាជីវៈ ព្រមទាំងតម្លៃសមរម្យ។

អ្នកស្រី មករា បញ្ជាក់ថា៖ «ខ្ញុំជាអ្នកជំងឺនៅពេទ្យហ្នឹង ហើយក៏តាមដានព្យាបាលនៅពេទ្យហ្នឹង​ដែរ នៅពេលដែលបិទពេទ្យ ខ្ញុំស្ដាយណាស់។ ខ្ញុំធ្លាប់ដើររកពេទ្យច្រើនដែរ ប៉ុន្តែ​ពេទ្យ​រដ្ឋធំៗ​មួយចំនួន​មិនបានស្មើនឹងពេទ្យគាត់ទេ ដោយសារអ្វី? ពេទ្យរដ្ឋមួយចំនួនយកលុយជាធំ សម្ដី​មិនអាចទទួលយកបានទេពេលខ្លះ»។

អ្នកស្រី មករា កំពុងបារម្ភពីសុខភាព និងស្ថានភាពនៃជំងឺអ្នកស្រី ខណៈអ្នកស្រី​ត្រូវបន្ត​តាម​ដាន​រៀងរាល់៦ខែម្ដង ហើយការបិទមន្ទីរសម្រាកព្យាបាល«ហូប សេនធ័រ» ប្រៀបបាននឹង​បិទ​ក្ដីសង្ឃឹមរបស់អ្នកស្រីដូច្នេះដែរ ត្បិតអ្នកស្រីមិនដឹងទៅបន្តការ​ព្យាបាលនៅមន្ទីរណាទៀត​ឡើយ។

អ្នកស្រី មករា និយាយថា៖ «ខ្ញុំពិបាកចិត្តខ្លាំងពេលបិទពេទ្យហ្នឹង រយៈពេល៦ខែខ្ញុំទៅតាមដាន​សុខភាពម្ដងព្រោះខ្ញុំមានដុំសាច់ស្បូន ហើយពេទ្យគាត់ឱ្យពិនិត្យមើលមហារីកទៀត តែមិន​ទាន់​​បានពិនិត្យផងពេទ្យក៏បិទបាត់ បើសិនណាជាបើកខ្ញុំសប្បាយចិត្តមែនទែន»។

អ្នកជំងឺរូបនេះ បានលើកឡើងពីចំណុចល្អជាច្រើនរបស់មន្ទីរពេទ្យហូប ដូចជាបានពន្យល់​ច្បាស់​លាស់ពីស្ថានភាពជំងឺទៅអ្នកជំងឺ មានសុជីវធម៌ល្អ មិនគិតលុយជាធំ ខណៈពេទ្យរដ្ឋ​មួយចំនួនមិនបានគិតប្រយោជន៍ និងអាយុជីវិតអ្នកជំងឺជាធំទេ ថែមទាំងមានសុជីវធម៌​មិន​សមរម្យទៀតផង។

អ្នកស្រី មករា បន្តថា៖ «ពេទ្យរដ្ឋមួយចំនួន ការយកចិត្តទុកដាក់ ពាក្យសម្ដី សីលធម៌នៅក្នុង​ខ្លួន គឺថាវាមិនបានមួយចំណិតពេទ្យហ្នឹងផង[ពេទ្យហូប] ពេទ្យខ្លះ[ពេទ្យរដ្ឋ] គាត់យក​លុយ​ជាធំ គាត់មិនបានខ្វាយខ្វល់ពីអាយុជីវិតអ្នកជំងឺ ឬមើលថាអ្នកជំងឺហ្នឹងមាន ឬក្រទេ សម្លឹង​មើល​ឃើញ​តែលុយ»

ប្រជាពលរដ្ឋ និងអ្នករត់ម៉ូតូកង់បី រង់ចាំនៅច្រកចូល មន្ទីរសម្រាកព្យាបាល មិត្តភាព មណ្ឌល នៃក្ដីសង្ឃឹម ក្នុងរាជធានីភ្នំពេញ។ រូបថតថ្ងៃទី៣១ ខែឧសភា ឆ្នាំ២០២៣។ ខេមបូចា/ ព្រីង សំរាំង

