សមាគមសម្ព័ន្ធអ្នកសារព័ត៌មានកម្ពុជា

អ្នកនាំពាក្យក្រសួងកសិកម្មបានបន្ទោសលើមន្ត្រីអង្គការសង្គ្រោះនិងថែទាំសត្វព្រៃ ករណីតំបន់ភ្នំតាម៉ៅ ខណៈសង្គមស៊ីវិលថារងចាំតាម​ដាន​បន្តទៀត

ផ្លូវដែលក្រសួងកសិកម្មឈូសឆាយដើម្បីបង្ការភ្លើងឆេះ និងឱ្យពលរដ្ឋធ្វើដំណើរ ស្ថិតនៅក្បែរឧទ្យានភ្នំតាម៉ៅ។ រូបថតនៅថ្ងៃទី១២ ខែធ្នូ ឆ្នាំ២០២៣។ (ខេមបូចា/ ឃាង សុខមាន)
ផ្លូវដែលក្រសួងកសិកម្មឈូសឆាយដើម្បីបង្ការភ្លើងឆេះ និងឱ្យពលរដ្ឋធ្វើដំណើរ ស្ថិតនៅក្បែរឧទ្យានភ្នំតាម៉ៅ។ រូបថតនៅថ្ងៃទី១២ ខែធ្នូ ឆ្នាំ២០២៣។ (ខេមបូចា/ ឃាង សុខមាន)

អ្នកនាំពាក្យ​ក្រសួង​កសិកម្ម បានបន្ទោសលើ​នាយកកម្មវិធីសង្គ្រោះនិងថែទាំសត្វព្រៃ​នៃ​អង្គការ​​សម្ព័ន្ធមិត្តសត្វព្រៃ​ជុំវិញលោក​ផ្តល់បទ​សម្ភាសន៍ទៅស្ថាប័នសារព័ត៌មានក្រៅស្រុកមួយ អំពី​ការឈូសឆាយព្រៃ​តំបន់​ភ្នំតាម៉ៅ​ដើម្បីធ្វើផ្លូវ ខណៈសង្គមស៊ីវិលលើកឡើងថា ការបន្ទោស​នេះ​ជារឿងមួយ​ដែលមិនសមហេតុសមផលនោះទេ។

កញ្ញា អ៊ឹម រចនា អ្នកនាំពាក្យក្រសួងកសិកម្ម បានចុះទៅទីតាំង​ឈូសឆាយធ្វើផ្លូវផ្ទាល់​កាល​ពីសប្តាហ៍​មុន​​ក្រោយ​ពី​សារព័ត៌មាន​ក្រៅស្រុកមួយបានចេញផ្សាយ និងបានផ្តល់​បទ​សម្ភាសន៍​ជាមួយស្ថាប័ន​កម្ពុជាថ្មី​ថា ការ​ចេញផ្សាយ​គឺជារឿងមូល​បង្កាច់ និងមានចេតនា​បង្ក​ភាពវឹកវរ​ដល់សាធារណជន និង​ខុស​ពី​ការពិត។

កញ្ញាបានពន្យល់បន្តថា តំបន់ដែលក្រសួងឈូសឆាយនេះ គឺស្ថិតនៅព្រំប្រទល់​រវាងដី​ឧទ្យាន​សួនសត្វភ្នំតាម៉ៅ និងដីឯកជនមិនមែនស្ថិតនៅក្នុង​ដីអភិរក្សដូចការ​លើកឡើង​នោះ​ទេ។ យ៉ាង​ណា​កញ្ញាបានបញ្ជាក់ទៀតថា ការឈូសឆាយព្រៃនេះដើម្បីបង្ការភ្លើងឆេះព្រៃ ដោយ​កញ្ញាថា ហេតុការណ៍នេះធ្លាប់កើតឡើងកន្លងមកជារៀងរាល់ឆ្នាំ ទើបក្រសួងត្រូវឈូស​ឆាយ​ដូច្នេះ មិនដូចខាងអង្គការ​WILDLIFE ALLIANCE ផ្តល់បទសម្ភាសន៍នោះទេ។

