សមាគមសម្ព័ន្ធអ្នកសារព័ត៌មានកម្ពុជា

សាលាដំបូងខេត្តព្រះវិហារផ្តន្ទាទោសអ្នកសារព័ត៌មានប្រាំបីនាក់ជុំវិញករណីគំរាមទារប្រាក់ពីម្ចាស់ឃ្លាំងឈើ

អ្នកសារព័ត៌មានប្រាំបីនាក់ត្រូវបានតុលាការផ្តន្ទាទោសពីបទគំរាមទារប្រាក់ និងដាក់ទោសឲ្យជាប់ពន្ធនាគារ បន្ទាប់ពីពួកគេបានថតរូបក្នុងឃ្លាំងឈើឯកជនមួយនៅខេត្តព្រះវិហារ កាលពីខែមិថុនា។ រូបថតដោយសមាគមសេរីភាពអ្នកសារព័ត៌មានកម្ពុជា។
អ្នកសារព័ត៌មានប្រាំបីនាក់ត្រូវបានតុលាការផ្តន្ទាទោសពីបទគំរាមទារប្រាក់ និងដាក់ទោសឲ្យជាប់ពន្ធនាគារ បន្ទាប់ពីពួកគេបានថតរូបក្នុងឃ្លាំងឈើឯកជនមួយនៅខេត្តព្រះវិហារ កាលពីខែមិថុនា។ រូបថតដោយសមាគមសេរីភាពអ្នកសារព័ត៌មានកម្ពុជា។

សាលាដំបូង​​ខេត្ត​ព្រះវិហារ​នៅ​ថ្ងៃ​ព្រហស្បតិ៍​បាន​ផ្តន្ទាទោស​អ្នកសារព័ត៌មាន​ចំនួន​ ៨​នាក់​ ឲ្យជាប់​ពន្ធនាគារ បន្ទាប់​ពី​រក​ឃើញ​ថាមាន​ទោស​ពី​បទ​គំរាម​ទារ​ប្រាក់ពី​ម្ចាស់​ឃ្លាំង​ឈើ​មួយ កាល​ពី​ខែ​មិថុនា។

អ្នកសារព័ត៌មាន​ទាំង​នោះ​ត្រូវ​បាន​ចាប់ខ្លួន​ភ្លាមៗ​បន្ទាប់​ពី​ម្ចាស់​ឃ្លាំង​ឈើ​បាន​រាយការណ៍​ថា ក្រុម​អ្នកសារព័ត៌មាន​នេះ​បាន​ថតរូប​ដោយ​មិនមាន​ការ​អនុញ្ញាត​ក្នុង​​​ឃ្លាំងឈើឯកជន។

លោក​ គឹម សំឡេង ព្រះរាជអាជ្ញារង​ខេត្ត​ បាន​ប្រាប់​ខេមបូចា ថាអ្នក​សារព័ត៌មាន​ចំនួន​ប្រាំពីរ​រូប​ត្រូវ​បាន​ផ្តន្ទាទោស​ឲ្យ​ជាប់ពន្ធនាគារ​រយៈពេល​ពីរ​ឆ្នាំ ប៉ុន្តែ​ត្រូវ​អនុវត្ត​ទោសក្នុងពន្ធនាគារ​តែ​ ៤ខែ និង​២០​ថ្ងៃ ហើយ​ទោសដែល​នៅ​សល់​គឺ​ត្រូវ​បាន​ព្យួរ។ អ្នកសារព័ត៌មាន​ទាំង​នោះ​មាន​ឈ្មោះ គឹម ហ៊ាន អាយុ ៤២​ឆ្នាំ វង្ស និមល ៤១​ឆ្នាំ គឹម ហុង ៤០​ឆ្នាំ រឿង ឈន ៤០​ឆ្នាំ សំ សារឿន ៤៩​ឆ្នាំ សឹង សូភី ៤២​ឆ្នាំ និង​ឆាយ លីវ ៥១​ឆ្នាំ។ អ្នកសារព័ត៌មាន​ទី​ប្រាំ​បី​ឈ្មោះ ជា សាម៉ុន ៣៩ឆ្នាំ ត្រូវ​បាន​ផ្តន្ទាទោស​ចំនួន ២.៦​ឆ្នាំ ប៉ុន្តែ​អនុវត្ត​ទោស​តែចំនួន​ប្រាំបី​ថ្ងៃ ហើយគាត់​ត្រូវ​បាន​ដោះលែង​ឲ្យ​នៅ​ក្រៅ​ឃុំរួច​ហើយ និងទោសដែលនៅសល់​ត្រូវ​បាន​ព្យួរ​ដូចគ្នា។