ក្នុងនាមជាអ្នកជំងឺមួយរូប អ្នកស្រីមករា រំពឹងថា រដ្ឋាភិបាលនឹងអន្តរាគមន៍លើករណីនេះ ហើយ​​ឈានដល់ការបើកមន្ទីរសម្រាកព្យាបាលទាំង៣ទីតាំងឡើងវិញ ដើម្បីបន្តព្យាបាល​អ្នក​ជំងឺ​បន្តទៀត ពិសេសអ្នកមានជីវភាពមិនសូវធូធារដូចអ្នកស្រី ត្បិតអ្នកស្រីផ្ញើក្ដីរំពឹង​ទៅ​លើ​មន្ទីរពេទ្យនេះខ្លាំង។ មកទល់ពេលនេះ អ្នកស្រីមករា នៅមិនហ៊ាន​ទទួលការព្យាបាល​ទៅ​មន្ទីរពេទ្យ​ណាឡើយហើយរំពឹងថា រដ្ឋាភិបាលនឹងបើកមន្ទីរពេទ្យទាំង៣ទីតាំងឆាប់ៗ។

អ្នកស្រី មករា បន្ថែមថា៖ «ប្រសិនណាជារដ្ឋាភិបាលគាត់បើកពេទ្យហ្នឹងវិញ ខ្ញុំសប្បាយចិត្ត​ខ្លាំង សឹងថាឱ្យខ្ញុំសំពះអរគុណដល់បាតជើងក៏ខ្ញុំធ្វើដែរ ដោយសារតែពេទ្យហ្នឹងល្អ ខ្ញុំមាន​ទំនុកចិត្តលើពេទ្យហ្នឹង ក្រោយពេលបិទ ខ្ញុំមិនដឹងថាខ្ញុំគួរទៅពេទ្យណា ត្បិតតែពេទ្យ​ច្រើន​មែនពិត តែមិនប្រាកដថាពេទ្យដែលយើងទៅហ្នឹងសមប្រកបល្អដូចពេទ្យខ្ញុំទៅនេះទេ»

ចំណែកពលរដ្ឋមួយរូបទៀតធ្វើដំណើរមកពីខេត្តសៀមរាប គឺអ្នកស្រី វណ្ណ ណារី អាយុ៣០ឆ្នាំ ឱ្យដឹងថា អ្នកស្រីមានជំងឺកម្រប្រចាំកាយ ដែលតម្រូវឱ្យលេបថ្នាំជាប្រចាំ បើគ្មានថ្នាំជំងឺអ្នកស្រី​នឹងធ្វើទុក្ខ ហើយអ្នកស្រីមានការសោកស្ដាយដែលក្រសួងសុខាភិបាល​សម្រេចបិទមន្ទីរ​សម្រាក​​ព្យាបាល«ហូប សេនធ័រ» ទាំង៣ទីតាំង ដែលជាកន្លែងព្យាបាលជំងឺ​ពលរដ្ឋខ្មែររាប់​ម៉ឺន​នាក់ មិនគិតពីវណ្ណៈមានក្រ ប្រកបដោយវិជ្ជាជីវៈ និងការយកចិត្តទុកដាក់ខ្ពស់។

កំពុងឈរមុខទ្វារនៃមន្ទីរពេទ្យក្នុងសង្កាត់វាលវង់ អ្នកស្រី ណារី និយាយថា៖‍ «និយាយ​រួម​អាច​ថា​ពេទ្យនេះ ជាអ្នកព្យាបាលប្រជាជន២៥ខេត្តក្រុង គឺគាត់មកពេទ្យហ្នឹង ថ្នាំគាត់មាន​ប្រសិទ្ធភាព​ខ្ពស់ ដូចខ្ញុំពីមុនឈឺធ្ងន់ណាស់អាចថាពេទ្យលែងទទួល តែមកដល់​ពេទ្យ​ហ្នឹង​ខ្ញុំបានធូរស្បើយដល់ឥឡូវអាចថា[ធូរស្បើយ]១០០ភាគរយទៅហើយ»

អ្នកស្រី ណារី ឱ្យដឹងទៀតថា ដោយសារតែជំងឺអ្នកស្រីជាជំងឺកម្រ អ្នកស្រីបានស្វះស្វែង​ព្យាបាល​គ្រប់ច្រកល្ហកមិនថានៅក្នុងស្រុក ឬក្រៅស្រុកនោះទេ តែមានតែពេទ្យ«ហូប សេនធ័រ»​មួយទេដែលព្យាបាលសមប្រកបបានធូរស្បើយ។ ដូច្នេះការបិទ​មន្ទីរសម្រាក​ព្យាបាល​«ហូប សេនធ័រ» ប្រៀបបាននឹងការផ្ដាច់ក្ដីសង្ឃឹមរបស់អ្នកស្រី និងអ្នកជំងឺរាប់ម៉ឺននាក់​ផ្សេងទៀងដូច្នេះដែរ។