កញ្ញាបានថ្លែងថា៖ «ខ្ញុំមិនយល់ថាហេតុអ្វីបានជាអង្គការWILDLIFE ALLIANCE លោកផ្ដល់​បទ​សម្ភាសន៍​ដល់សារព័ត៌មានមួយដែលផ្សាយពីក្រៅប្រទេសមក ចោទប្រកាន់​រដ្ឋាភិបាល​កម្ពុជា ចោទប្រកាន់ក្រសួង ចោទប្រកាន់ឧទ្យានជាតិភ្នំតាម៉ៅថា​យើងឈូសឆាយដីនេះ​ដើម្បី​ផល​ប្រយោជន៍ខ្លួន ធ្វើឡើងដើម្បីអភិវឌ្ឍក្នុងគម្រោងណាមួយ បំផ្លិចបំផ្លាញធនធានដែល​យើង​​ខំការពារ។ ការលើកឡើងគឺជាការប្រឌិតទាំងស្រុង ហើយក្រសួងសុំច្រានចោល»

កញ្ញា អ៊ឹម រចនា​ បានបញ្ជាក់បន្ថែមប្រាប់ ខេមបូចា នៅថ្ងៃទី២២​ ខែធ្នូនេះ​ ថា ការឈូសឆាយ​ផ្លូវ​នេះ មិនមែនជាការឈូសឆាយផ្លូវថ្មីនោះទេ វាជាផ្លូវចាស់ ក្រសួង​គ្រាន់​តែ​ឈូសឆាយ​ដើម្បី​បង្ការភ្លើងឆេះប៉ុណ្ណោះ។ យ៉ាងណាមិញកញ្ញាបន្តថា ក្រសួងកំពុង​ឈូស​ឆាយ​តំបន់ផ្សេង​ទៀត ក្នុងចេតនាបង្ការភ្លើងឆេះ។

កញ្ញា​ រចនា បានបន្តទៀតថា៖ «វាមិនមែនជាផ្លូវថ្មីស្អីទេជាផ្លូវដែលមានកន្លងមកហើយ ប៉ុន្ដែ​ត្រូវ​​រង​ការ​ដុះ​ទន្រ្ទាន​ដោយស្មៅឬមួយដើមឈើតិចតួច ប៉ុន្ដែវាអាចបង្កជា​ហានីភ័យ​ជាការ​ឆេះ​ព្រៃ។ ផ្លូវនេះវាស្ថិតនៅរវាងឧទ្យានការពាររបស់យើងជាមួយដីឯកជន។ យើងកំពុងតែធ្វើ​តាម​តំបន់​មួយចំនួនវាមានការប្រឈមនឹងហានីភ័យខ្លាំងមួយចំនួនភ្លើងឆេះព្រៃ»

​ខេមបូចា បានទំនាក់ទំនងលោក និក ម៉ាក នាយកកម្មវិធីសង្គ្រោះ និងថែទាំសត្វព្រៃ​នៃ​អង្គការ​សម្ព័ន្ធមិត្តសត្វព្រៃ តាមប្រព័ន្ធតេឡេក្រាម ដោយលោកឆ្លើយថា លោកសុំរក្សាភាព​ស្ងៀម​ស្ងាត់ និង​មិនអាចនិយាយអ្វីបន្ថែមបានទេ។ តែយ៉ាងណាលោកធ្លាប់បានប្រាប់កាសែត​ក្នុង​ស្រុកថា ព្រៃនៅជាប់ភ្នំតាម៉ៅមួយចំនួនធ្លាប់ជាជម្រកសត្វព្រៃ​ ​គឺកំពុងត្រូវ​បានគេកាប់សំអាត​ផ្នែក​ខាង​ក្រោម និងផ្នែកខ្លះទៀតត្រូវបានឈូសឆាយក្នុង​រូបភាព​ធ្វើផ្លូវ​ដើម្បី​ការពារភ្លើងឆេះ​ព្រៃមួយ​នេះ។

លោក និក ម៉ាក បង្ហាញក្តីបារម្ភថា ការធ្វើសកម្មភាពកាប់បំផ្លាញ និងឈូសឆាយ​ព្រៃឈើ​បែប​នេះ នឹងធ្វើឱ្យបាត់បង់ព្រៃឈើនៅជុំវិញតំបន់ភ្នំតាម៉ៅបន្ថែមទៀត និងប៉ះពាល់ដល់ជម្រក​សត្វ​ព្រៃ​រស់នៅ​តំបន់នោះផងដែរ ដែលលោកថា កន្លងមកតំបន់នោះ ជាកន្លែងសត្វរស់នៅច្រើន បន្ទាប់ពីដី២០២៥ហិកតា ដែលត្រូវបានរក្សាដោយអនុក្រឹត្យ។

