ក្រុមអង្គការសង្គមស៊ីវិល និងអ្នកនយោបាយ ទាមទារឱ្យរកយុត្តិធម៌សម្រាប់ បណ្ឌិត កែម ឡី និងអំពាវនាវឱ្យបញ្ឈប់វប្បធម៌និទណ្ឌភាពនៅកម្ពុជា ។
ការអំពាវនាវធ្វើឡើងក្នុងឱកាសប្រារព្ធខួបលើកទី៩ នៅព្រឹកថ្ងៃទី១០ ខែកក្កដា ឆ្នាំ២០២៥ នាទីតាំងដែល បណ្ឌិត កែម ឡី ជាអ្នកអត្ថាធិប្បាយនយោបាយដ៏មានប្រជាប្រិយភាព ត្រូវបានខ្មាន់កាំភ្លើងបាញ់ប្រហារឱ្យដួលដេកក្នុងថ្លុកឈាម ក្នុងហាង ស្តារម៉ាត នៃឋានីយប្រេងឥន្ទនៈ កាល់តិច ( Caltex ) នាស្តុបបូកគោ កាលពីថ្ងៃអាទិត្យ ទី១០ ខែកក្កដា ឆ្នាំ២០១៦ ។
ក្រៅពីការទាមទាររកយុត្តិធម៌ ក្រុមអ្នកចូលរួម មានទាំងមន្ត្រីអង្គការសង្គមស៊ីវិល តំណាងសហជីពកម្មករ និងអ្នកនយោបាយ បានរម្លឹកនូវវីរភាព និងបង្ហាញនូវការគោរពឱ្យតម្លៃចំពោះ បណ្ឌិត កែម ឡី ។
ជារៀងរាល់ខួបនៃការបាត់បង់ជីវិត បណ្ឌិត កែម ឡី សារអប់រំខ្លីៗ ដែលជាទ្រឹស្ដីរបស់បណ្ឌិតផ្ទាល់ ត្រូវបានរំលេច ដូចជា “ ជូតទឹកភ្នែករបស់អ្នក រួចបន្តដំណើរទៅមុខទៀត ” “ ខ្ញុំនឹងនិយាយអ្វីដែលអ្នកដទៃមិនហ៊ាននិយាយ ” ជាដើម ។ ដោយឡែក សារដែលជាគោលសម្រាប់ខួបលើកទី៩ គឺ “ តើឱ្យខ្ញុំរត់ទៅណា បើទីនេះជាមាតុភូមិខ្ញុំ ” ។
ជាការពិត កាលលោកនៅមានជីវិត បណ្ឌិត កែម ឡី ពុំដែលបានលើកទឹកចិត្តឱ្យមិត្តភក្ដិ ឬខ្មែរណាម្នាក់ ចាកចេញពីមាតុប្រទេស ព្រោះហេតុផលនយោបាយសោះឡើយ ។
ពីប្រទេសអូស្ត្រាលី ភរិយា បណ្ឌិត កែម ឡី គឺ លោកស្រី ប៊ូ រចនា ប្រាប់ ខេមបូចា ថា ថ្ងៃទី១០ ខែកក្កដា ជាថ្ងៃដែលជីវិតស្វាមីរបស់លោកស្រីត្រូវបានផ្ដាច់ផ្ដិល សុភមង្គលគ្រួសារត្រូវបំផ្លាញឱ្យខ្ទេចខ្ទាំ កូនប្រុសទាំងប្រាំត្រូវកំព្រាឪពុក ហើយកាន់តែគួរឱ្យក្ដុកក្ដួលទៅទៀតនោះ គឺកូនប្រុសពៅពុំទាន់ទាំងបានឃើញមុខឪពុកម្ដងផង ។
លោកស្រី ប៊ូ រចនា ព្រមទាំងកូន និងញាតិមិត្តគ្រួសារ ក៏បានធ្វើបុណ្យឧទ្ទិសកុសល ជូន បណ្ឌិត កែម ឡី ដែរ ។
កាលពីចុងខែមីនា ឆ្នាំ២០១៧ សាលាដំបូងរាជធានីភ្នំពេញ បានសម្រេចផ្តន្ទាទោសជនដៃដល់ម្នាក់ ឈ្មោះ អឿត អាង ហៅ ជួប សម្លាប់ ឱ្យជាប់ពន្ធនាគារអស់មួយជីវិត ពីបទ “ ឃាតកម្មគិតទុកជាមុន ” និងបទ “ ការកាន់កាប់អាវុធដោយគ្មានការអនុញ្ញាត ” ។
ទោះយ៉ោងណាក្ដី ក្រុមអ្នកការពារសិទ្ធិមនុស្ស និងអង្គការសង្គមស៊ីវិលចាត់ទុកថា ជួប សម្លាប់ ពុំមែនជាឃាតកពិតឡើយ ។
ថ្វីដ្បិតតែតុលាការបានបំបែកសំណុំរឿងព្រហ្មទណ្ឌនេះ ទៅជាពីរករណីក៏ដោយ ក៏ពុំទាន់មានការសើរើ ឬស្វែងរកតម្រុយថ្មីនៃសំណុំរឿងនេះនៅឡើយទេ ៕