លោក សំឡេង បាន​និយាយ​ថា លោក​សាម៉ុន​ត្រូវ​បាន​ដោះលែង​​មុន​គេ ពីព្រោះ​ភរិយា​របស់​លោក​បាន​ស្លាប់ ដោយ​ត្រូវ​បាន​រាយការណ៍​ថា បាន​កើត​ជំងឺ​គាំងបេះដូង​នៅ​ពេល​ឮ​ថា ស្វាមី​របស់​ខ្លួន​ត្រូវ​ជាប់​ពន្ធនាគារ។

​ព្រះរាជអាជ្ញារង​រូប​នេះ​បាន​មានប្រសាសន៍​ថា អ្នកសារព័ត៌មាន​ដែល​បាន​ជាប់​ទោស​ខាង​លើ បាន​ទារ​ប្រាក់​ពី​ម្ចាស់​ឃ្លាំង​ឈើ​លោក ហ៊ឹម ឆេងហ៊ាន អាយុ ៣៧​ឆ្នាំ ចំនួន​ពី១០០ទៅ១៥០​ដុល្លារ ​ក្នុង​ម្នាក់ៗ។ លោក ​ឆេងហ៊ាន ​បាន​ប្រាប់​ទៅ​វិញ​ថា លោក​អាច​ឲ្យ​ត្រឹម​តែ​២៥​ដុល្លារ​ក្នុង​ម្នាក់​តែ​ប៉ុណ្ណោះ ហើយ​អ្នកសារព័ត៌មាន​ទាំង​នោះ​មិន​យល់ព្រម។

ក្រុម​អ្នកសារព័ត៌មាន​ទាំងនេះគឺ​ រួម​មាន​អ្នកដឹកនាំ​សារព័ត៌មាន​ឌីជីថល​ខ្នាត​តូច​មួយ​ចំនួន។ លោក ឆុន គឺ​ជា​ចាងហ្វាងផ្សព្វផ្សាយ​ឲ្យ​សារព័ត៌មាន​ឥទ្ធិពល​ព្រះអាទិត្យ ហើយ​លោក​សារឿន​ជា​ចាងហ្វាង​ផ្សព្វផ្សាយ​ឲ្យ​សារព័ត៌មាន​ស្ថាបនា។ លោកស្រី ​និមល ចាងហ្វាង​ផ្សព្វផ្សាយ​ឲ្យ​សារព័ត៌មាន​ភ្នែករាស្រ្ត និង​លោក​សូភី​ជា​និពន្ធនាយក​សារព័ត៌មាន​ខ្មែរ​ជាយដែន។ ​

ក្រុម​អ្នកសារព័ត៌មាន​នេះ​ត្រូវ​បាន​ចាប់ខ្លួន​កាល​ពី​ថ្ងៃ​ទី៤ ខែ​មិថុនា ហើយ​ប្រសិន​បើ​មិនមាន​អ្វី​ប្រែប្រួល​នោះ​ទេ អ្នកសារព័ត៌មាន​ទាំង​ប្រាំពីរ​នាក់​នឹង​ត្រូវ​ដោះលែង​នៅ​ថ្ងៃ​ទី២២ ខែ​តុលា​​នេះ។ ​

លោក​ នួន​ ផានិត មេធាវី​តំណាង​ឲ្យ​អ្នកសារព័ត៌បួននាក់ក្នុងចំណោម​ទាំង​ប្រាំបី​នាក់ ​បាន​និយាយ​ថា ទោះបីជា​​តុលាការ​ផ្តន្ទាទោស​កូនក្តី​របស់​លោក​នូវ​ទោសទណ្ឌ​អប្បបរមា​ក៏​ដោយ កូនក្តី​របស់​លោក​នៅ​តែ​បាន​ប្រឈម​មុខ​នឹង​ភាព​អយុត្តិធម៌ ដោយសារ​តែ​មិនមាន​ភស្តុតាង​គ្រប់គ្រាន់​ដើម្បី​ផ្តន្ទាទោស​ពួកគេ​ពី​បទ​គំរាមទារប្រាក់​នោះ​ទេ។

លោក​ ផានិត ​ក៏​បាន​ជំរុញ​ឲ្យ​អ្នកសារព័ត៌មាន​ប្រកាន់ខ្ជាប់​នឹង​ក្រមសីលធម៌ និង​គោរព​ច្បាប់​ស្តី​ពី​សារព័ត៌មាន​ ដើម្បី​បញ្ចៀស​ពី​ការ​ប្រព្រឹត្ត​ខុសច្បាប់​ជាយថាហេតុ​ណា​មួយ។

