រដ្ឋបាលរាជធានីភ្នំពេញនៅថ្ងៃអង្គារនេះ បានប្រកាសហាមដាច់ខាតមិនឱ្យបុគ្គលិកនៃក្រុមហ៊ុនណាហ្គាវើលដ៍ ប្រមូលផ្ដុំធ្វើបាតុកម្មនៅក្បែរក្រុមហ៊ុន ស្ថិតក្នុងសង្កាត់ទន្លេរបាសាក់ ខណ្ឌចំការមន ក្រោមហេតុផលរក្សាសណ្ដាប់ធ្នាប់សាធារណៈ និងបញ្ចៀសការរីករាលដាលមេរោគកូវីដបំប្លែងថ្មី អូមីក្រុង។
អាជ្ញាធរក្រុងភ្នំពេញ បានធ្វើការព្រមានទៅក្រុមកូដករណាហ្គាវើលដ៍ថា មិនអនុញ្ញាតដាច់ខាតឱ្យមានការប្រមូលផ្តុំធ្វើសកម្មភាពបាតុកម្មខុសច្បាប់ នៅក្នុងសង្កាត់ទន្លេបាសាក់ ខណ្ឌចំការមនទៀតឡើយ ដើម្បីទប់ស្កាត់ការរីករាលដាលមេរោគអូមីក្រុង ចូលក្នុងសហគមន៍ និងធានាបាននូវសន្តិសុខ សណ្តាប់ធ្នាប់ របៀបរៀបរយសាធារណៈ។
រដ្ឋបាលរាជធានីភ្នំពេញបានលើកឡើងថា៖ «ក្នុងករណីរឹងរូស បន្តសកម្មភាពខុសច្បាប់ទៀតនោះ រដ្ឋបាលរាជធានីភ្នំពេញនឹងចាត់វិធានការរដ្ឋបាល និងវិធានការច្បាប់ ដោយគ្មានការលើកលែង»។
ដោយឡែក ក្នុងករណីក្រុមបាតុករអតីតបុគ្គលិក និងបុគ្គលិកណាហ្គាវើលដ៍ ដែលបានធ្វើចត្តាឡីស័កត្រឹមត្រូវតាមវិធានសុខាភិបាល ចង់ប្រមូលផ្ដុំតវ៉ា ត្រូវធ្វើនៅទីលានប្រជាធិបតេយ្យស្ថិតនៅសង្កាត់ឫស្សីកែវ ដោយត្រូវបំពេញនីតិវិធីតាមច្បាប់ស្តីពីការធ្វើបាតុកម្មដោយសន្តិវិធី។
រដ្ឋបាលរាជធានីភ្នំពេញ អះអាងថា ការធ្វើកូដកម្ម ស្របតាមច្បាប់ស្តីពីការងារ មិនអនុញ្ញាតឱ្យប្រើប្រាស់ទីតាំងសាធារណៈឡើយ ព្រោះថា ការប្រើប្រាស់ទីតាំងសាធារណៈដើម្បីធ្វើជាទីកន្លែងបញ្ចេញមតិ គឺត្រូវអនុលោមតាមច្បាប់ ស្តីពីការធ្វើបាតុកម្មដោយសន្តិវិធី។កន្លងមក ក្រុមអតីតបុគ្គលិក និងបុគ្គលិកក្រុមហ៊ុនណាហ្គាវើលដ៍ បានធ្វើការប្រមូលផ្ដុំនៅលើសួនច្បារសាធារណៈ ផ្ទុយពីការឯកភាពគ្នាជាមួយរដ្ឋបាលរាជធានីភ្នំពេញ នៅក្នុងកិច្ចប្រជុំនាថ្ងៃទី១៧ ខែធ្នូ ឆ្នាំ២០២១។
អាជ្ញាធរបានបញ្ជាក់ថា ៖«រដ្ឋបាលរាជធានីបានប្រើប្រាស់វិធានការអប់រំ ដល់ក្រុមបាតុករកុំឱ្យបន្តសកម្មភាពខុសច្បាប់ និងអនុវត្តតាមយន្តការដោះស្រាយវិវាទការងារ ស្របតាមច្បាប់ជាធរមាន និងខិតខំសម្របសម្រួលគ្រប់លទ្ធភាព តែក្រុមបាតុករនៅតែបន្តធ្វើសកម្មភាពខុសច្បាប់»។
