សមាគមសម្ព័ន្ធអ្នកសារព័ត៌មានកម្ពុជា

សង្គមស៊ីវិលគ្រោងនឹងចូលរួមធ្វើកូដកម្មទ្រង់ទ្រាយធំជាមួយកូដករណាហ្គាវើលដ៍ បើសិននៅតែគ្មានដំណោះស្រាយ

កូដករកំពុងលើកបដាទាមទារឱ្យក្រុមហ៊ុនណាហ្គាវើលដ៍ដោះស្រាយវិវាទនិងគោរពច្បាប់ការងារ។ រូបថតថ្ងៃទី៥ ខែកក្កដា ឆ្នាំ២០២២។ ខេមបូចា/ សុវណ្ណ ស្រីពេជ្រ
កូដករកំពុងលើកបដាទាមទារឱ្យក្រុមហ៊ុនណាហ្គាវើលដ៍ដោះស្រាយវិវាទនិងគោរពច្បាប់ការងារ។ រូបថតថ្ងៃទី៥ ខែកក្កដា ឆ្នាំ២០២២។ ខេមបូចា/ សុវណ្ណ ស្រីពេជ្រ

សង្គមស៊ីវិលនិងសហជីពដែលធ្វើការលើកកម្ពស់សិទ្ធិការងារ ប្រមាណ៤០ស្ថាប័នទទូច​ឱ្យ​អាជ្ញាធររដ្ឋ កុំជ្រៀតជ្រែកវិវាទការងារនៃក្រុមហ៊ុនណាហ្គាវើលដ៍។ ពួកគេគ្រោងនឹង​ចូលរួម​ធ្វើកូដកម្មទ្រង់ទ្រាយធំជាមួយក្រុមកូដករ ប្រសិនបើនៅតែគ្មានដំណោះស្រាយឆាប់ៗនេះ។

វិវាទការងារនៅក្រុមហ៊ុនណាហ្គាវើលដ៍បានអូសបន្លាយជិតមួយឆ្នាំមកហើយ រីឯដំណោះ​ស្រាយហាក់មិនមានពន្លឺសម្រាប់ក្រុមកម្មករនៅឡើយ។ ការណ៍នេះ ខាងក្រុមសង្គមស៊ីវិល និងសហជីពដែលធ្វើការលើកកម្ពស់សិទ្ធិការងារ និងសិទ្ធិមនុស្ស ប្រមាណ១០នាក់ កាលពី​ថ្ងៃទី៥ ខែកក្កដា បានបង្ហាញវត្តមាននៅកន្លែងកូដកម្ម ដោយអានសារអំពាវទៅ​អាជ្ញាធររដ្ឋ​កុំជ្រៀតជ្រែកវិវាទការងារ និងស្នើរដ្ឋាភិបាលជួយអន្តរាគមន៍លើវិវាទការងារឱ្យបានឆាប់។

ប្រធានសហព័ន្ធសហជីពកម្ពុជា លោកស្រីយ៉ាង សុភ័ណ្ឌ បានអះអាងថា ប្រសិនបើដំណោះ​ស្រាយ​មិនមានសម្រាប់បុគ្គលិកកម្មករណាហ្គាវើលដ៍ទេ សហជីពផ្សេងទៀត​នឹងចូលរួម​ធ្វើ​កូដកម្មទ្រង់ទ្រាយធំ ជាមួយកូដករណាហ្គាវើលដ៍ ដើម្បីឱ្យថោកែក្រុមហ៊ុនចេញមុខ​ដោះ​ស្រាយ​ដោយសន្តិវិធី។

លោកស្រីបន្ថែមថា សកម្មភាពតវ៉ាកន្លងមករបស់កម្មករ គឺជាសិទ្ធិសេរីភាពដែលធានា​ដោយ​ច្បាប់ ក្នុងការទាមទារឱ្យមានការគោរពសិទ្ធិការងារនៅកន្លែងធ្វើការ ហើយរដ្ឋាភិបាល​គប្បី​ពន្លឿនការអន្តរាគមន៍ បើពុំដូច្នេះរដ្ឋមិនចំណេញឡើយចំពោះការទុកវិវាទនេះចោល ។