លោកលើកឡើងថា៖ «យើងអត់ចង់ឱ្យគេធ្វើអ្វីទេ។ បើគេកាប់ព្រៃហើយ តើសត្វទៅ​ណា។ ព្រៃ​នេះ​​មាន​សត្វច្រើនបើតាមកាមេរ៉ាដែលបានដាក់»

កាលពីថ្ងៃ១២ ខែធ្នូ ឆ្នាំ២០២៣ អង្គការការពារសត្វព្រៃ​WILDLIFE ALLIANCE  បានចេញ​លិខិត​​បញ្ជាក់​មួយថា ការចេញផ្សាយរបស់ស្ថាប័នក្រៅស្រុកវីអូឌីជារឿងមិនត្រឹមត្រូវ និង​ជាព័ត៌មានមិនពិត ព្រោះការលើកឡើងរបស់អង្គការនេះដើម្បីការពារធនធានធម្មជាតិ និង​សត្វព្រៃប៉ុណ្ណោះ មិនមានចេតនាបង្កភាពវឹកវរណាមួយនោះទេ។ ក្នុងលិខិតដដែលបាន​បញ្ជាក់​​ថា អង្គការនេះគឺជាដៃគូរសហការដ៏ល្អរបស់រដ្ឋាភិបាល។

លោក ហេង គឹមហុង​ ប្រធានផ្នែកកម្មវិធីស្រាវជ្រាវ និងតស៊ូមតិនៃសមាគមបណ្ដាញ​យុវជន​កម្ពុជា(CYN)   បានថ្លែងថា ការលើកឡើងរបស់អ្នកនាំពាក្យក្រសួង​កសិកម្មវាមិន​ត្រឹមត្រូវ​នោះ​ទេ។ លោកបន្តថា ក្រសួងមុននឹងធ្វើអ្វីមួយត្រូវជូនដំណឹងដល់អ្នកពាក់ព័ន្ធផង ហើយការព្រួយ​បារម្ភ​គឺជារឿងត្រឹមត្រូវ ត្បិតកន្លងមកមានករណីឈូសឆាយម្ដង និង​បាន​បាត់​បង់ព្រៃឈើ​ជា​ជម្រក​សត្វតំបន់ភ្នំតាម៉ៅអស់ជាច្រើនហិកតា។

លោកឱ្យដឹងទៀតថា ក្រសួងខ្លួនឯងធ្វើអ្វីមួយត្រូវមានតុល្យភាព មិនគួរដាក់បន្ទុក​ទៅអ្នក​ផ្សេង គឺមិនត្រឹមត្រូវទេ។

លោកបន្ដថា៖ «យើងឃើញថាករណីភ្នំតាម៉ៅធ្លាប់ឈូសអស់រាប់សិបហិកតាវាជាមេរៀនមួយ​ដែល​ធ្វើ​ឱ្យពួកគាត់រៀនសូត្របាន។ ខ្ញុំយល់ថាក្រសួងមិនគួរព្យាយាមថ្កោលទោស​ទៅផ្នែក​ណាមួយទេ ផ្ទុយទៅវិញក្រសួងខ្លួនឯងត្រូវមានតម្លាភាពក្នុងការឆ្លើយតបទៅកាន់ពលរដ្ឋ»។

កាលពីថ្ងៃទី៨ ខែធ្នូ ឆ្នាំ២០២៣កន្លងទៅ សារព័ត៌មានវីអូឌីនៅក្រៅស្រុកបាន​ចេញផ្សាយ​ព័ត៌មាន​​ពាក់ព័ន្ធ​នឹងការឈូសឆាយព្រៃក្នុងតំបន់អភិរក្សលើសពីអនុក្រឹត្យ និងបានចេញផ្សាយ​ថា ពួកគេបានទទួលវីដេអូពីពលរដ្ឋ និងទទួលបានការផ្ដល់បទសម្ភាសន៍របស់លោក និក ម៉ាក នាយកកម្មវិធីសង្គ្រោះនិងថែទាំសត្វព្រៃ​នៃ​អង្គការ​​សម្ព័ន្ធមិត្តសត្វព្រៃ​។

