សាលាដំបូងរាជធានីភ្នំពេញ នៅថ្ងៃទី៤ ខែកក្កដា បានបដិសេធមិនឱ្យសកម្មជនចំនួនប្រាំបីនាក់ រួមទាំងលោក ស្រ៊ុន ស្រ៊ន អ្នកនិយាយបន្តពីកិច្ចព្រមព្រៀងសន្តិភាពទីក្រុងប៉ារីស នៅក្រៅឃុំ ពាក់ព័ន្ធនឹងបទញុះញង់បណ្តាលឱ្យប៉ះពាល់ដល់សណ្តាប់ធ្នាប់សន្តិសុខសង្គម។
លោកចៅក្រម ញឹម ពិសាល បានប្រកាសសាលក្រមបដិសេធសំណើសុំនៅក្រៅឃុំរបស់ចុងចោទ ប៉ុន្តែបដិសេធមិនបញ្ជាក់លម្អិតអំពីសេចក្តីសម្រេច នេះបើយោងតាមមេធាវីការពារក្តី។
លោក សឺន ជុំជួន មេធាវីការពារក្តីឱ្យជនជាប់ចោទ បានមានប្រសាសន៍ថា៖ «សាលក្រមត្រូវបានប្រកាសក្នុងលក្ខណៈប្រញាប់ប្រញាល់ ដោយមិនបញ្ជាក់ពីមូលហេតុ ហើយចៅក្រមបានច្រានចោលសំណើរបស់មេធាវី»។ លោកបន្តថា៖ «យើងសោកស្តាយចំពោះការសម្រេចនេះ»។
សកម្មជននៃកិច្ចព្រមព្រៀងសន្តិភាពទីក្រុងប៉ារីស ត្រូវបានចាប់ខ្លួនកាលពីខែកក្កដា ឆ្នាំមុន បន្ទាប់ពីបានបង្ហោះវីដេអូផ្សាយផ្ទាល់នៅលើ Facebook បញ្ចេញមតិរបស់ពួកគេលើការចោទថាបានប្រគល់ខេត្តភាគឦសានរបស់កម្ពុជាទៅឱ្យប្រទេសវៀតណាម ក្រោមគំនិតផ្តួចផ្តើមកិច្ចសហប្រតិបត្តិការតំបន់ត្រីកោណអភិវឌ្ឍន៍កម្ពុជា-ឡាវ-វៀតណាម (CLV-DTA)។
អ្នកស្រី ស្វាយ ពៅ ភរិយាជនជាប់ចោទ សាន សិទ្ធ ដែលចូលរួមក្នុងបន្ទប់សវនាការកាលពីថ្ងៃសុក្រ បានសម្ដែងការខកចិត្តចំពោះការសម្រេចនៅក្រៅឃុំ ដោយទទូចថាគាត់គ្មានកំហុស។
អ្នកស្រីបានថ្លែងថា៖ «ខ្ញុំសោកស្ដាយខ្លាំងណាស់ ព្រោះកូនខ្ញុំមកជាមួយខ្ញុំដើម្បីស្វាគមន៍ឪពុក ជំនួសឱ្យគាត់ជាប់នៅក្នុងមន្ទីរឃុំឃាំង»។ អ្នកស្រីបន្ថែមថា អ្នកស្រីនឹងពិភាក្សាជាមួយមេធាវីដើម្បីដាក់បណ្តឹងឧទ្ធរណ៍។
អ្នកស្រី ពៅ បានលើកឡើងថា៖ «គាត់ជាប្តីដ៏ល្អ។ អ្វីដែលគាត់បានធ្វើគឺជាការរួមចំណែកដល់សង្គម និងជួយសហគមន៍ ជាពិសេសលើកសិកម្មដាំបន្លែ»។
លោកស្រីបញ្ជាក់ថា រដ្ឋធម្មនុញ្ញកម្ពុជាធានាសិទ្ធិសេរីភាពក្នុងការបញ្ចេញមតិ និងការចូលរួម ដែលអនុញ្ញាតឱ្យប្រជាពលរដ្ឋខ្មែរចូលរួមក្នុងសង្គម និងសកម្មភាពនយោបាយ។
លោក យី សុខសាន្ត មន្ត្រីស៊ើបអង្កេតជាន់ខ្ពស់នៃសមាគមការពារសិទ្ធិមនុស្សអាដហុក មានប្រសាសន៍ថា ការបន្តឃុំខ្លួនពួកគេគឺ «អយុត្តិធម៌» ដោយពណ៌នាការកាត់ទោសថាជាទម្រង់នៃការដាក់ទណ្ឌកម្មប្រឆាំងនឹងអ្នកដែលហ៊ានបញ្ចេញមតិរិះគន់រដ្ឋាភិបាល។
លោកបានចង្អុលបង្ហាញថា ការផ្តន្ទាទោសអតិបរមាសម្រាប់ការចោទប្រកាន់ពីបទញុះញង់គឺពីប្រាំមួយខែទៅពីរឆ្នាំ ប៉ុន្តែជនជាប់ចោទបានជាប់ពន្ធនាគារអស់រយៈពេលជាងមួយឆ្នាំហើយ ដោយមិនបានកាត់ក្តីពេញលេញលើសំណុំរឿងរបស់ពួកគេ ដែលលោកបានពិពណ៌នាថា ការផ្តន្ទាទោសនឹងមិនមានដំណើរការត្រឹមត្រូវឡើយ៕
ប្រែសម្រួលពីអត្ថបទភាសាអង់គ្លេស៖ Court Rejects Bail Request by Paris Peace Agreement Activists
