សមាគមសម្ព័ន្ធអ្នកសារព័ត៌មានកម្ពុជា

ក្រុមប្រឹក្សា និងពលរដ្ឋមួយចំនួននៅឃុំមួយក្នុងខេត្តកំពង់ធំលើកឡើងថា មេឃុំ​ចាត់ចែងថវិកាគម្រោងស្ថាបនាផ្លូវមិនសមស្រប

ក្រុមប្រឹក្សាឃុំ ក្នុងឃុំសាគា្រម ស្រុកប្រាសាទបល្ល័ង្ក ខេត្តកំពង់ធំ បើកកិច្ចប្រជុំសាមញ្ញ នៅថ្ងៃទី២២ ខែសីហា ឆ្នាំ២០២៣ នៅទីតាំងសាលាឃុំ។ (រូបភាពផ្តល់ឱ្យ)
ក្រុមប្រឹក្សាឃុំ ក្នុងឃុំសាគា្រម ស្រុកប្រាសាទបល្ល័ង្ក ខេត្តកំពង់ធំ បើកកិច្ចប្រជុំសាមញ្ញ នៅថ្ងៃទី២២ ខែសីហា ឆ្នាំ២០២៣ នៅទីតាំងសាលាឃុំ។ (រូបភាពផ្តល់ឱ្យ)

ក្រុមប្រឹក្សាឃុំ និងពលរដ្ឋ​មួយចំនួន​នៅឃុំសាគ្រាម ស្រុកប្រាសាទបល្ល័ង្ក ខេត្តកំពង់ធំ បានលើកឡើងថា មេឃុំមក​ពីគណ​បក្ស​ប្រជាជនកម្ពុជា បានចាត់ចែងថវិកា​គម្រោងមូលនិធិឃុំសម្រាប់ធ្វើផ្លូវចំនួន៤រយ​លាន​រៀលមិនសមស្រប។

កិច្ចប្រជុំដេញថ្លៃលើកញ្ចប់ថវិកាមូលនិធិឃុំសាគ្រាម នៅថ្ងៃទី៨ ខែមិថុនា ឆ្នាំ២០២៣ ដែលមានការ ចូលរួមពីតំណាងថ្នាក់ខេត្ត ថ្នាក់ស្រុក ភាគីក្រុមហ៊ុន និងអាជ្ញាធរបានសម្រេចសាងសង់ផ្លូវលំ​ក្រាល​ក្រួស​​ក្រហម១ខ្សែប្រវែងជាង៤ពាន់ម៉ែត្រ នៅក្នុងភូមិកន្ទាក ដោយចំណាយថវិកា ប្រមាណ៤​រយ​លាន​រៀល។ ប៉ុន្តែនៅថ្ងៃទី២១ ខែសីហា មេឃុំបានបញ្ជាឱ្យគ្រឿងចក្រចាប់ផ្តើមឈូសឆាយ​ធ្វើផ្លូវ​ប្រវែង​១រយម៉ែត្រនៅក្នុងភូមិសាគ្រាមត្បូងទៅវិញ។

ក្រុមប្រឹក្សាឃុំម្នាក់ លោក ជឿន ណាស៊ី ថ្លែងថា លោក និង តំណាងបក្សភ្លើងទៀនគ្រោងស្នើកោះប្រជុំបន្ទាន់មួយនៅដើមសប្តាហ៍ក្រោយដើម្បីជជែកលើបញ្ហានេះ។ លោកបន្តថា បើមេឃុំនៅតែបន្តចាត់ចែងលុយគម្រោងតាមចិត្តឯងខុសគោលដៅទៀត លោក​នឹងដាក់លិខិតទៅថ្នាក់ខេត្តឱ្យជួយដោះស្រាយ។