រដ្ឋបាលរាជធានីភ្នំពេញ បានឱ្យដឹងទៀតថា រយៈពេល ៤៩ថ្ងៃ នៃបាតុកម្ម ក្រុមគ្រូពេទ្យបានរកឃើញវិជ្ជមានកូវីដ-១៩ ម្នាក់ ក្នុងចំណោមក្រុមបាតុករ និងរកឃើញជាបន្តបន្ទាប់ ហើយក្រសួងសុខាភិបាលបានស្នើបាតុករ ទៅយកសំណាកនៅទីតាំងដែលបានកំណត់ តែកម្មករមិនមានការសហការនោះឡើយ។
សេចក្ដីប្រកាសនេះបានបញ្ជាក់ថា៖« ក្នុងរយៈពេលនៃការធ្វើបាតុកម្មខុសច្បាប់ សកម្មភាពនេះបានបង្កឱ្យប៉ះពាល់យ៉ាងធ្ងន់ធ្ងរដល់សណ្តាប់ធ្នាប់ របៀបរៀបរយសាធារណៈ ការកកស្ទះចរាចរណ៍ ព្រមទាំងបង្កការរំខានដល់ការប្រកបរបរអាជីវកម្ម ប្រកបការងារប្រចាំថ្ងៃរបស់ប្រជាពលរដ្ឋ នៅជុំវិញតំបន់ធ្វើបាតុកម្មខុសច្បាប់ រហូតដល់មានសំណូមពរឱ្យអាជ្ញាធរមានសមត្ថកិច្ចជួយចាត់វិធានការដើម្បីធានានូវប្រក្រតីភាពនៃជីវភាព និងការរស់នៅប្រចាំថ្ងៃឡើងវិញ»។
ចំណែក កញ្ញា អ៊ុក សុភ័ក្រម៉ូលីកា ជាកូដករដែលជាបុគ្គលិកនៃក្រុមហ៊ុនណាហ្គាវើលដ៍មួយរូប ដែលបានចូលរួមធ្វើកូដកម្មដោយអហិង្សាអស់រយៈពេលជិត៥០ថ្ងៃ បានឱ្យដឹងថា ខាងសាលាក្រុងបានព្យាយាមលាបពណ៌ក្រុមកូដករ និងប្រាប់ឱ្យក្រុមបុគ្គលិកទទួលយកសំណើររបស់ក្រុមហ៊ុន បើមិនដូច្នេះទេ នឹងកើតទៅជារឿងអ្វីផ្សេង។ ចំណែកវិធានការសុខាភិបាល ហាក់មានការលំអៀងមកលើក្រុមកូដករ។
កញ្ញា សុភ័ក្រម៉ូលីកា បន្តថា៖ «រឿងអ្វីផ្សេងហ្នឹង គឺខាងសាលាក្រុងអ្នកនិយាយមកខាងក្រុមគណៈប្រតិភូចរចា ដូចរាល់ថ្ងៃអ៊ីងចឹង គឺសាលាក្រុងបានព្យាយាមលាបពណ៌មកលើក្រុមកូដករយើងគ្រប់រូបភាព។ ចំណែកក្រសួងសុខាភិបាល គឺផ្ដោតមកតែក្រុមកូដករ យើងមើលឃើញថាមានភាពលំអៀង រើសអើងមកលើពួកខ្ញុំជាក្រុមកូដករ ឱ្យច្បាស់ក្រឡែត»។
កូដកររូបនេះសម្ដែងការងើយឆ្ងល់ នៅពេលដែលរដ្ឋបាលរាជធានីភ្នំពេញ ស្នើឱ្យកម្មករទៅធ្វើបាតុកម្មនៅទីលានប្រជាធិបតេយ្យ ខណៈពួកគេធ្វើកូដកម្មរឿងវិវាទការងារជាមួយក្រុមហ៊ុនណាហ្គាវើលដ៍សោះ មិនមែនតវ៉ាជាមួយរដ្ឋាភិបាលឡើយ។
កញ្ញាបញ្ជាក់ថា៖ «ពួកខ្ញុំអត់អាចទៅធ្វើនៅទីលានប្រជាធិបតេយ្យទេ ព្រោះទីលានហ្នឹងសម្រាប់ប្រជាជនមិនពេញចិត្តនឹងរដ្ឋាភិបាល គាត់ទៅបញ្ចេញសម្លេងតវ៉ារបស់គាត់ តែពួកខ្ញុំមិនបានមានវិវាទជាមួយរដ្ឋាភិបាលទេ»។