លោកថ្លែងថា៖ «លោកបារម្ភពី​ការ​បាត់បង់​ធនធាន​ធម្មជាតិ និងជម្រកសត្វព្រៃ​បន្ដទៀត​នៅឯ​តំបន់​អភិរក្សភ្នំតាម៉ៅក្រោយ​ឃើញ​អាជ្ញាធរ​ឈូសឆាយដីបន្ថែមទៀត​ក្រោម​ហេតុផល​ថា​ដើម្បី​ការពារភ្លើងឆេះព្រៃ​ក្នុង​តំបន់​អភិរក្សមួយនេះ»

ស្រដៀងគ្នានេះដែរ លោក វណ្ណ សូផាត មន្ដ្រីសម្របសម្រួលធុរៈកិច្ច និងសិទ្ធិមនុស្សនៃ​មជ្ឈមណ្ឌល​សិទ្ធិ​មនុស្សកម្ពុជា បានថ្លែងថា ការលើកឡើងរបស់អ្នកនាំពាក្យក្រសួងកសិកម្ម​ដែលចោទលើលោក និក ម៉ាក នេះគឺមិនត្រឹមត្រូវនោះទេ។ លោកបន្ដថា បញ្ហាធ្វើផ្លូវដើម្បី​ការពារ​ភ្លើងឆេះព្រៃ និងដើម្បីឱ្យពលរដ្ឋធ្វើដំណើរនេះ វាជាហេតុផលមិនសមស្រប និង​មិន​អាច​ទទួលយកបាន។

លោកបន្ថែមថា៖ «លោក និក ម៉ាក គាត់ខំប្រឹងការពារធនធានរបស់ខ្មែរយើងណាស់ មិនគួរ​ណា​មន្ដ្រី​ជាន់ខ្ពស់ មានចំណេះដឹងបែរជា​ចោទគាត់វិញ។ ការលើកឡើងមិនសមហេតុ​មិន​សមផល​វា​ច្បាស់​ជាមានរឿងអីមួយមិនប្រក្រតីនឹងអាចលេចឡើងនៅពេលអនាគត ដែល​យើង​ទាំងអស់​កំពុងតែតាម។ ខ្ញុំគិតថាវាជាសញ្ញាមួយ ព្រោះសកម្មភាពអភិរក្ស ការពារ​មិនអ៊ីចឹងទេ»

អ្នកសារព័ត៌មានខេមបូចា បានចុះទៅទីតាំងផ្ទាល់សង្កេតឃើញថា ព្រៃមួយចំនួនបានដួលរលំ​ដោយសារតែ​គ្រឿង​ចក្រ​ឈូសឆាយដើម្បីធ្វើផ្លូវមួយខ្សែដោយតចេញពីផ្លូវ​កៅស៊ូចូល​ឧទ្យាន​ជាតិភ្នំតាម៉ៅ។ ផ្លូវដែលបានឈូសឆាយហើយមានទទឹងប្រហែល៥ម៉ែត្រ និងបណ្ដោយ​ប្រហែល​​​១គីឡូ ប៉ុន្ដែ​មិនឃើញមានគ្រឿងចក្រទុកនៅទីនោះទេ ដោយពលរដ្ឋអះអាងថា គ្រឿង​​ចក្រទាំងនោះ​បាន​ដកចេញ​ក្រោយពីផ្ទុះព័ត៌មានអំពីសកម្មភាពរបស់ពួកគេ។

ចំណែកឯពលរដ្ឋម្នាក់ក្នុងលក្ខខណ្ឌសុំមិនបញ្ចេញឈ្មោះ បាននិយាយយ៉ាងខ្លីថា ការឈូស​ឆាយ​នេះគឺលោកមានការព្រួយបារម្ភពីជម្រក​​សត្វ ប៉ុន្ដែលោកមិនអាច​និយាយព្រោះ​​លោក​ជា​​ពលរដ្ឋធម្មតា។

លោកបញ្ជាក់ថា៖ «ខ្ញុំបារម្ភបង ប៉ុន្ដែយើងពលរដ្ឋមិនអាចនិយាយបានបង»

មិនខុសគ្នានោះទេ ពលរដ្ឋម្នាក់ទៀតគឺលោក សុខ សំណាង (ឈ្មោះអ្នកសារព័ត៌មានដាក់ឱ្យ) ជាអ្នករត់ម៉ូតូឌុបនៅតំបន់ហ្នឹង​ បានឱ្យដឹងថា លោកបានដឹងពីការឈូសឆាយព្រៃ និង​សកម្មភាព​ផ្សេងៗ។ លោកបន្ដថា ក្នុងនាមជាពលរដ្ឋម្នាក់ពិតជាមានការសោកស្ដាយ ព្រោះ​​ឈើ​ដែលគេឈូសឆាយមានអាយុកាលច្រើនឆ្នាំហើយ ប៉ុន្ដែលោកថា លោកមិនអាច​និយាយ​អ្វីបាន បានត្រឹមឃើញគេយកគ្រឿងចក្រឈូសឆាយ។