លោកស្រី សុភ័ណ្ឌ ថ្លែងថា៖ «បើសិនណាមិនមានការដោះស្រាយទេ ប្រហែលជាមានការ​ចូល​រួម​កាន់តែធំដុំជាងមុនទៀត រហូតដល់សមាជិកតាមមូលដ្ឋានសម្រេចចិត្ត​ក្នុងការ​គាំទ្រ​កម្មករ​ណាហ្គាវើលដ៍នេះ»។

លោកស្រីបញ្ជាក់ថា សង្គមស៊ីវិលមិនឱបដៃឈរមើលកម្មករងអយុត្តិធម៌ពីវិវាទការងារ​មួយ​នេះ​ឡើយ ហើយនេះជាសប្ដាហ៍ទីមួយក្នុងការចូលរួមឃ្លាំមើលតែប៉ុណ្ណោះ សប្ដាហ៍ក្រោយៗ​នឹង​មានការចូលរួមផ្ទាល់។ អ្នកស្រីបន្តថា មូលហេតុដែលលោកស្រីសម្រេចចិត្តគាំទ្រ និងចូល​រួម​ធ្វើ​ជាមួយបុគ្គលិកណាហ្គាវើលដ៍ ក៏ដោយសារតែលោកស្រីក៏កម្មករដូចគ្នា ហើយកម្មករ​គឺ​គ្មាន​លុយ គ្មានអំណាច ដូច្នេះជាជនដែលងាយរងគ្រោះ ព្រោះត្រូវបានថៅកែរំលោភបំពាន។

លោកស្រីឱ្យដឹងថា៖​«យើងនឹងចូលរួមមកដល់ទីតាំងផ្ទាល់ទាំងសមាជិករបស់យើងស្ទើតែ​ទាំងអស់គ្នាចង់ចូលរួម ហើយអាចនឹងនៅទីសាធារណៈណាមួយ»។

អ្នកស្រីក៏បានស្នើទៅអាជ្ញាធររដ្ឋកុំធ្វើហួសពីតួនាទីជាអ្នកដែលបម្រើការពារប្រយោជន៍​ប្រជាពលរដ្ឋ។ ពិសេសក្រសួងការងារហាក់ដូចជាការពារប្រយោជន៍ក្រុមហ៊ុន និងបាន​ដើរ​តួ​និយាយជំនួសក្រុមហ៊ុន ដោយបង្ខំឱ្យកម្មករយកលុយបញ្ចប់រឿង ដែលវាផ្ទុយពីច្បាប់ការងារ និងការទាមទាររបស់កម្មករ ខណៈកន្លងមកសមត្ថកិច្ចបានប្រើប្រាស់ហិង្សា ធ្វើទុក្ខបុកម្នេញ​ដាក់កម្មករស្រ្តី។

អ្នកស្រីបន្ថែមថា៖ «អាក្រក់មែនទែន ដែលអាជ្ញាធររដ្ឋដើរតូនាទីគាំទ្រក្រុមហ៊ុនណាហ្គាវើលដ៍ រំលោភសិទ្ធិកម្មករ បន្ទាប់មកអត់ដោះស្រាយបញ្ហាឱ្យកម្មករ។ យើងសំណូមពរ​ឱ្យ​ក្រសួង​ការងារ ដើរតួនាទីក្នុងការដោះស្រាយបញ្ហាឱ្យដល់ឬសគល់នៃបញ្ហា បើមិនដូច្នេះ​ទេវិវាទ​នេះនឹងរីករាលដាលកាន់តែធំទៅៗ»។

កូដករកំពុងលើកបដាទាមទារឱ្យក្រុមហ៊ុនណាហ្គាវើលដ៍ដោះស្រាយវិវាទនិងគោរពច្បាប់ការងារ។ រូបថតថ្ងៃទី៥ ខែកក្កដា ឆ្នាំ២០២២។ ខេមបូចា/ សុវណ្ណ ស្រីពេជ្រ