លោក ជឿន ណាស៊ី៖ «យើងនឹងធ្វើលិខិតសូមអន្តរាគមន៍ពីឯកឧត្តមអភិបាលខេត្ត ពីមន្ត្រីជំនាញ មន្ត្រី​បច្ចេកទេស ដែលបានមកដេញថ្លៃហ្នឹងថាត្រូវតែអនុវត្តនៅភូមិកន្ទាក ដល់ទៅអនុវត្ត តើមន្ត្រី​បច្ចេកទេសយល់យ៉ាងណា? នាយកទីចាត់ការសាលាខេត្តផែនការហ្នឹង​យល់ឃើញយ៉ាងណា? ដាក់ទៅដើម្បីឱ្យអស់លោកជាគណៈអធិបតីទាំងអស់នោះបានជ្រាបថា មេឃុំពុំបាន​អនុវត្តនូវ​ស្មារតី​វិមជ្ឈការអំណាចពីថ្នាក់ជាតិមកថ្នាក់ក្រោមជាតិទេ។ ដូច្នេះការប្រើប្រាស់ថវិកាហ្នឹងគ្មានតម្លាភាព»

ប្រតិកម្មដូចគ្នាដែរក្រុមប្រឹក្សាឃុំម្នាក់ទៀត លោក ឌូ ឌា ហៅការសម្រេចចិត្ត របស់​មេឃុំ​នេះថា ជាការបំពានដល់សេចក្តីសម្រេចរបស់អង្គប្រជុំហើយ​ប៉ះពាល់ដល់ផល​ប្រយោជន៍​ប្រជាពលរដ្ឋ​នៅក្នុងឃុំដែលលោកមិនអាចទទួលយកបាន។

លោក ឌូ ឌា លើកឡើងថា៖ «ជំហរបស់ខ្ញុំគឺខ្ញុំដោយថាដោយសារលោកមេឃុំលោកអត់អនុវត្ត​តាម​គម្រោង​ដែល​យើង​អនុម័តរួចហើយជាមួយក្រុមប្រឹក្សាឃុំ។ ជំហររបស់ខ្ញុំគឺខ្ញុំមិនព្រម ព្រោះធ្វើខុស​នឹង​គោលការណ៍របស់យើងក្នុងនាមជាក្រុមប្រឹក្សាឃុំដែលបានសម្រេច​រួចហើយថា​យើងនឹង​ដាក់​មូលនិធិ​ហ្នឹងមកភូមិកន្ទាក»

ពលរដ្ឋម្នាក់នៅភូមិកន្ទាកលោក គីម កិប ឱ្យដឹងថា លោក និងអ្នកភូមិរង់ចាំអាជ្ញាធរធ្វើផ្លូវបន្ទាប់ពី​មាន​ការវាស់វែងកាលពីដើមខែមិថុនា ឆ្នាំ២០២៣។ លោកបន្តថា ស្ថានភាពនៅក្នុងភូមិរបស់លោក រួមទាំងអ្នកដឹកទំនិញ និងសិស្សទៅសាលារៀនជួបការលំបាកខ្លាំង។

លោក គីម កិប អំពាវនាវឱ្យអាជ្ញាធរឃុំផ្សព្វផ្សាយព័ត៌មានឱ្យបានទូលាយឱ្យពលរដ្ឋបានដឹង បើ​សិន​ជាមានការផ្លាស់ប្តូរគម្រោងកុំឱ្យពលរដ្ឋទន្ទឹងរង់ចាំ។

លោក គីម កិប បន្តថា៖ «ខ្ញុំផ្ទាល់ចង់ឱ្យឃុំប្រាប់ពលរដ្ឋនៅក្នុងភូមិតាមមូលដ្ឋានឱ្យបានច្បាស់ថា​ឥឡូវខែ​នេះ ថ្ងៃប៉ុណ្ណេះហ្នឹង ខាងគ្រឿងចក្រគេនឹងចុះចូលធ្វើហើយកុំបារម្ភអី»