លោកបន្ថែមថា៖ «ខ្ញុំដឹងគេយកគ្រឿងចក្រមកឈូសតើ ប៉ុន្ដែយើងជាពលរដ្ឋបានត្រឹម​ឈរ​មើល​ពីចម្ងាយ។ ស្ដាយដែរអូន ព្រោះព្រៃហ្នឹងយូរឆ្នាំហើយតាមខ្ញុំដឹង»

កាលពីថ្ងៃទី១៤ ខែមករា ឆ្នាំ២​​០​​២​​២ ទីស្ដីការគណៈរដ្ឋមន្រ្តី បានចេញសេចក្ដី​សម្រេចមួយឱ្យ​​ក្រុ​ម​​​ហ៊ុនលោកឧកញ៉ា ឡេង ណាវ៉ាត្រា ទទួលបានសិទ្ធិឈូសឆាយដីព្រៃ នៅតំបន់ភ្នំតាម៉ៅ។ សេចក្តី​​សម្រេច​​របស់គណៈរដ្ឋមន្រ្តីនេះ ធ្វើឡើងបន្ទាប់ពីលោកនាយករដ្ឋមន្រ្តី ហ៊ុន សែន កាល​ពី​ថ្ងៃទី៦ ខែមក​រា ឆ្នាំ២០២២ បើកឱ្យមានការវិនិយោគនៅទីនោះ។ ហើយនៅថ្ងៃទី៧ ខែសីហា ឆ្នាំ២០២២ លោកនាយករដ្ឋមន្ត្រី​​បញ្ជា​ឱ្យ​លុប​ចោល​ទាំង​អស់​ចំពោះ​ការ​អនុញ្ញាតិ​ឱ្យ​ដោះ​ដូរ​​ និង​អភិវឌ្ឍ​​តំបន់​ភ្នំ​តាម៉ៅ​ ក្រោយពីក្រុមហ៊ុន ឡេង ណាវ៉ាត្រា បានឈូសឆាយ​អស់​ជិត៦០០ហិកតា ក្នុងចំណោមផ្ទៃដីព្រៃ១ ៥០០ហិកតា ដែលលោកនាយករដ្ឋមន្ត្រី ហ៊ុន សែន ផ្ដល់ឱ្យដើម្បី​អភិវឌ្ឍ​។

ការសម្រេចលុបគម្រោងអភិវឌ្ឍន៍វិញនេះ ក្រោយមានប្រតិកម្មខ្លាំងពីមហាជនចំពោះ​ការ​សម្រេច​នេះ ដោយថានឹងធ្វើឱ្យប៉ះពាល់ដល់ធនធានធម្មជាតិ ពិសេសព្រៃឈើ និងសត្វព្រៃ​នៅតំបន់ភ្នំតាម៉ៅ។

ភ្នំតាម៉ៅ ​មានចម្ងាយប្រមាណ៤០គីឡូម៉ែត្រ ពីរាជធានីភ្នំពេញ មានផ្ទៃដីសួនសត្វ៤០០​ហិកតា និង​ផ្ទៃដីទំហំជាង២ ០០០ហិកតាជាព្រៃដែលព័ទ្ធជុំវិញសួនសត្វ​។

បើតាមលោក តាន់ គឹមសួរ ប្រធានយុវជនស្មគ្រចិត្ដជួយសង្គមបៃតងវររៀរស៍ បានបង្ហោះ​សារ​មួយ​​លើគណនីហ្វេសប៊ុកផ្ទាល់កាលពីថ្ងៃទី១២ ខែធ្នូ ថា ដីព្រៃជាង២០០ហិកតានេះ គឺជា​កម្មសិទ្ធ​​​ឯកជន​មហាឆ្ងល់​ថា ឯកជនណាមានដីប៉ុណ្ណាប៉ុណ្ណី តែគ្មានបានធ្វើសកម្មភាព​អ្វីនៅ​លើ​ដី​នេះបន្ដិចទាល់តែ​សោះ ទុកឱ្យព្រៃដុះពេញ ទុកឱ្យសត្វរត់លេងពេញព្រៃ។