គេសង្កេតឃើញថា កាលពីថ្ងៃម្សិលមិញនេះ មានកូដករប្រមាណ១០០នាក់ នៅតែបន្ត​ធ្វើ​កូដករ​ដូចសព្វមួយដង ដោយធ្វើដំណើរពីផ្សារទំនើបអ៊ីអន តាមផ្លូវសុធារស ក្នុងគោល​បំណង​ឈរតវ៉ាក្បែររបងក្រុមហ៊ុន ប៉ុន្តែត្រូវបានអាជ្ញាធរដាក់រនាំងហាមឃាត់មិនឱ្យទៅមុខ។ ក្នុងនោះ​មានឡានក្រុងប្រមាណ៥គ្រឿង​ និងឡានអគ្គស្នងការនគបាលជាតិ​តម្រៀបជួរក្បែរទីតាំង​កូដករ រួមជាមួយកម្លាំងសមត្ថិកិច្ច និងជនស៊ីវិលជាច្រើនមានវត្តមាននៅចាំរារាំងមិនឱ្យ​កម្មករ​បន្តដំណើរទៅមុខ។

ជាកូដករដែលបម្រើការងារនៅក្រុមហ៊ុនណាហ្គាវើលដ៍មួយរូប កញ្ញា ជឹម រដ្ឋា  បានថ្លែងប្រាប់ ខេមបូចា ថា កញ្ញារំភើបដោយបានដឹងដំណឹងថា​ខាងសហជីបមកពីវិស័យផ្សេង​នឹងចូលរួម​គាំទ្រ​​ចំពោះកូដកម្មនេះ។ កញ្ញាបន្តថា ការតវ៉ានេះមិនមែនដើម្បីតែសិទ្ធិការងារនៅក្រុមហ៊ុនទេ តែវាជាការសបញ្ជាក់ពីការទាមទារសិទ្ធិការងារចំពោះបុគ្គលិកកម្មករផ្សេងទៀត។

កញ្ញាប្រាប់ថា៖ «វាជារឿងត្រឹមត្រូវ ហើយក៏អរគុណដែលមើលឃើញប្រយោជន៍រួម ព្រោះ​ពួក​ខ្ញុំ​រាល់ថ្ងៃនេះ ធ្វើដើម្បីលក្ខខណ្ឌការងារចំពោះប្រជាពលរដ្ឋទូទាំងប្រទេស​និងក្មេងជំនាន់​ក្រោយ»។

កញ្ញា រដ្ឋា នៅតែមិនពេញចិត្តចំពោះដំណោះស្រាយដែលក្រសួងការងារ​បានផ្សះផ្សាអស់​១២ដង​មកនេះ​ ព្រោះក្រសួងនៅតែគាំទ្រក្រុមហ៊ុនឱ្យមានការបញ្ឈប់បុគ្គលិក​ដោយស្រេច​ចិត្ត។

កញ្ញាបញ្ជាក់ថា៖ «ពួកខ្ញុំទទួលយកអត់បានទេក្នុងនាមជាកូដករ តែខ្ញុំសង្ឃឹមថា​នឹងមាន​ដំណោះស្រាយឆាប់ៗ ហើយកងកម្លាំងអជ្ញាធរ និងភាគីពាក់ព័ន្ធផ្សេងៗសូមកុំយកខ្លួន​ទៅកាងក្រុមហ៊ុនបរទេស»។

អ្នកនាំពាក្យក្រសួងការងារ លោកហេង សួរ មានប្រសាសន៍ថា ក្រសួងបានអនុវត្តត្រឹមត្រូវទៅ​តាម​តួនាទី ហើយក្នុងករណីដោះស្រាយវិវាទមិនអស់ចិត្ត គឺត្រូវផ្សះផ្សាទៅកម្រិតមួយទៀត ឬ​ក្នុង​ករណីក្រសួងដោះស្រាយមិនបានត្រឹមត្រូវ អាចប្ដឹងទៅនីតិវិធីបន្ទាប់ គឺតុលាការ។ លោក​បន្ថែមថា គ្មានវិវាទណាមួយ ដែលអាចដោះស្រាយចប់បានទេ ប្រសិនបើភាគីវិវាទ​មិន​អនុវត្ត​ច្បាប់ និងគោរពនីតិវិធី។