ជុំវិញបញ្ហានេះមេឃុំសាគ្រាម លោក ចាន់ សុផល បកស្រាយថា ការផ្លាស់ប្តូរគម្រោងនេះ ដោយ​សារ​តែបញ្ហាទឹកជន់លិចមិនអាចបញ្ជូនគ្រឿងចក្រទៅធ្វើផ្លូវនៅភូមិកន្ទាកបាន ទើបលោក​សម្រេច​ឱ្យធ្វើផ្លូវប្រវែង១រយម៉ែត្រនៅភូមិសាគ្រាមត្បូងសិន។ លោកថា ផ្លូវសាគ្រាមត្បូង ក៏ខូចខាតខ្លាំង​ពលរដ្ឋ និងសិស្សសាលាពិបាកធ្វើដំណើរ។

ចំពោះបញ្ហាចោទថា មិនបានកោះប្រជុំ ឬជូនដំណឹងដល់ក្រុមប្រឹក្សាមកពីគណបក្សភ្លើងទៀន និង គណបក្សមូលដ្ឋាននោះ លោក ចាន់ សុផល អះអាងថា លោកបានជូនដំណឹង នេះដល់មន្ត្រីឃុំ​គ្រប់​គ្នាបានដឹងហើយ ប៉ុន្តែក្រុមប្រឹក្សាឃុំមកពីគណបក្សភ្លើងទៀន និងគណបក្សមូលដ្ឋាន មិនដែល​ទៅ​សាលាឃុំទេតាំងពីបោះឆ្នោតថ្ងៃទី២៣ ខែកក្កដា មក។

លោក ចាន់ សុផល ឱ្យដឹងថា៖ «ព្រមព្រៀងព្រោះដីសល់យើងព្រមព្រៀងថាសល់​ពីភូមិកន្ទាកយើង​ដាក់​​មក​អូរខ្សង់ និងសាគ្រាមត្បូង មានកំណត់ហេតុ មានការចូលរួមទាំងអស់​ប៉ុន្តែជំទប់២គាត់​ជំទាស់។ ជំទប់២នេះគណបក្សមូលដ្ឋានគាត់អត់បានចូលរួមប្រជុំទេ»

លោក ជឿន ណាស៊ី  បញ្ជាក់ថា ក្រុមប្រឹក្សាឃុំបក្សភ្លើងទៀន និងបក្សមូលដ្ឋាន នៅឃុំជា​ប្រចាំ​ពិសេសពេលប្រជុំមិនដែលអវត្តមានទេ។ ចំពោះការលើកឡើងថា ទឹកលិចផ្លូវនោះ​លោកហៅ​ថាជាលេសតែប៉ុណ្ណោះ ព្រោះមានផ្លូវបើកគ្រឿងចក្រចូលភូមិកន្ទាកបានតាមច្រកក្រុមហ៊ុនមេគង្គ និងភូមិស្វាយស។

ងៗសិស្សសាលាតូចៗនៅក្នុងភូមិកន្ទាក ឃុំសាគ្រាម ស្រុកប្រាសាទបល្ល័ង្ក កំពុងធ្វើដំណើរទៅសាលា។ រូបថតនៅថ្ងៃទី២៤ ខែសីហា ឆ្នាំ២០២៣។ (រូបភាពផ្តល់ឱ្យ)