ទាក់ទងនឹងសេចក្ដីប្រកាសរបស់រដ្ឋបាលរាជធានីភ្នំពេញ លោក ឃុន ថារ៉ូ អ្នកគ្រប់គ្រងកម្មវិធីការងារ នៃមជ្ឈមណ្ឌលសម្ព័ន្ធភាពការងារ និងសិទ្ធិមនុស្ស ហៅកាត់ថាអង្គការសង់ត្រាល់ បានយល់ឃើញថា អាជ្ញាធរនៅតែព្យាយាមក្នុងការស្វែងរកគ្រប់វិធីសាស្រ្ត និងគ្រប់មធ្យោបាយ ក្នុងការបំបែក ទប់ស្កាត់ រារាំងមិនអោយក្រុមកូដករធ្វើកូដកម្មដោយសន្តិវិធី ជាជាងការខិតខំប្រឹងស្វែងរកដំណោះស្រាយបញ្ចប់វិវាទការងាររួមមួយនេះ។
លោក ថារ៉ូ បញ្ជាក់ថា៖ «ការយកហេតុផលវិធានការទប់ស្កាត់កូវីដ និងបន្តចោទប្រកាន់ថាករណីនេះគឺជាការធ្វើបាតុកម្មខុសច្បាប់គឺជាការបកស្រាយច្បាប់ និងចោទប្រកាន់ដោយមិនមានមូលដ្ឋានច្បាប់គ្រប់គ្រាន់ និងជាការអនុវត្តន៍ច្បាប់ មានស្តង់ដារពីរខុសគ្នា រវាងកូដករ និង ថៅកែក្រុមហ៊ុនណាហ្គាវើលដ៏»។
អ្នកគ្រប់គ្រងកម្មវិធីការងាររូបនេះ បន្តថា អាជ្ញាធរគួរព្យាយាមរកវិធីដោះស្រាយដោយប្រសិទ្ធភាព និងអាចទុកចិត្តបានជាងយកហេតុផលទប់ស្កាត់សកម្មភាពស្របច្បាប់របស់កូដករ។
លោកថា៖ «អាជ្ញាធរគួរពិនិត្យមើលច្បាប់ស្តីពីការងារ និងគោលការណ៍ណែនាំរបស់ក្រសួងមហាផ្ទៃ ស្តីពីការធ្វើកូដកម្ម និងបាតុកម្មដោយសន្តិវិធី»។
ទាក់ទិននឹងការស្នើឱ្យក្រុមកម្មករទៅធ្វើការតវ៉ានៅទីលានប្រជាធិបតេយ្យ លោកថារ៉ូ ប្រាប់ឱ្យដឹងថា គឺជារឿងមិនត្រឹមត្រូវ និងមិនយល់ពីនីតិវិធីក្នុងការធ្វើកូដកម្ម និងកម្មវត្ថុនៃវិវាទការងារ និងការទាមទាររបស់កូដករ។
គួររំលឹកថា កាលពីដើមឆ្នាំ២០២០ ជាឆ្នាំដែលមានការរីករាលនៃជំងឺកូវីដ១៩ ហើយក្រុមហ៊ុនណាហ្គាវើលដ៍ បានផ្អាកការងារ និងកាត់បន្ថយបុគ្គលិកមួយចំនួន តែរហូតដល់ខែឧសភា ឆ្នាំ២០២១ ក្រុមហ៊ុនល្បែងដ៏ធំមួយនេះ បានបញ្ឈប់បុគ្គលិកទ្រង់ទ្រាយធំ ដែលភាគច្រើនជាថ្នាក់ដឹកនាំសហជីព ប្រតិភូចរចា និងសមាជិកសហជីព ក្រោមហេតុផលថាក្រុមហ៊ុនជួបវិបត្តិហិរញ្ញវត្ថុដោយសារបញ្ហាកូវីដ១៩។
ក្រោយមានការបញ្ឈប់ដោយគ្មានហេតុផលច្បាស់លាស់នេះហើយ ទើបបុគ្គលិកនៃក្រុមហ៊ុនណាហ្គាវើលដ៍ បានចាប់ផ្ដើមធ្វើកូដកម្មដោយអហិង្សាចាប់តាំងពីថ្ងៃទី១៨ ខែធ្នូ ឆ្នាំ២០២១ ក្រោយពួកគេដើរអស់និតិវិធីច្បាប់ ហើយក្រសួងការងារក៍មិនទាន់អាចរកដំណោះស្រាយជូនកម្មករនៅឡើយ។
