សមាគមសម្ព័ន្ធអ្នកសារព័ត៌មានកម្ពុជា

តុលាការសម្រេចឃុំខ្លួន លោក ឌួង ងៀប បណ្ដោះអាសន្នទាក់ទងនឹងបទឆបោក បន្ទាប់ពីលោកអះអាងថាតុលាការពុករលួយ

លោក ឌួង ងៀប កាលពីថ្ងៃទី៨ ខែកុម្ភៈ បាននិយាយតាមបណ្ដាញសង្គមដោយបានស្នើដល់លោកនាយករដ្ឋមន្ត្រី ហ៊ុន សែន ឲ្យជួយ ទាក់ទងនឹងបញ្ហាផ្លូវច្បាប់។ លោក ឌួង ងៀប ត្រូវចាប់ខ្លួននៅថ្ងៃទី១៤ ខែកុម្ភៈ ឆ្នាំ២០២២។
លោក ឌួង ងៀប កាលពីថ្ងៃទី៨ ខែកុម្ភៈ បាននិយាយតាមបណ្ដាញសង្គមដោយបានស្នើដល់លោកនាយករដ្ឋមន្ត្រី ហ៊ុន សែន ឲ្យជួយ ទាក់ទងនឹងបញ្ហាផ្លូវច្បាប់។ លោក ឌួង ងៀប ត្រូវចាប់ខ្លួននៅថ្ងៃទី១៤ ខែកុម្ភៈ ឆ្នាំ២០២២។

សាលា​ដំបូង​រាជធានី​ភ្នំពេញ កាលពី​ថ្ងៃ​ចន្ទ បាន​សម្រេច​ឃុំខ្លួនជាបណ្តោះអាសន្ន​ លោក ឌួង ងៀប ដែ​ល​មាន​ងារ​ជា​ឧកញ៉ា និង​ជា​ឧត្តមសេនីយ៍​ផ្កាយ៣ នៅ​ក្រសួង​មហារផ្ទៃ​ផង ​ពាក់​ព័ន្ធ​នឹង​បទ​ឆបោក​។​

អ្នក​នាំ​ពាក្យ​សាលា​ដំបូង​រាជធានី​ភ្នំពេញ លោក​ អ៊ី រិន បាន​ប្រាប់​ខេមបូ​ចា ថា តុលាការ​បាន​សម្រេច​ឃុំ​ខ្លួន​លោក​ ឌួង ងៀប ប៉ុន្តែលោកបដិសេធ​ផ្ដល់​ព័ត៌មាន​កលម្អិត​។ ស្នងការ​នគរបាលរាជធានី​ភ្នំពេញ លោក ស ថេត បាន​ឲ្យ​ដឹង​ដែរ​ថា លោក​ ឌួង​ ងៀប ត្រូវ​បាន​ចាប់​ខ្លួន​កាលពី​ព្រឹក​ថ្ងៃ​ចន្ទ តាម​ដីកា​របស់​តុលាការ​។​

លោក ឌួង ងៀប ត្រូវ​បាន​ចាប់​ខ្លួន​មួយ​សប្ដាហ៍ បន្ទាប់​ពី​រូប​លោក​បានចេញ​វីដេអូ​ផ្សាយ​ផ្ទាល់​មួយ​ដោយ​បាន​ចោទ​ប្រកាន់​ចៅ​ក្រម​សាលា​ដំបូង​រាជធានី​ភ្នំពេញ​ថា​ពុក​រលួយ និង​ថា​​បាន​គាប​​សង្កត់​រូប​លោក ដោយ​ចោទ​ប្រកាន់​ថា​បាន​ឆបោក​អ្នក​វិនិយោគ​តៃ​វ៉ាន់​។​​

តាម​រយៈ​វីដេអូ​ឃ្លីប​នោះ លោក ឌួង ងៀប បាន​អំពាវ​នាវ​រក​ជំនួយពី​​លោក​នាយក​រដ្ឋ​មន្ត្រី​ ហ៊ុន សែន ដោយ​បាន​អះអាង​ថា​លោក​បាន​រងគ្រោះ​ពី​អំពើ​អយុត្តិធម៌​។​​

លោក ថ្លែង​ថា ៖ «​ខ្ញុំ​បាន​ទទួល​​ការ​ចោទ​ប្រកាន់​ដោយ​អយុត្តិ​ធម៌​ពី​សាលា​ដំបូង​រាជធានី​ភ្នំពេញ បង្វែរ​[សំណុំ​រឿង]​ពី​ស​ទៅ​ខ្មៅ​»។ «ពេល​ខ្ញុំ​ចូល​តុលាការ​ម្ដង ខ្ញុំ​យក​លុយ​ទៅ​ម្ដង…គេចែកគ្នា​ស៊ី គេចិញ្ច្រាំខ្ញុំ​គេ​ឲ្យ​ខ្ញុំ​បង់ប្រាក់​ធានា​ប្រាំលាន​ដុល្លារ​ជា​ថ្នូរ​នឹង​បាន​នៅ​ក្រៅ​ឃុំ»។​