អ្នកស្រី ហែម សុគន្ធ​ពិសី​  ប្រធាន​មន្ទីរ​ព័ត៌មាន​ខេត្ត​ព្រះវិហារ បាន​និយាយ​ថា អ្នកស្រី​សុំ​មិនបញ្ចេញ​មតិ​លើ​ករណី​នេះ។ អ្នកស្រី​ក៏​បាន​លើកឡើង​ពី​ការណ៍​ដែល​អ្នកសារព័ត៌មាន​ទាំង​នេះ​បាន​ចូល​មក​ខេត្តព្រះវិហារ​ ដោយពួកគាត់​មិន​បានផ្តល់​ដំណឹង​ដល់​អ្នកស្រី​ ដែល​ការ​ផ្តល់ដំណឹង​នេះ​គឺមិន​តម្រូវ​ឲ្យ​ធ្វើ​ជា​ចាំបាច់​នោះ​ទេ​នៅ​កម្ពុជា។

អ្នកស្រី​បាន​ថ្លែង​ថា៖ «តាម​គំនិត​ខ្ញុំ​ ខ្ញុំ​គិត​ថា អ្នកសារព័ត៌មាន​ដែល​ទៅ​យក​ព័ត៌មាន​នៅ​ខេត្ត​ណាមួយ គួរ​តែ​ផ្តល់​មន្ទីរ​ព័ត៌មាន​ខេត្ត​ដឹង ពីព្រោះ​នៅ​ពេល​ពួកគេ​មាន​បញ្ហា [យើង] មិន​​បាន​ដឹង​នោះ​ទេ»

លោក​ ណុប វី នាយក​ប្រតិបត្តិ​សមាគម​សម្ព័ន្ធ​អ្នកសារព័ត៌មាន​កម្ពុជា (ខេមបូចា) ​បាន​និយាយ​ថា ជា​ទូទៅ តុលាការ​គួរ​ស៊ើបអង្កេត​ឲ្យ​បាន​ច្បាស់លាស់​ពី​ទីតាំង​ដែល​អ្នកសារព័ត៌មាន​ចុះ​ទៅ​យក​ព័ត៌មាន មុន​ពេល​ផ្តន្ទទោស​ពី​បទ​ប្រព្រឹត្ត​អំពើ​ខុសច្បាប់​ណា​មួយ។

លោក​បាន​ថ្លែង​ថា៖ «នៅក្នុង​សកម្មភាពនិងការងារ​អ្នកសារព័ត៌មាន​ទាំងនោះ តុលាការ​នៅ​តែ​ប្រើប្រាស់​ច្បាប់​ព្រហ្មទណ្ឌ​ដើម្បី​កាត់ទោស​ពួកគេ» ដោយ​បន្ថែម​ថា ការ​អនុវត្ត​ទោសទណ្ឌ​ករណី​ព្រហ្មទណ្ឌ​អាច​ប៉ះពាល់​ដល់​អាជីព​ជា​អ្នកសារព័ត៌មាន​ទាំង​មូល។

លោក​ ណុប វី​ បាន​ថ្លែង​បន្ត​ថា«ខ្ញុំ​សោកស្តាយ​ដែល​អ្នកសារព័ត៌មាន​នៅ​តែ​ទទួល​រង​ការ​ប្តឹងផ្តល់ និង​ការ​ចោទប្រកាន់​បែប​នេះ»។​ ដោយលោក បន្ថែមទៀតថា៖ «ហើយ​ខ្ញុំក៍​សោកស្តាយ ខ្ញុំយល់ឃើញថា ​​ច្បាប់​ស្តី​ពី​របប​សារព័ត៌មាន​នៅ​តែ​អវត្តមានក្នុងការ​ប្រើប្រាស់​ ជាពិសេស ករណីប្រឆាំង​នឹង​អ្នកសារព័ត៌មាន»។ ​