យ៉ាងណាលោកបានដាក់ជាសំណួរថា៖ «តើដីនេះគឺជាដីព្រៃ ឬជាដីស្រែចម្ការឬជាដីអាស្រ័យ​ផងរបស់ប្រជាជននៅទីនោះ?»។

លោកបន្តថា៖ «បើនេះជាដីព្រៃកម្មសិទ្ធឯកជនពិតប្រាកដមែន តើអាចស្នើសុំឯកជនប្ដូរទីទៅ​កាន់កាប់នៅកន្លែងផ្សេងដែលត្រូវបានឈូសឆាយហើយបានទេ?»

​ខេមបូចាបានសុំការបំភ្លឺពីលោក តាន់ គឹមសួរ បន្ថែមពាក់ព័ន្ធនឹងការបង្ហោះសាររបស់លោក ដោយបានឆ្លើយតបយ៉ាងខ្លីថា ពេលនេះលោកមិនអាចនិយាយអ្វីបន្ថែមបានទេ​ជុំវិញ​រឿង​តំបន់​ភ្នំតាម៉ៅ ព្រោះស្ថិតក្នុងស្ថានភាពក្ដៅ។

លោកថា៖ «ខ្ញុំមិនអាចនិយាយអ្វីបន្ថែមបានក្នុងស្ថានភាពនេះ បងអាចយកអ្វីដែល​ខ្ញុំផុស​ទៅ​ចុះផ្សាយបានបង»

ខេមបូចា មិនអាចសុំការបំភ្លឺពីលោក កែវ អូម៉ាលីស្ស ប្រធានរដ្ឋបាលព្រៃឈើ​នៃ​ក្រសួង​កសិកម្ម​បានទេ មុននឹងការចេញផ្សាយនេះ ដោយ​ទូរសព្ទ​គ្មានអ្នកលើក។

ខេមបូចាមិនអាចសុំការអត្ថាធិប្បាយពី លោក ភួន ឈីម អភិបាលស្រុកបាទីបានទេ ជុំវិញ​ករណី​នេះ។

លោក មាស អ៊ុយ ប្រធានរដ្ឋបាលខេត្ដតាកែវ បានប្រាប់ថា លោកមិនបានទទួលព័ត៌មាន​ណាពីការឈូសឆាយតំបន់ភ្នំតាម៉ៅនោះទេ។

លោកថា៖ «ពូអត់បានទទួលព័ត៌មានផង»

នៅថ្ងៃទី១៩ ខែសីហា ឆ្នាំ២០២២ ព្រះមហាក្សត្របានចេញព្រះរាជក្រឹត្យ ដោយដាក់​តំបន់​ភ្នំតាម៉ៅ ជាតំបន់ឧទ្យានសួនសត្វ ព្រៃការពារ និងសួនភូតគាម ដើម្បីធានានូវ​និរន្តរភាព​នៃ​ការ​ថែរក្សាអភិរក្សព្រៃឈើ និងសត្វព្រៃជាដើម ក្រោយតំបន់នេះមានភាព​ចម្រូងចម្រាស​ពីបញ្ហា​ឈូស​ឆាយដីព្រៃរាប់រយហិកតា ក្រោមគម្រោងអភិវឌ្ឍន៍របស់វិស័យឯកជន។

ព្រះរាជក្រឹត្យ​បានបញ្ជាក់ទៀតថា ការបង្កើត ឬដាក់តំបន់ភ្នំតាម៉ៅនេះ ក្នុងគោលបំណង​ដើម្បីអភិវឌ្ឍ​សួនភូតគាមសាស្ត្រដែលមានពូជឈើប្រណិត និងមានតម្លៃសេដ្ឋកិច្ចខ្ពស់ ព្រមទាំងអភិវឌ្ឍ​ជាតំបន់គោលដៅ​ទេសចរណ៍ធម្មជាតិ វប្បធម៌ និងប្រវត្តិសាស្ត្រ ផ្ដល់ការថែរក្សាសង្គ្រោះ​សត្វព្រៃ ព្យាបាល និងស្តារលទ្ធភាពសត្វព្រៃ៕

778 views

ព័ត៌មានទាក់ទង

ព័ត៌មានថ្មីៗ

អត្ថបទពេញនិយម