លោក បន្ថែម​ថា៖ «​ឥឡូវ​នេះ​ខ្ញុំ​គ្មាន​លុយ​ទៀតទេ ខ្ញុំ​គ្មាន​ជម្រើស មាន​តែ​ដើរ​ចូល​គុក​ដោយ​ខ្លួន​ឯង​»។​

អ្នក​នាំ​ពាក្យ សាលា​ដំបូង​រាជធានី​ភ្នំពេញ កាលពី​ថ្ងៃទី​១០ ខែកុម្ភៈ បាន​ចេញ​សេចក្ដី​ថ្លែង​ការណ៍​មួយ ដោយ​បាន​បដិសេធ​ការ​ចោទ​ប្រកាន់​របស់​លោក ឌួង ងៀប ថាមាន​អំពើ​ពុក​រលួយ។ ប៉ុន្តែ​ក្នុង​សេចក្ដី​ថ្លែង​ការណ៍​ បាន​បញ្ជាក់​ថា​ចៅ​ក្រម​ស៊ើប​សួរ​បាន​អនុញ្ញាតឲ្យ​ជន​ជាប់​ចោទ​អាច​បង់​ប្រាក់​ធានា​ឲ្យ​នៅ​ក្រៅ​ឃុំ​ជាង​ ៥,៣​លាន​ដុល្លារ​ ប៉ុន្តែ​លោក ឌួង ងៀប មិន​បាន​បង់​ប្រាក់​ធានា​នោះទេ​។ ក្នុង​សេចក្ដី​ថ្លែង​ការណ៍ ក៏​បាន​បញ្ជាក់​ដែរ​ថា លោក ឌួង ងៀប រង​បណ្ដឹង​ពី​អ្នក​វិនិយោគ​ជន​ជាតិ​តៃវ៉ាន់​ចំនួន​ពី​រ​រូប​ពីបទ ឆបោក​ទាក់ទង​នឹង​គម្រោង​អចលនទ្រព្យ​ក្នុង​រាជធានី​ភ្នំពេញ​។​

ដូច​គ្នា​ដែរ សាលា​ដំបូង​រាជធានី​ភ្នំពេញ កាលពី​ខែ​កញ្ញា ក៏​បាន​ចេញ​លិខិត​មួយ​ទៅ​រដ្ឋ​មន្ត្រី​ក្រ​សួង​មហាផ្ទៃ លោក ស ខេង ឲ្យ​ជួយ​ស៊ើប​អង្កេតដោយ​សង្ស័យ​​លើ លោក ឌួង ងៀប ពី​រឿង​ឆបោក និង​ក្លែង​ឯកសារ​សាធារណៈ ដែល​បាន​ប្រព្រឹត្ត​កាលពី​ឆ្នាំ​២០១៨​។

លោក ឌួង ងៀប ថ្លែង​ក្នុង​វីដេអូ​ឃ្លីប ថា លោក​ធ្លាប់​ធ្វើ​ការ​ជាមួយអ្នក​វិនិយោគ​តៃវ៉ាន់​ទាំង​ពីរលើ​គម្រោង​អចលនាទ្រព្យ​ រួម​ទាំង​គម្រោង​លំនៅ​ដ្ឋាន​​នៅ​ភ្នំពេញ​ផង​ដែរ ប៉ុន្តែ​បាន​បដិសេធ​ការ​ចោទ​ប្រកាន់​ពី​បទ​ឆបោក​។​​

លោក​បន្ថែម​ថា៖ «​វា​ជា​ជម្លោះ​ក្នុង​មុខ​ជំនួញ ហើយគួរ​តែត្រូវ​ដោះ​ស្រាយ​តាមផ្លូវ​ជំនួញ»។​

ប្រព័ន្ធ​តុលាការ​នៅ​កម្ពុជា​ត្រូវបាន​គេ​ចោទ​ប្រកាន់​ជា​រឿយៗ​ថា​មាន​អំពើ​ពុក​រលួយ និង​ធ្វើ​តាម​ការ​ចង់​បាន​របស់​​បក្ស​កាន់​អំណាច។ បើ​តាម​អតីត​អ្នករាយការណ៍​ពិសេស​អង្គការ​សហប្រជា​ជាតិ​ប្រចាំ​កម្ពុជា អ្នក​ជាប់​​ឃុំ​នៅ​ទូទាំង​ប្រទេស​មាន​ជាង​មួយ​ភាគ​បី ជា​អ្នក​ជាប់​ឃុំ​បណ្ដោះ​អាសន្ន​ ខណៈ​ក្រុម​មន្ត្រី​សិទ្ធិ​មនុស្ស​ថា​តួលេខ​មាន​ជិត ៧៥​ភាគ​រយ​។​