​​លោក អ៊ិត សូធឿត នាយកប្រតិបត្តិ​ស្តី​ទី​នៃ​មជ្ឈមណ្ឌល​កម្ពុជា​ដើម្បី​ប្រព័ន្ធ​ផ្សព្វផ្សាយ​ឯករាជ្យ​ ក៏​បាន​មានប្រសាសន៍​​ថា ការ​កាត់ទោស​មក​លើ​អ្នកសារព័ត៌មាន​ ខណៈ​ពួកគេ​បំពេញ​កាតព្វកិច្ច​ការងារ​របស់​ខ្លួន អាច​គំរាមកំហែង​សេរីភាព​សារព័ត៌មាន។ ចំពោះ​ករណី​ថតរូប​ដោយ​មិនមាន​ការ​អនុញ្ញាត​ លោក​សូធឿត ​បាន​លើកឡើង​ថា ប្រសិន​បើ​ឃ្លាំង​ឈើ​នោះ​ត្រូវ​ធ្លាប់មាន​សកម្មភាព​ខុសច្បាប់​ណាមួយ ការ​ស្នើ​សុំ​ថត​រូប​មុន​អាច​ផ្តល់​​ឱកាស​ដល់​ជនដៃដល់​ឲ្យ​ប្រព្រឹត្ត​បទល្មើស​បន្ថែម​ទៀត។

លោក​បាន​ថ្លែង​ថា៖ «ខ្ញុំ​គិត​ថា ទំហំ​​រយៈពេល​នៃ​ការ​ឃុំខ្លួន​អ្នកសារព័ត៌មាន​ទាំង​នោះ​គឺ​មាន​គោលបំណង​គំរាម​អ្នកសារព័ត៌មាន​មិន​ឲ្យ​បំពេញ​កាតព្វកិច្ច​របស់​ពួកគេ​ [ដូចជា] ការ​តាមដាន​សកម្មភាព ឬ​បទល្មើស​ណា​មួយ»

​​លោក​ មាស សុភ័ណ្ឌ អ្នកនាំពាក្យ​ក្រសួង​ព័ត៌មាន​ បានបដិសេធ​ថា សេចក្តីសម្រេច​របស់​តុលាការ​ក្នុង​ការ​ចោទប្រកាន់​មក​លើ​អ្នកប្រព្រឹត្ត​ខុសច្បាប់​គឺ​ជាការ​រឹតត្បិត​សេរីភាព​សារព័ត៌មាន។

​លោក​បាន​ថ្លែង​ថា៖ «អ្នកដែល​បំពាន​ច្បាប់​ត្រូវ​តែ​យក​មក​ទទួល​ទោស​នៅ​មុខ​ច្បាប់» ដោយ​ច្រាន​ចោល​ថា សេរីភាព​បញ្ចេញ​មតិ​គឺ​ជាកត្តា​មួយ​ផង​ដែរ​ក្នុង​ករណី​ខាង​លើ​នេះ។

កាល​ពី​ថ្ងៃ​អង្គារ សមាគម​សម្ព័ន្ធ​អ្នកសារព័ត៌មាន​កម្ពុជា​ បាន​ចេញ​របាយការណ៍​​ប្រចាំ​ត្រីមាស​ចុងក្រោយ​រយៈពេល​ពី​ខែ​កក្កដា​ដល់​កញ្ញា​ឆ្នាំ​នេះ ដែល​សមាគមបាន​សង្កេត​ឃើញ​ថា មាន​ករណី​ផ្សេងៗ​ដែល​បាន​ប៉ះពាល់​ដល់​អ្នកសារព័ត៌មាន​សរុប​ចំនួន ២១​នាក់។

​​របាយការណ៍​ប្រចាំ​ត្រីមាស​ក៏​បាន​កត់សម្គាល់​ថា សេរីភាព​សារព័ត៌មាន​ឌីជីថល​ត្រូវ​បាន​កាត់បន្ថយ​អំឡុងពេល​វិបត្តិ​ជំងឺ​កូវីដ១៩ ស្រប​ពេល​​មាន​ការ​កើនឡើង​យ៉ាង​ច្រើន​នូវ​ការ​ចោទប្រកាន់​ពី​ «ព័ត៌មាន​ក្លែងក្លាយ» ការ​ដកហូត​អាជ្ញាបណ្ណ​សារព័ត៌មាន ការគំរាមកំហែង​និង​ការ​ចាប់ខ្លួន​នា​ឆ្នាំ​នេះ​ដែល​ជាប់ពាក់ព័ន្ធ​នឹង​វិបត្តិ​ជំងឺ​កូវីដ១៩៕ (រាយការណ៍បន្ថែមដោយ ជា សុខនី)

ប្រែសម្រួលពីអត្ថបទភាសាអង់គ្លេស៖ Court hands prison sentences to eight journalists in timber extortion case

225 views
ព័ត៌មានថ្មីៗ »
អត្ថបទពេញនិយម »