មាត្រា៦០នៃច្បាប់ស្តីពីការគ្រប់គ្រងរដ្ឋបាលឃុំសង្កាត់ ចែងថា ក្នុងការរៀបចំផែនការអភិវឌ្ឍន៍ឃុំ សង្កាត់ ក្រុមប្រឹក្សាឃុំសង្កាត់ ត្រូវចាត់វិធានការ វាយតំលៃអំពីកម្រិតអាទិភាពនៃការអភិវឌ្ឍ និង​សកម្មភាព​អភិវឌ្ឍន៍នៅក្នុងឃុំសង្កាត់ របស់ខ្លួន។ ប្រមូលផ្តុំសេចក្តីត្រូវការក្នុងឃុំសង្កាត់ និង​កំណត់​​អាទិភាពចំពោះសេចក្តីត្រូវការទាំងនោះដោយផ្អែកទៅលើធនធានទាំងឡាយដែលឃុំសង្កាត់ មាន  និង​ធនធាន​ដែល​បាន​ទទួល។ ធ្វើសេចក្តីរាយការណ៍អំពីលទ្ធផលនៃការអនុវត្ត​ផែនការ​​អភិវឌ្ឍន៍ឃុំ សង្កាត់ជូនប្រជាពលរដ្ឋរបស់ខ្លួន។ ក្រុមប្រឹក្សាឃុំសង្កាត់ ​ត្រូវ​ដឹក​នាំ​ការងារឱ្យ​ស្រប​ទៅ​នឹង​ផែន​ការ​​ការអភិវឌ្ឍឃុំសង្កាត់ របស់ខ្លួន។

​ប្រធាន​អង្គការ​តម្លាភាព​កម្ពុជា​ លោក ប៉ិច ពិសី ចាត់ទុកក្រុមប្រឹក្សា គឺជាក្រុមដែលមាន​អំណាចធំ​នៅឃុំក្នុងការសម្រេចចិត្តនានា។ លោក ប៉ិច ពិសី ថ្លែងថា បើមេឃុំពិតជាមិន​អនុវត្តតាមស្មារតី​នៃ​កិច្ចប្រជុំមែន ក្រុមប្រឹក្សាផ្សេងទៀតគួរស្នើទៅអាជ្ញាធរថ្នាក់លើ អន្តរាគមន៍ ដើម្បីបង្ហាញ​ពី​តម្លាភាព​លើបញ្ហានេះ។

លោក ប៉ិច ពិសី បន្តថា៖ «ហើយក្រុមប្រឹក្សាទៀតសោតបើសិនជាមេឃុំមិនស្តាប់ទេគាត់គួរតែរៀបចំ​របាយការណ៍បញ្ជូនមកក្រសួងមហាផ្ទៃ ដើម្បីធ្វើនីតិវិធីបន្តក្នុងការត្រួតពិនិត្យតាមដាន​រាល់ការ​អនុវត្ត​ការងារហ្នឹងបាទ ពីព្រោះនៅក្នុងក្របខណ្ឌនៃការគ្រប់គ្រងរដ្ឋបាលថ្នាក់ក្រោមជាតិ​គឺ​ក្រុម​ប្រឹក្សា​មានអំណាចធំជាងគេ ហើយតួអង្គ ជាតួអង្គដែលត្រួតពិនិត្យតាមដានការងារ​របស់​អង្គប្រតិបតិ្ត​ហ្នឹងគឺមេឃុំ ហើយនឹងមន្ត្រីដដៃទៀតក្រោមឱវាទហ្នឹងគឺត្រូវស្តាប់ក្រុមប្រឹក្សានេះបាទ»

បើទោះជាមានការខ្វែងគំនិតគ្នាក៏ដោយ លោក ប៉ិច ពិសី យល់ឃើញថា នេះជាដំណើរការល្អ​ដែល​ក្នុងឃុំសង្កាត់មានក្រុមប្រឹក្សាជាប់ឆ្នោតមកពីបក្សផ្សេងៗគ្នាដើម្បីជជែកដេញដោលជួយដល់ការ​អភិវឌ្ឍឱ្យមានតម្លាភាព។