លោកថ្លែងថា៖ «គ្រប់ច្បាប់ទាំងអស់ គឺគេប្រគល់សិទ្ធិឱ្យស្ថាប័នជំនាញជាអ្នកបកស្រាយ និងកំណត់នូវរូបមន្តផ្សេងៗ។ ការបកស្រាយ និងការកំណត់រូបមន្តគណនានានា​ គឺគេប្រើ​ជាទូទៅ គេមិនអាចតម្រូវលើភាគីវិវាទណាមួយទេ។ ក្រសួងបានបកស្រាយ និងអនុវត្ត​គោលការណ៍ស្មើៗគ្នាចំពោះគ្រប់ភាគីវិវាទទាំងអស់»។

លោក ហេង សួរ បញ្ជាក់ទៀតថា កម្មករមិនគួរបកស្រាយតាមការយល់ឃើញរបស់ខ្លួន ដោយ​មិនប្រើយន្តការដែលមានក្នុងច្បាប់ទេ។ តាមច្បាប់កំណត់ក្រោយពេលផ្សះផ្សាវិវាទ បើមិនសះ​ជា ឬមិនឯកភាពគឺត្រូវប្តឹងទៅតុលាការ មិនមែនធ្វើសកម្មភាពខុសច្បាប់នោះទេ។

កូដករណាហ្គាវើលដ៍ប្រមាណជាង១០០នាក់បានតវ៉ា ដោយចងក្រណាត់ខៀវ​លើក្បាលសរសេរថា«កុំយកលុយ ទិញសិទ្ធិ» រួមទាំងលើកបដាទាមទារ ក្បែរស្ថានទូតរុស្សី ផ្លូវសុធារស រាជធានីភ្នំពេញ។ រូបថតនៅថ្ងៃទី២៨ ខែមិថុនា ឆ្នាំ២០២២។ ខេមបូចា/ សុវណ្ណ ស្រីពេជ្រ

ចំណែកអភិបាលរងរាជធានីភ្នំពេញ អះអាងថា ចំពោះការប្រកាសរបស់សហជីព​មកពី​វិស័យ​ផ្សេងថានឹងចូលរួមធ្វើកូដកម្មជាមួយបុគ្គលិកណាហ្គាទ្រង់ទ្រាយធំ អាជ្ញាធរនឹងរង់ចាំមើលសិន ហើយនឹងចាត់វិធានការទៅតាមស្ថានភាពជាក់ស្ដែង ព្រោះសកម្មភាពគ្រប់យ៉ាងស្ថិតនៅ​ក្រោម​ច្បាប់​ក្នុងនាមកម្ពុជាជាប្រទេសកាន់លទ្ធិប្រជាធិបតេយ្យ។

 លោកបញ្ជាក់ថា ពលរដ្ឋមានសិទ្ធិធ្វើគ្រប់យ៉ាង តែស្ថិតនៅក្រោមដំបូលច្បាប់។ ហើយចំពោះ​កងកម្លាំង​សមត្ថកិច្ចដែលមាននៅទីតាំងធ្វើកូដកម្ម គឺដើម្បីបង្ការខ្លាចមានហេតុការ​ណាមួយ​កើតឡើងប៉ុណ្ណោះ។

លោកថ្លែងថា៖ «ចាំគាត់មានសកម្មភាពបានអាជ្ញាធរពិចារណាថាត្រូវធ្វើយ៉ាងម៉េច ព្រោះគ្រាន់​តែគាត់ប្រកាសហ្នឹងយើងម៉េចដឹងថាគាត់ធ្វើមិនធ្វើ។ អាជ្ញាធរតែងតែ​ធ្វើកិច្ចការបង្ការ​ទប់ស្កាត់​ជារឿងរាល់ថ្ងៃ នេះជារបៀបដឹងនាំរបស់រដ្ឋ»។

យោងតាមខ្លឹមសារក្នុងលិខិតចំហរបស់អង្គការសង្គមស៊ីវិល និងសហជីព ចាត់ទុកថា ​ការ​ពន្យា​​ពេលមិនព្រមដោះស្រាយវិវាទការងារនេះទៅតាមច្បាប់ការងារ គឺជាចេតនាធ្វើបាប​កូដករ​ផ្នែកសេដ្ឋកិច្ច និងផ្លូវចិត្តកាន់តែខ្លាំងរហូតកូដករទ្រាំទ្រលែងបាន រួចបិទបញ្ចប់​វិវាទ​នេះ។ ទន្ទឹមនឹងនេះ ក៏មានការធ្វើទុក្ខបុកម្នេញ ការប្រើប្រាស់ទម្រង់​ហិង្សាលើកូដករស្រ្តី ដែលជាការរំលោភបំពានយ៉ាងធ្ងន់ធ្ងរ ដល់ការតវ៉ានេះផងដែរ។