កាល​ពី​ឆ្នាំ​ទៅ​ រដ្ឋ​មន្ត្រី​ក្រ​សួង​យុត្តិ​ធម៌​សន្យា​បង្ក្រាប​អំពើ​ពុក​រលួយ​ក្នុង​ប្រព័ន្ធ​តុលាការ​នៅ​ទូទាំង​ប្រទេស ដោយបាន​ប្រកាស​ថា​ការ​ប្រឆាំង​អំពើ​ពុក​រលួយ​ជា​គន្លឹះ​សំខាន់​សម្រាប់​យុទ្ធនាការ​សម្រាប់​ឆ្នាំ​ថ្មី​ក្នុង​ការ​សម្អាត​ការ​កក​ស្ទះ​សំណុំ​រឿង​នៅ​ក្នុង​តុលាការ​កម្ពុជា​។​​

បើ​តាម​អង្គការ​តម្លាភាព​អន្តរជាតិ​អំពី​សន្ទស្សន៍​អំពើ​ពុក​រលួយ​ឆ្នាំ​២០២១ ចេញ​ផ្សាយ​នៅ​ខែ​មករា អំពីប្រព័ន្ធ​យុត្តិធម៌​នៅកម្ពុជា​ ដោយ​ថា​កម្ពុជា ជា​ប្រទេស​ដែល​មាន​អំពើ​ពុក​រលួយ​ខ្លាំង មាន​សន្ទស្សន៍​នៅ​ក្នុង​តំបន់​ទាប​បំផុត​។​

លោក ​អំ សំអាត ​នាយករង​ទទួលបន្ទុក​កម្មវិធី​ឃ្លាំមើល​នៃអង្គការ​លីកាដូ មាន​ប្រសាសន៍​ថា​ សកម្មជន​ដី​ធ្លី សកម្មជន​បរិស្ថាន និង​សិទ្ធិ​មនុស្ស ​បច្ចុប្បន្ន​កំពុង​រង​គ្រោះ​ដោយសារ​ប្រព័ន្ធ​យុត្តិធម៌​។ លោក​បន្ត​ថា តុលាការ​ត្រូវ​តែធ្វើ​កំណែ​ទម្រង់​ដើម្បី​ឲ្យ​មាន​យុត្តិធម៌​សម្រាប់​គ្រប់​គ្នា​។​

លោកបន្ត​ថា៖ «ពួកគេ​ [សកម្មជន​] ត្រូវ​បាន​ចាប់​ខ្លួន​ និង​ឃុំ​ខ្លួន​សម្រាប់​អ្វី​ដែល​គេ​មិន​គួរ​ទទួល​នោះ​ឡើយ»។​

និយាយ​ចំពោះ​សំណុំ​រឿង លោក ឌួង ងៀប​ វិញ លោក ​អំ សំអាត ​មាន​ប្រសាសន៍​ថា​អង្គភាព​ប្រឆាំង​អំពើ​ពុក​រលួយ និង​សា្ថប័ន​ផ្សេង​ៗ​ទៀត​គួរតែស៊ើប​អង្កេត​លើ​រឿង​នេះដើម្បី​បង្ហាញពី​តម្លា​ភាព​។​

លោក​បន្ថែម​ថា៖ «សម្រាប់​ប្រព័ន្ធ​យុត្តិ​ធម៌ បើសិន​ជា​យើង​មិន​ទាន់មាន​ឯករាជ្យ​ទេ វា​នឹង​ប៉ះពាល់​ដល់​យុត្តិ​ធម៌​សង្គម មិន​ត្រឹម​តែ​អ្នក​ក្រ​ទេ អ្នក​មាន​ក៏​ដូច​គ្នា…​វា​ដើរ​តួសំខាន់​ណាស់​សម្រាប់ផ្ដល់​យុត្តិ​ធម៌​សង្គម​សម្រាប់​គ្រប់​គ្នា»

ប្រែសម្រួលពីអត្ថបទភាសាអង់គ្លេស៖ Court sends tycoon Duong Ngeap to pre-trial detention on fraud charge after claim of judicial corruption

780 views

ព័ត៌មានទាក់ទង

ព័ត៌មានថ្មី

អត្ថបទពេញនិយម