មេដឹកនាំសហជីពគឺ កញ្ញាឈឹម ស៊ីថរ និងអ្នកទាំង៧នាក់ផ្សេងទៀត ត្រូវបានចាប់ខ្លួនកាល ពីថ្ងៃទី៤ មករា ពីបទ «ញុះញង់បង្កឱ្យមានភាពវឹកវរធ្ងន់ធ្ងរដល់សន្តិសុខសង្គម»។ ចំណែកបុគ្គលិកចំនួន៣នាក់ទៀត គឺលោកជួប ចាន់ណាត លោក សេង វណ្ណារិទ្ធ និងលោក សៅរ៍ សម្បត្តិ ត្រូវបានឃុំចាប់ខ្លួនកាលពីថ្ងៃទី៥ កុម្ភៈ ពីបទ«រារាំងវិធានការសុខាភិបាល» យោងទៅ តាមមាត្រា១១ នៃច្បាប់ ស្តីការប្រឆាំងនឹង ការរីករាលដាលជំងឺកូវីដ១៩។ មេដឹកនាំសហជីព និងសមាជិកចំនួន១១នាក់ត្រូវបានចាប់ខ្លួន និងឃុំខ្លួននៅពន្ធនាគារទាក់ទិននឹងការធ្វើកូដកម្ម។
ជុំវិញវិវាទការងារ និងការចាប់ខ្លួនជាបន្តបន្ទាប់នេះ សង្គមស៊ីវិលជាច្រើន បានរួបរួមគ្នាដាក់ញតិ្តសុំការអន្តរាគមន៍ទៅស្ថាប័នរដ្ឋាភិបាល គឺក្រសួងមហាផ្ទៃ និងរដ្ឋសភា ក្រសួងយុត្តិធម៌ ក្រសួងកិច្ចការនារី និងក្រសួងការងារ ដើម្បីឱ្យជួយដោះស្រាយវិវាទការងារ និងទម្លាក់បទចោទមកលើកម្មករ ដែលជាតំណាងសហជីពនៃក្រុមហ៊ុនណាហ្គាវើលដ៍ ដែលបានចាប់ខ្លួនកន្លងមក។
លោក ថារ៉ូ អះអាងយ៉ាងដូច្នេះថា ករណីវិវាទការងារនេះកំពុងតែមានការតាមដានពីស្ថាប័នជាតិ និង អន្តរជាតិ ហើយការបន្តចាប់ខ្លួន និងធ្វើការចោទប្រកាន់ទៅលើក្រុមកូដករ និងជះឥទ្ធិពលអវិជ្ជមាន ចំពោះរាជរដ្ឋាភិបាលដើម្បីឆ្លើយតបទៅនិងយន្តការអន្តរជាតិ រួមមានយន្តការរបស់ អង្គការអាយទ្បូ ក្រុមប្រឹក្សាសិទ្ធិមនុស្ស និងការតាមដានត្រួតពិនិត្យ ជាទៀងទាត់ស្តីពីសិទ្ធិមនុស្ស ក្រោមយន្តការអង្គការសហប្រជាជាតិ។
លោកបញ្ជាក់យ៉ាងច្បាស់ថា៖ «កម្ពុជាមិនទាន់មានការធ្វើឱ្យប្រសើរទ្បើង នូវអនុសាសន៍ និងការទាមទាររបស់គណៈកម្មការអឺរ៉ុបស្តីពីដំណោះស្រាយ ស្តីពីសិទ្ធិមនុស្ស និងសិទ្ធិការងារនៅកម្ពុជានៅទ្បើយទេ។ ករណីនេះវានិងអាចជារបៀបវារៈ ក្នុងការផ្តល់ និងមិនបន្ត ប្រព័ន្ធអនុគ្រោះព័ន្ធរបស់ EU និង និងការផ្តល់អោយមកវិញ GSP របស់សហរដ្ឋអាមេរិចផងដែរ»។
យ៉ាងណាមិញ កញ្ញា សុភ័ក្រម៉ូលីកា បានធ្វើការស្នើសុំទៅក្រសួងពាក់ព័ន្ធនានា ឱ្យជួយដោះស្រាយវិវាទការងារនេះឱ្យបានចាប់រហ័ស និងដោះលែងថ្នាក់ដឹកនាំទាំង៨នាក់ ដើម្បីចូលតុចរចាបញ្ចប់វិវាទ ជាជាងរកវិធីដាក់គំនាបគាបសង្កត់ក្រុមកូដករ ។
កញ្ញាបន្ថែមថា៖ «ក្រសួងពាក់ព័ន្ធត្រូវរកវិធីឱ្យថៅកែក្រុមហ៊ុន ឬថ្នាក់ដឹកនាំក្រុមហ៊ុនចុះមកតុចរចាជាមួយតំណាងរបស់យើងទាំង៨នាក់ អានេះបានជាដំណោះស្រាយសម្រាប់វិវាទការងារមួយនេះ មិនមែនព្យាយាមលាបពណ៌បង្វែររឿងទៅជារឿងនយោបាយ ឬចោទថាបដិវដ្ដពណ៌ទេ»៕