អ្នកស្រី ណារី ថ្លែងថា៖‍ «ខ្ញុំឡើងអស់សង្ឃឹមហើយទៅពេទ្យចិនផង ចូលខ្ទង់ម៉ឺនដុល្លារ ហើយខ្ញុំមកព្យាបាលពេទ្យនេះ១០ឆ្នាំហើយ អ្នកជំងឺខ្លះត្រូវការលេបថ្នាំមួយជីវិត ដល់​តែ​បិទទៅអ្នកជំងឺបានអីជាទីពឹង ខ្ញុំពិបាកចិត្ត ព្រោះខ្ញុំត្រូវការប្រើថ្នាំដើម្បីបន្តជីវិត»

និយាយទាំងអួលដើមក អ្នកស្រី ណារី សំណូមពរទៅរដ្ឋាភិបាល និងក្រសួងសុខាភិបាល ជួយអន្តរាគមន៍ ដើម្បីបានប្រយោជន៍ដល់ប្រជាពលរដ្ឋខ្មែរ ជាពិសេសអ្នកជំងឺ​ដែលកំពុង​ព្យាបាល​នៅមន្ទីរពេទ្យនេះបានបន្តការព្យាបាល។

អ្នកស្រី ណារី បន្ថែមថា៖ «ខ្ញុំចង់ឱ្យសម្ដេចពុក ជួយអន្តរាគមន៍ឱ្យបើកពេទ្យហ្នឹងឡើងវិញ ដើម្បី​ឱ្យកូនចៅដែលមកពេទ្យហ្នឹងមានសង្ឃឹមឡើងវិញ [បិទពេទ្យហ្នឹង] ដូចផ្ដាច់ជីវិតខ្ញុំអ៊ីចឹង ខ្ញុំត្រូវការថ្នាំដើម្បីបន្តជីវិតរស់»។

អ្នកស្រី វណ្ណ ណារី ជាអ្នកជំងឺមកពីខេត្តសៀមរាប កំពុងទាក់ទងទៅគ្រូពេទ្យដើម្បី បើកថ្នាំប្រចាំខែ។ អ្នកស្រីសដែងការខកចិត្ត ដោយសារតែមន្ទីរពេទ្យត្រូវបានបិទ។ រូបថតថ្ងៃទី៣០ ខែមិថុនា ឆ្នាំ២០២៣។ ខេមបូចា/ សុវណ្ណ ស្រីពេជ្រ

បន្ទាប់ពីក្រសួងសុខាភិបាលប្រកាសបិទមន្ទីរសម្រាកព្យាបាល«ហូប សេនធ័រ» ឃើញមាន​​ប្រតិកម្ម​ពីប្រជាពលរដ្ឋជាច្រើន និងឃើញមានការសំណូមពរឱ្យរដ្ឋាភិបាល​អន្តរាគមន៍​ក្នុង​ការ​បើកមន្ទីរសម្រាកព្យាបាលនេះឡើងវិញ។ តាមរយៈការនិយាយឆ្លើយឆ្លងនៅក្នុង​បណ្ដាយ​សង្គម អ្នកជំងឺស្ងើចសរសើរ និងលើកចំណុចល្អរបស់មន្ទីរពេទ្យនេះផងដែរ។

យោងតាមសេចក្តីថ្លែងការណ៍របស់ក្រុមហ៊ុន«សេនធ័រ អហ្វ ហូប» បានឱ្យដឹងថា ក្រុមហ៊ុន​មាន​ការសោកស្ដាយជាខ្លាំង ចំពោះចំណាត់ការរបស់ក្រសួងសុខាភិបាល ដែលបាន​បិទ​មន្ទីរ​សម្រាកព្យាបាលឯកជនទាំង៣ទីតាំង ខណៈមន្ទីរសម្រាកព្យាបាលនេះ បានជួយ​អ្នកជំងឺចំនួន​ជាង ៨៩ ៦២៨នាក់ ក្នុងមួយឆ្នាំ ដើម្បីទទួលបានការ​ថែទាំង​សុខភាពដែលមានគុណភាព និង​តម្លៃ​សមរម្យ។