ក្រុមសង្គមស៊ីវិលថ្លែងថា៖ «ការពន្យាពេលមិនព្រមដោះស្រាយ វិវាទការងាររបស់កម្មករ​និយោជិតនៅក្រុមហ៊ុនណាហ្គាវើលដ៍ គឺជាចេតនាបំបាក់ស្មារតីចលនាសហជីពឯករាជ្យ ប្រកបដោយវិជ្ជាជីវៈដែលធានាដោយអនុសញ្ញាស្នូលផ្នែកការងារ រដ្ឋធម្មនុញ​នៃ​ព្រះរាជាណាចក្រ​កម្ពុជា ច្បាប់ស្តីពីការងារ និងច្បាប់ស្តីពីសហជីព»។

យ៉ាងណាមិញ សហភាពសហជីព សហព័ន្ធសហជីព សមាគម អង្គការសង្គមស៊ីវិល នៅទទូច​ស្នើសុំទៅអាជ្ញាធររដ្ឋ ជាពិសេសលោកនាយករដ្ឋមន្រ្តី​ ហ៊ុន សែន មេត្តាចាត់​វិធានការ​ដោះ​ស្រាយ​វិវាទការងារនេះ ដោយតម្កល់ប្រយោជន៍របស់ភាគីទាំងសងខាងដើម្បី​បិទបញ្ចប់វិវាទ​ការងារនេះដោយសន្តិវិធី តាមគោលនយោបាយឈ្នះៗដែលបានអនុវត្តននាពេលកន្លងមក​ដើម្បីទទួលបានការគាំទ្រពីកម្មករនិយោជិត ស្ថាប័នជាតិ និង អន្តរជាតិដែលកំពុងតាមដាន​យក​ចិត្តទុកដាក់លើវិវាទការងារដែលមានការអូសបន្លាយរហូតមកដល់ពេលនេះ។

គួរកត់សម្គាល់ថា នាពេលកន្លងមកក្រុមកូដករ ធ្លាប់បានដាក់ញត្តិស្នើសុំការអន្តរាគមន៍ពី​លោកនាយករដ្ឋមន្រ្តី រដ្ឋសភា ក្រសួងមហាផ្ទៃ ក្រសួងយុត្តិធម៌ និងក្រសួងកិច្ចការនារីក្ដី តែមកទល់ពេលនេះហាក់មិនទាន់ទទួលបានពន្លឺសម្រាប់ដំណោះស្រាយឡើយ។

បើតាមសេចក្ដីប្រកាសរបស់ក្រសួងការងារ គិតត្រឹមថ្ងៃទី២ ខែកក្កដា ឆ្នាំ២០១២ មាន​អតីត​បុគ្គលិកចំនួន៤រូបបន្ថែមទៀត បានមកទទួលយកដំណោះស្រាយតាម រយៈការធ្វើលិខិត​ព្រមព្រៀងទទួលយកប្រាក់បំណាច់បញ្ចប់កិច្ចសន្យាការងារពីក្រុមហ៊ុនរួចហើយ។ គិតមកដល់ថ្ងៃនេះ មានអតីតបុគ្គលិកសរុបចំនួន ២០៥រូបក្នុងចំណោម ៣៧៣រូប បានយល់​ព្រម​ទទួលយកការទូទាត់នូវប្រាក់បំណាច់បញ្ចប់កិច្ចសន្យាការងារជាមួយក្រុមហ៊ុន។ ដោយ​ឡែក អតីតបុគ្គលិកដែលមិនព្រមទទួលយកសំណងនៅសល់ត្រឹម១៦៨រូបតែប៉ុណ្ណោះ៕

202 views

ព័ត៌មានទាក់ទង

ព័ត៌មានថ្មីៗ

អត្ថបទពេញនិយម