សមាគមសម្ព័ន្ធអ្នកសារព័ត៌មានកម្ពុជា

តុលាការបញ្ចប់ការសាកសួរពលរដ្ឋបឹងតាមោក ដែលប៉ះទង្គិចជាមួយមន្ត្រីខណ្ឌព្រែកព្នៅ

ប្រជាពលរដ្ឋសហគមន៍បឹងតាមោក ដើរចេញពីសាលាដំបូងរាជធានីភ្នំពេញ បន្ទាប់ពីការសាកសួរកាលពីថ្ងៃទី១៥ ខែកុម្ភៈ ឆ្នាំ២០២៤។ (រូបភាពផ្ដល់ឲ្យ)
ប្រជាពលរដ្ឋសហគមន៍បឹងតាមោក ដើរចេញពីសាលាដំបូងរាជធានីភ្នំពេញ បន្ទាប់ពីការសាកសួរកាលពីថ្ងៃទី១៥ ខែកុម្ភៈ ឆ្នាំ២០២៤។ (រូបភាពផ្ដល់ឲ្យ)

កាល​ពី​ថ្ងៃ​ព្រហស្បតិ៍ សាលា​ដំបូង​រាជធានី​ភ្នំពេញ​បាន​បញ្ចប់​ការ​សាកសួរ​អ្នក​ភូមិ​​បឹងតាមោក​ចំនួន៦នាក់ ដែល​បាន​ប៉ះ​ទង្គិច​ជាមួយ​អាជ្ញាធរ​ខណ្ឌ​កាល​ពី​ខែ​ធ្នូ​។ ការសាកសួរនេះ​បានបញ្ចប់មួយថ្ងៃ​មុន​ការរំពឹងទុក ដោយជន​ត្រូវ​ចោទ​បានបដិ​សេធការចោទប្រកាន់ និងទាមទារឱ្យតុលាការទម្លាក់ការចោទប្រកាន់។

លោក សុខ បាន​ មន្ត្រី​សាលា​ខណ្ឌ​ព្រែកព្នៅបាន​ប្ដឹង​ពលរដ្ឋ​ទាំងនេះ​ពី​បទ​ហិង្សា​ដោយ​ចេតនា ធ្វើ​ឲ្យ​ខូច​ខាតដោយ​ចេតនា​ និង​បទ​ប្រឆាំង​នឹង​អ្នក​រាជការ​​សាធារណៈ អំឡុង​ពេល​មាន​ជម្លោះ​កាល​ពី​ថ្ងៃ​ទី​១៨ ខែ​ធ្នូ។ សមាជិក​សហគមន៍សំរោងត្បូង​បាន​ប៉ះទង្គិចជាមួយអាជ្ញាធរខណ្ឌព្រែកព្នៅ ពេលក្រុម​មន្ត្រីព្យាយាមរុះរើតូបលក់បន្លែដែលពលរដ្ឋ​កំពុងសាងសង់។

អ្នកស្រី អំ ភឿន ជា​អ្នកជិតខាងរបស់​អ្នក​ស្រី គង់ តឿ ម្ចាស់តូបលក់បន្លែ​ត្រូវបានសាកសួរអស់​រយៈពេល២០នាទីកាលពីរសៀលថ្ងៃព្រហស្បតិ៍ ដោយប្រាប់ខេមបូចា​ តុលាការបានសួរថា តើគាត់បាន​ជាប់ពាក់ព័ន្ធក្នុងហេតុការណ៍នេះឬយ៉ាងណា ហើយថា តើ​អ្នក​ស្រីបាន​​ប្រើហិង្សាមក​លើអាជ្ញាធរឬទេ។ អ្នក​ស្រី​បាន​បដិសេធ​ការ​​ចោទ​ប្រកាន់​នេះ។

អ្នក​ស្រី អំ ភឿន ​បាន​និយាយ​ថា៖​ «គាត់​បាន​សួរ​ខ្ញុំ​ថា ​តើ​ខ្ញុំបាន​ទៅ​វាយ​អាជ្ញាធរ​ឬ​អត់​? ខ្ញុំប្រាប់គាត់ថា ប្រជាពលរដ្ឋយើងមិនដែលឈ្លោះជាមួយអាជ្ញាធរទេ ប៉ុន្តែអាជ្ញាធរមករកពួកយើង​ បំផ្លាញតូបរបស់ គង់ តឿ ដែលកំពុងសាងសង់នៅលើដីរបស់គាត់ មិនមែននៅលើដីអាជ្ញាធរ ឬក្រុមហ៊ុនទេ»។

អ្នកស្រី​និយាយថា ប្រជាពលរដ្ឋ​ក្នុង​សហគមន៍​របស់​អ្នកស្រី​ គឺជា​ជនរងគ្រោះ​ពិតប្រាកដ​ក្នុង​ជម្លោះ​នេះ ហើយ​ទាមទារ​ឲ្យ​តុលាការ​រក​ដំណោះស្រាយ​ចំពោះ​វិវាទ​ដីធ្លី​​ដ៏​រ៉ាំរ៉ៃ​នេះ និង​ដាក់​ឲ្យ​ក្រុម​មន្ត្រី​ទាំង​នោះ​ទទួលខុសត្រូវ​​។