ក្នុងសេចក្ដីប្រកាសបញ្ជាក់ថា៖ «យើងខ្ញុំពិតជាមានការសោកស្ដាយដែលប្រតិបត្តិការ​វេជ្ជសាស្ត្រ​របស់មន្ទីរសម្រាកព្យាបាលរបស់យើងខ្ញុំ​ ឥឡូវនេះត្រូវបានផ្អាកជាបណ្ដោះអាសន្ន ហើយបានបញ្ឈប់យើងខ្ញុំពីការផ្តល់សេវារបស់យើងខ្ញុំទៅដល់អ្នកជំងឺដែលត្រូវការការថែទាំ និងព្យាបាលជាចាំបាច់ ជាពិសេសអ្នកជំងឺលើសសម្ពាធឈាម ទឹកនោមផ្អែម និងបេះដូង​ដែលត្រូវការថ្នាំ និងគ្រូពេទ្យព្យាបាលជាប្រចាំ»

ប្រភពដដែល បន្តថា មន្ទីរសម្រាកព្យាបាលទាំង៣ទីតាំង មិនដែលទទួលបានការព្រមាន ឬ​វិធាន​​ផ្លូវការណាមួយពីអាជ្ញាធរ មុនប្រកាសបិទទីតាំងឡើយ ហើយក៏កំពុងរៀបចំ​របាយការណ៍​​សកម្មភាពព្យាបាលអ្នកជំងឺ និងការផ្ទេរ ឬផ្លាស់ប្ដូរអាជ្ញាបណ្ណ​ទៅតាម​បែបបទ​រដ្ឋបាល តែផ្ទុយទៅវិញ ក្រសួងសុខាភិបាលបានបញ្ជាឱ្យបិទមន្ទីរសម្រាកព្យាបាលតែម្ដង។

សេចក្ដីថ្លែងការណ៍និយាយថា៖ «យើងខ្ញុំទទួលស្គាល់ថាមន្ទីរសម្រាកព្យាបាលរបស់យើងបាន​នឹងកំពុងរៀបចំធ្វើ លើរបាយការណ៍អំពីសកម្មភាពព្យាបាលអ្នកជំងឺ និងការផ្ទេរ ឬផ្លាស់ប្តូរ​អាជ្ញាបណ្ណ​ដែលមានស្រាប់របស់វេជ្ជបណ្ឌិត ដែលជាអ្នកឈរឈ្មោះ​ទទួលខុសត្រូវចំពោះ​មុខ​អាជ្ញាធរសុខាភិបាល ដើម្បីស្របតាមវិធានរបស់ក្រសួងសុខាភិបាល។ ប៉ុន្តែជាអកុសល មន្ទីរ​សម្រាកព្យាបាលត្រូវបានបញ្ជាអោយបិទទ្វា មុនពេលដែលយើងខ្ញុំបញ្ចប់កិច្ចការរដ្ឋបាលនេះ​ទៅ​វិញ»

ក្រោយក្រសួងសុខាភិបាលប្រកាសបិទទ្វារមន្ទីរសម្រាកព្យាបាល បច្ចុប្បន្នមានបុគ្គលិកពេទ្យ​ចំនួន​២៥០នាក់ ដែលជាគ្រូពេទ្យមានវិជ្ជាជីវៈក្នុងការបំពេញការងារជាគ្រូពេទ្យ ព្យាបាលជំងឺ។

លិខិតជូនដំណឹងពីខាងមន្ទីរសម្រាកព្យាបាល​ «ហូប សេនធ័រ» សម្រាប់ប្រាប់ដល់អ្នកជំងឺ និងសាធារណជន អំពីការផ្អាកដំណើរការបណ្ដោះអាសន្ន។ រូបថតថ្ងៃ​​ទី៣០ ខែមិថុនា ឆ្នាំ២០២៣។ ខេមបូចា/ សុវណ្ណ ស្រីពេជ្រ

ជុំវិញករណីនេះ អ្នកនាំពាក្យក្រសួងសុខាភិបាល លោកស្រី ឱ វណ្ណឌីន មិនអាច​ទាក់ទង​បាន​ទេ​នៅថ្ងៃទី៣១ ខែមិថុនា នេះ ដោយទូរសព្ទមិនលើក និងមិនឆ្លើយតបសារនៅក្នុង​តេឡេក្រាម។