អភិបាលរងស្រុកប្រាសាទបល្ល័ង្ក លោក សេង សារ៉ាត់ ជាអ្នកចូលរួមធ្វើជាអធិបតីក្នុងពេលដេញថ្លៃ ធ្វើផ្លូវនៅក្នុងឃុំសាគ្រាមកាលពីថ្ងៃទី៨ ខែមិថុនា កន្លងទៅនេះថ្លែងថា តាមលោកចាំការសម្រេច ពេល​នោះ គឺធ្វើផ្លូវក្នុងភូមិកន្ទាក។ ចំពោះការផ្លាស់ប្តូរ​ហើយមានការខ្វែងគំនិតគ្នារវាង​ក្រុមប្រឹក្សាឃុំ​នេះ លោកនឹងទាក់ទងទៅឃុំដើម្បីសម្របសម្រួល។

លោក សេង សារ៉ាត់ បញ្ជាក់ថា៖ «អ! ហ្នឹងហើយចឹង! ខ្ញុំនឹងទាក់ទងទៅខាងក្រុមប្រឹក្សាឃុំដើម្បី​សួរនាំឱ្យជាក់​ដើម្បីឱ្យគាត់ធ្វើកិច្ចការជូនដំណឹងណាមួយដើម្បីឱ្យគាត់បានដឹងទាំងអស់គ្នាវិញ»

អភិបាលខេត្តកំពង់ធំ លោក ងួន រតនៈ បានប្រាប់ខេមបូចាថា លោកមិនទាន់ទទួលដំណឹងពីការ​ខ្វែង​គំនិតគ្នា​រវាង​ក្រុមប្រឹក្សានៅក្នុងឃុំសាគ្រាមនេះទេ។ លោកថា លោកនឹងឱ្យមន្ត្រីនៅថ្នាក់ឃុំ​រាយការណ៍​អំពីបញ្ហានេះដើម្បីលោកមានមូលដ្ឋានក្នុងការដោះស្រាយ។

លោក ងួន រតនៈ ថ្លែងថា៖ «នៅឡើយៗបង។ ចាំមើលចាំឱ្យរាយការណ៍បងបាទ»

ឃុំ​សាគ្រាម​​មាន​ភូមិចំនួន១១ មានប្រជា​ពលរដ្ឋ​ជាង​១ម៉ឺននាក់​ (១០ ១២៨នាក់) ស្មើ​នឹង​ជាង​២ពាន់​គ្រួសារ ​(២ ១៤៣គ្រួសារ)​។ នៅ​ឃុំ​សាគ្រាម​មាន​អាសនៈ​ក្រុមប្រឹក្សា​ឃុំ​ចំនួន​៧​ ក្នុង​នោះ​ គណបក្ស​ប្រជា​ជន​កម្ពុជា​មាន​៣អាសនៈ​ បក្ស​ភ្លើងទៀន​មាន​២អាសនៈ​ និង​បក្ស​ប្រជា​ធិបតេយ្យមូលដ្ឋាន​មាន​២អាសនៈ​។

របាយការណ៍របស់ក្រសួងមហាផ្ទៃបង្ហាញថា កញ្ចប់ថវិកាមូលនិធិឃុំ-សង្កាត់ មានចន្លោះ ពី៧ម៉ឺន ទៅជាង២០ម៉ឺនដុល្លារ អាស្រ័យលើឃុំ-សង្កាត់តូច ឬធំ។ ចំណែកឃុំសាគ្រាមក្នុងឆ្នាំ២០២៣ គ្រោង ចំណាយជាង១ពាន់លានរៀល ដែលស្មើនឹងប្រមាណ២៥ម៉ឺនដុល្លារ។

អតីតរដ្ឋមន្ត្រីក្រសួងមហាផ្ទៃលោក ស ខេង ធ្លាប់ជំរុញឱ្យក្រុមប្រឹក្សាឃុំ-សង្កាត់​ចាត់ចែង​ថវិកា​ទាំង​នេះ​ឱ្យមានតម្លាភាព ឱ្យកើតជាផលប្រយោជន៍ នៅក្នុងមូលដ្ឋាន៕

626 views

ព័ត៌មានទាក់ទង

ព័ត៌មានថ្មីៗ

អត្ថបទពេញនិយម