កញ្ញា យ៉ន សម្បត្តិ អាយុ១៩ឆ្នាំ ជា​កូនស្រី​របស់​អ្នកស្រី គង់ តឿ ត្រូវ​បាន​សាកសួរ​អស់​រយៈពេល១ម៉ោង​កាលពី​​ព្រឹក​ថ្ងៃ​ព្រហស្បតិ៍ ហើយ​នាង​បាន​បដិសេធ​ថា ​​មិន​បាន​ប្រើ​​ហិង្សា​លើ​អាជ្ញាធរទេ​។

អ្នកស្រី គឹម យឿន អាយុ ៣០ឆ្នាំ ជា​កូនស្រីម្នាក់ទៀតរបស់អ្នក​ស្រី គង់ តឿ ក៏ត្រូវបានសាក​សួរផងដែរ​ និងបាន​បដិសេធថា មិនបានប្រើហិង្សាលើ​មន្ត្រីទេ​ ដោយនិយា​យថា អំឡុងពេលមាន​ការ​ប៉ះទង្គិច​គ្នា​កាលពី​ខែធ្នូ នាងបានត្រឹម​តែ​ជួយទប់​ម្តាយរបស់នាងឲ្យ​ឈរ និងដើរប៉ុណ្ណោះ ដោយសារម្តាយរបស់នាងមានសុខភាពមិនល្អ​។

លោក សួស វិទ្យា​រ៉ា​​ឌី អ្នកនាំពាក្យ​ចៅក្រម​នៅ​សាលាដំបូង​រាជធានីភ្នំពេញ​​បាន​បដិសេធ​​ធ្វើ​អត្ថាធិប្បាយ​ទេ ហើយ​បានបង្វែរ​​សំណួរ​បន្ថែម​ទៅ​ព្រះរាជអាជ្ញា​រង​​ ប្លង់​ សុផល។ នៅក្នុងសារតាម​តេឡេក្រាម​កាលពីថ្ងៃសុក្រ លោក ប្លង់ សុផល បានសរសេរថា លោកមិនមានព័ត៌មានបន្ថែមអំពីករណីនេះទេ។

រដ្ឋាភិបាលបានកាត់ឆ្វៀល​ជាងពាក់កណ្តាលនៃផ្ទៃ​បឹងតាមោកក្នុងរយៈពេលប្រាំឆ្នាំចុងក្រោយនេះទៅឱ្យអ្នក​ជំនួញធំៗ និងស្ថាប័ន​រដ្ឋ ដែលកំពុងចាក់លុប​បឹងសម្រាប់ការអភិវឌ្ឍន៍អចលនទ្រព្យ។ យោងតាមអង្គការសមាគមធាងត្នោត (STT) បានឱ្យដឹងថា ប្រជាពលរដ្ឋ ឬតំបន់នៅតាមមាត់​បឹងត្រូវបានបណ្តេញចេញដោយបង្ខំ និងបន្តប្រឈមនឹងការគំរាមបណ្តេញចេញ។

កាល​ពី​ខែ​មុន អង្គការ​សង្គម​ស៊ីវិល​ចំនួន៣៨ រួម​ទាំង​​សហគមន៍​មូលដ្ឋាន​បាន​អំពាវនាវ​ឲ្យ​អាជ្ញាធរ​បញ្ឈប់​ជា​បន្ទាន់​នូវ​ការ​យាយី​សមាជិក​សហគមន៍​សំរោង​ត្បូង និង​ចេញ​ប័ណ្ណ​កម្មសិទ្ធិដី​​ជូន​ប្រជាពលរដ្ឋ។

លោក សឿង សារ៉ន​ នាយកប្រតិបត្តិនៃអង្គការសមាគម​ធាងត្នោត​ (STT) មានប្រសាសន៍ថា ជំហររបស់អង្គការ គឺសុំឱ្យតុលាការទម្លាក់ចោលការចោទប្រកាន់ទាំងអស់លើសមាជិកសហគមន៍សំរោងត្បូង។ លោក​បន្ត​ថា ឧប្បត្តិហេតុ​នេះ​កើត​ឡើង​ពី​ការ​ខ្វែង​គំនិត​គ្នា​ជុំវិញថា ​​អ្នក​ណា​មាន​សិទ្ធិ​លើ​ដីនោះ​។

លោកមាន​ប្រសាសន៍ថា៖ «តុលាការ​គួរ​ពិចារណា​អំពី​ប្រភេទ​ដី​របស់​សហគមន៍​ដែល​មាន​ជម្លោះ​ជា​មុន​សិន។ ប្រសិន​បើ​វា​ជា​ដី​ឯកជន​ [បណ្ដឹង​]នេះគួរ​តែ​ត្រូវបាន​ទម្លាក់​ចោល ហើយ​សមាជិក​សហគមន៍​គួរ​តែ​មាន​សិទ្ធិ​ជា​ម្ចាស់​​ដី​នោះ»

ប្រែសម្រួលពីអត្ថបទភាសាអង់គ្លេស៖ Court Concludes Questioning of Boeung Tamok Residents Who Clashed With District Officials

468 views

ព័ត៌មានទាក់ទង

ព័ត៌មានថ្មីៗ

អត្ថបទពេញនិយម