ចំណែកលោក ហុក គីម​ចេង អគ្គនាយក​បច្ចេកទេសនិងសុខភាពនៃក្រសួងសុខាភិបាល បាន​បដិសេធមិនបកស្រាយចំពោះមូលហេតុដែលក្រសួងសុខាភិបាលបិទមន្ទីរសម្រាកព្យាបាលទាំង៣ទីតាំង។

លោក គីមចេង ថ្លែថា៖ «ខ្ញុំមិនអាចឆ្លើយតបបានទេ គេមានក្រុមការងារទទួលខុសត្រូវ​ចំពោះ​រឿងនេះ»

គួរជម្រាបជូនថា មន្ទីរសម្រាកព្យាបាលទាំង៣ទីតាំង ត្រូវបានក្រសួង​សុខាភិបាលប្រកាស​បិទ​ក្នុងពេលតែមួយ កាលពី​ថ្ងៃទី​១២ ខែឧសភា ដោយក្រសួងបញ្ជាក់ថា មន្ទីរសម្រាក​ព្យាបាល​នេះ មិនមាន​វេជ្ជបណ្ឌិត​ឈរឈ្មោះ​ទទួលខុសត្រូវ និង​មិនបាន​ផ្ញើ​របាយការណ៍​ជូន​ក្រសួង​តាម​​ច្បាប់​កំណត់​។

យ៉ាងណាមិញ នៅថ្ងៃទី១៣ ក្រសួងសុខាភិបាលក៏បានចេញសេចក្ដីបំភ្លឺម្ដងទៀត ដោយ​អះអាង​ថា ទីតាំងដែលបិទនោះ មិនមែនជាមន្ទីរពេទ្យរបស់រដ្ឋ ដែលមានឈ្មោះ មន្ទីរពេទ្យ​ព្រះសីហនុ មណ្ឌលនៃក្ដីសង្ឃឹម [Sihanouk Hospital Center of Hope (SHCH)] នោះឡើយ។ ហើយការ​បិទ​មន្ទីរ​សម្រាក​ព្យាបាល​នៅ​រាជធានី​ភ្នំពេញ​ទាំងនេះ ក៏​ព្រោះតែ​មន្ទីរ​សម្រាក​ព្យាបាល​​​ទាំងនេះ​មិន​គោរព​តាមច្បាប់​ទម្លាប់​។​

ឆ្លើយតបទៅនឹងកង្វល់របស់ប្រជាពលរដ្ឋលើការបន្តការតាមដានសុខភាព ឬការស្វែងរកការ​ពិនិត្យ ព្យាបាលជំងឺនោះ ក្រសួងសុខាភិបាល  បានបញ្ជាក់ថា នៅកម្ពុជាមានមន្ទីរជាតិចំនួន ១២កន្លែង មន្ទីរពេទ្យរាជធានី-ខេត្តចំនួន២៥មន្ទីរពេទ្យបង្អែកស្រុកចំនួន៩៥កន្លែង មណ្ឌល​សុខភាពចំនួន១ ២៨៨កន្លែង និងប៉ុស្តិ៍សុខភាពចំនួន១២៥កន្លែង ដែលកំពុង​បន្តផ្តល់សេវា​ពិនិត្យ និងព្យាបាលជំងឺជូនប្រជាពលរដ្ឋនៅទូទាំងប្រទេស ដោយមិនរើសវណ្ណៈ ពូជសាសន៍ ឬនិន្នាការនយោបាយអ្វីឡើយ។

យ៉ាងណាមិញ មន្ទីរសម្រាកព្យាបាល«ហូប សេនធ័រ» អះអាងថាចង់បន្តការថែទាំអ្នកជំងឺ ដែល​ត្រូវការ​សេវាពីក្រុមវេជ្ជបណ្ឌិត និងបន្តបំពេញបេសកកម្មក្នុងការផ្តល់ជូននូវការថែទាំសុខភាព​ប្រកបដោយគុណភាពខ្ពស់ និងមានតម្លៃសមរម្យដល់ប្រជាជនកម្ពុជាឱ្យបានឆាប់បំផុត៕

290 views

ព័ត៌មានទាក់ទង

ព័ត៌មានថ្មីៗ

អត្ថបទពេញនិយម